1 Samuel24
1Saul Philistinme de gwa kela gade cailigwanglu ge, David Engedi renaamkang ga bam lie peda rangbeu.2Cidau Saul Israelme pelane kakgade reugwa yitume cangcum de ngngwa lwe David nah pe minadung de Helung bam Tsura ga peeimie.3Pa meuründung bam lampui taiga cika tsupop ge ga gwanglu. Saul cika mtak kera nlütlu. Cu David nah pe minadung tsupop lungki kecuk lebie mbai bam.4David pe minadung pe dage rangdi, “RAMPAUBE n dage rang kebeu tingba zie aide delie, ‘Ih ngauraume de n ba gage kaibeu zielie n dage rang kebeu nzwa, nang pe dage n suibe teigai lu kerane.’” Pecai David cuhlu nah zing de liahang Saul cwatie tuge dang mpetlu.5Pecai David ne Saul cwatie tu dang kedine pa pelung cang tadi.6Pa pe minadung dage rangdi, “RAMPAUBE de peu Ih a mpaube de teikeherei di kera gade acu kezeu beulo, RAMPAUBE ne keniak kelube, pecu a ba hetwa pet rezam dilu kebui gade, kedanemene, ngau kegai pecu au RAMPAUBE ne keniaklu dilu.”7Cine David pe minadungde sam aidungde le kesiugai, nah penuide peu Saul de gwaketang kera peuma. Saul cuhlwe, tsupop gade tetdi, nah pe lampui ga miedi.8Cipaucai, David cuhlwe, tsupop gade tetdi, delwe pecai Saul de qugai: “Hegwangpei a mpaubo.” Saul pecai nreu twagwa gai ge, David pecu rüt eh hangdeu ga pe zu keumie.9David Saul dage rangdi, “Daitei nang mina ‘Ainie, David ncu rezam kera peeila lie, de eh rang kecume sam pung lano?”10Henai nang n miakle ngau da dainzwa eh RAMPAUBE ncu a ba gage kaibeu bi anui tsupop ga kebam dau. Mi kangge ncu teitset lodi, ciude Ih ncu kelibeu. Ih rang, ‘Ih a mpaube dage a ba hwa gai lak; kedanemene pecu au RAMPAUBE ne keniak kelu Hegwangpei lu.’11Ainie, A pei, pielo a ba ga dai keu bam bi. N cwatie tu gade dang mpet kelu pai Ih danglu ciude ncu teitsetti ma, Ih ncu rezam mede tei keherei kera peila kemak ndu keliage, nah Ih ndage kemau tei gai dima, nang acu teitset kera peila liede.12A nai caube mau bi peu RAMPAUBE de tiak lulo, nah RAMPAUBE de peu acu saja peu de lubui nang ada ge tei gai kebam dungde ziemne, dede Ih madau gede ncu rezam dilak.13Ndaa hangkiasam rang kela de nzwa, ‘Kemaume dade kemau bata petla.’ Dede Ih au ncu rejam dilak lie.14Israelme gwangpei caude renia lano? Nang cau cai zuimie lano? Heteu tsai kedi ge cai! Tammaine ge cai!15RAMPAUBE de peu tiak zie, nah anai caube mau bi pane cet zie, nah pecu peu makie cide pie kelube teilu, nah acu gumlu, nah acu n dade kelikelube tei lulo.”16David Saul de sam aidungde marang cangdi ge, Saul rangdi, “Aide n kwa deni, a na David?” Saul hap cuhdi.17Pa David dage rangdi “Nang au a swa de masang kiee lie. Kedanemene nang keyile a ziehi teibeu, Ih n dage kemau tei gai liede.”18Nang henai daikenzwa ge nang a dade yibi kecu keulia da, kedanemene nang acu teitsetti ma, RAMPAUBE acu n ngaugia be ba kangga ge acu kai kebeu dau.19Magade mi ge pe ngauraume gede ngaulu cai, pa pecu peu rejam mezing eh tet lu zieni? RAMPAUBE de peu ncu makeyi teu samlam beulu, nang a dage henai ngaugia keulia kegai de ziemne.20Cu au, nang Israel reu hegwangpei tei kera nah n kedi kang gade Israelme hegwangram aide bam jüja kera Ih ci mci luda.21RAMPAUBE zi gade nang a leuhme dang gidi mede acai mbaibeu zielie kecu nah a pei ki gade a zi ngkap dilak lie kecu sampet beulo.22Cine David pa ciciu luzie lie kecu Saul dage pe sam pet gaibeu. Pecai Saul kilung ga gwangdi, dede David nah pe minadung penui mbaibam ga caili miedi.
Bridge Connectivity Solutions Pvt. Ltd.