1 Corinthians3
1Nhan móón adhi anó, aku vil kah chóóm praaq palơq adhi anó kơi palơq nôôq manưih đuui Chuôq, bơơi nek kơi palơq nôôq akóón manưih ti, kơi palơq nôôq akóón n'niên par-aang kalóóng Chuôq Paq Manưih.2Aku ơi đóng adhi anó ơm đơơk toh hơq eh rau chana kók, taai adhi anó kah ve chóóm đuôh. Kơi achêk hơq, patơk mơ xók ađôk adhi anó kung kah ve chóóm đuôh.3Taai adhi anó kung dyơq lóóm manưih ti. Tââq dhiq m'pơng adhi anó, nek dhiq ve lóóm rau makhinh lơq tarkaai tarvei, nek kah alua adhi anó nek lóóm manưih ti, lơq tơơt cha kơi manưih đơơi?4Tââq, xók manưih ađô praaq: “Aku mađó leq Phaau-lô,” hayơq manưih lââng: “Aku mađó ưng A-bô-lô,” nek kah alua adhi anó nek manưih đơơi?5Kơi achêk nek, A-bô-lô nek ngaai? Hayơq Phaau-lô nek ngaai? Nek nôôq dhơn ratơơq, hơq adhi anó ve lóóm huuiq tââq piđó, patơk mơ ting mak dhiq Yaang Pleng ơi patơơt đóng ting chanak.6Aku ơi choh, A-bô-lô ơi rah, bơơi Yaang Pleng têêng đóng gamak yaal.7Kơi achêk hayơq, eh rau manưih choh, kung eh rau manưih rah nek kah rauriq. Bơơi Yaang têêng đóng gamak yaal nek Yaang Pleng.8Hayơq manưih choh lơq manưih rah nek mưi, bơơi ting chanak e bâân đơơp jêên makông ađêi ting mơ rau galeh nhok ưng achak araang.9Taai nôôq yi nek nôôq parjơơk marau tarnêêng mađó leq Yaang Pleng. Adhi anó nek kalung klung ưng Yaang Pleng, dhanong đong ưng Yaang Pleng.10Ting mơ ơơn phươk liêm ưng Yaang Pleng ơi đóng leq aku, aku ơi têêng bhanơn thê kơi manưih têêng kala ragêi tarnêêng, hayơq ngaai lââng yuur kadhơng dhiq m'piing ađek. Bơơi ting chanak phaai chagơn leq kơi ađêi yuur kadhơng dhiq papiing.11Ơi kah ngaai ve chóóm bhơn mưi bhanơn lââng lơh tââq bhanơn bâân bhơn, hơq ađek nek Jê-su Chuôq Paq Manưih.12Kơi achêk hayơq, la ve ngaai kadhơng papiing bhanơn achêk palơq vaang, baak, dhơl kiiq, n'lóóng, bhơơi rang, n'drang,13nek tarnêêng ưng ting chanak e val kơi giit lơh, taai tangêi achêk e gluh pakah; tââq ađó bâân tapakah kalóóng óih; lơq chênh óih e klêêu lêi tarnêêng ưng dyóp ngaai ve harau tarnêêng parvôôiq.14La tarnêêng ưng ngaai bhiêk dyơq lóóiq, đu nek tarnêêng hơq manưih ađek ơi kadhơng, nek manưih ađek e bâân đơơp kaliim haanh;15la tarnêêng ưng ngaai bâân róh bil, nek manưih ađek e đơơp hư bil, hayơq chênh ađêi e bâân paq, bơơi ting kơi thê ngóq palơh óih.16Adhi anó kah n'nal kơi adhi anó nek đong bhanuôih ưng Yaang Pleng lơq Yaang Liêm ưng Yaang Pleng mamông kalóóng ađêi alua?17La ngaai manưih têêng pahư đong bhanuôih ưng Yaang Pleng, nek Yaang Pleng e têêng pahư manưih achêk. Taai đong bhanuôih ưng Yaang Pleng nek tabah liêm, hơq đong bhanuôih achêk nek adhi anó.18Óóq ngaai tư galơơk chachââr ađêi. La ngaai manưih kalóóng adhi anó ve ngóq kơi nek tabech galang dhiq klaang ađôk, nek manưih achêk phaai lơơi đóng ađêi val xar “manưih ngôôk” hơq đóng ve chóóm bâân val xar tabech galang.19Ơi rau tabech galang ưng manưih hóng katiêk ađôk nek rau ngôôk ngaak toom mat Yaang Pleng. Taai ve paraaq xaraq, kơi ađô: “Ađó kóóp kadhâng nôôq manưih tabech kalóóng rau galang bhriêl ưng piđó.”20Lơq vil ve xaraq:“Chuôq n'nal nôôq paraaq pakah ưng nôôq manưih tabech galang; kơi piđó nek kah rau malơơi.”21Kơi achêk hayơq, óóq ngaai pakah pajơơr dhiq akóón manưih, Taai pabhơt nek ưng adhi anó,22dhơ nek Phaau-lô, môôiq A-bô-lô, môôiq Sê-pha, dhơ nek talaang katiêk, môôiq rau parmông, môôiq rau chêt, môôiq tarnêêng xók ve, môôiq tarnêêng ravang bhral. Tabhơt maar mađó leq adhi anó,23hayơq adhi anó mađó leq Chuôq Paq Manưih, lơq Chuôq Paq Manưih mađó leq Yaang Pleng.
FAR EAST BROADCASTING COMPANY