1 Mose Kukũ Nɔnle6
Kufiofa Ko Niefĩ Kulenke Nii
1N-ya mmle ninle sɛsaabla ku sisuku ku afiofa ya di SAATE, Yaa lee latɔkɔ mi alɛ ntuo ye ni, alɛ biaklee ni di kasɔ ka biɔtaalɛ Yordan minaasiɛ ni,2di mmle di babi lee ku babi lɛma ba nikɔwa ni sɛɛmaa lɛma kamayɛkɛ ni SAATE Yaa lee di obe wɔ bisi ni nkpa, alɛ biakyɛ di sisuku nɔɔ minklee afiofa nɔɔ nwu amuu lɛta ye nii, mmle biasiɛ ni nkpa minklɛ nii.3Oo Israel, nu, lolaa fanyu falɛ fɛɛkyɔɔ kotoko, di mmle dibalɛ ninta fɔ ni, alɛ faalofo fanlɛɛsa kpinwu di kasɔ ka di nnyɛɛntu ku bablɔ kobiɛ ninfe nii, fɛ mmle di SAATE, bate lɛfɔ Yaa labuɛ aatɛ fɔ nii.4Oo Israel, nu: SAATE Yaa loo, SAATE nwu onwii ale.5Nioso bɔmbɔ SAATE Yaa lɛfɔ ku otu lɛfɔ omuu ku ɔkla lɛfɔ omuu ku osie lɛfɔ omuu.6Afiofa ya mmle kɔta fɔ ni miɛ asiɛ di otu lɛfɔ kamɛ.7Tuo nya babi lɛfɔ. Buɛ nya fatɔkɔ ma, nse fakpe leeyo, nse fakyɛ di osuku, nse fate ku obe wɔ fɛɛtaka ni.8Pɛ nya lɛkpa di nnɛɛtũ lɛfɔ fɛ nsũ lɛtɛsaa, faanii nya di katũ lɛfɔ.9Kpana nya fatika di ayo lɛfɔ n-yoko sewoso ku akloo lɛfɔ suoto.Kɔ̀ka Di Otokopĩ Suoto
10Nse SAATE Yaa lɛfɔ lɛkpaa fɔ ɛɛwako kasɔ ka aaka ntam aata ni bate lɛfɔ Abraham, Isak ku Yakob alɛ abata fɔ ni yi- kasɔ ka di sekpoo kplɛ se nikɔkyɛ ni sitũ, ninaanle aye niɛtɛ sĩ nii,11ayo ya di asaa nwaa amuu ateate leyii ni kamɛ, ninaanle afɔ niɛtɛ nya nii, atubiɔ ya ninaanle afɔ niekutu nii, nta awosobi afe ku nnɔnyi awosobi afe ya ninaanle afɔ niɛkpɛ nii- ni nse feele feemiɛ,12lolala fanyu falɛ faayee SAATE wɔ niakpaa fɔ aadieko ni di Egipte, aadieko ni di sɛlanle kasɔ nwu.13Yɛkɛ SAATE Yaa lɛfɔ nwu, sumu lete nɔɔ, faaka ntam lɛfɔ di leyooto nɔɔ kamɛ.14Bitantikanko bayaa bamba, batii ba ninsi beekyi ye ni bayaa nwu;15diekye SAATE, Yaa lee wɔ ninsi ni di kamɛ lee yi, Yaa wɔ ninkpɛ ni sɛsɔfɔwo ale, ɔblɔ kafɔɔ kamafiɛ nwɔ di suoto lee, anwɔɔsa ye di kasɔ nwu suoto.16Bitansɔ SAATE Yaa lee bianyu, fɛ mmle biabla ni di Masa.17Binyu bilɛ bieklee SAATE Yaa lee afiofa nwu, sɛsaabla ku sisuku nɔɔ se ɛɛta ye ni.18Bla lɛsaa le ninlɛ, diesiɛko ni kafɔɔ di SAATE nwu anu, di mmle dibalɛ ninta fɔ ni, fankyɛ fanaayɔ ni kasɔ biene ka di SAATE nwu laka ntam aata ni bawa lɛfɔ,19abatososa balo lɛfɔ bamuu di anu lɛfɔ, fɛ mmle di SAATE nwu labuɛ nii.20Dii kaamaa, nse babi lɛfɔ lɛkaalɛ fɔ alɛ, “Afiofa, sɛsaabla ku sisuku se di SAATE Yaa loo lebuɛ ɛɛtɛ ni kasɔ mɔ?”21tɔkɔ ma falɛ: “Buale Farao balanle di Egipte kasɔ, kafɔɔ SAATE nwu lakpaa wo aadieko di Egipte ku kɔnɛɛ nɔɔ osie.22Di anu loo di SAATE nwu lakyesee asaa ya niabla ni ɔkpɛ ku atuosaa kplɛ ku dibuo- di Egipte ku Farao ku leyo nɔɔ batii bamuu suoto.23Kafɔɔ awo yi, aadiki wo aakyeko nfa aawako aabata wo kasɔ ka aaka ntam aatɛ aata ni bawa loo.24Ni di SAATE nwu latɔkɔ wo alɛ buklee afiofa ya mmle amuu, buɔyɛkɛ SAATE Yaa loo, mmle di obe lele dibalɛ ninta wo nii, munwɛ ni nkpa, fɛ mmle dite ni miɛ.25Ni nse buololaa afiofa ya mmle amuu buole di SAATE Yaa loo anu, fɛ mmle ɛɛtɔkɔ wo ni yi, ni nnwu nimale wo ɔsaabla tinini nɛ.”The Seed Company