EZEKIEL37
Akui Korea Kagbolomi
1Bosate kɔrɔ̃ ɔsia me iso, ne ɔkɔ me ɔbɔrɛgu ku Bosate Siwarã ne ɔsɛra me i kagbolomi ndɛndɛ̃ ne. Kagbolomi ɔyigu akui.2Ɔkɔ me ɔsɛgu ɔkpesegu i wã ndɛ̃, ne lonya akui gbodzoo i kagbolomi karɔ̃, akui wa lobua akore.3Ɔkarɛ me sɔ, "Ɔturi awune ɔbi, akui wagbe aawo ngbã ɔwe?"Loɣɛ sɔ, "O Bosate Wɔ Nsiguso fɔ ɔnɔwɛ̃ pɛ nɣe."4Kere ne ɔɣere me sɔ, "Ɖikanya tã akui wagbe si aɣere wã sɔ: 'Minɔ Bosate itɔ̃me, akui korea!5Bosate Wɔ Nsiguso to ɔɣere akui wagbe sɔ: Loatã siwarã ɔbo i mi ame fiɛ miaba ngbã.6Nto loatã sitɔbɛ ɔmatã mi iso fiɛ loatã siturina ɔfu i mi iso ku ɔko. Nto loapia siwarã i mi ame, ne miaba ngbã. Iyɔ ne mito miatsue sɔ Mme nɖe Bosate.' "7Ne ɔso loɖikanya lɛ Bosate ɔɣere me. Ne ngbɔ ame nto loɖikanya ne, akui ipɛpɛguso silɔ ɔre ne akui ɔsakanya, ikui i ikui iso.8Lonyɔ, ne sitɔbɛ gu sosina ɔte so i akui iso, ne sosina ɔko ɔfu i wã iso ɣɛɛ siwarã iiwe i wã ame.9Kere ne ɔɣere me sɔ, "Ɖikanya tã siwarã, ɖikanya ɔturi awune ɔbi, si aɣere sɛ̃ sɔ, ' Bosate Wɔ Nsiguso sɔ: O siwarã, bɔrɛ i siwiri ina ame ba. Warã pia i mma maɖue ame, si maawe ngbã.' "10Ne ɔso loɖikanya lɛ Bosate ɔɣere me, ne siwarã ɔbo i ma ame. Maba ngbã ne maya i ma ngba iso - makpakpɛ̃dze ikuri siare loya.11Kere ne ɔɣere me sɔ, "Ɔturi awune ɔbi, akui wagbe nɖe Israel iyo ɔɖuɖu ne. Masɛ maɣɛ sɔ, 'Bo akui ɔɔkore fiɛ bo ɔriinyɔ ɔɔyu, maɔtu bo maɖi.'12Ne ɔso ɖikanya si aɣere ma sɔ, ' Bosate Wɔ Nsiguso sɔ: O wũ maturi, nto loba loabusi mi akpibiɔ fiɛ loaɖi mi lobɔrɛgu i wã ame. Loto loakpesera mi lobɔ i Israel karɔ̃ iso.13Iyɔ mi, wũ maturi to miatsue sɔ Mme nɖe Bosate, si lobusi mi akpibiɔ fiɛ lotara mi lobɔrɛgu i wã ame.14Nto loasu wũ siwarã lopia i mi ame fiɛ miawe ngbã ne nto loasɛra mi i mi mɔmɔ karɔ̃ iso. Iyɔ mito miatsue sɔ Mme Bosate loɔɖeika, fiɛ loɔbara i ne iso, Bosate loɣɛ ne.' "
Yuda Gu Israel Ɔɖe Sigarakaɖekɔ̃ Siwɛ̃
15Bosate itɔ̃me ɔba me sɔ,16"Ɔturi awune ɔbi, su kakolosɛi si atsɛrɛ asia i kã iso sɔ, 'Iɖe Yuda gu Israel mabi ma mpiagu wũ ɔkpɛ.' Iyɔ si asu kakolosɛi mama, si atsɛrɛ asia i kã iso sɔ, 'Iɖe Efrayim ɔdziri, iɖe Yosef gu Israel iyo ma mpiagu wũ ɔkpɛ.'17Sa kukolosɛi kanya si ibara ɔdziri ɔwɛ̃ sɔ maaɖe iwɛ̃ i fɔ kɔrɔ̃ ame.18"Si fɔ kaɖemabi ɔkarɛ-ɔ sɔ, 'Aito aɣere bo nnɛgbe karɔ̃ ɣɛɛ?'19Ɣere ma sɔ, ' Bosate Wɔ Nsiguso sɔ: Nto loba loasu Yosef kakolosɛi - nga mpia i Efrayim kɔrɔ̃ ame - gu Israel mabi kumele gɔ mpiagu wũ, losu losakanya gu Yuda kakolosɛi, lobara kɔ̃ kakolo ɔdziri ɔwɛ̃, ne mato maakpese mawɛ̃ i wũ kɔrɔ̃ ame.'20Mɔɛ̃ kudzirii gɔ iso ɔɔtsɛrɛ ara asia la i ma anɔmi ame21si aɣere ma sɔ, ' Bosate Wɔ Nsiguso sɔ: Nto loaɖi Israel mabi lobɔrɛgu i ngbegɔ makɛlɛ. Nto losa ma kanya lobɔrɛgu i ngbegɔ masame mapia fiɛ loakɔ ma lokpesegu ma lobɔ i ma mɔmɔ karɔ̃ iso.22Nto loabara ma kaɖe kawɛ̃ i karɔ̃ ame, i Israel abe iso. Igara ɔwɛ̃ to ɔ̃aɖe ma ɔɖuɖu iso fiɛ maisibaɖe nɖebi minyɔ kuiyikuiyi ana ɣee maisibaɣɛ ma mapia i sigarakuɖekɔ̃ kunyɔ ame.23Maisibapukutura so ku ma arapɔa gu kumiamia nyanyariã ɣee ku ma aɣɛrɛ, alasɔ nto loaɖi ma lobɔrɛgu i ma kamaisɛ i wũ iso akpi ame, ne nto loasekelera ma. Mato maaɖe wũ maturi fiɛ Mme nto loaɖe ma Ɣaa.24" 'Wũ ɔɖabo David to ɔ̃aɖe igara i ma iso, ne ma ɔɖuɖu aawe nyɔisose ɔwɛ̃. Mato maasiai wũ mmara fiɛ maamɔɛ̃ wũ asɛ̃ra mala kukaakɔ.25Mato maasɛ i karɔ̃ ga losu lotã wũ ɔɖabo Yakob ame, karɔ̃ ga iso mi mawa ɔsɛ. Ma gu ma mabi gu ma mawa to maasɛ i mmɔ ɔwi daaro fiɛ wũ ɔɖabo David to ɔ̃aɖe ma igara ɔwi daaro.26Nto loabara isobuɛ ndamu ku ma. Ito iaɖe ndamu mɛ loase ɖaa. Nto loasɛra ma fiɛ loatã maɣe masia i kukame ame, ne loasu wũ isɔrɛyo lopia i mi ndɛ̃ ɔwi daaro.27Wũ kawekɔ̃ aawegu ma. Loto loaɖe ma Ɣaa fiɛ maaɖe wũ maturi.28Iyɔ i nɖebi to miatsue sɔ Mme Bosate lobara Israel sekelee, si wũ isɔrɛyo ka ipia i ma ndɛ̃ ɔwi daaro.' "The Seed Company