2 Куг24
1Израильтян-влаклан Господьын шыдыже угыч ылыжын. Тудо нунын ваштареш Давидым таратен да тыгай кӱштымашым пуэн: «Кай, Израиль ден Иуда калыкым шотлен лек».2Кугыжа Иоав сарзывуйжылан каласен: «Дан гыч Вирсавий марте Израильын [да Иудан] чыла тукым мландышт гоч эрте да, мыланем калыкын чотшым палаш манын, тудым шотлен лук».3Иоав кугыжалан каласен: «Тек Господь, тыйын Юмет, калык чотым шӱдӧ пачаш шукемда, да тек тидым кугыжа озамын шинчаже ужеш. Но молан мыйын кугыжа озам тидым ыштынеже?»4Но кугыжан шомакше Иоав ден сарзывуй-влакын мутышт деч виянрак лийын. Иоав ден сарзывуй-шамыч, кугыжа деч лектын, Израиль калыкым шотлаш каеныт.5Иорданым вончымеке, нуно Ароереш, Гад лапверыште верланыше олан кечывалвел могырыштыжо, шогалыныт. Вара Иазер олашке каеныт.6Тушечын Галаадыш да Тахтим-Ходши мландыш толыныт. Тушечын Дан-Яаныш каеныт да Сидон велке савырненыт.7Вара Тир карман деке миен шуыныт, евей ден хананей-влакын чыла олашт гоч эртеныт да мучашлан Иуда мландын кечывалвекыже, Вирсавийыш, лектыныт.8Тыге нуно уло мланде мучко эртеныт да индеш тылзат коло кече гыч Иерусалимыш пӧртылыныт.9Иоав мыняр еҥым шотлен лукмо чотым кугыжалан увертарен. Сарзылан йӧрышӧ, кердым нумалше пӧръеҥ-влакын чотышт Израильыште кандашшӱдӧ тӱжем, а Иудан вичшӱдӧ тӱжем лийын.10Калыкым шотлен лукмо деч вара Давидын шӱмжылан кочын чучын. Тудо Господьлан каласен: «Тыге ыштен, мый кугу сулыкыш пуренам. Кызыт, Господь, Тыйым йодам – кудалте тарзетын титакшым, вет мый ораде семын ыштенам».11Кунам Давид вес кечын эрдене кынелын, пророк Гадлан, Давидын ончыкужшыжлан, Господьын шомакше лийын:12«Кай, Давидлан каласе, тыге Господь ойла: ”Мый тыланет кум тӱрлӧ орлыкым темлем. Кудыжым ойырен налат – тый денет тыге ыштем”».13Гад Давид деке толын да увертарен: «Ойырен нал: мландыштет шым ий шужымаш лиеш але тушманет-влак тыйым кум тылзе поктылаш, а тый нунын деч куржталаш тӱҥалат, але мландыштет шучко чер кум кече озаланаш тӱҥалеш? Шоналте да ойырен нал – мыйым Колтышылан могай вашмутым пуаш».14Давид Гадлан каласен: «Мылам пеш неле. Тек мый Господьын кидышкыже логалам, вет Тудын порылыкшо кугу. Еҥ-влакын кидышкышт гына логалаш огыл ыле». [Давид шучко черым ойырен налын. Тунам шыдаҥ тӱредме жап лийын.]15Господь Израиль ӱмбак шучко черым колтен. Тиде эр гыч тӱҥалын, тудо палемдыме жап марте шуйнен. [Калык коклаште чер шарлен,] да Дан гыч Вирсавий марте шымле тӱжем еҥ колен.16Иерусалимым пытараш манын, [Юмын] Суксыжо шке кидшым ола ӱмбак шуялтен. Но Господь орлыкым колтымыжлан ӧкынен да калыкым пытарыше Суксылан каласен: «Сита! Кидет кораҥде!» Господьын Суксыжо тунам иевусей Орнан идымже тураште лийын.17Калыкым пытарыше Суксым ужмеке, Давид Господьлан каласен: «Тиде мый сулыкыш пуренам, мый, [кӱтӱчӧ,] осалым ыштенам! А нине шорык-влакше мо дене титакан улыт? Тек Тыйын кидет мыйын ӱмбакем да мыйын тукымем ӱмбак савырна».18Тудо кечын Гад Давид деке толын да каласен: «Кай, иевусей Орнан идымыштыже Господьлан жертвенникым шогалте».19Господьын кӱштымыжӧ да [пророк] Гадын шомакше почеш Давид каен.20Тудын деке кугыжа ден тарзыж-влакын толмыштым ужмеке, Орна нунын ваштарешышт лектын да Давидлан вуйжым мланде марте савен.21Орна йодын: «Молан мыйын кугыжа озам шке тарзыж деке толын?» Давид вашештен: «Тыйын идымет налаш. Калыкым пытарымаш чарныже манын, тушан мый Господьлан жертвенникым шогалтем».22Орна Давидлан каласен: «Тек мыйын кугыжа озам чыла мо кӱлешым налеш да тидым надырлан конда. Теве йӱлалтен пуаш ӱшкыж-влак, а шийме оҥа ден омыта-шамыч пулан каят.23Кугыжа, чыла тидым Орна тылат пуа». Вара ешарен: «Тек Господь Юмет тый декет поро лиеш!»24Но кугыжа Орналан каласен: «Уке, мыняр шога – мый тылат тӱлем. Господь Юмемлан мый яра налме надырым ом кондо». Давид идым ден ӱшкыж-влакым витле сикль шийлан налын.25Тушан Давид Господьлан жертвенникым чоҥен да йӱлалтен пуымо надыр ден татулык надырым конден. [Жертвенник изи лийынат, варажым тудым Соломон кугемден.] Израиль верч кумалмым Господь колын, да калыкым пытарымаш чарнен.
Institute for Bible Translation, Finland