Timoti saro peba owera ie Pauro ro gemeiriai-ro 2 ਪੜ੍ਹੋ

Timoti saro peba owera ie Pauro ro gemeiriai-ro2

Koko se gi-iwotoi-ri Iesu ubi tanaro kisioidiro aboto

¹Nimo Iesu Keriso ro wisa tato nirimagare ti-nimiotiti-die koko se kirimowotoi aboto. Ina mo mere Timoti, owera oro aboto ibo ie koko se ba-diwotoi.²Mo ro beda owera to nitomutiti, oro ro ta-irowidirotiti urubia sirio sosoro gabo ato. Nedi karatamudiro ro oro ro na-imadetiti morobise urubia oro ro neito ba-ditamudirotiti. Ina nedi owera ro neio ro ioudo amadima-amudia-ri oro aboudo, ina neio modobo amadimo-oi-ri arua urubia kitamudiro aboto.

³Mibo, temeteme maumo ato ibo ba-dou, Iesu Keriso mea boso koroho dubu beda sosoro koroho ra ibo ba-dirohotiti.⁴Boso koroho urubia ro duriomoro tanaro aboto auna se imaragoidiro-ri pua, mabu neio ubi ie boso eputa dubu kamade kowaititi.⁵Ina ata pikisa owera ibo ie urubia hio na-orowario-dumo, neio ro korowiro sabi kiauri dubu owera kirowidiro tato, ina nedi korowarario ro nou sapuwo to wisa imade-ri pua.⁶Ina ata pikisa owera ibo ie, pari ato woko pupuwo to etio ro isioidiro-dumo, pari namabu kisuwoduti ato modobo ie kebase neio ro kiasio.⁷Timoti mo ro beda owera nemabuti maumo mea se ba-demaragoidiro. Oro ro maumo mea se nama-osora-ri oro Abera Naramu ro maumo kimaragoidiro patu nato amadi-emowapotai-ri.

⁸Oro ro Iesu Keriso ba-demaragoidirotiti. Nou Abera Godi ro pamo rido ta-gowameai-ro. Nou Deibidi nasa ie nu gu ioudo orobu-die. Nedi mea owera ro mo ro na-nimowautiti Iesu Keriso sapuwo to,⁹mo dibura abato koko tau nou mabu ato niaurititi. Mo ro urubia dubu kopia sosoro ie tu ra sairo ra seni to aise nemotohiti-rimo. Kaupoti Godi edi owera ro ata dubu ata ro modobo pua seni to kemotohiti.¹⁰Ina noudo ie Godi ro edi urubia girapoi-ro neio sapuwo to mo ro sirio mibo patu niohidirotiti. Modobo ie neio ro Iesu Keriso sapuwo to kimibiria ina wisa tato keremiro kimade, ina mea ia se korowomidiro womu tato womu tato. Nedi tanaro ro kororosioidiro sapuwo to mo ro sirio mibo patu nou ri niohidirotiti.

¹¹Nedi owera ro morobise owera ie, nimo nou mutu korowaburai ato, nou mutu ibose to anama-irowomidiro-ri.¹²Nimo pupuwo se korowotoi koko tau kiauri ato, nimo ro saiki ata eputa urubia to Iesu mutu anama-irowomidiro-ri.
Nimo ro Iesu karatio ato, nimo nou ro ibose to nama-iratio-ri.¹³Kaupoti nimo ro Iesu mau kesebo ato, nimo nou ro wisana mau isebo-ri pua, mabu nou beda sosoro ra nou karatidiai modobo pua.

