1 𐴘𐴡𐴇𐴝𐴥𐴕𐴧𐴝 5を読んでください。

1 𐴘𐴡𐴇𐴝𐴥𐴕𐴧𐴝5

𐴀𐴞𐴔𐴝𐴕𐴠 𐴊𐴟𐴕𐴞𐴘𐴝𐴘𐴌𐴠 𐴎𐴞𐴃𐴧𐴠𐴥

¹𐴎𐴠𐴦𐴕𐴞𐴑𐴞 𐴀𐴞𐴏𐴝𐴤𐴌𐴠 𐴔𐴡𐴀𐴏𐴞𐴤 𐴊𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴝𐴓𐴧𐴝𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴒𐴞𐴘𐴡𐴘; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴁𐴝𐴉𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴞𐴥𐴁𐴝𐴌 𐴉𐴟𐴖𐴝𐴌𐴠 𐴘𐴡𐴥 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥.²𐴀𐴝𐴣𐴀𐴌𐴝 𐴀𐴝𐴓𐴧𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥 𐴊𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴊𐴠 𐴇𐴞𐴥𐴘𐴝𐴕𐴠 𐴎𐴝𐴕𐴞 𐴊𐴠 𐴑𐴞, 𐴀𐴝𐴣𐴀𐴌𐴝 𐴀𐴝𐴓𐴧𐴝𐴌 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥.³𐴀𐴝𐴓𐴧𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴝𐴥 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴝𐴥. 𐴀𐴞𐴥𐴁𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴎𐴟𐴓𐴝𐴂𐴢 𐴕𐴡.⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴒𐴞𐴘𐴡𐴘 𐴀𐴞𐴥𐴃𐴠 𐴃𐴡 𐴊𐴟𐴕𐴞𐴘𐴝𐴘𐴌𐴠 𐴎𐴞𐴃𐴞 𐴀𐴝𐴘𐴧𐴠𐴤. 𐴊𐴟𐴕𐴞𐴘𐴝𐴘𐴌𐴠 𐴎𐴞𐴘𐴝𐴥𐴕𐴠 𐴎𐴞𐴃𐴞 𐴀𐴝𐴙𐴐𐴧𐴠𐴥 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌𐴝𐴌 𐴀𐴞𐴔𐴝𐴕.⁵𐴎𐴠𐴦𐴕𐴞𐴑𐴞 𐴀𐴞𐴏𐴝𐴤𐴌𐴠 𐴀𐴝𐴓𐴧𐴝𐴌 𐴉𐴟𐴖𐴝 𐴊𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴠𐴥, 𐴏𐴞𐴌𐴞𐴥𐴉𐴢 𐴀𐴞𐴥𐴃𐴠 𐴕𐴡 𐴀𐴡𐴥𐴘 𐴊𐴟𐴕𐴞𐴘𐴝𐴘𐴌𐴠 𐴎𐴞𐴃𐴞 𐴀𐴝𐴘𐴧𐴠𐴤 𐴊𐴠 𐴀𐴝𐴌 𐴇𐴡𐴕𐴠؟

