AMÓS1
1Re' Amós i xwihik chi cha'jen tentzuun chupaam i ye'aab' Tecoa, je' wili i k'uhb'aal xuk'ul ruuk' i QaJaaw Dios, chikiij i aj Israel. Re' noq pan kiib' haab' i rub'an i yihk, re' noq xwihik chi reyil Judá i Uzías, re' noq xwihik chi reyil Israel i Jeroboam rak'uun i Joás.2Re' QaJaaw Dios ruuk' k'aah xuq'or chi je' wili:
Chinaah i yuuq' Sión wilik Jerusaleem: Re' taqe i chee' k'ahaam naakichiqiik, eh naakichiqiik i k'im wilkeeb' chuwach i yuuq' Carmelo.3Re' QaJaaw Dios je' wili xuq'or: Re' taqe i aj Damasco ma' k'isiin i mahk xkian, ruum i re' naa nuye'em taqe chutojariik i kimahk. Eh xkian i ti' k'axik reh i tinamiit Galaad je' rukab' noq inq'ojarik paam i trigo chi ch'ihch' xkian reh.4Ruum aj re', re' hin naa nukojom ruq'aq'al i rupaat i reey Hazael, eh naa ruk'ahtiik i paat i rub'an wii' taaq'anik i reey Ben-hadad.5Re' hin naa nuq'eb'em taqe i ru puertahiil i tinamit Damasco, naa nusacham kiwach, i aj wach k'ixkaab' Avén. Eh re' i wilik chi taaq'anik Bet-edén naa nusacham wach. Re' taqe i aj Siria naa kik'amariik reje pankowlaj kamanik pan tinamit Qir, inki.6Re' QaJaaw Dios je' wili xuq'or: Re' taqe i aj Gaza ma' k'isiin i mahk xkian, ruum aj re' naa nuye'em taqe chutojariik i kimahk. Re' keh xkik'ayej reje pankowlaj kamanik i nutinamiit pan tinamit Edom.7Ruum aj re', re' hin naa nukojom ruq'aq'al i tz'aq kotimaj wii' riij i tinamit Gaza, naa ruk'ahtiik taqe i paat imb'aan wii' i taaq'anik.8Eh naa wo' nusacham kiwach i aj Asdod. Je' wo' taqe i wilkeeb' chi taaq'anik chinaah i tinamit Ascalón, eh naa wo' nusacham kiwach tinamit Ecrón, je' wo' chu'nchel i aj filisteo, inki.9Re' QaJaaw Dios je' wili xuq'or: Re' taqe i aj Tiro ma' k'isiin i mahk xkian, ruum aj re', re' hin naa nuye'em taqe chi tojariik i kimahk. Ruum xkiq'asaj pankowlaj kamanik i nutinamiit ar Edom, ma' xkik'am ta kiib' pansuqkiil chi xa kas kichaaq' kiib' je' naq rukab' i kiyejaam wach.10Ruum aj re', re' hin naa nukojom ruq'aq'al i tz'aq kotimaj wii' riij i tinamit Tiro, eh naa ruk'ahtiik taqe i paat imb'aan wii' taaq'anik, inki.11Re' QaJaaw Dios je' wili xuq'or: Re' taqe i aj Edom ma' k'isiin i mahk xkian, ruum aj re' naa nuye'em taqe chutojariik i kimahk. Re' keh yohb'aal wach i kijosq'iil, ruuk' q'aslaj ch'ihch' xkikansaj i kas kichaaq' aj Israel ma' xkiketelaaj ta wach.12Ruum aj re', re' hin naa nu kojom ruq'aq'al i tinamit Temán, eh naa wo' ruk'ahtiik taqe i paat imb'aan wii' i taaq'anik, inki.13Re' QaJaaw Dios je' wili i xuq'or: Re' taqe i aj Amón ma' k'isiin i mahk xkian, ruum aj re' naa nuye'em taqe chutojariik i kimahk. Re' keh xkiyeew runimaal wach i kitinamiit xkixih chi q'aslaj ch'ihch' i kipaam taqe i yowaab' ixoq wilkeeb' ar Galaad.14Ruum aj re', re' hin naa nukojom ruq'aq'al i tz'aq kotimaj wii' riij i tinamit Rabá. Eh naa ruk'ahtiik taqe i paat imb'aan wii' taaq'anik. Xa je' chik ink'uloq kaq suut teew noq naa nutaq'aam chaloq i aj q'aq'ineel taq cha naah.15Eh re' i kireey re' taqe i nimaq wach kikamaj ruuk', naa kik'amariik reje pankowlaj kamanik, inki i Dios.1Re' QaJaaw Dios je' wili xuq'or: Re' taqe