Filimona'a1
Nage'a
1Gootta Yessuusi Kiristoosixxee'e usuremalloke kadeenneke anee Phawuloosinaa'ninna dayyo no'oke Ximotoosinaa'n, eeyemeeke dayyo no'okeenna no'oke hujeti jaalo kadeeke Philmoona'a,2dayyo no'oxxe Afibiya'a, no'onni welti Kirsitoosike loliinke manjo kadeeke Arkiphaasi'a, iittanni mine atik giddo bukki hita'neexxe Kirsitoosito'a.3Mageno Anna no'okenaa'ninna Gootta no'oke Yessuusi Kiristoosinaa'n badhaadhikinna nage'i ha'no'a kadowwaal.Filmoonixxa Jaalallanna Amana
4Atee anxe soodachchonni qalli hiyyanno wodda, duuchchi wodda Mageno anka galateefataannen.5Tinni kaddeechchi ati Gootta Yessuusi'ni affettexxa amananna qulliyye duuchchi'a affettexxa jaalalla laqeennen.6Kiristoosi'n anfeennexxa elolla yaane duuchcha adda egendattoshsha; amana atixxa welekee qoodate'n jabaattattoshsha soodataanneni.7Anke dayyo; qulliyyetixxa qalbe atixxe hujenni hafuura adhdhiseetaxxee atixxe jaalalanaa'n lumoxxa gammashshonna dayyeeffachcho alfeennen.8Tennexxe ati assa hasissaaxxa assitattoshsha Kirsitoosinni afo'o wo'me silaat atee ajajannan.9Kaddo malee jaalallati atee kadhataa'ennen; yoona ani geerchi ta'a kinni Yessuusi Kiristoosike useremallo kadeennek ani Phawuloosi;10Usuriinke mi'ne'n hedhennexxi wengeeleti i'lenneke belto anke Anasimoosixxee atee kadhataannen.11Isi edo ati'a woyi fula'nemabaakemman; ta'a kinni ati'anna kaddoo ani'a la'o afaake manjo kade'en.12Konnee qalbe mittenni eeyyanneka isoo atiba'a hige dagaashsha asseennen.13Wengeeletee usuremeennaxxa yanna atixxa bakka ani'a ergatemaashsha isoo ifi'a gattilsonaa haseennan.14Yaane kinni ati assitattoxxe elolla yaane duuchcha atixxe eettinnite malee hunnati kaddabaashsha atee mari'achchisebe'noki mittechchonna assa hasabe'non.15Aki magaada Anaasimoos atinaa'n heenooxxe yanna'a gargar higeechchi ati isoo adhdhitettexxi duuchchi woddi'a atinni hedhaashshaten.16Ta'inni edi'a kinni isoo garbinshate kaddebaang garbi caala kadeeke eeyyemeeke dayyon. Isi ani'a eeyyemeeken; ati'a kinni maalikinna Goottikinna hitatta caala eeyyemeeken!17Yoona jaaliinsha anee uuddaattechchinni anee adhdhittatteashsha assittetexxi isoo adhdhi.18Isi atee balleesseexxi yaane hexxxeexxe kaddoole yookaan atika liqa afeedheexxe kaddoole isoo ane'n laakko'i.19Ani Phawuloosi tennee anga anxenni ati'a borreesseennen; iso'ni affeettechcho ani ati'a hiissannon; ati umo atingenninni anke kada atixxa ani ate'n haaso'a hasissabaan.20Anke dayyo tenne eloxxa yaane ani'a assitottaa Goottik atee kadhataannen. Ballo'o maganneteni Korsitoosixxee hitettexxi qalbe anxa hafuura adhdhis.21Tenne ati'a borreessennechchi ani'a ajajandattoxxa ege'neennaxxeeten. Yoona ani atee assi hiyyennexxi iimi darre assitattoxxa ege'neennen.22Tenne gadhi darre soodachcho ha'nooxxi hiissichcho alfiteenaa ha'noobaa dagonnaa halchannaxxee'e hafuura adhdhannoxxa bakka ani'a qophpheesse.Muuxamiinka Nage'a Dhaama
23Aninni welt Yessuusi Kirsitoosike usuremallo kadeeke Ephaafira ati'a nage'a shiqisa'neen.24Iittanni aninni welt huja'neekiir Maariqoosi, Arsixirokoosi, Deemaasinna Luqqaasi na'ge'a ati'a shiqinsa'neen.25Gootta Yessuus Kiristoosik badhaadhi ha'nooke Irrinni welt hedhowwaal.The Word for the World International