HESEKIEL1
Yaa Lɛkakpomii
1Di dii nɔnle suoto di Yuda batii kɔwɛntɛ naafa kamɛ, di alɛɛ afosi-atiɛ nii kamɛ, di obe wɔ lasiɛ ni di balanle kamɛ di Kebar Okle kotoko yi, osi lasɛkɛtɛ, ni lanya Yaa odiki otuo nɛ.2Di kɔwɛntɛ nwu dii nɔnle suoto- niale ni lɛlɛɛ nɔnle di Ɔka Yehoiakin lasifi ni sɛlanle kamɛ yi-3SAATE nwu ɔlaa lawa kuata Busi obisuɔtɔbi, oletatɛ Hesekiel di Kebar Okle kotoko di Kaldea batii kasɔ suoto. Nfa di Yaa kɔnɛɛ latika nwɔ di suoto nɛ.4Lanyu nii, ni lanya afɛɛfɔ lakye katoo-kasɔ aatɔɔwa- lelokonkyɛ kplɛ latoomunaa ku ɔtɔ, lɛkpa kafɔɔ lamana ni diakyi. Ɔtɔ nwu ntɛɛntɛɛ late fɛle lɛbɔɔsaa le niebe ni ɔtɔ bɔmbɔ okle.5Asaa ya kafɔɔ niate ni fɛle asaa ya ninkpe ni nkpa ana lasiɛ di ɔtɔ nwu kamɛ. Di letembi nini late ni fɛle otii,6kafɔɔ dibiala lɛma lawɛ anu ana ku afoko ana.7Nkpaa lɛma layila tinini; nkpaatũ lɛma late fɛle lɛnankyuebi akpɔbi okle, diatoosesee kafɔɔ fɛle lɛbɔɔsaa sɛɛle le beekpee ni di ɔtɔ kamɛ okle.8Baawɛ otii nnɛɛ di afoko lɛma kalɔ di ɛfankyi lɛma ɛna nwu suoto. Bana lɛma nwu bamuu lawɛ anu ku afoko,9afoko lɛma kafɔɔ lakpanko bawo. Dibiala lɛma lanyu sitũ aakyɛ tinini; batamunikĩi di obe wɔ baakyɛ nii.10Nnya mmle okle di anu lɛma late ni: Bana nwu biala lawɛ otii anu, dibiala lawɛ kyata anu di oletanɛɛkyɛ, di ɔmɛntukyɛ kafɔɔ yi, dibiala lawɛ nankyue-suɔtɔ anu; dibiala kafɔɔ lawɛ klikpo anu.11Nkpo di anu lɛma late nɛ. Afoko lɛma lafukuti aakyɔɔ osi lɛkyɛ; dibiala lawɛ afoko anyɔ, kunwii kɔkpanko ɔbamba kofoko di kakyɛ biala, afoko anyɔ kafɔɔ latĩi ma suoto.12Dibiala lanyu sitũ aakyɛ tinini. Kakɔlele di ninwuna nwu nkyɛ, mankyɛ nfa, mammunikĩi kafɔɔ di obe wɔ bakyɛ nii.13Asaa nwu ninkpe ni nkpa late fɛle atɔkɔnii nikɔfiɛ nii ee fɛle kaka sɛtɔ. Ɔtɔ latɔɔkyɛ sitũ kuatookple sɛmaa di asaa nwu ninkpe ni nkpa kamɛ; kuakpa, ɔtɔ kafɔɔ latoomunaa kuatoodie nwu kaamɛ.14Asaa ya ninkpe ni nkpa nwu ntoso ankyɛ sitũ ankple sɛmaa fɛle ɔtɔ amunaa okle.15Lanyu ni asaa nwu ninkpe ni nkpa yi, lanya keke kɔkpaa di kasɔ suoto di asaa ya ninkpe ni nkpa biala ɔlɔɔkɔ ku anu ana ninya nwu.16Nnya mmle di keke nwu nkpaa letembi late ni ku mmle baabla nya ni: Aatoosesee fɛle afuɔ ya manlɛɛ ni krisolite, ana