John21
1Hadơi dơgrữq vruãq nữn, Yàc Je-su vloh pa-tơviãq rùp drơi ga dơgrữq mơnuĩh mơgrũ pãq Tơsìq Ti-be-ri-at. Pitrai ròq pa-tơviãq rùp drơi la yơu nĩ:2Pơnõq nhũ iơu pơtõm sì gỡuq wỡq — Si-môn Pier, Thô-ma angãn la Đi-đim, Na-tha-na-en, mơnuĩh pơweh sì Ka-na dơlãp lơgar Ga-li-le, sigỡuq sì dơgrữq anàq lakơi Se-be-đe, sì dua aràc mơnuĩh mơgrũ tơmo dơlãp weh sì gah Pitrai hũ.3Si-môn Pier đơp sì pơnõq nhũ: “Hlãq nao dàc akàt.” Pơnõq nhũ drơ sì ung: “pơnõq hlãq kung ròq nao sì sơai.” Pơnõq nhũ tơviãq nao sì trỗt tơma sa voh ahòq, nữn pơnõq nhũ ôh mãq hũ hagĩq dơlãp mơlãp nữn.4Tũq nữn, dơlãp tũq trôh sơdah mư-ờp vloh, Yàc Je-su dỡc pãq gah tơsìq, bôh làiq yơu nữn, dơgrữq mơnuĩh mơgrũ ôh thơu làiq nữn la Yàc Je-su.5Yơu nữn Yàc Je-su tơnĩa pơnõq nhũ: “Ơ dơgrữq pơnõq anàq, ôh hũ kaya hagĩq pioh bõc lơĩh?” Pơnõq nhũ drơ sì Pitrai: “Ôh hũ.”6Vloh Pitrai pơđar pơnõq nhũ: “Iỡuq dàc sơnhuãl pãq gah hơnuãq ahòq, nữn pơnõq adơi sơai ròq hũ akàt.” Yơu nữn, pơnõq nhũ dàc sơnhuãl nữn pơlih ôh hũ tãl prãn katũc nhũ tơgùq kơyua hũ lũ viãq akàt prõng.7Hadơi nữn, mơnuĩh mơgrũ dih, la mơnuĩh nữn Yàc Je-su khiãng anĩt, đơp sì Pier: “Nữn la Yàc.” Yơu nữn, hadơi sì tũq Si-môn Pier hmỡq làiq nữn la Yàc, nữn ung mãq ao lơniãu bar rùp nhũ (kơyua ung ãn dòq tơlũc) vloh ung plõc trỗt tơsìq.8Dòq dơgrữq mơnuĩh mơgrũ tơmo nữn nao pãq dlòc ahòq tìt trôh, (kơyua pơnõq nhũ ôh dòq ơtah dì mưng gah, mĩn pơgãp dua rơtôh ku-đe) pơnõq nhũ katũc sơnhuãl tơgùq hũ lũ viãq akàt.9Hadơi nữn, dơlãp tũq pơnõq nhũ tơviãq mững ahòq đìq pãq gah, pơnõq nhũ bôh gơnãm apôi hadãc ãn khũ, gãm akàt sì bẽn ãn dòq ãp pãq dlòc apôi.10Yàc Je-su đơp sì pơnõq nhũ: “Iỡuq mãq va sa asĩt akàt nữn pơnõq adơi sơai vơhrơu mãq hũ mai pãq đĩ.”11Yơu nữn, Si-môn Pier đìq ahòq sì katũc sơnhuãl tơviãq pãq gah, vãq sơnhuãl la sa rơtôh lơmã plôh tlơu drơi akàt prõc. Sì bôh làiq hũ lũ akàt yơu nữn, nữn sơnhuãl song ôh tũq halơi tẽq.12Yàc Je-su đơp sì pơnõq nhũ: “Iỡuq mai vẽq pãq đĩ bõc mư-ờp”. Vơnãh tơmo, nữn ôh mơnuĩh mơgrũ halơi khĩn tơnĩa Pitrai: “Ung la asơi?” Pơnõq nhũ kung song thơu làiq nữn la Yàc.13Yàc Je-su trôh vloh mãq bẽn sì vrơi ga pơnõq nhũ, sì gãm akàt wỡq.14Nĩ la bãc tlơu vloh Yàc Je-su pa-tơviãq rùp ga dơgrữq mơnuĩh mơgrũ, mưng tũq Pitrai hũ hadiuq wỡq mưng kaya mơtai.15Hadơi sì tũq pơnõq nhũ bõc mư-ờp vloh, Yàc Je-su tơnĩa Si-môn Pier làiq: “Si-môn anàq Jãng hũ, hã khiãng anĩt pôgrũ rlao sì