ອ່ານ 𐴘𐴡𐴇𐴝𐴥𐴕𐴧𐴝 16

𐴘𐴡𐴇𐴝𐴥𐴕𐴧𐴝16

¹”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴃𐴝𐴤 𐴀𐴞𐴀𐴕 𐴀𐴠𐴃𐴡𐴓𐴧𐴝𐴤 𐴈𐴡𐴘𐴧𐴞𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕𐴡𐴃𐴧𐴟 𐴕𐴡 𐴎𐴡𐴦𐴒𐴡𐴥𐴘.²𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴧𐴟 𐴕𐴠𐴦𐴓𐴝𐴘𐴊𐴞𐴁𐴡; 𐴀𐴡𐴥𐴘, 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴧𐴠𐴤𐴌, 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴌𐴞𐴉𐴠𐴥𐴓𐴠 𐴀𐴞𐴥𐴃𐴠 𐴄𐴝𐴥𐴀𐴌𐴞𐴁𐴡 𐴊𐴠, 𐴀𐴞𐴥𐴃𐴠 𐴀𐴝𐴓𐴧𐴝𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴠𐴥𐴌 𐴁𐴡𐴥𐴓𐴞.³𐴀𐴞𐴥𐴃𐴝𐴌𐴝 𐴇𐴠𐴥𐴕𐴊𐴞𐴓𐴧𐴝 𐴇𐴞𐴥𐴀𐴕 𐴀𐴠𐴃𐴡𐴓𐴧𐴝𐴤 𐴒𐴡𐴌𐴞𐴥𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴕𐴡 𐴁𐴝𐴉𐴡𐴌𐴠 𐴏𐴞𐴕𐴧𐴠𐴥 𐴀𐴝𐴦𐴌 𐴕𐴡 𐴀𐴝𐴣𐴀𐴌𐴠𐴥 𐴏𐴞𐴕𐴧𐴠𐴥.⁴𐴓𐴠𐴑𐴞𐴕 𐴇𐴞𐴥𐴀𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴧𐴞𐴥 𐴊𐴠, 𐴎𐴠𐴀𐴕𐴠 𐴇𐴞𐴥𐴀𐴕𐴡𐴌 𐴀𐴡𐴑𐴃𐴡𐴥 𐴀𐴝𐴘𐴓𐴠𐴤 𐴃𐴟𐴣𐴀𐴝𐴥𐴌𐴝𐴃𐴧𐴟 𐴔𐴡𐴕𐴡𐴃𐴢 𐴀𐴟𐴍𐴠𐴤 𐴊𐴠 𐴑𐴞, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴈𐴡𐴀𐴘𐴢 𐴌𐴝𐴥𐴙𐴑𐴧𐴞. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴀𐴘𐴓𐴝 𐴓𐴡𐴥𐴃𐴞 𐴇𐴞𐴥𐴀𐴕 𐴕𐴡𐴥 𐴈𐴡𐴀𐴘𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴝𐴔.

