ອ່ານ Pita saro peba titi owera ie kimibiria urubia aboto 1

Pita saro peba titi owera ie kimibiria urubia aboto1

¹Mo masiro Saimoni Pita ie, nedi peba titi owera ro mo ro nisioidiro. Iesu Keriso edi woko ro mo ro wisa tato se nemesioidirotiti, ibose mo nou ro kotiodorai dubu e.
Iesu Keriso nimo ro Godi to nasorotiti-dumo, ibose nou nimo kiapopo dubu nouse ie. Nimo nou ro modobo ta-niwaititi nou owera kimibiria aboto, mabu nou mea tuputupu dubu e. Nio etio ra owera Iesu Keriso sapuwo to mea se na-gimibiria-rimo, neibi kitiodorai urubia beda sosoro nimibiria-birimo, nedi peba titi ro mo ro nio ia aboto nisioidiro.

²Wisa tato kiwarebai, miro mutu nio niro turi ato aise ba-miroromowadotiti-do, obo sosoro ba-mararasedutiti-mo. Idaibo sosoro ba-mororosioidiro-mo, mabu Godi nio ro morobise to umoro ta-goi-rimo, ibose nimo kiapopo dubu Iesu nio umoro ie.

Godi urubia to ta-gararapoi-rimo idaibo sosoro to ba-dirowomidiro

³Godi edi pupuwo korosa ro nimo ro kebase edi na nomidai-rimo nou aboudo, nimo nou ro imese modobomodobo ta-niwaititi-ro keremiro mea se kiwaboi sapuwo to, ibose Godi ubi tanaro kisioidiro aboto. Nedi tanaro ro nou ro gisioidiro nimo aboto, mabu nimo ro Godi morobise umoro ta-noi-rimo. Godi imese meana ia ie, ibose nou masiro auna ia ie, nimo nou mabu ato nirapoi-ro nou urubia to ararasoro ri.⁴Idaibo mino to Godi ro hodo gasaubiai-ro nimo aboudo, awawo meamea ia tanaro kisioidiro aboto. Ubauba ubi tanaro erere se edi na ro iamotiti, imese sirio urubia nedi duriomoro ro nato na-irowomidiro, neio ro sirio tau aise isioidirotiti-dumo. Nedi ubauba ubi tanaro sirio ro sopu duriomoro urubia ubauba neio ro iwaititi-dumo. Kaupoti Godi ubi ie nimo ro nou edi kimasaubiai owera ro neito nedi ubauba ubi tanaro sirio ro neio aboudo karagareawado, ina Godi sosoro nato korowomidiro.

⁵Godi ro nimo sapuwo to iedi awawo tanaro ro ta-gisioidiro. Ina nou mabu ato ie nio edi kimibiria ro na-iworohuti-dumo Iesu sapuwo to, ina meamea tanaro kisioidiro ba-dadabuai-mo. Ina Godi edi morobise umoro ro ba-dadabuai-mo.⁶Ina ubauba tanaro kisioidiro aboudo korodiobuti tanaro ba-dadabuai-mo. Ina koko tau ato kirimowotoi ba-dadabuai-mo. Ina Godi ubi gabo kobodoro ba-dadabuai-mo.⁷Ina borubi kimibiria urubia mutu naminiramio sosoro korowarebai ba-dadabuai-mo. Ina maumo nirimagare imese urubia sapuwo to ba-dadabuai-mo.

⁸Mabu nedi meamea tanaro ro nio ro sirio tau namadimi-isioidiro-ri, ina nio abato namadimi-iroromowado-ri, nio Abera Naramu Iesu Keriso umoro koi sapuwo to meamea tanaro iopu sosoro nio aboudo amadimi-isuwoduti-ri.⁹Kaupoti beda urubia ra idaibo tanaro isioidiro tato, neio idaibo urio idomari mea se kirarowo pua, aupi namabu se kiauri ie, muso namabu neio ro timotimo se kiauri ie. Neio ro woki ta-gimati-dumo ibo neio edi ubauba tanaro sirio ro na-isioidiro-mo, Godi ro keba ia se gimatopeamuti.

