الرُّؤْيَا 10 ਪੜ੍ਹੋ

الرُّؤْيَا10

المَلَاكْ والكْتَابْ الصْغِيرْ

¹ومْبَعِّدْ شُفْتْ مَلَاكْ آخِرْ قْوِيْ هَابِطْ مِالسْمَاء مَلْفُوفْ بْغِيمَة، وفُوقْ رَاسُو قَوْسْ قُزَحْ، ووِجْهُو كِيفْ الشَّمْسْ، وسَاقِيهْ كِي زُوزْ عْرُصْ نَارْ،²وفِي يِدُّو كْتَابْ صْغِيرْ مَحْلُولْ. وحَطْ سَاقُو اليْمِينْ عَالبْحَرْ واليْسَارْ عَالبَرْ.³وصَاحْ صِيحَة كْبِيرَة كَايِنُّو صِيدْ يِزْئِرْ، بَعْدْهَا تِسْمَعّْ صُوتْ الرْعُودْ السَّبْعَة.⁴ووَقْتِلِّي نَطْقُوا الرْعُودْ السَّبْعَة، حَضَّرْتْ رُوحِي بَاشْ نِكْتِبْ، يَاخِي سْمَعْتْ صُوتْ مِالسْمَاء يْقُلِّي: «مَا تِكْتِبْشْ الِّي نَطْقِتْ بِيهْ الرْعُودْ السَّبْعَة، خَلِّيهْ سِرْ».

⁵والمَلَاكْ الِّي شُفْتُو وَاقِفْ عَالبْحَرْ والبَرْ هَزْ يِدُّو اليْمِينْ لِلسْمَاء⁶وحْلِفْ بِالحَيْ لِلْأَبَدْ خَالِقْ السْمَاء ولِّي فِيهَا، والأَرْضْ ولِّي فِيهَا، والبْحَرْ ولِّي فِيهْ، وقَالْ مَا عَادِشْ فَمَّة حَتَّى مُهْلَة.⁷آمَا كِي يْجِي الوَقْتْ، ويُنْفُخْ المَلَاكْ السَّابَعْ فِي بُوقُو، وَقْتْهَا سِرْ اللَّهْ يْتِمْ، كِيمَا بَشْرُوا بِيهْ عْبِيدُو الأَنْبِيَاءْ.

⁸والصُّوتْ الِّي سْمَعْتُو مِالسْمَاء، كَلَّمْنِي مَرَّة أُخْرَى وقَالِّي: «إِمْشِي خُوذْ الكْتَابْ الصْغِيرْ المَحْلُولْ، الِّي فِي يِدْ المَلَاكْ الوَاقِفْ عَالبْحَرْ والبَرْ».⁹ومْشِيتْ لِلْمَلَاكْ وطْلَبْتْ مِنُّو بَاشْ يَعْطِينِي الكْتَابْ الصْغِيرْ، يَاخِي قَالِّي: «خُوذُو وكُولُو، بِشْ يْكُونْ مُرْ فِي مَعْدْتِكْ، آمَا حْلُوْ كِي العْسَلْ فِي فُمِّكْ!».¹⁰وخْذِيتْ الكْتَابْ الصْغِيرْ مِنْ يِدْ المَلَاكْ وكْلِيتُو، وكَانْ حْلُوْ فِي فُمِّي كِي العْسَلْ، آمَا بَعْدْمَا كْلِيتُو، مَعْدْتِي تِمْلَاتْ بِالمْرَارَة.¹¹وقَالُولِي: «لَازْمِكْ تِتْنَبَّأْ مَرَّة أُخْرَى عْلَى بَرْشَة شْعُوبْ وأُمَمْ ولُوغَاتْ ومُلُوكْ».