Woko dubu ro Godi kamade kowaititi modobo ie

¹⁴Timoti mo ro dese to edi owera ro na-niatiti urubia oro ro neito ba-dirobidiro inaina aise ba-dimowautiti. Godi sosoro gabo ato umoro owera pupuwo to ba-dimowauti ibo, owera maumo sapuwo to keremaro arua urubia mutu ubauba tanaro ie. Keremaro urubia owera edi urubia ro na-irowidiro-dumo neio iwarebai-ri pua, ubauba kiwai ie.¹⁵Oro pupuwo ba-dasibai woko kosioidiro aboto ina noudo ie oro Godi ro nato ama-apoi-ri mea woko dubu to. Godi woko etio ro kemesioidiro ra neio siripo eremati-ri pua, urubia neio ro itamudiro-dumo morobise tuputupu gabo. Ina oro ibose idaibo tanaro nou ba-disioidirotiti.¹⁶Timoti arua urubia ro ubauba ia owera na-iwasorotiti-dumo, neio ro Godi owautiti pua. Idaibo urubia aboto aradabu mamo, mabu nou e idaibo owera to etio ro iremowautiti-dumo neio Godi aboudo musomuso oititi-dumo.¹⁷Neio edi kitamudiro owera ro na-iworohutiti-dumo, nou korobodorai ie, urubia kimibiria ubauba aise kiwai ie. Neio edi owera ro kikoni sosoro ie koiriai modobo pua. Himinase ra Piratusi ra neitiro idaibo dubu teibo ie neitiro ro imowautiti-do urubia bagea owera.¹⁸Neitiro teibo morobise gabo rido ta-garaubai-do. Neitiro ro urubia ibo itamudiro-do urubia Godi ro pamo rido ta-giwame-ro. Neitiro ro urubia idaibo owera to na-itamudirotiti-do arua urubia kimibiria tanaro ubauba imowaititi-do.

¹⁹Kaupoti Godi edi morobise kimibiria urubia ro neio kimibiria mutu koko se torowotoi. Neio idaibo sosoro ie sesere posi moto gebari neio ro owotoititi-dumo. Ina nedi posi ro nato Godi ro titi ta-giatiti ibo, ‘Abera Naramu Godi auna umoro ie nu simara urubia etio ra.’ Beda urubia ro karo ra ibo mo Abera Naramu ubi tanaro nisioidirotiti ina idaibo urubia ro modobo ie ubauba tanaro kimeseruti.

²⁰Namabu sirio dubu moto ato namabu erere ro kiamo ie, ibose nou moto ato ohona kiaremo namabu kiamo ie. Arua namabu gorodi rido gisioidiro-rimo arua siriba to ie, ina arua komapi to ie ina arua ota to ie. Gorodi ra siriba ra to edi namabu ro gisioidiro-rimo neio awawo tanaro sapuwo to iamotiti, meamea ohona neito imowititi-dumo. Arua dorogora se mereki komapi rido edi na gisioidiro-rimo ohona momoso, soro neio iaremo na ie.²¹Ina noudo ie urubia dubu ubauba aboudo marea tato na-orowai, nu gorodi mereki sosoro koi ie. Soriomu tau ato iedi mereki ro ohona neido modobo ato kiho ie. Idaibo dubu nu keremiro tarena ie. Nou ro eputa dubu ubi tanaro modobo ato kemesioidiro ie. Ibose nou modobo ta-goi meamea tanaro kisioidiro aboto.

²²Ina nou do ie Timoti, orio domere ro edi ubauba ubi tanaro sirio ro na-isioidirotiti-dumo, neio aboudo ba-dodaudiro. Abera Naramu etio ro emowabutiti-dumo morobise giropu mutu neio ro oro ia mutu modobo ie meamea tanaro binio to kiosora. Idaibo tuputupu tanaro kisioidiro, morobise tanaro kisioidiro, urubia nirimagare kimati, sirio tau miro to korowomidiro.

²³Kaupoti owera keremowameduti urubia, kimaragoidiro tato urubia, neio ro dorogora se owera katamuai ato, neio mutu aradabu mamo. Mabu oro umoro ie neio ro owera kididi ie.²⁴Oro etu ro ararasoro Abera Naramu wisa tato woko dubu to, arua urubia mutu keremaro modobo pua. Kaupoti oro ro modobo ie tanaro mea se kisioidiro imese urubia aboto. Oro ro modobo ie urubia morobise owera to kitamudiro. Ina ibose etio ro isioidiro-dumo ubauba tanaro oro aboto, serawo samo to oi mamo neio aboto.²⁵Etu ro koi ra masawe oro aboto, wisana nedi dubu ro muro owera to gi-emowameai-ri. Oro ro idaibo tanaro kisioidiro ato, etu umoro ra nedi karasaubuti kitamudiro dubu ro Godi ro gabo kemodobura ie ubauba aboudo kerewesegerai aboto morobise owera imibiria ri.²⁶Nu kimaragoidiro patu kiwameai ie, ina Satani namusu rido imese karahua ie, taie nou ro Satani edi ubi tanaro ro aise isioidiro-ri pua.