Heremíasi18
Múa luma adaaguti ágeidinaü lauti múa
1Aba ladimurehan Aburemei numa, lariñaga nun:2—Beiba lúbiñe nadagimeinti múa, níchuguba aban uganu bun ñein.3Aba naragachun lúbiñoun nadagimeinti múa, aba nadariruni adüga aban weru.4Weru le ladügübei oura ligía, aba lagünrinchagun lúhaburugu, ábaya ladüdüragüdüni múa ligía lun lañoundaguni deregüdayalei lunya luadigimariduni darí lun ladügüni kei labusenruni.5Ábati lariñagun Aburemei nun:6—Siñati funagia nadügün hau huguya Ísüraelina kei ladüga nadagimeinti múa le lau lumúan?7Lidan murusun oura, ánhana busén lun náhulaagun, odi nachagaragun odi nagünrinchagun aban néchani luma burí arúeihani adüganéime.8Gama lumoun anhein hígira gürigia hagía hariban, ábame móunahan naali lan abeichúni le yebe lunbei nóunahani hawagun.9Lárigiñe, ánhana busén lun nábunagun luma lun nagibedaguagüdün aban néchani o arúeihani adüganéime.10Gama lumoun anhein hadüga gürigia hagía le wuribabei, meberesen hagía lau neweridihan, ábame móunahan naali lan buiti le yebe lunbei nóunahani houn.11—Ariñagabá lubeiti houn lílana Hudá luma houn aganóutiña Herusalén, luagu nariñahare lan houn, au, le Aburemei: Neledeguña hubá; haritaguatina nabeichunün. Ígira huméi luriban üma, aranse huméi hóuserun.12Ábame hariñagun bun: “Meferidirabéi bidaani! Himei wamuti wabagaridun kei wagundan luma lun wafalaruni luriban tayumahan wanigi”.13Ligía lariñagunbei Aburemei: «Álügüdaha humá hadan néchanigu, anhein anihein lubéi aganbaali katei ítaraburiti. Adügaaña lánigu Ísüraeli aban katei wéiriti luriban!14Anihein funagia dan lagumuchagun niewe luéigiñe burí liñun luwübüri Líwanu? Lamabeiduba funagia lidili duna le ararirubei áraabugiñe?15Gama lumoun numutuniña, bulíei hamaadina, águdahatiña kupali houn búngiugu ha iyeenitiña, yuriguaaña lidan hémeri, le binadu üma, aba hafalarun üma le ibidiñewati.16Adüga hamaali hageira fulasume mageirawati, lébuname taweiridun hanigi, sun ha ásügürütiña ñéingiñe, hánhingichubei hachügü le hanufude.17Au, kei aban garabali luéigiñeti oubaü le ñéingiñe lubéi laboucha weyu, nachagaragubei Ísüraeli; néibaaguagüdübei hawéi láganiñu. Efeinba narufuda houn, mámaba nigibu, danme lachülürün luéyuri habeichún».Eledeguni lubá profeta
18Aba hariñagun:—Waranseha lun wáfaruni Heremíasi. Memegeirúnbaña fádirigu lun harufudahan woun, chu tau lun heweridihaniwa hama profetagu lun hasubudiragüdüni lererun Bungiu woun. Ru wamá lidurun lun lafarún. Madüga wamá gasu lau ni kata lídangiñe le lariñagubei.
Lafurieidun Heremíasi
19Aburemei, tenibá nun! Aganbabéi le hariñagubei náganiñu!20Lau san wuribani lafayeirúa buiti? Chigá hamaali numuaha!Haritaguabá luagu ñǘbuinhadina lan bigibugiñe lun nadimurehan luagu hafulesein, lun namuriahan buma lun badireiruni bigañi hawéi.21Gama lumoun guentó, adügabá lun hóunwegun hasaanigu lau ilamaü o tau lan eféin; lun herederun hámarigu mámariga, masaaniguga! Lun láfaraguniña sandi wügüriña, hilagua hagíame nibureinhaña wuriburugu!22Óunahaba saragu híwerutiña hawagun sódini; Aganbualá hagúarahan lau anufudei! Ladüga hachigin huyu lun hárügüdünina sétitiña sádara nubá.23Gama lumoun buguya Nabureme, subudi bumuti sun aransehani le hadügübei lun háfarunina. Ualá ferudunabani hariban, mabulieidabei hafigoun! Ábürügüdabaña bigibugiñe, béibaña lau bigañi!
Bible Society of Honduras