Wafilipi4

1Hinu walongu wa nenga, wandu ninguwapala, niwela na luhujulu na mwenga lwa kuwalola, mwenga weni kunighola nihekeleli, mwenga ndiwa wandu weni kunighola nipeghwi hupo, mwenga wapalwa wa nenga mngupalwa mgangamali kukukonganika na Bambu.
2Ninguwaluwa nesu Eudia na Sinitike, mgholi ndulumu handa walongu weni kukongana na Bambu.3Ningukuluwa mtumikila myangu mchakaka, uwatangi wadala hagha, kwaikiva waghasikili nesu pamonga na nenga kulihengu lya kutangasa Habali Maha kwa kuyangala, pamonga na Kilementi na wayangu waghangi hagha wogha mahina ghao yayandikwa kukihitabu kya ukomu.
4Hinu mhekeleli machuwa hyogha kwa kukongine na Bambu! Ninguhuyila kangi kulongela, mhekileli.
5Kila mundu awonesi unyalinyali wa mwenga. Bambu kapabehi kuhika.6Mkotoho kughasika kukindu chochosi , ila kuhyogha muweli wandu wa kumyupa na kumshukwile Sapanga kwa kila mngukipala, machuwa hyogha myupi mkiwela na moyu wa kushukwile.7Kuponga gha Sapanga ipitili malanga hyogha gha wandu itegholokela maheli mioyu na malanga gha mwenga kukukongana na Kilisito Yesu.
8Kwa kuhyomolela, walongo wa nenga, muviki mawachilo gha mwenga kumighalu hyogha yenikuwela gha chakaka na yeni kutundamilisa na yeni kupalwa na Sapanga na maha na gha kuhekelesa na hyogha yeni kuwayeghela sifwa gha maha.9Myendeleli kughola ghala mlivula na kupokela kuhuma kwa nenga, na hyogha mhyoghanilile na kulola vila niwela nikighola. Na Sapanga mweni kuwaghola mlikali kwa kuponga atewela pamonga na mwenga.
10Nihekelela nesu na kumshukwile Sapanga. Kiuchakaka machuwa hyogha muwelili mnguniwachila nesu kunitanga, ila msindilwi njila gha kuyegha mtanga kwa nenga.11Ningulonga ng'ogha nagha kwaikiva ningupala mtanga kuhuma kwa yeyosi, nenga nilivula kukwila na kila niwela nachu.12Ningumanya ndambu gha kulama paniwela ng'ogha na hindu, na hilahila paniwela na hindu ngenju. Nilivulili mighalu hyogha kuwela na njala au kuyukuta, kuwela na hindu ngenyu au kulepelelwa.13Kilisito angunipegha makakala gha kusinda mighalu hai hyogha.
14Ila mwenga mghola maha kwa kukonganika pamonga na nenga kwa kunitanga kulung'ai lwangu.15Nyongesa gha hagha, mwenga Wafilipi mngumanya yiwa lichuwa lya mtumbulo panitumbula lihengu lya kutangasa Habali Maha, paniwelile nikihuka haku Makedonia, kwahela lipinga lighangi lya weni kumkwinila Kilisito lyeni kutangana na nenga kunani gha kupegha na kupokela, ila mwenga maweni hela.16Hata paniwelile haku Tesaloniki mnitangili mihanja itangala.17Ninguhakula ng'ogha kupokela hindu kuhuma kwa mwenga ila ningupala kulola highili kuhuma kwa Sapanga zikiwahikila mwenga kwa hagha mnguyaghola kwa upalo.18Hinu, nipokela kala vindu vyogha mnipeghili hupo zitangala nesu. Niwela na kila kindu kwa vila hinaa Epafulodito kaniyeghela kala hupo zya mwenga. Hupo hazi ni handa litambiko lyeni kulunguswa lyeni manungilo maheli, na hali ni litambiko lyeni kujumilwa na kumhekelesa Sapanga.19Hinu, Sapanga wa nenga, kwa unaisa ghaki mkulu kwa njila gha Kilisito, atewapegha vindu vyogha mnguvipala.20Sapanga wa twenga hayu Tati wa twenga asifilwe machuwa hyogha bila mwihu. Hina.
21Nijambusili wandu wogha weni kukongana na Kilisito Yesu, walongo wenikuwela pamonga na nenga wanguwajambusa.22Kangi wandu wogha wa Sapanga wenikuwela baha, wanguwajambusa, nesu nesu wandu weni kumkwinila Sapanga wala weni kuwela kulighuta lya Kaisali nkosi wa Loma.
23Ningumluwa Sambanga Tati awapeghi umaha kuhuma kwa Bambu wa twenga Yesu Kilisito.

The Word for the World International

https://app.library.bible/content/6f6cca05a7913c93