2 𐴃𐴞𐴔𐴡𐴥𐴃𐴞 4 ကိုဖတ်ပါ

2 𐴃𐴞𐴔𐴡𐴥𐴃𐴞4

¹𐴀𐴝𐴓𐴧𐴝𐴌𐴠 𐴐𐴝𐴥𐴙𐴑𐴧𐴝𐴃𐴢 𐴒𐴡𐴌𐴞𐴥, 𐴀𐴠𐴊𐴧𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤 𐴎𐴞𐴁𐴝𐴤 𐴁𐴝𐴀𐴣𐴐𐴧𐴝 𐴀𐴞𐴥𐴏𐴝𐴉𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴙𐴃𐴧𐴡𐴥 𐴀𐴝𐴘𐴁𐴡𐴤 𐴊𐴠 𐴀𐴡𐴑𐴃𐴡𐴥𐴃𐴢 𐴎𐴞𐴕𐴊𐴝 𐴀𐴠𐴊𐴧𐴠 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴡 𐴀𐴞𐴥𐴁𐴝𐴌𐴠 𐴐𐴝𐴥𐴙𐴑𐴧𐴝𐴃𐴢 𐴒𐴡𐴌𐴞𐴥 𐴀𐴝𐴀𐴛 𐴃𐴡𐴌𐴠𐴥 𐴈𐴡𐴌𐴝𐴒𐴡𐴌𐴞 𐴕𐴞𐴐𐴡𐴥𐴃𐴢 𐴒𐴡𐴌𐴞𐴥𐴌,²𐴀𐴝𐴓𐴧𐴝𐴌 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌; 𐴄𐴝𐴘𐴔𐴠 𐴁𐴠𐴄𐴝𐴘𐴔𐴠 𐴃𐴡𐴘𐴧𐴝𐴌 𐴃𐴝𐴥𐴑; 𐴑𐴟𐴥𐴁𐴢 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴃𐴝𐴦𐴓𐴞𐴔 𐴊𐴞 𐴔𐴝𐴕𐴟𐴥𐴙𐴐𐴡𐴌𐴠 𐴁𐴟𐴎𐴢 𐴊𐴠, 𐴀𐴟𐴥𐴣𐴐𐴞𐴘𐴝𐴌𐴞 𐴊𐴠, 𐴀𐴠𐴊𐴧𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴥𐴌.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴁𐴡𐴤, 𐴎𐴠𐴣𐴃𐴧𐴠𐴥 𐴔𐴝𐴕𐴟𐴥𐴙𐴐𐴠 𐴏𐴡𐴥𐴘𐴧𐴞 𐴃𐴝𐴦𐴓𐴞𐴔 𐴕𐴡 𐴉𐴟𐴥𐴕𐴞𐴁𐴡, 𐴁𐴡𐴥𐴓𐴑𐴠 𐴕𐴞𐴎𐴡𐴌 𐴔𐴡𐴕𐴡𐴌 𐴀𐴝𐴎𐴧𐴟 𐴔𐴡𐴎𐴞𐴕 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴓𐴧𐴝 𐴀𐴠𐴕𐴊𐴞𐴓𐴧𐴝 𐴀𐴟𐴏𐴃𐴝𐴃𐴢 𐴀𐴡𐴥𐴑𐴧𐴡𐴓𐴢 𐴊𐴡𐴓𐴝 𐴒𐴡𐴌𐴞𐴥𐴁𐴡, 𐴎𐴠𐴃𐴝𐴌𐴝𐴤 𐴀𐴞𐴥𐴃𐴝𐴌𐴝𐴃𐴧𐴟 𐴎𐴞𐴀𐴕 𐴉𐴟𐴥𐴕𐴞𐴃𐴡 𐴈𐴝𐴕 𐴀𐴟𐴣𐴃𐴝𐴌 𐴇𐴞𐴥𐴀𐴕 𐴉𐴟𐴥𐴕𐴝𐴘𐴁𐴡.⁴𐴀𐴞𐴥𐴃𐴝𐴌𐴝 𐴏𐴡𐴥𐴘𐴧𐴞𐴃𐴧𐴟 𐴕𐴞𐴎𐴡𐴌 𐴈𐴝𐴕 𐴉𐴞𐴥𐴌𐴝𐴘𐴉𐴠𐴓𐴝𐴘 𐴁𐴝𐴕𐴝𐴖𐴡𐴃𐴞 𐴑𐴞𐴏𐴧𐴝𐴤 𐴀𐴡𐴥𐴑𐴧𐴡𐴓𐴡𐴌 𐴀𐴟𐴎𐴟 𐴈𐴝𐴕 𐴊𐴞𐴁𐴡.⁵𐴔𐴡𐴕𐴃𐴡𐴌 𐴃𐴟𐴘 𐴇𐴝𐴥𐴀𐴌 𐴇𐴝𐴥𐴓𐴡𐴃𐴡𐴃𐴢 𐴕𐴞𐴎𐴡𐴌𐴠𐴥 𐴏𐴡𐴥𐴣𐴓𐴞 𐴌𐴝𐴑, 𐴊𐴟𐴑 𐴁𐴡𐴌𐴊𐴝𐴐𐴢 𐴒𐴡𐴌, 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌, 𐴀𐴠𐴊𐴧𐴠 𐴀𐴝𐴓𐴧𐴝𐴘𐴠 𐴃𐴡𐴌𐴠𐴥 𐴎𐴠 𐴎𐴞𐴔𐴧𐴝 𐴊𐴞𐴦𐴘𐴠𐴥 𐴇𐴞𐴥𐴀𐴕 𐴀𐴝𐴊𐴝𐴘 𐴒𐴡𐴌.

