2 Куг23
1Теве Давидын пытартыш мутшо:«Тыге ойла Давид, Иессей эрге,тыге ойла кӱш нӧлталме айдеме,Иаковын Юмыжын шӱрен палемдымыжеда Израильыште мотор мурым мурышо.2Господьын Шӱлышыжӧ мыйын гоч ойла,Тудын шомакше – мыйын йылмыштем.3Израильын Юмыжо каласыш,Израильын кӱ курыкшо мылам увертарыш:”Кӧ, Юмо деч лӱдын, вуйлатен шога,еҥ-влакым чынлын вуйлата,4тудо – пуйто эрын волгыдыжо,ояр эрдене нӧлталтше кече,кудыжо йӱр деч вара шудым кушта”.5Тыгай огыл мо мыйын тукымем Юмо дене пырля?Вет Тудо мый денем курымаш ойпидышым ыштен,тудыжо – радамлен ыштыме да вашталташ лийдыме.Тудо огыл мо мылам сеҥымашым пуа,мыйын чыла шонымем шукта?6А Юмым пагалыдыме еҥ-влаклуктын кудалтыме коршаҥге гай лийыт,кудыжым кидышкат огыт нал.7Тудын деке тӱкнаш кӱртньым але тоям кучылтытда тудым тушанак йӱлалтат».8Теве Давидын эн тале сарзыже-влакын лӱмышт. Ахаман тукым гыч Исбосеф нине кум тале сарзын вуйлатышыже лийын. Ик кредалмаште тудо умдыж дене кандашшӱдӧ еҥым пытарен.9Кумыт кокла гыч вес тале сарзе – Елеазар, Ахохийын Додо эргыжын эргыже. Кунам сар дене толшо филистим-влакым кредалаш лекташ оҥарен ӱжыныт, тудо Давид дене пырля лийын.10Израильтян-шамыч тунам нунын ваштареш лектыныт, да Елеазар филистим-влакым тунар шуко пуштеден – кидше тӱҥгылген да керде пелен пижын шинчын. Господь тиде кечын кугу сеҥымашым пӧлеклен. Сарзе-шамыч Елеазар почеш колышо-влакын мо улыштым поген гына каеныт.11Кумшо тале сарзе – Гарар гыч Шамма, Аген эргыже. Кунам филистим-влак Фирийыш погыненыт – туштыжо пасун ик касалыкыштыже яшмыкпурса кушкын, – израиль сарзе-шамыч нунын деч куржыныт.12Но Шамма тиде пасу покшек шогалын, тудым арален кредалын да филистим-влакым кырен шалатен. Тунам Господь кугу сеҥымашым пӧлеклен.13Кумло вуйлатыше кокла гыч нине кум тале сарзе тӱредме жап годым Давид деке Одоллам курыкпомыш дек толыныт. Тунам филистим-влак Рефаим лапверыште стан дене шогеныт.14Давид тунам карманыште лийын, а филистим отряд – Вифлеемыште.15Давидын йӱмыжӧ шуын, да тудо каласен: «О, иктаж-кӧ Вифлеем капка воктенысе таве гыч мыланем йӱаш вӱдым конда ыле гын!»16Тунам нине кум тале сарзе филистим стан гоч шолып эртеныт, Вифлеем капка воктенысе таве гыч вӱдым коштал налыныт да Давидлан конденыт. Но Давид йӱаш тореш лийын да, Господьлан чапым пуэн, тудым йоктарен,17тыге каласен: «Тиде вӱдым йӱмӧ деч Господь мыйым аралыже! Вет тиде нине еҥ-влакын вӱрышт, нуно, шке илышыштым чаманыде, вӱдлан каеныт». Давид вӱдым йӱын огыл. Теве мом нине кум тале сарзе-влак ыштеныт.18Авесса, Иоавын шольыжо, Саруян эргыже, кум сарзын вуйлатышыже лийын. Тудо умдыж дене кумшӱдӧ еҥым пуштын. Кум тале сарзе тудым пагален.19Кум сарзе коклаште тудо эн лӱмлӧ, нунын вуйлатышышт лийын, но саде кум тале сарзе дене иктӧр шоген огыл.20Ваней, Иодай эрге, Кавцеил гыч лӱддымӧ еҥ, тыгак шке пашаж дене чапланен. Тудо Моав гыч Ариилын кок эргыжым пуштын. Тудак лум толмо кечын вӱдым погымо вынемыш волен да тушто левым пуштын.21Тудо тыгак кугу капан египтяным пуштын. Тудыжын кидыштыже умдо лийын, а Ваней ваштарешыже тоя дене лектын, кидше гыч умдым шупшын налын да тудым тиде умдо денак пуштын.22Теве мом Ваней, Иодай эрге, ыштен. Саде кум тале сарзе тудым пагален.23Кумло сарзе коклаште тудо эн лӱмлӧ лийын, но саде кум тале сарзе дене иктӧр шоген огыл. Давид тудым шке капоролжо-влакын вуйлатышыштлан шогалтен.24[Теве Давидын тале сарзыж-влакын лӱмышт.] Кумло еҥ коклаште Асаил, Иоавын шольыжо, лийын, тыгак – Вифлеем гыч Елханан, Додо эрге;25Харод гыч Шамма, Харод гычак Елика;26Фалтий гыч Хелец; Фекой гыч Ира, Иккеш эрге;27Анафоф гыч Авиезер; Хуша гыч Мебуннай;28Ахохий тукым Цалмон; Нетофа гыч Магарай;29Нетофа гычак Хелев, Ваана эрге; Вениамин мландысе Гива гыч Иттай, Рибай эрге;30Пирафон гыч Ваней; Нахле-Гааш гыч Иддай;31Арава гыч Ави-Албон; Бархюм гыч Азмавет;32Шаалбон гыч Елияхба; Яшен эрге-влак кокла гыч Ионафан;33Гарар гыч Шамма; Арар гычак Ахиам, Шарар эрге;34Мааха гыч Елифелет, Ахасбай эрге; Гило гыч Елиам, Ахитофел эрге;35Кармил гыч Хецрай; Арба гыч Паарай;36Цова гыч Игал, Нафан эрге; Гад тукым гыч Ваний;37аммон Целек; Бероф гыч Нахарай, Саруян Иоав эргыжын саргурал нумалшыже;38Итри гыч Ира, Итри гычак Гареб39да хеттей Урий. Чылаже – кумло шымыт.
Institute for Bible Translation, Finland