𐴉𐴟𐴖𐴝𐴌 𐴁𐴝𐴦𐴁𐴟𐴃𐴠 𐴒𐴡𐴁𐴝𐴤

⁶𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤 𐴉𐴝𐴕𐴞𐴥 𐴀𐴠𐴊𐴧𐴠 𐴓𐴡𐴖𐴢 𐴖𐴡𐴥𐴌 𐴊𐴟𐴖𐴝𐴌𐴝 𐴀𐴝𐴙𐴐𐴧𐴠𐴥; 𐴏𐴞𐴌𐴞𐴥𐴉𐴢 𐴉𐴝𐴕𐴞𐴥𐴌 𐴊𐴟𐴖𐴝𐴌𐴝 𐴕𐴡, 𐴁𐴡𐴥𐴓𐴑𐴠 𐴉𐴝𐴕𐴞𐴥 𐴀𐴠𐴊𐴧𐴠 𐴓𐴡𐴖𐴢 𐴖𐴡𐴥𐴌 𐴊𐴟𐴖𐴝𐴌𐴝. 𐴇𐴠𐴥𐴕𐴊𐴞𐴓𐴧𐴝 𐴁𐴡𐴥𐴓𐴞 𐴂𐴝𐴑-𐴌𐴟𐴀𐴘𐴠 𐴒𐴡𐴁𐴝𐴤 𐴊𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴌𐴟𐴀 𐴃𐴡 𐴕𐴞𐴎𐴠 𐴏𐴡𐴥𐴘𐴧𐴞.⁷𐴒𐴡𐴁𐴝𐴤𐴊𐴡𐴘𐴝 𐴀𐴝𐴏𐴠𐴤 𐴊𐴠 𐴃𐴞𐴕، 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠:⁸𐴂𐴝𐴑-𐴌𐴟𐴀, 𐴉𐴝𐴕𐴞𐴥, 𐴀𐴠𐴊𐴧𐴠 𐴓𐴡𐴖𐴢; 𐴇𐴠𐴥 𐴃𐴞𐴕𐴞𐴥 𐴒𐴡𐴁𐴝𐴤𐴘𐴠 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴒𐴡𐴁𐴝𐴤 𐴊𐴠𐴥.⁹𐴁𐴠𐴐𐴡𐴥𐴑 𐴀𐴝𐴣𐴀𐴌𐴝 𐴀𐴞𐴕𐴏𐴝𐴥𐴕𐴡𐴌 𐴒𐴡𐴁𐴝𐴤𐴌𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴞𐴥, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴒𐴡𐴁𐴝𐴤 𐴃𐴡 𐴀𐴝𐴌𐴡𐴤 𐴋𐴡𐴣𐴀𐴌. 𐴀𐴝𐴓𐴧𐴝𐴌 𐴒𐴡𐴁𐴝𐴤 𐴀𐴡𐴥𐴙𐴓𐴊𐴠 𐴖𐴝𐴀𐴕 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴉𐴟𐴖𐴝𐴌 𐴁𐴝𐴦𐴁𐴟𐴃𐴠 𐴊𐴞𐴘𐴠𐴥.¹⁰𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴌 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴀𐴞𐴥𐴃𐴝𐴌 𐴊𐴞𐴓𐴠 𐴇𐴠𐴥 𐴒𐴡𐴁𐴝𐴤 𐴑𐴡𐴁𐴟𐴓𐴢 𐴒𐴡𐴌𐴠𐴥; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴌𐴠 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴠𐴥 𐴀𐴞𐴥𐴃𐴠 𐴀𐴞𐴥𐴁𐴝𐴌𐴠 𐴔𐴞𐴏𐴝𐴥 𐴁𐴝𐴕𐴝𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴉𐴟𐴖𐴝𐴌 𐴁𐴝𐴦𐴁𐴟𐴃𐴠 𐴎𐴠 𐴒𐴡𐴁𐴝𐴤 𐴊𐴞𐴥𐴘𐴠 𐴇𐴞𐴥𐴘𐴝𐴕 𐴊𐴠 𐴀𐴞𐴥𐴃𐴠 𐴁𐴞𐴐𐴧𐴝𐴥𐴐𐴢 𐴕𐴡𐴥 𐴒𐴡𐴌𐴠𐴥.¹¹𐴇𐴠𐴥 𐴒𐴡𐴁𐴝𐴤 𐴀𐴡𐴥𐴙𐴓𐴊𐴠, 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴊𐴞𐴦𐴘𐴠𐴥, 𐴀𐴝𐴦𐴌 𐴇𐴠𐴥 𐴎𐴞𐴕𐴊𐴞𐴒𐴞 𐴀𐴞𐴥𐴁𐴝𐴌 𐴉𐴟𐴖𐴝𐴌 𐴇𐴝𐴣𐴏𐴠 𐴀𐴝𐴏𐴠𐴤.¹²𐴎𐴠𐴦𐴕𐴞𐴑𐴞 𐴇𐴠𐴥 𐴉𐴟𐴖𐴝𐴌𐴠 𐴉𐴝𐴘𐴧𐴠𐴥 𐴀𐴞𐴥𐴃𐴠 𐴇𐴠𐴥 𐴎𐴞𐴕𐴊𐴞𐴒𐴞 𐴉𐴝𐴘𐴧𐴠𐴥, 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴌 𐴇𐴠𐴥 𐴉𐴟𐴖𐴝𐴌𐴠 𐴕𐴡𐴥 𐴉𐴝𐴦 𐴀𐴞𐴥𐴃𐴠 𐴇𐴠𐴥 𐴎𐴞𐴕𐴊𐴞𐴒𐴞 𐴕𐴡𐴥 𐴉𐴝𐴦.

𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴌 𐴎𐴝𐴕𐴑𐴝𐴌𐴞

¹³𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤, 𐴀𐴞𐴀𐴕 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴑𐴞𐴘𐴡𐴥𐴓𐴧𐴝 𐴓𐴠𐴑𐴞𐴥𐴌 𐴈𐴡𐴘𐴓𐴠𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴃𐴧𐴟 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴀𐴝𐴏𐴠𐴤 𐴊𐴠 𐴎𐴝𐴕𐴡.¹⁴𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴀𐴝𐴣𐴀𐴌𐴝𐴌 𐴎𐴠 𐴇𐴞𐴥𐴔𐴧𐴡𐴃𐴢 𐴀𐴝𐴏𐴠𐴤 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠, 𐴎𐴡𐴊𐴞 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴔𐴝𐴒𐴞, 𐴇𐴞𐴥𐴘𐴝𐴕 𐴀𐴞𐴥𐴁𐴝𐴘𐴠 𐴉𐴟𐴥𐴕𐴠.¹⁵𐴀𐴝𐴣𐴀𐴌𐴝 𐴎𐴠𐴇𐴡𐴥𐴕 𐴘𐴝𐴀𐴕 𐴎𐴝𐴕𐴞, 𐴀𐴝𐴣𐴀𐴌𐴝 𐴎𐴞𐴘𐴝𐴥𐴕 𐴔𐴝𐴒𐴞 𐴇𐴞𐴥𐴘𐴝𐴕 𐴀𐴞𐴥𐴁𐴝𐴘𐴠 𐴉𐴟𐴥𐴕𐴠; 𐴀𐴝𐴣𐴀𐴌𐴝 𐴘𐴝𐴀𐴕 𐴀𐴡𐴥 𐴎𐴝𐴕𐴞 𐴊𐴠 𐴑𐴞, 𐴀𐴝𐴣𐴀𐴌𐴝 𐴀𐴞𐴥𐴁𐴝𐴃𐴧𐴟 𐴎𐴞𐴀𐴕 𐴔𐴝𐴙𐴒𐴧𐴞𐴥 𐴇𐴞𐴥𐴀𐴕 𐴉𐴝𐴘𐴧𐴞𐴥.

¹⁶𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴕𐴞𐴎𐴡𐴌 𐴁𐴝𐴥𐴘𐴧𐴠 𐴀𐴠𐴕𐴊𐴞𐴓𐴧𐴝 𐴒𐴟𐴕𐴝𐴤 𐴒𐴡𐴌𐴠𐴥𐴌 𐴊𐴠 𐴊𐴠𐴑𐴠𐴥 𐴎𐴠 𐴒𐴟𐴕𐴝𐴤𐴘𐴠 𐴔𐴡𐴦𐴃𐴢 𐴕𐴟 𐴀𐴝𐴕𐴠𐴤, 𐴃𐴡𐴥𐴀𐴘𐴓𐴠 𐴀𐴞𐴥𐴃𐴠 𐴊𐴟𐴖𐴝 𐴒𐴡𐴙𐴓𐴧𐴠𐴥 𐴀𐴝𐴓𐴧𐴝𐴘𐴠 𐴇𐴠𐴥 𐴁𐴝𐴥𐴘𐴡𐴌𐴠 𐴎𐴞𐴕𐴊𐴞𐴒𐴞 𐴊𐴞𐴦𐴁𐴡. 𐴀𐴝𐴀𐴛 𐴒𐴟𐴕𐴝𐴤 𐴖𐴝𐴀𐴕𐴡𐴌 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠 𐴎𐴠 𐴒𐴟𐴕𐴝𐴤𐴘𐴠 𐴔𐴡𐴦𐴃𐴢 𐴕𐴟 𐴀𐴝𐴕𐴠𐴤. 𐴔𐴡𐴦𐴃𐴢 𐴀𐴝𐴕𐴠𐴤 𐴊𐴠 𐴒𐴟𐴕𐴝𐴤 𐴘𐴡𐴥 𐴀𐴝𐴏𐴠𐴤, 𐴀𐴝𐴀𐴛 𐴇𐴠𐴥𐴕𐴊𐴞𐴓𐴧𐴝 𐴒𐴟𐴕𐴝𐴤 𐴓𐴧𐴝 𐴊𐴟𐴖𐴝 𐴒𐴡𐴙𐴃𐴧𐴡𐴥 𐴈𐴡𐴀𐴙𐴌 𐴊𐴠 𐴕𐴡.¹⁷𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴑𐴟𐴈𐴝𐴔 𐴒𐴟𐴕𐴝𐴤, 𐴔𐴡𐴕𐴃𐴡𐴌 𐴔𐴡𐴦𐴃𐴢 𐴕𐴟 𐴀𐴝𐴕𐴠𐴤 𐴊𐴠 𐴒𐴟𐴕𐴝𐴤 𐴘𐴡𐴥 𐴀𐴝𐴏𐴠𐴤.