⁶𐴀𐴝𐴣𐴀𐴌 𐴈𐴡𐴃𐴝𐴤 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴝𐴣𐴀𐴌𐴠𐴥 𐴀𐴠𐴇𐴡𐴥𐴕 𐴌𐴡𐴐𐴢 𐴑𐴟𐴌𐴁𐴝𐴕𐴞𐴌 𐴋𐴡𐴥𐴙𐴓𐴧𐴝 𐴋𐴝𐴥𐴓𐴞𐴊𐴞𐴘𐴝 𐴎𐴝𐴌. 𐴀𐴝𐴀𐴛 𐴊𐴟𐴕𐴞𐴘𐴝𐴙𐴃𐴧𐴟 𐴎𐴝𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴀𐴘𐴒𐴞𐴘𐴡𐴘.⁷𐴀𐴝𐴀𐴛 𐴁𐴝𐴥𐴓𐴝 𐴓𐴝𐴌𐴝𐴥𐴙𐴃𐴢 𐴓𐴝𐴌𐴝𐴥𐴘 𐴒𐴡𐴙𐴅𐴧𐴞𐴥, 𐴎𐴞𐴁𐴧𐴝𐴃𐴡𐴌𐴠 𐴇𐴡𐴥𐴃𐴡𐴔 𐴒𐴡𐴙𐴅𐴧𐴞𐴥, 𐴀𐴝𐴦𐴌 𐴀𐴞𐴔𐴝𐴕𐴡𐴌𐴠 𐴄𐴞𐴑𐴝𐴘 𐴌𐴝𐴙𐴑𐴧𐴞𐴥.⁸𐴘𐴝𐴓𐴝 𐴀𐴝𐴣𐴀𐴌 𐴓𐴧𐴝 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴃𐴝𐴏𐴢 𐴎𐴡𐴔𐴝 𐴒𐴡𐴙𐴅𐴧𐴝𐴥 𐴀𐴝𐴏𐴠𐴤, 𐴎𐴞𐴁𐴝𐴤 𐴀𐴞𐴕𐴏𐴝𐴥𐴉𐴖𐴝𐴓𐴝 𐴁𐴞𐴏𐴝𐴌𐴇𐴝𐴌 𐴔𐴝𐴓𐴞𐴑𐴠 𐴀𐴞𐴥𐴁𐴝𐴌 𐴖𐴝𐴦𐴉𐴠𐴏𐴞𐴌 𐴊𐴞𐴕𐴡𐴃𐴢 𐴀𐴝𐴣𐴀𐴌𐴠𐴥 𐴊𐴞𐴦𐴁𐴡; 𐴏𐴞𐴌𐴞𐴥𐴉𐴢 𐴀𐴝𐴣𐴀𐴌𐴠𐴥 𐴕𐴡, 𐴁𐴡𐴥𐴓𐴑𐴠 𐴀𐴟𐴘𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴡𐴌𐴠 𐴘𐴡𐴥 𐴊𐴞𐴦𐴁𐴡 𐴎𐴠𐴃𐴝𐴌𐴝𐴤 𐴔𐴟𐴇𐴝𐴥𐴁𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴀𐴞𐴥𐴁𐴝𐴌 𐴀𐴝𐴀𐴌 𐴀𐴠𐴕𐴃𐴠𐴎𐴝𐴌𐴡𐴃𐴢 𐴀𐴝𐴏𐴠𐴤.