𐴂𐴝𐴑-𐴌𐴟𐴀𐴌 𐴈𐴝𐴔

⁵”𐴔𐴡𐴕𐴃𐴡𐴌 𐴘𐴝𐴓𐴝 𐴀𐴝𐴀𐴛 𐴀𐴟𐴁𐴝𐴤𐴌 𐴇𐴠𐴥𐴍𐴠 𐴎𐴝𐴙𐴌𐴒𐴡𐴥𐴘 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴠 𐴀𐴝𐴣𐴀𐴃𐴧𐴟 𐴉𐴟𐴏𐴝𐴥𐴌 𐴕𐴡 𐴒𐴡𐴌𐴡𐴤𐴌 𐴊𐴠, ’𐴃𐴟𐴀𐴛 𐴇𐴡𐴍𐴠𐴥 𐴎𐴡𐴀𐴌𐴒𐴡𐴘 𐴊𐴠𐴥؟‘⁶𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴀𐴕 𐴈𐴡𐴘𐴧𐴞𐴥 𐴊𐴠 𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴉𐴠𐴌𐴠𐴐𐴝𐴕𐴞𐴘𐴠 𐴁𐴡𐴥𐴌𐴞𐴒𐴞𐴘𐴡𐴘.⁷𐴓𐴠𐴑𐴞𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴝𐴥𐴘𐴊𐴝𐴓𐴧𐴝 𐴎𐴝𐴙𐴌𐴒𐴡𐴥𐴘 𐴊𐴠; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴀𐴝𐴀𐴛 𐴕𐴡 𐴎𐴝𐴘𐴒𐴡𐴥𐴘, 𐴇𐴠𐴥 𐴔𐴡𐴊𐴡𐴃𐴒𐴝𐴥𐴌 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴕𐴟 𐴀𐴝𐴘𐴁𐴡𐴤; 𐴔𐴡𐴕𐴃𐴡𐴌 𐴀𐴝𐴀𐴛 𐴎𐴝𐴘𐴓𐴠𐴥𐴒𐴡𐴘, 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴟𐴔.⁸𐴀𐴝𐴦𐴌 𐴀𐴞𐴥𐴁𐴝 𐴎𐴠𐴣𐴃𐴧𐴠𐴥 𐴀𐴝𐴘𐴁𐴡𐴤, 𐴊𐴟𐴕𐴞𐴘𐴝𐴘𐴌𐴠 𐴒𐴟𐴕𐴝𐴤𐴌, 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴀𐴠𐴊𐴧𐴠 𐴁𐴞𐴏𐴝𐴌𐴡𐴌 𐴁𐴝𐴦𐴁𐴟𐴃𐴠 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴝𐴘𐴁𐴡.⁹𐴒𐴟𐴕𐴝𐴤𐴌 𐴁𐴝𐴦𐴁𐴟𐴃𐴠 𐴄𐴡𐴥𐴀𐴌𐴝𐴘𐴁𐴡 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴠𐴤;¹⁰𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴁𐴝𐴦𐴁𐴟𐴃𐴠 𐴄𐴡𐴥𐴀𐴌𐴝𐴘𐴁𐴡 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴀𐴝𐴀𐴛 𐴁𐴝𐴉𐴡𐴌 𐴇𐴠𐴥𐴍𐴠 𐴎𐴝𐴙𐴌𐴒𐴡𐴥𐴘 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴝𐴌 𐴕𐴡 𐴊𐴠𐴑𐴞𐴥𐴁𐴝;¹¹𐴁𐴞𐴏𐴝𐴌𐴡𐴌 𐴁𐴝𐴦𐴁𐴟𐴃𐴠 𐴄𐴡𐴥𐴀𐴌𐴝𐴘𐴁𐴡 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴊𐴟𐴕𐴞𐴘𐴝𐴙𐴌 𐴏𐴡𐴥𐴊𐴧𐴝𐴌𐴡𐴌 𐴁𐴞𐴏𐴝𐴌 𐴀𐴡𐴥𐴘𐴒𐴞𐴘𐴡𐴘.

¹²”𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴁𐴝𐴥𐴌 𐴀𐴝𐴌𐴡𐴤 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴝𐴥.¹³𐴓𐴠𐴑𐴞𐴕 𐴎𐴠𐴣𐴃𐴧𐴠𐴥 𐴀𐴟𐴁𐴝𐴤, 𐴘𐴝𐴥𐴕𐴞 𐴏𐴡𐴥𐴘𐴧𐴞𐴌 𐴌𐴟𐴀 𐴀𐴝𐴘𐴁𐴡𐴤, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴉𐴟𐴌𐴝 𐴏𐴡𐴥𐴘𐴧𐴞𐴌 𐴌𐴝𐴏𐴃𐴝 𐴊𐴝𐴈𐴝𐴤𐴘𐴁𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴕𐴞𐴎𐴡𐴌 𐴃𐴡𐴌𐴉𐴡𐴥𐴃𐴧𐴟 𐴑𐴠𐴏𐴧𐴟𐴥 𐴈𐴡𐴘𐴁𐴡𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴎𐴞𐴀𐴕 𐴉𐴟𐴥𐴕𐴠 𐴇𐴞𐴥𐴀𐴕 𐴁𐴠 𐴈𐴡𐴘𐴁𐴡𐴤, 𐴀𐴝𐴦𐴌 𐴎𐴞𐴀𐴕 𐴀𐴡𐴥𐴘𐴁𐴡 𐴊𐴠 𐴀𐴝𐴏𐴠𐴤 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌𐴠 𐴎𐴝𐴕𐴝𐴘𐴊𐴞𐴁𐴡.¹⁴𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴒𐴟𐴥𐴕 𐴓𐴡𐴦𐴘𐴢 𐴃𐴟𐴣𐴀𐴝𐴥𐴌𐴝𐴌𐴠 𐴎𐴝𐴕𐴝𐴘𐴊𐴞𐴁𐴡; 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴒𐴡𐴌𐴞𐴥𐴁𐴡.¹⁵𐴁𐴝𐴉𐴡𐴃𐴧𐴟 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴃𐴡 𐴀𐴝𐴣𐴀𐴌; 𐴇𐴠𐴥𐴃𐴡𐴓𐴧𐴝 𐴈𐴡𐴘𐴧𐴞𐴥 𐴊𐴠, 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴒𐴟𐴥𐴕 𐴓𐴡𐴦𐴘𐴢 𐴃𐴟𐴣𐴀𐴝𐴥𐴌𐴝𐴌𐴠 𐴎𐴝𐴕𐴝𐴘𐴊𐴞𐴁𐴡.“