¹⁸𐴀𐴝𐴣𐴀𐴌𐴝 𐴎𐴝𐴕𐴞, 𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴒𐴞𐴘𐴡𐴘 𐴀𐴞𐴥𐴃𐴠 𐴒𐴟𐴕𐴝𐴤𐴃𐴢 𐴉𐴡𐴌𐴞 𐴕𐴡 𐴃𐴝𐴥𐴑𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴉𐴟𐴖𐴝𐴘𐴠 𐴀𐴞𐴥𐴃𐴝𐴌𐴠 𐴈𐴠𐴥𐴉𐴝𐴎𐴡𐴃𐴢 𐴌𐴝𐴑𐴠𐴥, 𐴀𐴝𐴦𐴌 𐴀𐴞𐴁𐴞𐴓𐴞𐴥𐴐𐴠 𐴀𐴞𐴥𐴃𐴝𐴌𐴠 𐴏𐴟𐴥𐴘 𐴕𐴡 𐴉𐴝𐴌𐴠.¹⁹𐴀𐴝𐴣𐴀𐴌𐴝 𐴘𐴝𐴀𐴕 𐴀𐴡𐴥 𐴎𐴝𐴕𐴞 𐴊𐴠 𐴑𐴞, 𐴀𐴝𐴣𐴀𐴌𐴝 𐴀𐴝𐴓𐴧𐴝𐴌, 𐴀𐴝𐴦𐴌 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴀𐴞𐴁𐴞𐴓𐴞𐴥𐴐𐴡𐴌 𐴑𐴡𐴁𐴎𐴝𐴃𐴢 𐴀𐴝𐴏𐴠𐴤.²⁰𐴀𐴝𐴣𐴀𐴌𐴝 𐴀𐴝𐴌𐴡𐴤 𐴎𐴝𐴕𐴞 𐴊𐴠 𐴑𐴞, 𐴀𐴝𐴓𐴧𐴝𐴌 𐴉𐴟𐴖𐴝 𐴀𐴝𐴀𐴘𐴢 𐴀𐴝𐴣𐴀𐴌𐴝𐴌𐴠 𐴁𐴟𐴎𐴞𐴥𐴁𐴝𐴌 𐴃𐴡𐴖𐴉𐴞𐴥𐴑 𐴊𐴞𐴦𐴘𐴠𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴎𐴞𐴁𐴝𐴤 𐴏𐴡𐴥𐴘𐴧𐴞 𐴀𐴞𐴥𐴁𐴝𐴌𐴠 𐴎𐴝𐴕𐴞 𐴉𐴝𐴌𐴞. 𐴁𐴠𐴐𐴡𐴥𐴑 𐴀𐴝𐴣𐴀𐴌𐴝 𐴎𐴞𐴁𐴝𐴤 𐴏𐴡𐴥𐴘𐴧𐴞 𐴀𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴀𐴝𐴏𐴞𐴤, 𐴘𐴝𐴥𐴕𐴞 𐴀𐴞𐴥𐴁𐴝𐴌 𐴉𐴟𐴖𐴝 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠. 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴏𐴡𐴥𐴘𐴧𐴞 𐴀𐴝𐴓𐴧𐴝 𐴀𐴝𐴦𐴌 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞.

²¹𐴀𐴡𐴥 𐴀𐴝𐴊𐴡𐴙𐴅𐴧𐴝 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢, 𐴕𐴞𐴎𐴡𐴌𐴠𐴥 𐴔𐴟𐴃𐴧𐴞 𐴉𐴟𐴣𐴎𐴝𐴃𐴧𐴟 𐴁𐴝𐴏𐴝𐴘 𐴌𐴝𐴑𐴡𐴥.

The Word for the World International

https://app.library.bible/content/87faca8b51c22590