𐴑𐴠𐴏𐴧𐴟𐴥 𐴕𐴡𐴏𐴞𐴥𐴘𐴡𐴃𐴢

⁹𐴀𐴝𐴣𐴀𐴌 𐴇𐴝𐴣𐴏𐴠 𐴃𐴡𐴌𐴝𐴃𐴡𐴌𐴞 𐴀𐴝𐴘 𐴁𐴡𐴓𐴧𐴝 𐴑𐴟𐴐𐴞𐴥𐴐𐴢 𐴒𐴡𐴥𐴌.¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴠𐴥𐴔𐴝𐴏𐴠 𐴀𐴠 𐴊𐴟𐴕𐴞𐴘𐴝𐴘𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥 𐴀𐴝𐴣𐴀𐴌𐴠𐴥 𐴀𐴠𐴌𐴞𐴊𐴞𐴘𐴠𐴥. 𐴘𐴡𐴥𐴒𐴧𐴗𐴝 𐴃𐴞𐴏𐴡𐴥𐴓𐴡𐴕𐴞𐴑𐴝 𐴐𐴡𐴥𐴀𐴌𐴡𐴃𐴢 𐴒𐴞𐴦𐴘𐴠𐴥𐴒𐴡𐴘. 𐴑𐴌𐴠𐴏𐴑𐴠𐴕 𐴃𐴡 𐴒𐴝𐴓𐴝𐴃𐴞𐴥𐴘𐴝𐴃𐴢 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴃𐴞𐴃𐴟𐴏𐴢 𐴊𐴝𐴓𐴔𐴝𐴃𐴞𐴘𐴝𐴃𐴢 𐴒𐴞𐴦𐴘𐴠𐴥𐴒𐴡𐴘.¹¹𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤 𐴊𐴠 𐴏𐴞𐴌𐴞𐴥𐴉𐴢 𐴓𐴟𐴑𐴝𐴥𐴏𐴢, 𐴇𐴠𐴥𐴃𐴡𐴓𐴧𐴝 𐴔𐴝𐴌𐴑𐴟𐴏𐴡𐴌𐴠 𐴃𐴡𐴌 𐴉𐴟𐴥𐴖𐴝𐴣𐴃𐴞 𐴓𐴡𐴘𐴀𐴝𐴕𐴞𐴤𐴐𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴌𐴠 𐴀𐴝𐴣𐴀𐴌 𐴈𐴝𐴔𐴡𐴃𐴢 𐴓𐴝𐴒𐴠𐴌.¹²𐴀𐴝𐴀𐴛 𐴃𐴟𐴑𐴞𐴑𐴟𐴏𐴡𐴌𐴠 𐴀𐴞𐴥𐴉𐴞𐴏𐴝𐴏𐴡𐴃𐴢 𐴊𐴞𐴉𐴠𐴍𐴝𐴥𐴘𐴊𐴞𐴘𐴞.¹³𐴃𐴡𐴌𐴝𐴏𐴡𐴃𐴢 𐴑𐴝𐴌𐴂𐴟𐴏𐴡𐴌 𐴇𐴠𐴥𐴍𐴠 𐴀𐴝𐴀𐴛 𐴎𐴠 𐴐𐴝𐴥𐴓𐴢 𐴓𐴝𐴕 𐴀𐴠𐴌𐴞 𐴀𐴝𐴙𐴐𐴧𐴞𐴤 𐴇𐴞𐴥𐴘𐴝𐴕 𐴃𐴟𐴘 𐴀𐴝𐴘𐴃𐴠𐴤 𐴓𐴡𐴘𐴀𐴝𐴕𐴞𐴤𐴐𐴢, 𐴀𐴝𐴦𐴌 𐴑𐴞𐴃𐴝𐴁𐴢 𐴂𐴟𐴥𐴕 𐴀𐴡𐴥 𐴓𐴡𐴘𐴀𐴝𐴕𐴞𐴤𐴐𐴢, 𐴈𐴝𐴥𐴀𐴏𐴒𐴡𐴌𐴞 𐴏𐴝𐴔𐴝𐴌𐴝 𐴀𐴡𐴓𐴝 𐴒𐴟𐴥𐴕.