𐴉𐴠𐴌𐴠𐴐𐴝𐴕𐴞 𐴑𐴟𐴥𐴐𐴞𐴃𐴢 𐴁𐴡𐴊𐴡𐴓𐴞𐴎𐴝𐴘𐴁𐴡𐴥𐴘

¹⁶”𐴇𐴡𐴃𐴟𐴥𐴕 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴝𐴌 𐴕𐴡 𐴊𐴠𐴑𐴞𐴥𐴁𐴝, 𐴀𐴝𐴦𐴌 𐴀𐴝𐴁𐴝𐴌 𐴇𐴡𐴃𐴟𐴥𐴕 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴊𐴠𐴑𐴞𐴥𐴁𐴝.“

¹⁷𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴌 𐴇𐴡𐴦𐴎𐴧𐴡𐴕 𐴐𐴝𐴥𐴌𐴞𐴃𐴠 𐴀𐴝𐴉𐴡𐴤𐴏𐴡𐴃𐴢 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴀𐴝𐴣𐴀𐴌𐴝𐴌𐴠 𐴀𐴞𐴀𐴕 𐴑𐴞𐴦 𐴈𐴡𐴀𐴌, ’𐴇𐴡𐴃𐴟𐴥𐴕 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴝𐴌 𐴕𐴡 𐴊𐴠𐴑𐴞𐴥𐴁𐴝, 𐴀𐴝𐴦𐴌 𐴀𐴝𐴁𐴝𐴌 𐴇𐴡𐴃𐴟𐴥𐴕 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴊𐴠𐴑𐴞𐴥𐴁𐴝‘؟ 𐴀𐴝𐴌𐴡𐴤 𐴈𐴡𐴀𐴌 𐴊𐴠, ’𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴁𐴝𐴉𐴡𐴌 𐴇𐴠𐴥𐴍𐴠 𐴎𐴝𐴙𐴌𐴒𐴡𐴥𐴘؟‘“¹⁸𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴘𐴠 𐴎𐴞𐴘𐴝𐴥𐴕 ’𐴇𐴡𐴃𐴟𐴥𐴕 𐴀𐴡𐴌‘𐴈𐴡𐴃𐴝𐴤 𐴈𐴡𐴀𐴌 𐴇𐴞𐴥𐴘𐴝𐴕 𐴑𐴞𐴦؟ 𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞 𐴀𐴞𐴁𐴝𐴤𐴘𐴠 𐴑𐴞𐴘𐴡𐴥𐴌 𐴈𐴡𐴃𐴝𐴤 𐴈𐴡𐴀𐴌.“

