1 TIMOTIUSI2
1Retena mo pa, jono kavo sanepaja maso mia ave amamo mesau so Allah, e membe nadi maso i so siniotu vevesiei pasia, metopana vesie pai maso Allah, so siniotu pasia vura,2mia kota membe nadi so raja pasia e siniotu veve baba pasia vura, ave amamo diadi so tatenam na mari pai e vesasie tutiri tambe ari maso Allah nanapi vava viate.3Tane nadi vetoapa jasi ma siete e siono sane vesasie so Allah, Vekor Vesie maso tata pai.4Allah miajar toapa, ave amamo siniotu vura sesamuai vesie pai e senduin aniau vetindija pai nanapi Kristus.5Aso Allah ma siri to, e venana kasau rabua Allah tutiri siniotu pa, siri kota, andina siniotu Yesus Kristus,6viono nie tarai pai to manau, ave riera siniotu vura nana sene tatar pasi. Vava nine veruana nana raria viate diria pai, Allah dioisara to manau, aso I ma sane vesie siniotu vura sesamuai vesie pai.7Apajoma Allah diemiase ira so siniotu Yahudi va pasia, ave amamo itopana Kavo Vesie pai maso sia e jeniniau sanetiar vetindija pai maso sia pa. Kavo ikavora nine ma sive vata! Ja ma jawia va!8Apavo, isanemi vesie ave amamo, na topina vea, mua pasia sembe nadi tutir sane veve sren pai, tutir kasisiou pivai variriwi va.9Isanemi vesie kota, ave amamo vavi pasia semarandini sia to rawai va, e sesasu avavar ariri buai viate. Senanari roriau sene rurandau pasi va pivai semarandini sia na barawa pivai mutiara va, pivai sasu vene vait verawai vape moja.10Vape ariria mamo, vavi pasia ma semarandini sene tarai tutiri buai vesie, ariri vavi setojo vesom maso Allah pasia.11Vavi pasia ma nari setaniau tutir manasi e senggorusara kavo aniau pasi.12Ja ma jono kasau va so vavi pasia setaniniau mua pasia, pivai sembe pareta sia. Vavi pasia ma nari semanasi nanapa menduir e membe ari pa.13Aso Allah nienari retena paini Adam, e vepui vori Hawa pa.14E Adam ni Bilis pai diawi va, vape Hawa ni Bilis pai diawi, apajoma riewani Allah nie pareta pai.15Vape vavi pai ma nari siemuai vesie pai, aso diavi atuma pana, masisi nienari ariri vesie pai e sanetiar Kristus to karakuai, e sanepai siniotu vevesiei to karakuai, e tienam nana sren pai maso Allah.
The Seed Company