¹⁴𐴃𐴝𐴔𐴝𐴌 𐴈𐴝𐴔-𐴒𐴡𐴌𐴡𐴤𐴘𐴝 𐴀𐴝𐴓𐴠𐴑𐴏𐴎𐴠𐴕𐴊𐴝𐴌𐴠 𐴀𐴝𐴣𐴀𐴌 𐴁𐴡𐴀𐴗𐴃𐴢 𐴓𐴟𐴏𐴧𐴝𐴥𐴕 𐴒𐴡𐴙𐴅𐴧𐴠𐴥. 𐴔𐴝𐴓𐴞𐴑𐴠 𐴀𐴞𐴥𐴃𐴝𐴌𐴠 𐴀𐴞𐴥𐴃𐴝𐴌 𐴈𐴝𐴔 𐴔𐴡𐴎𐴞𐴕 𐴁𐴡𐴊𐴡𐴓𐴝 𐴊𐴞𐴦𐴁𐴡.¹⁵𐴃𐴟𐴘 𐴕𐴞𐴎𐴠 𐴘𐴡𐴥 𐴀𐴞𐴥𐴃𐴝𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴑𐴞𐴐𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴀𐴝𐴣𐴀𐴌𐴝𐴌 𐴃𐴡𐴁𐴡𐴓𐴞𐴑𐴡𐴌 𐴁𐴞𐴐𐴞𐴤 𐴔𐴟𐴈𐴝𐴥𐴓𐴠𐴉𐴢 𐴒𐴡𐴙𐴅𐴧𐴠𐴥.¹⁶𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴠𐴥 𐴉𐴡𐴀𐴘𐴓𐴝𐴁𐴝𐴌 𐴀𐴝𐴣𐴀𐴌 𐴏𐴡𐴥𐴉𐴝𐴘 𐴊𐴞𐴥 𐴁𐴡𐴓𐴧𐴝 𐴁𐴞𐴏𐴝𐴌𐴡𐴃𐴢 𐴃𐴟𐴓𐴝𐴤 𐴒𐴞𐴥𐴀𐴓𐴢, 𐴇𐴠𐴥𐴣𐴃𐴧𐴠 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴌 𐴏𐴝𐴥𐴀𐴣𐴃𐴢 𐴕𐴡𐴥 𐴊𐴠, 𐴁𐴡𐴥𐴓𐴑𐴠 𐴁𐴠𐴒𐴧𐴟𐴥𐴕𐴠 𐴀𐴝𐴣𐴀𐴌𐴠𐴥 𐴉𐴠𐴥𐴓𐴝𐴘 𐴒𐴞𐴀𐴓𐴒𐴡𐴘. 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌 𐴇𐴠𐴥 𐴈𐴝𐴔𐴡𐴌 𐴀𐴞𐴥𐴏𐴝𐴉𐴑𐴞𐴃𐴝𐴁𐴢 𐴕𐴡 𐴌𐴝𐴑𐴡𐴥𐴗𐴑.¹⁷𐴔𐴡𐴕𐴃𐴡𐴌 𐴔𐴝𐴓𐴞𐴑 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴃𐴝𐴦𐴑𐴡𐴃𐴢 𐴊𐴞𐴀𐴓𐴢, 𐴎𐴠𐴀𐴕𐴠 𐴀𐴝𐴣𐴀𐴌 𐴊𐴟𐴖𐴝𐴌𐴝 𐴑𐴟𐴥𐴐𐴈𐴡𐴥𐴁𐴡𐴌 𐴉𐴟𐴌𐴝𐴉𐴟𐴌𐴞 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴝𐴥 𐴀𐴡𐴥𐴘𐴎𐴝𐴒𐴡𐴘 𐴀𐴝𐴦𐴌 𐴃𐴝𐴔𐴝𐴥𐴔 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴕 𐴇𐴞𐴥𐴀𐴕 𐴉𐴟𐴥𐴕𐴠. 𐴇𐴞𐴥𐴘𐴝𐴕 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴐𐴞𐴥𐴚𐴒𐴡𐴌 𐴔𐴟𐴑𐴡𐴃𐴧𐴟 𐴁𐴝𐴏𐴝𐴘𐴧𐴠𐴥 𐴊𐴠.¹⁸𐴔𐴝𐴓𐴞𐴑𐴠 𐴀𐴝𐴣𐴀𐴌𐴠𐴥 𐴇𐴝𐴥𐴀𐴌 𐴁𐴟𐴌𐴝 𐴈𐴝𐴔𐴡𐴃𐴧𐴟 𐴁𐴝𐴏𐴝𐴘𐴁𐴡𐴥, 𐴀𐴝𐴦𐴌 𐴏𐴡𐴥𐴘𐴧𐴞-𐴏𐴡𐴥𐴓𐴝𐴔𐴡𐴃𐴠 𐴀𐴞𐴥𐴁𐴝𐴌 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴓𐴡𐴘𐴎𐴝𐴘𐴁𐴡𐴥𐴘. 𐴀𐴞𐴥𐴁𐴝𐴌 𐴃𐴝𐴦𐴌𐴞𐴉𐴢 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴇𐴝𐴥𐴔𐴞𐴐𐴝 𐴀𐴡𐴥𐴖𐴝𐴃𐴢 𐴃𐴝𐴥𐴑𐴡𐴗𐴑. 𐴀𐴝𐴦𐴔𐴞𐴕.