¹⁹𐴀𐴞𐴏𐴝𐴤𐴘𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥 𐴊𐴠, 𐴀𐴞𐴥𐴃𐴝𐴌𐴝𐴃𐴧𐴟 𐴀𐴞𐴥𐴁𐴝𐴌𐴠 𐴏𐴟𐴥𐴖𐴝𐴓𐴢 𐴒𐴡𐴙𐴃𐴧𐴡𐴥 𐴔𐴡𐴕𐴠𐴈𐴡𐴀𐴌, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴝𐴉𐴡𐴤𐴏𐴡𐴃𐴢 𐴀𐴝𐴣𐴀𐴌 𐴈𐴡𐴃𐴝𐴤 𐴘𐴝𐴀𐴕𐴡𐴌 𐴁𐴝𐴦𐴁𐴟𐴃𐴠 𐴈𐴡𐴖𐴝𐴤𐴇𐴡𐴘 𐴒𐴡𐴌𐴡𐴤𐴌 𐴊𐴠 𐴕𐴠𐴥, 𐴎𐴞𐴘𐴝𐴥𐴕 𐴀𐴝𐴀𐴛 𐴈𐴡𐴘𐴧𐴞𐴥 𐴊𐴠, ’𐴇𐴡𐴃𐴟𐴥𐴕 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴝𐴌 𐴕𐴡 𐴊𐴠𐴑𐴞𐴥𐴁𐴝, 𐴀𐴝𐴦𐴌 𐴀𐴝𐴁𐴝𐴌 𐴇𐴡𐴃𐴟𐴥𐴕 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴊𐴠𐴑𐴞𐴥𐴁𐴝؟‘²⁰𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴈𐴝𐴣𐴊𐴞𐴁𐴝𐴥 𐴀𐴠𐴊𐴧𐴠 𐴁𐴞𐴓𐴝𐴑 𐴒𐴡𐴌𐴞𐴥𐴁𐴝, 𐴔𐴡𐴕𐴃𐴡𐴌 𐴊𐴟𐴕𐴞𐴘𐴝𐴘𐴧𐴠 𐴑𐴟𐴥𐴐𐴞 𐴒𐴡𐴌𐴞𐴥𐴁𐴡. 𐴃𐴟𐴣𐴀𐴝𐴥𐴌𐴝 𐴉𐴠𐴌𐴠𐴐𐴝𐴕 𐴀𐴡𐴥𐴘𐴁𐴝, 𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝𐴌 𐴉𐴠𐴌𐴠𐴐𐴝𐴕𐴞 𐴑𐴟𐴥𐴐𐴞𐴃𐴢 𐴁𐴡𐴊𐴡𐴓𐴞𐴎𐴝𐴘𐴁𐴡𐴥𐴘.²¹𐴎𐴠𐴣𐴃𐴧𐴠𐴥 𐴇𐴡𐴕𐴡𐴤 𐴔𐴝𐴘𐴝𐴉𐴟𐴖𐴝𐴘𐴠 𐴉𐴟𐴖𐴝 𐴎𐴡𐴌𐴔𐴡 𐴊𐴠 𐴇𐴠𐴥𐴣𐴃𐴧𐴠 𐴃𐴡 𐴊𐴟𐴑 𐴉𐴝𐴦, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴌 𐴊𐴟𐴑 𐴉𐴝𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴙𐴐𐴧𐴠𐴥; 𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴉𐴟𐴖𐴝 𐴇𐴝𐴥𐴓𐴝𐴏𐴢 𐴀𐴡𐴥𐴘𐴎𐴝𐴒𐴡𐴘, 𐴊𐴟𐴕𐴞𐴘𐴝𐴙𐴃𐴢 𐴀𐴠𐴒𐴧𐴗𐴝𐴤 𐴉𐴟𐴖𐴝 𐴉𐴡𐴘𐴊𐴝 𐴀𐴡𐴥𐴘𐴧𐴠 𐴊𐴠 𐴑𐴟𐴥𐴐𐴞𐴘𐴠 𐴇𐴠𐴥 𐴊𐴟𐴑𐴡𐴌𐴠 𐴀𐴝𐴌 𐴔𐴡𐴕𐴡𐴃𐴢 𐴕𐴡 𐴌𐴝𐴑𐴠𐴥.²²𐴇𐴠𐴥𐴕𐴊𐴞𐴓𐴧𐴝, 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴘𐴝𐴓𐴝 𐴉𐴠𐴌𐴠𐴐𐴝𐴕𐴞𐴃𐴢 𐴀𐴝𐴏𐴡𐴤; 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴓𐴧𐴡𐴥𐴘 𐴀𐴝𐴀𐴛 𐴀𐴝𐴁𐴝𐴌 𐴔𐴞𐴓𐴞𐴘𐴟𐴥𐴔, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴑𐴟𐴥𐴐𐴞 𐴀𐴡𐴥𐴘𐴁𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴑𐴟𐴥𐴐𐴞𐴌𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴕𐴡𐴤𐴑𐴞𐴘𐴠 𐴓𐴡𐴦𐴘𐴢 𐴕𐴡 𐴉𐴠𐴓𐴝𐴘𐴁𐴡.²³𐴇𐴠𐴥 𐴊𐴞𐴕 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴃𐴧𐴟 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴉𐴟𐴏𐴝𐴥𐴌 𐴒𐴡𐴌𐴞𐴥𐴁𐴝 𐴊𐴠 𐴕𐴝𐴥𐴘. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴕𐴝𐴔𐴠 𐴁𐴝𐴉𐴡𐴃𐴧𐴟 𐴑𐴠𐴏𐴧𐴟𐴥 𐴔𐴝𐴒𐴡, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴊𐴞𐴦𐴁𐴡.²⁴𐴀𐴝𐴙𐴅𐴧𐴡𐴤 𐴉𐴡𐴙𐴅𐴧𐴡𐴕𐴃𐴡 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴕𐴝𐴔𐴠 𐴑𐴠𐴏𐴧𐴟𐴥 𐴔𐴝𐴙𐴒𐴧𐴡𐴥 𐴊𐴠 𐴕𐴝𐴥𐴘. 𐴔𐴝𐴒𐴡, 𐴃𐴟𐴣𐴀𐴝𐴥𐴌𐴝 𐴉𐴝𐴘𐴁𐴝, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴑𐴟𐴥𐴐𐴞 𐴉𐴟𐴌𐴝 𐴀𐴡𐴥𐴘𐴎𐴝𐴒𐴡𐴘.

