Efesa3
1Mau amo alefasia, Na Folo, Keliso Yesune dabalu molosia, yau idele inolo gilifea walelu amo alefasia, na dibolo lolu.2Dabalu Godehe nafea melumo, gili dubulubu. Amo ewe, Ene kanululo Ehe nafea melumo, gilifea sagamesine gadefalu.3Kegele amo ewe. Godehe Ene mugusilu muguba ufulumo, nafea ulufaba waleso. Amone na lagi ama wedino seleba ufulu.4Aufia, gili sulu ewe alegasiamo, eweguba asigimale. Na-mo Kelisone mugusilumo bisigia, na dawalolo dulu loluba hilisemale.5Saladegelu idele inolo adabia dedalelumo, ilifea Godene mugusilu amogubada ulufaba fisigaba waleluale. Aubale. Auluso, sedalele yagi, Godene Asubanefea alefasia, mugusilu amo Godene hilibaisi daalu muuba kalilu ilifeada, Ene saaba ofolo ilifeada, ulufaba fisigaba ufia labe.6Mugusilu amone elemo ewe. Awalu sulu nafulu ewefea alefasia, yau mosomu gilida, nini Isolaele galiba, domala ule ua adesia kulifia, daalo ule ua diaba yaalo alebaibu. Aufia, Keliso Yesufea alefasia, nini suniamo, kegele nini diyobafeba, oloba huliale sulu saaba ufulumo, ua osolaba diaba yaeyobafe.7Godehe na awalu sulu nafulu ewene samesi, nafea Ene kanululo balu meba ilogoso. Aufia, ehe na dabalu amo molomesi kiwigaaba ofeleso.8Godene muuba kalilu ili amone, sia ageledenomo, na lolu. Auluso, Gode alefasia, na dabalu molomesi nafea kanululo meba ilogoso. Dabalu amo ewe. Na yau idele inolofea awalu sulu nafulu saaba meyo. Amo alefasia, ilida Kelisone iminiyodoluale wasiga sauulu dobumo babiyobafe.9Aufia, Godehe Ene mugusilumo idele inolo suniane asigi sawaba walemesine, na gadefaso. Mugusilu amo, Gode kegele suniada mololu amo Ehe, fogo wedinale muguba ufiasu adabia mulu.10Godehe eweguba holobagamesi asigifia alolumo ewe. Aga Ehe sesefea alefasia, Ene dawalolone fofagelu nolobalo nolobaloba dobu amone, ulufaba waleyo hamefe. Amofea alefasia, yasiloda, wida solu ilida, anakiwine kiwigagalu usu ami alebaibu ili amohe, Godene dawalolo amo sawaba bamesi, E auba hamefe.11Asigi sisa amo Ene hamefeafia mulu. Samini waagifia, nine Saminilo Keliso Yesufea alefasia, auba moloyoba daiyalu hame amo ufiasu alolu.12Aufia, ninihe, Kelisofea asigi ule ufulu amo alefasia, nini muuba kalilu ligia, Gode Ene olegia kalugaeyomo sagilibuale. Nini Gode labea maiyone, Keliso E-mo eno labe.13Aulune, gine asigi ule ufulu ogo bonesia kiwi sanemabiyo. Higinilu na disu ewe, na gili sagoba ofelesia disu. Aulugulu, keleba asigimabiyo. Gili elalelu ligia, heafuba alebaimesine, na higinilu ewe disu.14Mau amo alefasia, na emo hugulumo sagaba sigia, Nao Godedai sulu sodo.15E-mo, hebene alebaibu sunia amoneda, helefealu alebaibu sunia amoneda, ine Enao labi, sunia Efeafia misiyone wi dilo.16Na emo hugulumo sagafia, Edai sulu selesiamo, Ehe Ene Asubanefea alefasia, Ene elalelu wasiga sauulu amifia, gine libo wasigafia, gili kiwigaaba homesi selesu.17Aufia, gine asigi ule ufulu ogo alefasia, Keliso E gine libo usu melesine, na aubada selesu. Ausimo, gili hameselo mana usu ami, i seme hele usu fedoba sebuguba, molo ikau hele usu geluguba, kiwigaaba kalugaafia alebaiyobafe.18Ausimo, gilida, muuba kalilu ili noolo suniadai, ua gegoaba ligia, Kelisone hameselomo eloba bisigia, amo asigiba diyodolu alebaiba yaeyobafe. Hameselo amone selaleda, fubada, lagoloda, ilogoloda, gili ua asigiba diaba yaeyobafe.19Ene hameselohe nine asigi wasolu amo, gili asigiba diaba yaeyobafe. Ausi, Gode Enefea wasiga sauulu iminibu amogubasu, gilifeada auba wasiga sauuyobafe.20Nini amene haalisumoda, amene asigisumoda, amone E suniaba daaba moloyodolu labe. Ene kiwigagalu amohe, nine libo usu dabalu molofe. Amone bisigia, nini koleba, Ene kiwigagalu eloyo amonemo, beabia abia samodoyodoluale loluba bosolu.21Aulune, Ene wi amo digimale!
Keliso Yesu Efea alefasiada, ene sese amofea alefasiada, nini koleba, Godene wi digibasu miliyoba. Saladegelu aselabia mulufealoda, maiyofealoda, amo suniahe aubasu, Godene wi digibasu miliyo dobu. Elalelumo, Efea alefalu miliyobafe. Amen . Amo seale koleba.
Keliso Yesu Efea alefasiada, ene sese amofea alefasiada, nini koleba, Godene wi digibasu miliyoba. Saladegelu aselabia mulufealoda, maiyofealoda, amo suniahe aubasu, Godene wi digibasu miliyo dobu. Elalelumo, Efea alefalu miliyobafe. Amen . Amo seale koleba.
Wycliffe Bible Translators, Inc.