¹⁰Mo medamio niramio, nio Godi ro girapoi-ro nou urubia to ararasoro ri. Ina noudo ie nio pupuwo kiasibowado modobo ie paease kiwawuti aboto ibo nio Godi urubia ie. Mabu nio ro nedi meamea tanaro ro aise namadimi-isioidiro-ri, nio sipi amadimi-iwodouti-ri, Godi edi gabo ro nio ro kemeserai gabo tato ie.¹¹Ina ido nimo Abera Naramu Iesu Keriso nimo kiapopo dubu, nimo boito nama-iwaboi-ri womu tato womu tato, nio odoro ri nou ro auna kamade mutu amadi-irumai-ri.

Nedi totomu owera ro nou se ba-dirobidiro-mo

¹²Mo umoro ie nedi totomu owera sirio ro nio ro kebase umoro ta-goi-rimo. Nio ro nedi morobise owera ro mea se ta-garatamudiro-rimo, koko se nou ri irobidiro-dumo. Kaupoti nio mo ro sirio tau umoro inaina anama-iwaititi-ri nedi totomu owera sirio ro neio sapuwo to.¹³Mo orodiobuti-ri pua mo idaibo tau ato na-nomidiro nedi sopu durupi ro nouto, mea tanaro ie nio umoro inaina aise kiwaititi nedi totomu owera sirio ro neio sapuwo to.¹⁴Mabu mo umoro ta-noi ibo mo ro nedi sopu durupi ro aupise ie anamadi-emeserai-ri. Nimo Abera Naramu Iesu Keriso mo nou ro paease ta-nemowawea-ro ibo nedi tanaro ro aupise amadi-ororosioidiro-ri mo aboto.¹⁵Mo ubi ie nio mo ro binio to umoro inaina kiwaititi nedi kitamudiro owera sirio ro neio sapuwo to. Ina mo ro nio karaburai to namadi-imeserai-ri, nedi owera sirio ro nio ro woki imati-ri pua, neio sapuwo to aise amadimi-imaragoidirotiti-ri.

¹⁶Nio neibi ro ta-nimowautiti-bimo ibo nimo Abera Naramu Iesu Keriso nou amadi-orowameai-ri simara pupuwo korosa mutu. Karasaubuti totomu arua urubia ro simara bagea kimaragoidiro to na-gisioidiro-rimo, neibi ro nio neito imowautiti pua. E e, nou sosoro neibi ro simara idomari to na-nowea-birimo, nou imese auna ia dubu e.¹⁷Mabu iedi tau ro nato, Iesu Abera Godi ro auna masiro nato gomia. Imese auna ia woroworo Godi, owera kodu nou aboudo ibo gosuruo-ro, ‘Nou mo ia mere ie, mo ubi mere ie. Mo auna kamade ie nou aboto.’¹⁸Godi aboudo edi owera kodu ro na-gosuruwo-ro, neibi ia ro simara gare to ta-nemewidiro-birimo. Mabu neibi Iesu mutu edi tarena podo ro neito atu se nioro-birimo.

Godi ipusu owera urubia ro owera na-garo morobise owera ie

¹⁹Godi edi ipusu owera urubia ro keba ia se Tarena Buka ato beda owera gisioidiro-rimo, io morobise owera nou se ie. Ina nedi owera ro nimo kimibiria urubia auna umoro ie ibo nou morobise ie. Neio ro beda owera gisioidiro-rimo nou se kibodoro modobo ie. Nedi owera ro nou pina sosoro ie duwoduwo nou ro ama-owagare-ri. Nou kibodoro modobo ie womu tato Iesu Keriso neito namadi-orowameai-ri. Idiai kiboni kebase beda sosoro ra namadi-imewiti-ri, ina kowaroho saiki saro rido nama-owaroho-ri, Iesu edi woroworo ro idaibo mino to nio edi niro turi ro nato ama-imewititi-ri.²⁰Nio umoro sapuwo to auna ia owera nou e. Nio abato umoro aise kowamo modobo ie, ibo Godi ipusu owera urubia ro beda owera gisioidiro-rimo Tarena Buka ato, nedi owera ro ata dubu ata ro simara mino to nama-imabuti-ri, nu nakara se ama-arasaubuti-ri.²¹Mabu Godi edi ipusu owera ro Tarena Buka ato na-iamo, ibo pua ipusu owera urubia ro simara ubi ato kisioidiro. Neio Tarena Urio ro gimasouti, ina owera Godi aboudo ie neio ro urubia nato gimowauti-rimo.