Шотл9
1Египет мланде гыч кайымеке, кокымшо ийын икымше тылзыжын Синай ир мландыште Господь Моисейлан каласен:2«Тек израиль эрге-влак палемдыме жапыште Кугечым пайремлат.3Икымше тылзын латнылымше кечынже кастене, шке жапыштыже, Кугечым чыла пунчал ден йӱла почеш эртарыза».4Моисей израиль эрге-влаклан Кугечым пайремлаш кӱштен.5Икымше тылзын латнылымше кечынже кастене Синай ир мландыште нуно Кугечым эртареныт. Кузе Господь Моисейлан кӱштен, израильтян-влак чылажымат тыгак ыштеныт.6Нунын коклаште южо еҥже колышо кап деке тӱкнымылан кӧра ару огыл лийыныт, садлан нуно тиде кечын Кугечым эртарен кертын огытыл. Тунам нуно Моисей ден Аарон деке миеныт7да каласеныт: «Колышо кап деке тӱкнымӧ дене ме ару огыл улына. Палемдыме жапыште моло израиль калык дене пырля ме Господьлан надырым конден огына керт мо?»8«Шогыза, мый Господь деч пален налам – мом Тудо тендан шотышто ышташ кӱшта», – вашештен нунылан Моисей.9Господь Моисейлан каласен:10«Израиль эрге-влаклан ойло – иктаж-кӧ тендан кокла гыч але йоча-уныкада кокла гыч, колышо кап деке тӱкнен, ару огыл лийын, але тиде жапыште тора корнышто лийын гын, тудат Господьын Кугечыжым пайремлышаш.11Тек тыгай еҥ кокымшо тылзын латнылымше кечынже кастене Кугечым пайремла, тек кугече пачам тудо шергинде да кочо шудо-влак дене кочкеш.12Тек пача деч эр марте нимомат огыт кодо да лужым огыт пудырто, Кугечым эртарыме чыла пунчалым шуктат.13А кӧ ару улеш да [тора] корнышто огыл, но Кугечым ок пайремле – тыгай еҥ шке калыкше кокла гыч кораҥдыме лийшаш. Вет тудо Господьлан надырым шке жапыштыже конден огыл: шке сулыкшылан тудо мутым кучышаш.14Тендан коклаште илыше йотъеҥынат Господьын Кугечыжым пайремлаш кумылжо лектеш гын, тудо Кугечым эртарыме чыла пунчал ден йӱлам шуктышаш. А нуно чылалан икгай улыт – тендан калык гыч лекше еҥланат, йотъеҥланат».15Скинийым – ойпидыш скинийым – шогалтымеке, тудым пыл леведын, а кас гыч эр марте скиний ӱмбалне тул семын койын.16Тыге эре лийын: [кечывалым] скинийым пыл, а йӱдым тул гай койшо леведын.17Кунам пыл скиний деч кӱшкӧ нӧлталтын, Израиль калык корныш тарванен, а тудын шогалме верешыже нуно шке станыштым шогалтеныт.18Господьын кӱштымыж почеш нуно корныш тарваненыт, Господьын кӱштымыж почеш чарнен шогалыныт. Кунам пыл скиний ӱмбалне шоген, калыкат шке верыштыжак лийын.19Пыл скиний ӱмбалне кужу жап шоген гын, израиль эрге-влакат, Господьын кӱштымыжым колыштын, вер гычышт тарванен огытыл.20Южгунам пыл скиний ӱмбалне икмыняр кече веле шоген. Израиль эрге-влак Господьын кӱштымыж почеш шогалыныт да Господьын кӱштымыж почеш корныш тарваненыт.21Южгунам пыл ик йӱдлан веле шогалын, а кунам тудо эрдене нӧлталтын – калыкат корныш тарванен. Пыл кеч кечывалым але йӱдым нӧлталтын гынат, нуно тунамак корныш тарваненыт.22Скиний ӱмбалне пыл кок кечылан але тылзылан, але икмыняр кечылан кодын гын, тунам израиль калыкат верыштыжак шоген, корныш тарванен огыл. Кунам пыл нӧлталтын, калыкат тарванен.23Господьын кӱштымыж почеш нуно шогалыныт, Господьын кӱштымыж почеш корныш тарваненыт. Тыге нуно Господьын Моисей гоч кӱштымыжым шуктеныт.
Institute for Bible Translation, Finland