ເຢເຣມີຢາ43
1ເມື່ອເຢເຣມີຢາໄດ້ບອກປະຊາຊົນເຖິງຖ້ອຍຄຳທັງໝົດຂອງພຣະເຈົ້າຢາເວ ພຣະເຈົ້າຂອງພວກເຂົາຄື ທຸກຢ່າງທີ່ພຣະເຈົ້າຢາເວໄດ້ໃຊ້ລາວເພື່ອບອກພວກເຂົາຈົບແລ້ວ2ອາຊາຣີຢາລູກຊາຍຂອງໂຮຊາອີຢາ, ໂຢຮານານລູກຊາຍຂອງກາເຣຢາ ແລະ ພວກຄົນທີ່ຈອງຫອງທັງໝົດກໍໄດ້ເວົ້າກັບເຢເຣມີຢາວ່າ, “ເຈົ້າກຳລັງຕົວະ! ພຣະເຈົ້າຢາເວ ພຣະເຈົ້າຂອງພວກເຮົາບໍ່ໄດ້ໃຊ້ເຈົ້າມາກ່າວວ່າ, ‘ພວກເຈົ້າຕ້ອງບໍ່ໄປທີ່ເອຢິບເພື່ອຕັ້ງຖິ່ນຖານຢູ່ທີ່ນັ້ນ’.3ແຕ່ບາຣຸກລູກຊາຍຂອງເນຣີຢາກໍາລັງຍຸຍົງເຈົ້າໃຫ້ຕໍ່ສູ້ພວກເຮົາ ເພື່ອມອບພວກເຮົາໄວ້ກັບຊາວບາບີໂລນ, ພວກເຂົາຈະຂ້າພວກເຮົາ ຫລື ຈັບພວກເຮົາໄປເປັນຊະເລີຍທີ່ບາບີໂລນ”.4ດັ່ງນັ້ນ ໂຢຮານານລູກຊາຍຂອງກາເຣຢາ, ນາຍທະຫານກອງທັບທັງໝົດ ແລະ ປະຊາຊົນທັງໝົດຈຶ່ງບໍ່ເຊື່ອຟັງຄຳສັ່ງຂອງພຣະເຈົ້າຢາເວໃຫ້ອາໄສຢູ່ໃນດິນແດນຢູດາຍ.5ແຕ່ໂຢຮານານລູກຊາຍຂອງກາເຣຢາ, ນາຍທະຫານກອງທັບທັງໝົດທີ່ໄດ້ພາປະຊາຊົນທີ່ຍັງເຫລືອທັງໝົດຂອງຢູດາຍທີ່ໄດ້ກັບມາອາໄສຢູ່ໃນດິນແດນຢູດາຍມາຈາກຊົນຊາດຕ່າງໆທີ່ພວກເຂົາໄດ້ກະຈັດກະຈາຍໄປນັ້ນ.6ພວກເຂົາຍັງໄດ້ພາທຸກຄົນທີ່ເນບູຊາຣາດານ ຜູ້ບັນຊາການທະຫານເຝົ້າຍາມໄດ້ປະໄວ້ໃຫ້ຢູ່ກັບເກດາລີຢາລູກຊາຍຂອງອາຮີກໍາ, ຫລານຊາຍຂອງຊາຟານມີດັ່ງນີ້: ຜູ້ຊາຍ, ແມ່ຍິງ, ເດັກນ້ອຍ ແລະ ລູກສາວຂອງກະສັດ. ພວກເຂົາໄດ້ເອົາຜູ້ທຳນວາຍເຢເຣມີຢາ ແລະ ບາຣຸກລູກຊາຍຂອງເນຣີຢາໄປນໍາພວກເຂົາດ້ວຍ.7ດັ່ງນັ້ນ ພວກເຂົາໄດ້ເຂົ້າໄປໃນເອຢິບໂດຍການບໍ່ເຊື່ອຟັງຄຳສັ່ງຂອງພຣະເຈົ້າຢາເວ ແລ້ວກໍມາຈົນເຖິງຕາປັນເຮັດໃນດິນແດນເອຢິບ.8ຖ້ອຍຄຳຂອງພຣະເຈົ້າຢາເວໄດ້ມາເຖິງເຢເຣມີຢາໃນຕາປັນເຮັດວ່າ:9“ຕໍ່ໜ້າຊາວຢິວທັງໝົດ, ຈົ່ງເອົາຫີນໃຫຍ່ໆບາງກ້ອນ ແລະ ມາຝັງພວກມັນໄວ້ໃນກ້ອນດິນຈີ່ທີ່ທາງເຂົ້າວັງຂອງຟາໂຣໃນຕາປັນເຮັດ.10ແລ້ວຈົ່ງກ່າວກັບພວກເຂົາວ່າ, ‘ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່, ພຣະເຈົ້າແຫ່ງອິດສະຣາເອນກ່າວດັ່ງນີ້ວ່າ: ເຮົາຈະສົ່ງກະສັດເນບູກາດເນັດຊາແຫ່ງບາບີໂລນ ຜູ້ຮັບໃຊ້ຂອງເຮົາມາ ແລະ ເຮົາຈະຕັ້ງບັນລັງຂອງລາວເທິງກ້ອນຫີນເຫລົ່ານີ້ທີ່ເຮົາໄດ້ຝັງໄວ້ບ່ອນນີ້; ລາວຈະຂະຫຍາຍຜ້າເຕັນແຫ່ງກະສັດເທິງກ້ອນຫີນເຫລົ່ານີ້.11ລາວຈະມາໂຈມຕີເອຢິບ, ຈະນຳຄວາມຕາຍມາສູ່ຜູ້ທີ່ຖືກກຳນົດໃຫ້ຕາຍ, ຜູ້ທີ່ຖືກກຳນົດໃຫ້ເປັນຊະເລີຍກໍຈະເປັນຊະເລີຍ, ຜູ້ທີ່ຖືກກຳນົດໃຫ້ຕາຍດ້ວຍດາບກໍຈະຕາຍດ້ວຍດາບ.12ລາວ ຈະຈູດໄຟເຜົາວິຫານຂອງບັນດາພະແຫ່ງເອຢິບ; ລາວຈະເຜົາວິຫານຕ່າງໆຂອງພວກເຂົາ ແລະ ຈະເອົາບັນດາພະຕ່າງໆຂອງພວກເຂົາໄປ. ຄົນລ້ຽງແກະເກັບໂຕຫມັດອອກຈາກເຄື່ອງນຸ່ງຂອງຕົນໃຫ້ສະອາດຢ່າງໃດ, ສະນັ້ນ ລາວຈະເກັບເອຢິບໃຫ້ສະອາດເໝືອນກັນຢ່າງນັ້ນ ແລະ ກໍຈາກໄປ.13ຢູ່ທີ່ນັ້ນລາວຈະຖອນເສົາສັກສິດຕ່າງໆໃນວິຫານຂອງພະແສງຕາເວັນ ລົງໃນເອຢິບ ແລະ ຈະຈູດວິຫານຕ່າງໆຂອງບັນດາພະແຫ່ງເອຢິບຖິ້ມເສຍ’ ”.
Biblica, Inc.