2 SAMUEL8
Dawid Nkpɛ Alenkee
1Di obe owo kamaa, Dawid lalenkee Filisti batii, aawakosa ma kasɔ, aafũ Meteg Amma okpoo di Filisti batii nnɛɛ.2Dawid kafɔɔ lalenkee Moab batii. Aata ma baate kaasɔ, ni aaklapoosa ma ku okũ kaanale nɛ. Ekũ lɛkaana sɛnyɔ biala, aalo ma, kafɔɔ aata lɛkaana tiefa lasiɛ nkpa. Nioso Moab batii labasiɛ di Dawid kalɔ, ni baawako nwɔ kɔsɔsĩ nɛ.3Dawid lakple aakpɛko Soba ɔka Rehob obisuɔtɔbi Hadadeser, di obe wɔ aakyɛ alɛ ɔɔlaakple anse ni kasɔ nɔɔ difũ di Efrate Okle kotoko.4Dawid lafũ bakeke nɔɔ ba di bapɔnkɔ nnanfi ni kakpe, bakeke bawantɛ nkpe nkuɛnsĩ ku bakpɛtɛ ba ninkyɛ ni ninkpaa nkpe afosi-anyɔ. Dawid labubudi bamuu sɛkpaakũ, diabu bakeke bapɔnkɔ kɔlafa.5Di Siria batii di Damasko lawa baabakyakaako ni Soba ɔka Hadadeser, Dawid lalo batii lɛma nkpe afosi-anyɔ nkpe nnyɔ.6Ninfɛ di Dawid latofo bakpɛtɛ kasiɛkɔ di Siria batii kasɔ suoto di Damasko, ni di Siria batii lasiɛ nwɔ kaalɔ, baatɔɔwako nwɔ kɔsɔsĩ nɛ. SAATE nwu lata Dawid lelenkee di kakɔ lele aakyɛ.7Dawid layɔ koto sɛɛle kubiafunsaa ya niale ni Hadadeser banɔɔfotii ale aawako Yerusalem.8Ninfɛ di Ɔka Dawid layɔ abɔɔsaa kpinwu niale ni Hadadeser ale di Beta ku Beroai sekpoo nɛ.9Di Hamat ɔka Toi lanu alɛ Dawid ntoolenkee ni Hadadeser bakpɛtɛ bamuu yi,10ni aakpee obisuɔtɔbi nɔɔ Yoram alɛ alaasɛɛsa Ɔka Dawid, aatansa nwɔ di kakpɛ lelenkee nɔɔ di Hadadeser suoto nɛ, nnwɔ niakpɛko ni Toi. Yoram lakyɛnko Dawid koto fututu, koto sɛɛle ku abɔɔsaa asaa.11Nioso Ɔka Dawid lakleklesa asaa ya mmle aata SAATE nwu, fɛ mmle aabla ni ku koto fututu ku koto sɛɛle ko aakyeko ni nnle be mmuu aawakosa ni kasɔ:12Nsĩ niale Edom ku Moab, Amon batii, Filisti batii ku Amalek nɛ. Aakleklesa kafɔɔ kakpɛ asaa ya aayɔ ni di Soba ɔka Rehob obisuɔtɔbi Hadadeser nfũ.13Ni di Dawid lafũ leyooto di obe wɔ aalaalo ni Edom batii lefosi nkpe nnɛ di Mmba Ɔtaata aakple ni sɛmaa nɛ.14Aatofo bakpɛtɛ nsiɛkɔ di Edom aafenko, ni di Edom batii bamuu lasiɛ di Dawid kalɔ nɛ. SAATE nwu lata Dawid lelenkee di kakɔ lele aakyɛ.15Dawid lale sɛka di Israel omuu suoto, aatɔɔbla nle niate ni tinini, di osuku kanya aata batii nɔɔ bamuu.16Yoab wɔ di ɔya niale ni Seruia niayila di bakpɛtɛ kanya; Ahilud obisuɔtɔbi Yehosafat niale akũ katɛkɔ nyuntɛ;17Ahitub obisuɔtɔbi Sadok ku Abiatar obisuɔtɔbi Ahimelek niale olebatatɛ; Seraia niale kukũ kpanatɛ;18Yoiada obisuɔtɔbi Benaia niayila di Keret batii ku Pelet batii kanya; Dawid babisuɔtɔbi lale ɔka olebatatɛ.The Seed Company