𐴀𐴝𐴇𐴠𐴥𐴌𐴞 𐴏𐴡𐴥𐴓𐴝𐴔

¹⁹𐴂𐴌𐴞𐴏𐴞𐴥𐴓𐴝𐴌𐴠 𐴀𐴠𐴊𐴧𐴠 𐴀𐴠𐴑𐴟𐴥𐴘𐴓𐴝 𐴌𐴠, 𐴀𐴠𐴊𐴧𐴠 𐴀𐴟𐴕𐴞𐴏𐴞𐴥𐴉𐴝𐴌𐴝𐴏𐴡𐴌 𐴒𐴡𐴥𐴌 𐴄𐴞𐴥𐴘𐴝𐴌𐴠 𐴀𐴝𐴀𐴛 𐴏𐴡𐴥𐴓𐴝𐴔 𐴊𐴞𐴥𐴘𐴞 𐴁𐴡𐴥𐴓𐴞 𐴈𐴡𐴀𐴙𐴐𐴢.²⁰𐴀𐴠𐴌𐴝𐴏𐴃𐴟𐴏𐴢 𐴑𐴡𐴥𐴌𐴞𐴕 𐴐𐴡𐴥𐴀𐴌𐴡𐴃𐴢 𐴃𐴝𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴃𐴡𐴌𐴡𐴉𐴞𐴥𐴔𐴡𐴏𐴡𐴌𐴠 𐴀𐴝𐴀𐴛 𐴔𐴞𐴓𐴠𐴃𐴟𐴏𐴢 𐴐𐴡𐴥𐴀𐴌𐴡𐴃𐴢 𐴀𐴠𐴌𐴞 𐴀𐴝𐴙𐴐𐴧𐴞𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴃𐴧𐴟 𐴀𐴡𐴐𐴟𐴥𐴑 𐴀𐴡𐴥𐴘𐴧𐴠.²¹𐴐𐴞𐴥𐴃𐴑𐴝𐴓𐴡𐴌 𐴀𐴝𐴒𐴠 𐴀𐴝𐴘 𐴁𐴡𐴓𐴧𐴝 𐴉𐴟𐴌𐴝𐴉𐴟𐴌𐴞 𐴑𐴟𐴐𐴞𐴥𐴐𐴢 𐴒𐴡𐴥𐴌. 𐴘𐴟𐴁𐴟𐴓𐴟𐴏𐴢, 𐴂𐴟𐴊𐴠𐴕𐴏𐴢, 𐴓𐴞𐴕𐴡𐴏𐴢, 𐴑𐴝𐴓𐴟𐴊𐴞𐴘𐴝, 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴠𐴥 𐴃𐴡𐴌𐴠𐴥 𐴏𐴡𐴥𐴓𐴝𐴔 𐴎𐴝𐴕𐴝𐴌.

²²𐴔𐴝𐴓𐴞𐴑 𐴃𐴡𐴌 𐴌𐴟𐴀𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴡𐴗𐴑. 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔𐴡𐴃𐴢 𐴎𐴝𐴌𐴞 𐴃𐴝𐴥𐴑𐴡𐴗𐴑.

The Word for the World International

https://app.library.bible/content/87faca8b51c22590