Yeremia27
Yeremia Lakpee Simu Owoso Di Simu
1Di Yuda ɔka Yosia obisuɔtɔbi Sedekia sɛka ole kasɔkakyekɔ yi, ɔlaa wɔ mmle lakye SAATE nwu nfũ kuata Yeremia alɛ:2Nnya ɔlaa wɔ di SAATE nwu labuɛ aatɔkɔ mi ni alɛ: “Bla simu owoso fakyeko sikũ ku sewoso, faayɔ nwu fakpee di simu lɛfɔ.3Faata Edom, Moab, Amon, Tiro ku Sidon baka kanya diefe ni di batii ba niɛwa ni Yuda ɔka Sedekia ɔkyɛ di Yerusalem suoto.4Ta ma kanya bakyɛnko basaate lɛma falɛ, ‘Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: “Bitɔkɔ basaate lee ɔlaa wɔ mmle bilɛ:5Ku osie nii kplɛ ku kɔnɛɛ nii lɛnanfi layɔ labla kasɔ ku batii ku babɔkɛɛ ba ninsi ka ni di suoto, ni nin-yɔ ka nta otii lele niebuo mi anu nɛ.6Nunua yi, kamayɔ nsɔ lɛfɔ mmuu nta kpɛmblatɛ nii Babel ɔka Nebukadnesar; kamata bia lepoo kamɛ babɔkɛɛ nsiɛ nwɔ kaalɔ.7Nnle mmuu kamasumu nnwɔɔ ku obisuɔtɔbi nɔɔ ku ɔwa-suɔtɔbi nɔɔ ninaase di obe wɔ di kasɔ nɔɔ obe kamawo ni; nse nnle kpinwu ku baka kplɛ ntɔɔbla nwɔ lampo lɛma.8“ ‘ “Kafɔɔ nse, kale kawo ee sɛkakalekɔ kawo lesĩ Babel ɔka Nebukadnesar osumu ee bawakosa suoto kasɔ di simu owoso nɔɔ nwu kalɔ yi, ni kamayɔ kapamii, kɔka-ɔkpɛ ku ofiɛ kpile nnanfi kale nwu kootoko, ninanse di obe wɔ kamawɔɔsa nwu ni ku kɔnɛɛ nɔɔ, SAATE nwu niebuɛ.9Nioso bitankyɔɔ ɔlaababuɛtɛtɛ lee, babɔmpɛtɛ lee, alaafɔ kasɔ badikitɛ lee, bakpi bakpatɛ lee ee asaabakaalɛtɛ lee ba nintɔkɔ ye ni alɛ, ‘Bilɔbasumu Babel ɔka nwu.10Sɛlaa ku afunu mambuɛ mantɛ manta ye, n-se nimatososa ye ni fanfa di nsɔ lee suoto; kamatososa ye minwɔɔ kafɔɔ.11Kafɔɔ nse kale kawo kamakosa suoto nɔɔ kasɔ di Babel ɔka Nebukadnesar simu owoso kalɔ, ansumu nwɔ yi, ni kamata kale nwu nsiɛ di kasɔ nɔɔ kamu suoto, ankpɛ afe, ansiɛ nkpa kafɔɔ ninfa, SAATE nwu niebuɛ.” ’ ”12Layɔ kanya nwu okle lata Yuda ɔka Sedekia. Ni labuɛ nlɛ, “Biwakosa suoto kasɔ biesiɛ di Babel ɔka simu owoso kalɔ; biesumu nwɔ ku batii nɔɔ, ni bibasiɛ nkpa.13Obe oso di afɔ ku batii lɛfɔ biakpi di kapamii, kɔka-ɔkpɛ ku ofiɛ kpile kanya, ku asaa ya di SAATE nwu lafunaa ni kale lele ninamasumu ni Babel ɔka?14Bitankyɔɔ atoko di ɔlaababuɛtɛtɛ ba nimbuɛ mantɔkɔ ye ni alɛ, ‘Bilɔbasumu ni Babel ɔka,’ diekye sɛlaa ku afunu boobuɛ mantɛ manta ye.15SAATE nwu niebuɛ alɛ. ‘Ninkpee ma.’ Boobuɛ sɛlaa ku afunu mantɛ di leyooto nii kamɛ. Nkpo oso, kamatososa ye minwɔɔ kafɔɔ, aye ku ɔlaababuɛtɛtɛ, akyuu lee nwu anyɔ ba nimbuɛ sɛlaa mantɛ manta ye nii.’ ”16Ninfɛ latɔkɔ olebatatɛ ku batii ba mmle bamuu nlɛ, “Nnya ɔlaa wɔ di SAATE nwu kobuɛ ni alɛ: Bitankyɔɔ atoko di ɔlaababuɛtɛtɛ ba nimbuɛ ni alɛ, ‘Dilɔbaklɛ babakplesa asaa ya baayɔ ni di SAATE nwu leyo mankyeko Babel manwako nii.’ Sɛlaa ku afunu boobuɛ mantɛ manta ye.17Bitankyɔɔ ma atoko. Bisumu Babel ɔka, ni bibasiɛ nkpa. Obe oso di okpoo kplɛ wɔ mmle kaawɔɔ kunte?18Nse ɔlaababuɛtɛtɛ bale bakpe kafɔɔ SAATE nwu ɔlaa yi, ni ta ma batikiti SAATE wɔ Ninlenke ni lekoto alɛ balaayɔ asaa ya niebu ate ni di SAATE nwu leyo kamɛ ku Yuda ɔka lɛkayo kamɛ ku Yeruslem basifiko Babel.19Diekye nnya ɔlaa wɔ di SAATE wɔ Ninlenke ni kobuɛ ankyeko ni akpaka nwu, Lekpo bɛɛsi nwu, atikasaa ya mankyisa ni ku asaa bamba ya niebu ni di okpoo kplɛ wɔ mmle kamɛ,20n-ya di Babel ɔka Nebukadnesar ditayɔ asifiko ni di obe wɔ aakpaa ni Yuda ɔka Yehoiakim obisuɔtɔbi Konia aadieko ni di Yerusalem aasifiko ni sɛlanle kamɛ di Babel, diɛkyakaa ni di Yuda ku Yerusalem batii finle bamuu.21Nwaako, nnya ɔlaa wɔ di SAATE nwu, Israel Yaa wɔ Ninlenke ni kobuɛ ankyeko ni asaa ya niebu ate ni di SAATE nwu leyo kamɛ ku Yuda ɔka lɛkayo kamɛ ku Yerusalem:22‘Babakpaa ma mansifiko Babel, nfa kafɔɔ babawɛ ninaase di dii le kamawa mmakpaa ma ni nɛ,’ SAATE nwu niebuɛ. ‘Nse ntookplesa ma lɛwako lɛbasiɛsa di lɛba le mmle.’ ”The Seed Company