Ɛfɛso5
1Nɔ, b̈ii lʉ̀ hə kəwu Nyii, ndə vâa ndə ɔ kʉ̀ʉ bɔŋ daa.2B̈ii dùʼ nə ŋkʉ̂ʉ, haʼ ndə Klai kə kʉ̀ʉ bʉʼʉ kɔ́ məchimbi-i yie bʉʼʉ, ndə i bɛ nə fɔ-fɛ̀ʼndɛŋ-jyujyu-bə, kɔkə ndə yɔ̂ʼkə-i lùŋ bʉ̀ʉ daa tʉ Nyii.3Bɔŋ kə bə mə yʉ́ bəsəŋ, ntɛ-kənu nyàatəŋwɔŋ təmiyɔŋ leʼnə ntɔmə mu bii fɛ, ndə i kʉ̀ʼnə ndə məbɛ mu bʉə-Nyii fɛ.4Kə bə məyʉ́ kwə́ʼ nyàatə ŋwɔŋ, byuunɔ kwə́ʼ bənɔ̌ʼɔ byuunɔ mbɛʼnə bənɔ̌ʼɔ mu bii fɛ, bii nɔ kie ndə mə-kə́-kɔ́ bə ndɔ tʉ Nyii.5B̈ii kə́ kínə mbɔ wotəmiyɔŋ ndə ɔ bɛ ŋgaa bəsəŋ, kə́ nyàatə ŋwɔŋ-ɛŋ, kə́ chìi ntɔmə nɔ bɛ nə wo ndə ɔ tʉʼ gháa bənyii kədɔŋ. Ɔ kie yəŋkə ntoʼ Klai ghɔŋbə Nyii fɛ.6Kə bii mə mɛ̀ʼtə wo fə́ʼhə bii nə kwə́ʼ njʉnjʉ fɛ, bʉʼka nubə-ɔ̄ŋ, tʉʉbʉə-Nyii bu shíʼ ndəŋ bʉə ndə bɔ̂ŋ gòʼ təmə kə́ yʉ́ chu-i fɛ.7Nɔ, kə a mə fúu nuɔ bii bɔŋ fɛ.8Bii nɔ nə fəŋ bɛ njəŋkə vɛʼbɛʼ, bɔŋ nduɔ ndə bii bɛ bʉə-Tiekətʉ nɔ, bii nɔ bɛ kɛʼɛ, nuʼ-yii kie ndə mədʉ̀ʼ.9Mbʉ kɛʼɛ ndə i bɛ mu bii nɔ kie ndə mə-kə́-dʉ̀ʼ ŋwɔŋ-ɛŋ haʼ ndəŋ nubə ndə i bɛ jyujyu, kə́ bɛ kʉ̀ʼnə bɔŋleʼ kə́ bɛ shʉəŋ,10kə́ kɔ̀ɔtə ndə mətyúutə nukə ndə i bu kɔ́ tʉʉjyu tʉ Tiekətʉ.11Kə bii mə kɔ́ ghɔkə-ii ndə nu-mu-kənjəŋ-bə ndə i mə kwáa fɛ, b̈ii kə́ kɛ̀ʼ, kɛ̀ʼ.12Bʉʼka i nɔ bɛ nu-kətʉ-vyíinə-bə ndə mə-kə́-fʉ̀ʼtə nubə ndə bɔ̂ŋ tʉʼ chìi mu kənjəŋ.13Ndʉʉ ndə nukə təmiyɔŋ gwè mu kɛʼɛ, i dʉ̀ʼ ŋkɛŋ kənu ndə i bɛ yɔŋ,14bʉʼka fɔkə təmiyɔŋ ndə i gwè hə mu kɛʼɛ nɔʼ bɛ kɛʼɛ. Nɔ bɛ yɔŋ ndə bə kə nyɔ̀ʼ mbɔ,“B̈ii gwùʼtə mbɛŋhə, bii ndə bii tʉʼ bɛ́ŋbɛ́ŋ,bii ndə bii nɔʼ kwú b̈ii lɔ̀ hə sêKlai bu báa ndəŋ bii.”15B̈ii láa le ndə ntɛhə ndə bii tʉʼ chìi nubə, kə bii mə kə́ chí mbi ndə bənɔ̌ʼɔ fɛ, b̈ii kə́ chí nə bʉə ndaa.16Kaʼ bii kie fia ndə məchìi nukə b̈ii chìi jyujyu bʉʼka mbi nɔʼ byʉ́ʼ.17Ndʉʉmɛ, kə bii mə bɛ bənɔ̌ʼɔ fɛ, b̈ii bɔŋ kə́ kínə