dơgrữq mơnuĩh nĩ lơĩh”? Ung drơ sì Pitrai làiq: “Ơ Yàc, viãq, Pitrai thơu làiq hlãq khiãng anĩt Pitrai.” Yàc Je-su đơp sì ung làiq: “Iỡuq ròc iãq vẽq dơgrữq avo anàq pôgrũ hũ.”16Pitrai vloh tanĩa wỡq ung bãc dua: “Si-môn anàq Jãng hũ, sơai hũ khiãng anĩt pôgrũ lơĩh”? Ung drơ sì Pitrai: “Viãq, Ơ Yàc; Pitrai thơu làiq hlãq khiãng anĩt Pitrai.” Pitrai đơp sì ung làiq: “Iỡuq dlãc dơgrữq avo pôgrũ hũ.”17Pitrai tơnĩa wỡq ung bãc tlơu: “Si-môn anàq Jãng hũ, sơai khiãng anĩt pôgrũ lơĩh?” Pier ka-ồq ka-ãn kơyua Pitrai ròq tơnĩa ung tlơu bãc: “Sơai khiãng anĩt pôgrũ lơĩh”? Ung drơ sì Pitrai: “Talơvãt Yàc, Pitrai thơu avih dơgrữq vruãq; Pitrai thơu làiq hlãq khiãng anĩt Pitrai.” Yàc Je-su đơp sì ung: “Iỡuq ròc chiẽp dơgrữq avo pôgrũ hũ.18Iỡuq viãq, iỡuq viãq, pôgrũ đơp sì sơai, dơlãp tũq sơai dòq dãm, sơai mĩn akãq krơi kơ-iãng drơi sì nao anĩh halơi drơi ưng, nữn dơlãp tũq sơai tơhã, sơai ròq pơh tơngãn drơi tơviãq, sì mơnuĩh tơmo ròq akãq kơ-iãng ga sơai vloh va sơai trôh anĩh nữn sơai ôh ưng.”19Pitrai đơp kaya nữn, pioh pơto pa-thơu mưng kaya mơtai yơu halơi nữn ung Pier ròq ngãq gơhluh Yàc Pô Lơngĩq. Đơp pơnuaĩq nữn vloh, Pitrai pơđar ung: “Iỡuq tui vẽq pôgrũ.”20Dơlãp tũq weh hadơi, Pier bôh mơnuĩh mơgrũ nữn Yàc Je-su anĩt duman ãn lơvàq nao tui hadơi, la mơnuĩh dơlãp tũq bõc tlãp, ròq pađiơ rùp di dơda Yàc Je-su vloh tơnĩa làiq: “Ơ Yàc, asơi la mơnuĩh jơdrãq dì Pitrai?”21Kơyua yơu nữn, dơlãp tũq bôh mơnuĩh nữn, Pier đơp sì Yàc Je-su: “Ơ Yàc, dòq mơnuĩh nĩ ròq tơviãq yơu halơi?”22Yàc Je-su đơp sì ung: “Mơyah làiq pôgrũ ưng mơnuĩh nữn miẽt dòq chàc tãl trôh tũq pôgrũ trôh, nữn ôh tơwãq kaya hagĩq trôh tãl sơai ôh? Sơai iỡuq nao tui pôgrũ.”23Yơu nữn la hũ pơnuaĩq nĩ tiẽng dơnãi di khrãh dơlãp dơgrữq adơi sơai làiq mơnuĩh mơgrũ nữn ròq ôh mơtai. Nữn Yàc Je-su ôh hũ đơp sì Pier làiq mơnuĩh mơgrũ nữn ròq ôh mơtai, nữn mĩn đơp: “Mơyah làiq pôgrũ ưng mơnuĩh nữn miẽt dòq wỡq tãl tũq pôgrũ trôh, nữn ôh tơwãq hagĩq trôh tãl sơai ôh.”24Nĩ viãq la mơnuĩh mơgrũ nữn ngãq chưng mưng dơgrữq vruãq nĩ, sì la mơnuĩh wãq wỡq dơgrữq vruãq nữn, nữn pơnõq drơi thơu làiq pơnuaĩq ngãq chưng mơnuĩh nữn hũ la tơpãq viãq.25Rlao nữn, kung hũ lũ vruãq tơmo nữn Yàc Je-su song ngãq, mưng dơgrữq vruãq nữn, mơyah làiq wãq angãn avih dơgrữq vruãq, nữn hlãq sơnơng vãq avih dun kơyua vloh viãq ôh hũ anĩh pioh rơmiãq avih dơgrữq vơ-ar hũ wãq tơviãq.
FAR EAST BROADCASTING COMPANY