لواحي11
1ئِمُّوْشَا-اَيِي يجّن ن وغَانِيم اَم ذ ڒَعْبَار ينَّا-ٱيِي يجّن: "كَّر، عْبَر ثَمْزِيذَا ثَمقّْرَانْت ن أَربِّـي ذ ڒْمذْبَح، حْسب شْحَاڒ إِي عبّْذن ذِنِّي.2وَلَكِن ڒمْرَاح يدْجَان غَار بَرَّا إِ ثمْزِيذَا اجّ-يث وَاحْذس، وَار ث تعْبَار شَا ڒَاحقَّاش يمُّوْش-اَسن إِ ڒݣْنُوْس. أَذ عفّْسن ثَنْدِينْت يقدّْسن ذِي ثْنَاين أُو اَرْبعِين ن شْهُوْرَاث.3أَذ سّكّغ ثْنَاين ن ڒشْهُوْذ ينُو اَذ ݣّن اَرُّوْض ن لْحُزن اَذ خْبَرن يوْذَان س مِين عڒْمن زي أَربِّـي اَڒَاف أُو مِيَّاتَاين أُو ستِّين يُوْم."4ڒشْهُوْذ نِّي نِثْنِي ذ ثْنَاين ن ڒْشجُّوْر ن زِّيتُوْن، أُو عَاوذ نِثْنِي ذ ثْنَاين ن ڒقْنَاذڒ إِݣ يبدّن زَّاث إِ سِيذِي أَربِّـي ن دُّنشْت-أَ.5مڒَا شَان يِجّن يرْزُو اَذ يضَرّ ڒشْهُوْذ نِّي، أَتَاف اَذ تفّغ ثْمسِّي زݣ ؤُقمُّوْم نْسن اَذ تشّ ڒْعَذْيَان نْسن. مڒَا شَان يجّن يرْزُو اَثن يضَرّ، أَمنِّي إِي غَا يمّث.6ذِي ڒِيَّامَاث نِّي إِي ذِي غَا خْبَرن ڒشْهُوْذ-أَ س مِين عڒْمن زِي أَربِّـي اَتَاف اَغَارْسن ثِيڒِي سُّلْطَا زِي غَا بلّْعن اَجنَّا وَار د يشِّيْث بُو ونْࢲَار قَاع. أَتَاف عَاوذ اَغَارْسن ثِيڒِي سُّلْطَا اَذ اَرّن اَمَان ذ يذَامّن اَذ ضڒْقن إِ مَارَّا لْمُصِيبَاث خ ثْمُوْرْث مڒْمِي مَا خْسن.7خْمِي غَا كمّْڒن ڒخْبَار نْسن إِي زِي غَا شهْذن، أَذ د يݣَعّذ ڒْوَحْش زِي ڒَادْجغ بْڒَا ڒَاحدّ اَثن يحَارب، أَثن يغْڒب، أَذ ينغ ڒشْهُوْذ نِّي.8أَذ تقِّيم دَّات نْسن ذِي شَّارِع ن ثنْدِينْت ثَمقّْرَانْت ؤُمِي قَّارن س ڒْمَعْنَا سَدُوْم نِغ مِصْرَا يعْنِي مَانِي يتْوَاصلّب سِيذِيثْسن.9ئِوْذَان زِي مْكُڒ شَّعْب ذ ڒْقُوْم ذ لُّغَا ذ ڒْݣـنُس اَذَايْسن خْزَرن ذِي دَّات نْسن ثڒْتِيَّام ذ ؤُزْين، وَار تجِّين حَدّ اَذ ينْضڒ ڒشْهُوْذ-أَ.10يمزْذَاغ ن ثْمُوْرْث اَذ فَرْحن اَذ زْهُوْن س ڒْموْث نْسن. أَذ ؤُشن يكَادُوْثن إِ وَايَاوْيَا ڒَاحقَّاش لْأَنْبِيَا نِّي س ثْنَاين، يعْنِي ڒشْهُوْذ نِّي، عدّْبن اَطَّاس يمزْذَاغ ن ثْمُوْرْث.11وَامِي ثعْذُو تڒْتِيَّام ذ ؤُزْين نِّي، يُوْذف ذَايْسن يجّن ن بُوْحْبڒ زِي أَربِّـي ذِي ڒشْهُوْذ-أَ، كَّرن بدّن خ يضَارن نْسن. ينِّي ثن يࢲْرِين ثُوْذف ذَايْسن ثِيݣّْوْذِي ذ ثَمقّْرَانْت.12سْڒِين إِ يِجّن ن ثْمِيجَّا ثجْهذ تْڒَاغَا-د خَاسن زݣ وجنَّا ثقَّار-اَسن: "ݣَعّْذم-د ذَانِيتَا!" ڒشْهُوْذ نِّي ݣَعّْذن غَار وجنَّا ذݣ وسيْنُو، ڒْعَذْيَان نْسن خْزَرن ذَايْسن.13ذِي ڒْوقْث نِّي يوْقع يجّن ن زِّنْزَال ذ اَمقّْرَان، ثْنهْذم عشْرَا ذِي مِيَّا زِي ثنْدِينْت. مُّوْثن ذِي زِّنْزَال-أَ سبْعَاڒَاف ن يِوْذَان. يِنِّي يقِّيمن ݣّْوْذن، بْذَان سمْغَارن أَربِّـي إِݣ يدْجَان ذݣ وجنَّا.14ثعْذُو تَمَارَا وِيس ثْنَاين، ثنِّي وِيس ثْڒَاثَا عْڒَاين اَذ د تَاس.15ثكَّر لْمَلَائِكَا وِيس سبْعَا ثْصُوْض ذِي زَّمَّار نّس، أُوْشَا ثِمِيجَّاوِين ذݣ وجنَّا قَّارنْت س جّْهذ: "ئِذْوڒ ڒحْكَام ن دُّنشْت-أَ ذݣ يفَاسّن ن سِيذِي أَربِّـي نّغ ذ لْمَسِيح نّس، اَذ يحْكم إِ ڒبْدَا ن ڒبْدَاث."16كَّرن اَرْبعَا أُو عِشْرِين نِّي يمْغَارن إِي قِّيمن خ لْعَرْشَاث نْسن زَّاث إِ أَربِّـي، هْوَان خ وغمْبُوْب نْسن سجّْذن-اَس إِ أَربِّـي،17قَّارن:"نتْشكَّر-يشك آ سِيذِي أَربِّـي إِݣ يزمَّرن إِ كُڒْشِي،شك إِݣ يدْجَان، شك إِي تُوْغَا يدْجَان،ڒَاحقَّاش ثسْخذْمذ جّْهذ نّش، ثبْذِيذ تْحكّْمذ.18ڒݣْنُوْس غضْبن، يُوْوض-د وغْضَب نّش.يُوْوض-د نْهَار ن لْحِسَاب ذ لْعِقَاب ن يِنِّي يمُّوْثن.اَذ تْجَازِيذ يِنِّي ذَاش يخدّْمن يعْنِي لأَنْبِيَا ذ ڒْمُوْمِنِين نّش صَّالِحِين،ذ ينِّي يتْوقَّارن يسم نّش س يمزْيَانن ذ يمقّْرَانن.أَذ تقْضِيذ خ يِنِّي يسفْسَاذن ثَمُوْرْث."19ثْنُوْرْزم ثمْزِيذَا ثَمقّْرَانْت ن أَربِّـي ذݣ وجنَّا، يمظْهَار-د تَابُوْت ن ڒْعَهذ ن أَربِّـي ذِي ثمْزِيذَا نِّي. ئِوْقع وَاسَّام ذ يغُوْيَان ذ وَاجَّاج ذ زِّنْزَال ذ يشَرَّا اَطَّاس.
Wycliffe Bible Translators, Inc.