Afisa3
Tarchi Bulus kǝthlǝm fee nawakchǝ kǝ Yahudawecha
1Kǝthlǝm ndaˈan, nggǝt Bulus, chokin chi kǝ wan pursuna i Kǝrǝsti Yesu kǝthlǝm kun fee nawakchǝ kǝ Yahudawecha.2Fǝrinchǝ kit su wa sǝkwun kusheˈtǝ mbǝr ǝnaɗi fǝri tǝ Farta, kǝthlǝm tar kaafata kǝthlǝm kun.3Ndat wa tǝmɗi ǝn kǝɗ hur sǝnaˈta mbuˈichǝ Farta wuɓtǝ kaɗatˈyan. Kǝɗ ǝnɗi tapati kǝ yari chawat.4Maa chan nggawun ǝnɗa, nowun mbahǝn sǝn hwengngǝkǝt ǝnɗi sǝndi kǝ ɗar ichiɗi nech ǝ wuɓta i Kǝrǝsti.5Mbuˈwu fee ǝnɗi nech ǝ wuɓtǝ ya kǝmɗi nafchi heshiɗi choh wa. Paɗaa ǝ nakanya pǝn fee hayang tǝmɗi Shemeta Thla Chiɗ Chiɗ kǝmɗi taatǝ kǝmsichi Kǝristi tǝ fǝ shenuˈchǝ tǝ yahti Farta.6Wuɓtǝ ǝnɗiya ndaˈan nech kǝ, tǝmɗi kusheˈtǝ ndikta thla mbinchan yi Kǝristi Yesu, ndat wa fee nawakchǝ kǝ Yahudawecha kǝ chok ndǝ kǝ fee nech sǝm kǝrsǝ mǝrta ɓukwaˈ Yahudawecha. Fen tǝ nggǝmǝn nat chokkamǝn kǝɗ tanggathlechǝ fat arta. Kǝ chok mǝn kǝ shikechǝ choktǝ paɗ, kǝ ɗǝfmichiɗiya ǝ hur Kǝrǝsti Yesu.7Chokin chǝ kǝ maafati kusheˈtǝ kwastǝ ndiktǝɗiya, tǝmɗi pafǝn i kaafati Farta thla fǝri tǝ fee, tǝmɗi alkǝtɗiˈyan nech chǝt ter tǝ nenchi.8Chǝka mǝ nakan wa nggǝt nech ngguɗyeh kaan hur nafchi Chinda. Nggǝt fǝraˈndǝ fee kaafaɗiya kǝ ɓasi kusheˈtǝ kwastǝ ndikta, kǝmɗi fee nawakchǝ kǝ Yahudawecha. Kusheˈtǝɗi pǝɗanchǝ alkǝt sǝndi nef ha.9Paɗ kǝthlǝm kǝ mbuˈani nafchǝ nat wuɓtu ǝnɗi tahsandǝ Fartǝ ha. Wuɓtǝ ǝnɗiya, Farta thla tǝnchǝ chǝkamǝ nat wuɓan kan mǝni nafcha hurata kǝ hurecha.10Kaɗatˈyan ndaˈan nech kǝ nakanya tǝmɗi nafcha fǝ fǝr kitcha, kǝ mbuˈ fee mbǝr ǝni Farta samǝn samǝn, kǝmɗi fǝ chǝt kuturakta tǝ alkicha ǝ fǝrta.11Thla nech kǝ tahastǝyan fa thla kǝ poreˈ, paɗ thla thlǝnandǝ fee kaɗ tǝmɗi Kǝrǝsti Yesu Chinmǝn.12Ə hwirˈyan, paɗ tǝmɗi fǝr kit kǝmɗiyan natmǝn tǝ alkǝt ɗǝt nduk tǝ Farta, lekǝt su wa.13Kǝthlǝm ndaˈan, mǝ yiraˈwun fa hur fǝr kit kǝthlǝm ǝnɗi naa fee chitǝ mǝɗya wa. Kǝthlǝm kun nati saa ɓahchiɗiya. Ɓahtǝɗinchiya nan chokowun ɗǝf kǝ ǝnɗi naa fee maanowun nda.14Kǝthlǝm ndaˈan, chaminchi kuruminchǝ ha ǝ pangngǝn Chinda Farta,15thla fǝranchǝ chǝka yen wira thlǝma, ǝ hulafǝrta tǝ hur heshi.16Shiyani Farta thlaˈtǝ hur wurmaktǝ maandiyan kǝ ɗǝksowun chǝ tǝ alkǝtˈyan. Kǝthlǝm kǝ chokwun tǝ alkǝt fa hur wanɗǝkaɗechˈyowun tǝmɗi Shemetˈyan.17Kǝthlǝm Kǝristi kǝ chok ha hur wanɗǝkaɗechˈyowun tǝmɗi fǝr kit. Nggǝt shitǝ paɗ yahraˈan kǝ pǝha tǝ thlaarchǝyan kaan ǝ hur wanɗǝkaɗechˈyowun.18Kǝthlǝm kǝ mbǝswun alkǝt sǝn ǝna, ɓukwaˈ tǝ nafchi Fartǝ nat. Kǝ wathlowunchǝ hǝthl mbǝrkǝta, tǝ njang kǝta, tǝ maanda, tǝ hwengkǝti yahraˈan i Kǝristi.19Paɗ kǝ sǝn wun yahraˈan tǝɗi nessi Kǝristi kǝthlǝm nggǝmǝn thla pǝɗanchǝ sǝndi nef ha. Kǝthlǝm natˈyowun ha kǝ chok kǝɗ yi Farta.20Malaman maanda kǝ chok kǝ yi Fartǝyamǝn thla tǝmɗi alkǝtˈyan ǝ hur mǝn. Mǝthlan chǝt tera paɗ mǝthlan thlǝnandǝ ichǝɗi kaɗ pǝɗanchǝ thla ha nat natmǝn shita, ndu ǝnɗi natmǝn kaɗata.21Maanda kǝmɗiyan kǝ chok hur nafchi fǝ fǝr kitcha tǝ paɗ hur Kǝristi Yesu. Thlaˈtǝ heshiɗiya, taˈkǝ yuwa heshichiɗi nech ɓat nat, kǝ kweˈkǝɗan. Kǝchok kǝɗu.The Seed Company