𐴀𐴝𐴀𐴛 𐴊𐴟𐴕𐴞𐴘𐴝𐴘𐴌𐴠 𐴎𐴞𐴃𐴞 𐴀𐴝𐴙𐴐𐴧𐴞𐴤

²⁵”𐴈𐴡𐴃𐴝𐴤 𐴀𐴞𐴀𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴔𐴠𐴀𐴏𐴝𐴓𐴢 𐴊𐴞𐴥 𐴁𐴠 𐴈𐴡𐴘𐴧𐴞𐴥, 𐴓𐴠𐴑𐴞𐴕 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴧𐴠𐴤𐴌, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴔𐴠𐴀𐴏𐴝𐴓𐴢 𐴊𐴞𐴥 𐴀𐴝𐴌 𐴕𐴡 𐴈𐴡𐴘𐴧𐴟𐴥𐴔, 𐴁𐴡𐴥𐴓𐴑𐴠 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴉𐴡𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴟𐴥𐴔.²⁶𐴇𐴠𐴥 𐴊𐴞𐴕 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴕𐴝𐴔𐴠 𐴔𐴝𐴒𐴞𐴁𐴝𐴥; 𐴀𐴝𐴦𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴀𐴕 𐴕𐴡 𐴈𐴡𐴀𐴙𐴌 𐴊𐴠, 𐴀𐴝𐴀𐴛 𐴁𐴝𐴉𐴡𐴌 𐴇𐴝𐴣𐴏𐴠 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴌𐴡𐴏𐴢 𐴒𐴡𐴙𐴅𐴧𐴟𐴥𐴔.²⁷𐴁𐴝𐴉𐴢 𐴕𐴞𐴎𐴠 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴡𐴥 𐴀𐴝𐴦𐴌 𐴁𐴞𐴐𐴧𐴝𐴥𐴐𐴢 𐴒𐴡𐴙𐴅𐴧𐴡𐴥 𐴊𐴠, 𐴀𐴝𐴀𐴛 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴙𐴐𐴧𐴞𐴤 𐴊𐴠.²⁸𐴀𐴝𐴀𐴛 𐴁𐴝𐴉𐴡𐴌 𐴈𐴠𐴥𐴕𐴃𐴟 𐴀𐴝𐴀𐴘𐴢 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴀𐴝𐴙𐴐𐴧𐴞𐴤; 𐴀𐴝𐴁𐴝𐴌 𐴀𐴝𐴀𐴛 𐴀𐴠 𐴊𐴟𐴕𐴞𐴘𐴝𐴘 𐴀𐴠𐴌𐴞 𐴁𐴝𐴉𐴡𐴌 𐴇𐴠𐴥𐴍𐴠 𐴎𐴝𐴙𐴌𐴒𐴡𐴥𐴘.“