nwu amuu kafɔɔ ladie bawo. Ɔbla baabla dibiala late fɛle keke kɔkpaa nwu lewo nsi di keke kɔkpaa lewo kamɛ okle.17Nse bakyɛ yi, manfuo ɔkyɛ di ɛfankyi nwu ɛna onwii lele suoto di asaa nwu ninkpe ni nkpa lɛkyɔɔ ni anu; bakeke nwu ninmumunikĩi nse asaa nwu ninkpe ni nkpa nkyɛ.18Nkpaa abɔɔsaa lɛma lataka katoo di difu lasiɛ ni kafɔɔ, nkpaa abɔɔsaa ana nwu amuu kafɔɔ lawɛ anu, aamana amuu aakyi.19Nse asaa nwu ninkpe ni nkpa nkyɛ, bakeke nkpaa nwu nkyɛ di ɔlɔɔkɔ lɛma; nse asaa nwu ninkpe ni nkpa lɛtaka kaasɔ yi, bakeke nkpaa nwu kafɔɔ ntaka.20Kakɔlele di ninwuna nwu nkyɛ, mankyɛ nfa, bakeke nkpaa nwu kafɔɔ ntaka ku mma, diekye asaa ya ninkpe ni nkpa ninwuna lasiɛ di bakeke nkpaa nwu kamɛ.21Nse babɔkɛɛ nwu nkyɛ, mma kafɔɔ mankyɛ; nse babɔkɛɛ nwu leyila, mma kafɔɔ man-yila; nse babɔkɛɛ nwu lɛtaka kaasɔ, bakeke nwu kafɔɔ ntaka ku mma, diekye asaa ya ninkpe ni nkpa ninwuna lasiɛ di bakeke nwu kamɛ.22Lɛsaa ninwii latika di asaa ya ninkpe ni nkpa nsintɛɛ, diate ni fɛle kablɛfɛɛkɔ okle, diatoosesee fɛle ditubakani, di difu lasiɛ ni.23Beefukuti afoko lɛma bɛɛkyɔɔ bawo di kablɛfɛɛkɔ nwu kalɔ, dibiala lawɛ afoko anyɔ ya niatĩi ni suoto nini.24Nse asaa nwu ninkpe ni nkpa nkyɛ yi, nnu afoko lɛma lɛkpanko, fɛle ntu be nikobiɛ ninfe ni diwi, fɛle Nnwɔ Ninlenke ni sɛlɔ, fɛle bakpɛtɛ kudu. Nse beeyila, manwakosa afoko lɛma kasɔ.25Ninfɛ di sɛlɔ sinwii ladie siakye kablɛfɛɛkɔ nwu osi di asintɛɛ lɛma di obe wɔ nfɛ bayɛ bɛɛwakosa ni afoko kasɔ.26Di kablɛfɛɛkɔ nwu osi yi, lɛsaa ninwii latika di nsintɛɛ lɛma diate ni fɛle difuɔ le manlɛɛ ni safir lɛkakpomii. Lɛsaa ninwii kafɔɔ niate ni fɛle otii lasiɛ di lɛkakpomii nwu suoto.27Lanya ni nkpo fɛle lɛsaa le niate ni fɛle kataduu nɔɔ. Diasifi ni osi, aate fɛle lɛbɔɔsaa le nikosesee nii, fɛle ɔtɔ nieyii ni kamɛ. Diayɔ ni ninfa kafɔɔ diawa ni di kalɔ lɛkyɛ yi, aate fɛle ɔtɔ; ɔtɔ wɔ niatɔɔkpa kuamana nwɔ kuakyi nii.28Fɛle mmle di kolosansa ntaa ni di kolo osi di kanto ɔnɔɔbee kamɛ yi, nkpo niale lɛkpa le niamana nwɔ diakyi ni nɛ.Nle mmle niale SAATE nwu dibu letembi le ate ni nɛ. Obe wɔ lanya ni nii yi, lafuusa anu kaasɔ, ni lanu otii onwii niatɔkakatɛ ni sɛlɔ nɛ.
The Seed Company