nukə ndə Tiekətʉ kʉ̀ʉ.18Kə bii mə búu nə ndʉʼmə fɛ, bʉʼka mbɔ i bu chìi bii chìi nubə ndə i bu bʉ́əhə bii, bɔŋ b̈ii mɛ̀ʼtə jyʉ́ʉhə bə L̈yʉʉhəNyiikə jyʉ́ʉhə bii.19B̈ii yùɔ ntɛ-təlyuu-Nyii-hə ndə Dɛbi kə yùɔ tʉ bəbɛʼbʉə bɔŋleʼ kə́ yùɔ ibɛʼ-yə ntɛ-təlyuu-hə ndə i gwè hə kəghɔ-LyʉʉhəNyiikə bɔŋleʼ bʉ̂ʼtə fɔbə ndə mələ̀ʼtə Tiekətʉ nə fyiihə-ii inchəŋ,20kə́ kɔ́ ndɔ ndə nubə inchəŋ təvɛʼtəvɛʼ tʉ Nyii mbʉ Tie yie-Tiekətʉ-yʉʼʉ Jiso Klai.21B̈ii kə́ ké ŋwɔŋtə-ii tʉ bəbɛʼbʉə, kə́ fàa bə Klai.22Bəke, b̈ii ké ŋwɔŋ-yii tʉ bələŋ-bii, fi nə bii tʉʼ nʉ̀ʉ sê bəshʉ Tiekətʉ.23Bʉʼka woləŋ nɔ tʉʼ gìe kətʉ vi-i, haʼ ndə Klai tʉʼ gìe kətʉ chɔshi, ndə i bɛ mbʉə-e, mbəŋ-ɛŋ kə́ bɛ Ŋkwaa-ɛ.24Nduɔ ndə chɔshi tʉʼ yʉ́ kəghɔ-Klai nɔ, bəke ghɔ nɔ kie ndə məké ŋwɔŋtə-ʉə tʉ bələŋ-bʉə ndə nubə inchəŋ.25Bələŋ, b̈ii kʉ̀ʉ bəke-bii, haʼ ndə Klai kə kʉ̀ʉ chɔshi tə kwú yie-ɔ.26Ɔ nɔ nə chìi ɔ, mbɔ ɔ bɛ ŋkʉʉ, ndə ɔ kə sʉ̀ ɔ nə muu ndə ɔ fí ndə bɛ ŋgieNyiikə.27Jiso nɔ chìi yɔ̄ŋ-yə mbɔ chɔshi chʉʼ bʉ̀ʉ shʉ-ɔ, təmə kie kwɔtəkə mbʉə-ɔ ghɔŋbə shʉ núʼtə fɛ, byuunɔ ntɛ-kənu ndə maa-yɔ̄ŋ fɛ, mbɔ ɔ chʉʼ bɛ ŋkʉʉ təmə bə mə kie nukə ndə məgìe kətʉ-ɔ fɛ.28Nɔ bɛ haʼ nɔ, bələŋ nɔ kie ndə məkʉ̀ʉ bəke-bʉə haʼ ndə bɔ̂ŋ kʉ̀ʉ mbʉəhə-ʉə. Wo ndə ɔ kʉ̀ʉ vi-i, nɔ kʉ̀ʉ ŋwɔŋ-ɛŋ.29Bʉʼka wo kaa ghɔ ndə ɔ bàa mbɔʼ-mbʉə-e fɛ, ɔ̃ nɔ yúʼ ɔ bɔŋleʼ lɛ́nə ɔŋ haʼ ndə Klai chìi tʉ chɔshi.30Bʉʼka bʉʼʉ bənchəŋ nɔ bɛ yəŋ-mbʉə-bə-i.31“Bʉʼka luu-ɔ̄, woləŋ nɔ kie ndə məmɛ̀ʼtə tie-e ghɔŋbə ŋkwê-i gɛ̀ tùonə ghɔŋ vi-i, mbʉ b̈ʉə bəbûu chʉʼ bɛ mbyu mbʉə imɔʼ.”32Ŋguu shʉ́əshʉ́ə nɔ ghɔ ndə bə kɛ̀ʼ ndə yəŋkə-ɔ̄ŋ, mɔ kə́ ghɔ̀ŋ mbɔ i nɔ bɛ te Klai ghɔŋbə chɔshi.33Buŋ ndə nɔ, ẅotəmiyɔŋ mu bii kʉ̀ʉ vi-i ndə ɔ kʉ̀ʉ ŋwɔŋ-ɛŋ, mbʉ woke-ghɔ̄ nɔ kie ndə məbú ləŋ-ɛŋ.
Wycliffe Bible Translators, Inc.