²⁹𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴘𐴝𐴓𐴝 𐴃𐴟𐴀𐴛 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴈𐴡𐴀𐴌, 𐴇𐴡𐴕𐴡𐴤 𐴔𐴠𐴀𐴏𐴝𐴓𐴢 𐴊𐴞𐴥 𐴕𐴡.³⁰𐴘𐴝𐴓𐴝 𐴀𐴝𐴣𐴀𐴌𐴝 𐴎𐴝𐴕𐴞 𐴉𐴝𐴙𐴅𐴧𐴞𐴥 𐴊𐴠, 𐴃𐴟𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴕𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴣𐴃𐴧𐴟 𐴇𐴡𐴕𐴡𐴤𐴑𐴞𐴘𐴠 𐴏𐴟𐴥𐴖𐴝𐴓𐴢 𐴒𐴡𐴌𐴞𐴥𐴁𐴝𐴌 𐴎𐴡𐴌𐴟𐴌 𐴕𐴝𐴥𐴘; 𐴇𐴞𐴥𐴘𐴝𐴕𐴠 𐴀𐴝𐴣𐴀𐴌𐴝 𐴁𐴞𐴐𐴧𐴝𐴥𐴐𐴢 𐴒𐴡𐴌𐴞𐴥 𐴊𐴠, 𐴃𐴟𐴀𐴛 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴙𐴐𐴧𐴡𐴥 𐴊𐴠.“

³¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴘𐴝𐴓𐴝 𐴁𐴞𐴐𐴧𐴝𐴥𐴐𐴢 𐴒𐴡𐴌𐴡𐴤 𐴕𐴠𐴥؟³²𐴏𐴡𐴀, 𐴀𐴠𐴀𐴕 𐴀𐴡𐴑𐴃𐴡𐴥 𐴀𐴝𐴘𐴧𐴠𐴤𐴌, 𐴁𐴠𐴐𐴡𐴥𐴑 𐴀𐴝𐴀𐴘𐴒𐴞𐴘𐴡𐴘, 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴊𐴡𐴌𐴁𐴡𐴊𐴡𐴌 𐴀𐴡𐴥𐴘 𐴎𐴝𐴌-𐴎𐴝𐴌 𐴎𐴝𐴒𐴝𐴃𐴢 𐴃𐴠𐴦-𐴃𐴠𐴦 𐴎𐴝𐴘𐴁𐴝𐴒𐴡𐴥𐴘, 𐴀𐴝𐴦𐴌 𐴀𐴝𐴣𐴀𐴌𐴠𐴥 𐴇𐴝𐴥𐴓𐴞𐴒𐴝 𐴀𐴠𐴌𐴞𐴁𐴝𐴥. 𐴃𐴡𐴀 𐴀𐴝𐴀𐴛 𐴇𐴝𐴥𐴓𐴞𐴒𐴝 𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴝𐴉𐴢 𐴃𐴡 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤.

³³”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴃𐴝𐴤 𐴀𐴞𐴀𐴕 𐴀𐴠𐴃𐴡𐴓𐴧𐴝𐴤 𐴈𐴡𐴘𐴧𐴞𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴐𐴝𐴥𐴕𐴃𐴞 𐴉𐴡𐴦. 𐴊𐴟𐴕𐴞𐴘𐴝𐴙𐴃𐴢 𐴔𐴝𐴎𐴠𐴥 𐴃𐴟𐴣𐴀𐴝𐴥𐴌𐴝 𐴊𐴟𐴑-𐴔𐴡𐴏𐴞𐴁𐴡𐴃𐴡𐴃𐴢 𐴃𐴝𐴥𐴑𐴞𐴁𐴝; 𐴔𐴡𐴕𐴃𐴡𐴌 𐴇𐴞𐴥𐴔𐴧𐴡𐴃𐴢 𐴕𐴝 𐴇𐴝𐴥𐴌𐴝𐴘𐴧𐴡, 𐴀𐴝𐴀𐴛 𐴊𐴟𐴕𐴞𐴘𐴝𐴘𐴌𐴠 𐴎𐴞𐴃𐴞 𐴀𐴝𐴙𐴐𐴧𐴞𐴤.“

The Word for the World International

https://app.library.bible/content/87faca8b51c22590