Езд7
1Чыла тидын деч вара Персий кугыжа Артаксерксын кугыжаланымыж годым Ездра, Сераий эрге – Сераий Азарийын эргыже, Азарий Хелкийын эргыже,2Хелкий Шаллумын эргыже, Шаллум Садокын эргыже, Садок Ахитувын эргыже,3Ахитув Амарийын эргыже, Амарий Азарийын эргыже, Азарий Мераиофын эргыже,4Мераиоф Зерахийын эргыже, Зерахий Уззийын эргыже, Уззий Буккийын эргыже,5Буккий Авишуйын эргыже, Авишуй Финеесын эргыже, Финеес Елеазарын эргыже, а Елеазар кугу иерей Ааронын эргыже лийыныт –6Вавилон гыч лектын. Тудо закон туныктышо лийын, Израильын Господь Юмыжын пуымо Моисейын законжым сайын пален. Ездра ӱмбалне Господь Юмыжын кидше лийын, сандене кугыжа тудлан мом йодмыжым чыла пуэн.7Тудын дене пырля Иерусалимыш каяш моло израиль еҥат лектыныт, тыгак икмыняр иерей ден левит, мурызо, капка орол ден храм полышкалыше каеныт. Тиде Артаксерксын шымше ий кугыжаланымыж годым лийын.8Ездра Иерусалимыш тиде кугыжан шымше ий вуйлатымыж годым визымше тылзын толын.9Вавилон гыч тудо корныш икымше тылзын икымше кечынже тарванен улмаш, а Иерусалимыш визымше тылзын икымше кечынже толын шуын. Тудын ӱмбалне Юмын поро кидше лийын,10вет Ездра шкенжым пӱтынек Господьын законжым тунемме, тудым шуктымо, Израиль калыкым законысо пунчал ден устав-влаклан туныктымо пашалан пуэн улмаш.11Артаксеркс кугыжа иерей да закон туныктышо Ездралан, Господьын Израильлан пуымо кӱштымаш ден пунчалже-влакым сайын палыше еҥлан, серышым пуэн. Туштыжо теве мом возымо улмаш:12«Артаксеркс, кугыжа-влакын кугыжашт – иерей Ездралан, кавасе Юмын законжым сайын палыше еҥлан. Тыныс лийже.13Мый тыгай кӱштымашым пуэм: кугыжанышыштем Израиль калык гыч улшо кажне еҥ, тыгак иерей ден левит – кӧ тый денет пырля Иерусалимыш кайынеже, – тек каят.14Кугыжа да тудын каҥашым пуышо шым еҥже тыйым Иуда мландыш да Иерусалимыш колтат. Тушто Юметын законжым – тый тудым сайын палет – кузе шуктен шогымым рашемде,15тыгак тушко ший ден шӧртньым наҥгай. Тудым кугыжа да тудын каҥашым пуышыжо-влак Израильын Юмыжлан пуэныт, Тудыжын илыме верже – Иерусалимыште.16Пеленет тыгак пӱтынь Вавилон кундемыште погымо ший ден шӧртнетым, калыкын да иерей-влакын Иерусалимыште улшо Юмыштын пӧртшылан шке кумылын пуымо пӧлекыштым нал.17Тиде окса дене вигак ӱшкыж, тага да пача-влакым, нунын дене пырля пуышаш кинде надыр ден йошкар арака надырым нал да чыла тидым Иерусалимыште улшо Юмыдан пӧртшын жертвенникешыже надырлан кондо.18Кодшо ший ден шӧртньым иза-шольыч-влак дене пырля шке шонымыда семын, Юмыдан кумылжо дене келшышын кучылтса.19Тылат кучыктымо чыла ате-ӱзгарым, кудым Юметын пӧртыштыжӧ служитлаш пуымо, Иерусалимысе Юмын чурий ончыкшо шынде.20Юметын пӧртшылан мом эше кӱлешанлан шотлет, кугыжан поянлыкым аралыме верже гыч налын кертат.21Мый, Артаксеркс кугыжа, эҥер вес велысе казначей-влаклан кӱштымашым пуэм: мом иерей Ездра, кавасе Юмын законжым сайын палыше еҥ, йодеш – тунамак чыла пуыза.22Шийым – шӱдӧ талант марте, шыдаҥым – шӱдӧ кор марте, йошкар аракам – шӱдӧ бат марте, олив ӱйым – шӱдӧ бат марте, а шинчалым шотлыде пуыза.23Кавасе Юмын шыдыже кугыжаныш, кугыжа да эргыж-влак ӱмбаке ынже ылыж манын, кавасе Юмо мом ышташ кӱшта, Тудын пӧртшылан чыла шуктымо лийже. [Шекланыза, Юмын пӧртлан зияным нигӧ ынже кондо].24Тидымат палыза: нигӧ деч, кӧмыт Юмын пӧртыштӧ служитлат – тиде иерей але левит, мурызо але капка орол, храм полышкалыше лийже – нимогай налогым, йозакым, лӱмоксам ида нал.25А тый, Ездра, шке Юметын пуымо мунлылыкшо почеш вуйлатыше ден судья-влакым шогалте. Тек нуно эҥер вес велне улшо калык коклаште, кӧмыт тыйын Юметын законжым палат, судитлыме пашам шуктен шогат. А кӧмыт огыт пале, нуным туныктыза.26Кӧ тыйын Юметын законжым да кугыжан законжым ок шукто, тыгай еҥ тунамак судитлыме лийшаш: тудым пуштман але поктен колтыман, але погыжым шупшын налман, але казаматыш петырыман».27Моктымо лийже Господь, мемнан ача-кочана-влакын Юмыжо! Иерусалимыште улшо Господьын пӧртшым сӧрастараш Тудо кугыжан шӱмжым кумылаҥден,28кугыжалан, тудын каҥашым пуышыжо да кугу тӧраже-влаклан мый декем поро кумылым пуэн! Господьын кидше пеленем лийын, сандене мый кумылаҥынам, пеленем наҥгаяшлан Израиль он-влакым погенам.
Institute for Bible Translation, Finland