Colossians3
1Tîrơ̆ gư̆n, dilah oh mi rôh lŏ sŏng dî lơh jîng wăl băl î Yang Dŏng-Klàs, gừn jôi jăt cĕ lơ̆gay jơno ăm cŭngsî trồ, anẵu Yang Dŏng-Klàs ndăng nggui đah ma Yang Tơm Trồ.2Ăn cĕ nùs-kơlôi trôh lơ̆gay jơno ăm cŭngsî trồ, ơ̆-iyŏ lơ̆gay jơno ăm nteàh ù.3Bơh oh mi rôh lŏ sŏng sơ̆t, gư̆m jơno jîng oh mi rôh lŏ sŏng dî pôn băl î Yang Dŏng-Klàs nơ̆m Yang Tơm Trồ.4Tơm tô̆ Yang Dŏng-Klàs, la Jơno jîng oh mi rôh lŏ dê, sơđah-să, gừn oh mi rôh lŏ kŭng sơđah-să băl î Kơnràñ nơ̆m jơno gơklŏ.5Gư̆n-jîng, lơh tơngsơ̆t cĕ lơ̆gay pơnah nteàh ù — gư̆ptî rês-àr bơnan, sơmơ̆-sơmĭñ, gơlîng-gơlang, ham-kơñ bờk-mơsăk, gư̆m ham-hà, mà ham-hà la duh-khoai rồp-ràk,6bơh lơ̆gay jơno dô mà jơno tơcao Yang Tơm Trồ dê ndăng trôh,7mà bơh lai, oh mi rôh lŏ kŭng sŏng lơbà swà nơ̆m lơ̆gay jơno gư̆n, tơm tô̆ oh mi rôh lŏ hôm jîng nơ̆m gô.8Mơya jơ dô oh mi rôh lŏ păl tă rơmbư̆ng căư kơp jơno dô — gư̆ptî jơno gơhao nùs, gơjrăñ-măñ, mă-prề, mờc-bơsah, băl î jơno bờk-kơsờk tơlôh bơh nơ̆m yôi mơ̆n.9Bư̆ng tơs blăc î găp, bơh sŏng plồ rơmbư̆ng să-jăn cro yo băl î jơno ờs dơm gô dê,10gừn sŏng dưñ cù tơmơ̆t cro mhăy, rơ̆ la cro ndăng dî lơh mhăy nơ̆m jơno gư̆t wơng jăt rồp-să Bơtao mon bơjîng gô dê,11la anẵu mà ơ̆ tom cro Grek gư̆m cro Juđa, cro koh kato gư̆m cro ơ̆ koh kato, cro ơ̆-hoan gư̆t jơno, cro Sithe, cro dê̆-gơna, cro khăt-gơboh, mơya Yang Dŏng-Klàs la lơ̆gay jơno, gư̆m nơ̆m lơ̆gay jơno.12Gư̆n-jîng, gư̆ptî cro dî săc-rwơh Yang Tơm Trồ dê, la cro sang-goh gư̆m dî kơloh ngăn, dưñ cù cĕ nùs kơloh sơmah, lơbăn-niem, tơng-êt să, niem-lơhơn, kŏng-ăt,13kŏng ăt băl î găp gư̆m toh glài î găp, dilah cro găy gư̆n tom jơno ƀoah-yoam î cro nde, gừn gư̆ptî Yang sŏng hồ-toh oh mi rôh lŏ tîgay, oh mi rôh lŏ kŭng păl hồ-toh gư̆p tîgư̆n ya.14Mơya cŭngsî jơh kơp jơno gư̆n, păl dưñ nùs kơñ-kơloh, rơ̆ la săy tơmkot bơkhê jơno wêl-tăl dê.15Lơi cĕ jơno lơngăp-lơnge Yang Dŏng-Klàs dê ăt-bồ nhòng nùs oh mi rôh lŏ, mà oh mi rôh lŏ kŭng sŏng dî hôi trôh jơno lơngăp-lơnge gư̆n nhòng du-lăm să-jăn gư̆m rang sơđah cĕ nùs gư̆t ưnngai.16Lơi cĕ ma Jơno Yang Dŏng-Klàs ăm nhòng nùs oh mi rôh lŏ dubă tơngkah-tơngkăñ, tơm tô̆ bơtău tơngkah î jơh lơ̆gay jơno jăk-sai, mơ̆ndơm-mơ̆nieng găp lơ̆gay jơno tơs-crih, lơ̆gay seng đas-sờ î lơ̆gay jơno đas-sờ đah hwîng, đas-sờ î jơno gư̆t ưnngai nơ̆m nùs mơ̆n ăn ma Yang Tơm Trồ.17Kơp bră mà oh mi rôh lŏ lơh, bulah bơh î jơno tơs hala bơh î bră lơh, lơh cĕ jơh lơ̆gay nơ̆m sơnăn Yang, la Yang Jesu kơnơm bơh Kơnràñ ưnngai Yang Tơm Trồ la Bàp.18Ơ cro la bo-ua, don-duh cĕ bo-klo mơ̆n, tîrơ̆ gư̆n la dî păl ngăn nhòng Yang.19Ơ cro la bo-klo, kơñ-kơloh cĕ bo-ua mơ̆n, gư̆m bư̆ng lơh khêh-bơtăng î bo-ua.20Ơ cro la kon, don cĕ jơno mơi bàp mơ̆n nhòng kơp bră, bơh gư̆n la jơno niem-nùs Yang.21Ơ cro la bàp, bư̆ng mơgă tơcao nùs kon so mơ̆n, lơi ƀòn gô ơ̆ tơblơ̆ nùs.22Ơ cro la dê̆-gơna, don cĕ jơno cro pơnhơm mơ̆n pơnah să-jăn nhòng kơp bră, ơ̆-iyŏ bơh î jơno tom măt cro pơnhơm dê gư̆ptî nhẵư hê cro ờs dưñ lơh niem-nùs cro nde, mơya bơh î nùs tơpăt-ngăn, duh kơ̆mbrit Yang.23Bulah oh mi rôh lŏ lơh jơno găy lơh cĕ bơh anẵu nhòng nùs gư̆ptî lơh ma Yang mà ơ̆-iyŏ lơh ma cro nde.24Bơh gư̆t lah mơ̆n rơp dưñ-lăñ phăn-ƀan lơh srăy miê mơ̆n bơh anẵu Yang. Oh mi rôh lŏ ndăng lơh dê̆-gơna ma Yang, rơ̆ la Yang Dŏng-Klàs.25Bơh cro găy lơh jơno ơ̆ tơpăt-durư̆ng rơp dờp wăl jơno mà cro gư̆n sŏng lơh dubă ơ̆ tơpăt-durư̆ng, gư̆m ơ̆ tom jơno tơmpẵu.
FAR EAST BROADCASTING COMPANY