i aj Moab ma' k'isiin mahk xkian, ruum aj re' naa nuye'em taqe chutojariik i kimahk. Re' keh xkik'at xkikanaa' chi xa chaaj chik i rub'aqil i wilik naq chi reey ar Edom.2Ruum i re' naa nukojom ruq'aq'al i tinamit Moab, eh naa ruk'ahtiik taqe i paat imb'aan wii' i taaq'anik ar Queriot. Re' taqe i aj q'aq'ineel k'erlik kichii', eh naakixulem i tuun noq naa rukuxiik kikansam taqe i aj Moab.3Eh naa wesam i wilik chi reyil chikinaah, eh junkanteesjiik naa nub'anam ruuk' taqe i k'amal b'eeh inki i QaJaaw Dios.4Re' QaJaaw Dios je' wili xuq'or: Re' taqe i aj Judá ma' k'isiin mahk xkian ruum aj re' naa nuye'em taqe chutojariik i kimahk. Re' keh ma' xponik ta panaq' kiwach i nutijiniik. Eh ma' xkik'am ta naah i nuk'uhb'aal, re' chik taqe i tiyoox xkiloq'ej re' ixkiloq'ej chaloq i kimaam kati't.5Ruum aj re', re' hin naa nukojom ruq'aq'al i tinamit Judá, eh naa nuk'atam taqe i paat imb'aan wii' taaq'anik ar Jerusaleem, inki. Re' QaJaaw Dios xuq'or chi naa ruye'em taqe chutojariik i kimahk i aj Israel6Re' QaJaaw Dios je' wili i xuq'or: Re' taqe i aj Israel ma' k'isiin i mahk xkian ruum aj re' naa nuye'em taqe chutojariik i kimahk. Re' keh inkik'ayej reje ruuk' tumiin i ma' xta kimahk, eh xa ruuk' i junk'uhl chi xijab' inkik'ayej i neb'aa'.7Eh ma' mponik ta panaq'kiwach inkiye'q' panak'al taqe i neb'aa', ma' korik ta wach kik'ux kuuk' i ma' nimaq ta kiwach, eh re' irixooq i ajaab'ees irixoqb'eej wo' chik ak'uunb'ees. Ruuk' taqe i inki a'n re' re' inkesaj i wajaawriik.8Ma' k'isiin itz'ihy inkimol wach re' inkahnik kuuk' xa chi riij k'aas, kiokik haa' chi wi'k noq kilooqjiik taqe i tiyoox. Eh ruuk' i tumiin inkesaj reh i xama' xta wo' kimahk inkiloq' i k'ah laj ha' inkuk'ej chupaam i rupaat i kitiyoox.9Eh ma' nk'ulik ta chik pankik'ux noq xwesaj taqe reje pan kiye'aab' i aj amorreo, eh xnusach kiwach, atoob' ta chi xanimaq chik kooq, je' ninqaal kooq chee' chakaltee', eh kowlaj winaq taqe je' kikab' i tz'inuj.10Eh re' taq i hat aj Israel, re' hin xineesanik taq chaaweh Egipto, ka'winaq haab' xat nub'esaj taq chaloq chupaam i ye'aab' chiq yuuq', reh chi xnuyeew taq aweh i kiye'aab' i aj amorreo.11Re' hin korik taq i nuq'or aweh chi chaxilak taq i hat wilik i xnukoj chi jalal nuq'oral. Eh xnusik' kiwach i k'ijolaq chi xi kahnik panukamaj chi ma' yok'ooj taj i rismaal kinaah, inki i QaJaaw Dios.12Eh re' taq i hat xamin taqe i k'ijool re' re' chi ruuk'jiik i k'ah laj ha' inxohk'risanik, eh ma' xayeew ta taq q'ab' keh i jalal nuq'oral chi xkiq'or rib'iral i nub'ihnaal.13Ruum taq i xa a'n re' re' naa nuye'em taq i ti' k'axik cha naah, naa taq aqahb'aniik ruum i ruti'kiil je' rukab' i choqik i rub'an i kareta noq ahl i trigo rihqaam.14Eh re' neerumol chi elik xama' naa ta wo' ruko'leem riib', eh re' i kow riib' naa rukahniik chi ma' xta raansil. Eh re' i kow riib' xama' naa ta wo' ruko'leem riib' chuwach i ti'.15Eh ni xata re' inchol peleto ruuk' i flecha naa ruko'leem riib', ni xata re' i kow inajiminik, eh ni xata re' inarumolom chi elik chi riij i kawayú naa ruko'leem riib'.16Chupaam taqe i q'iij re' re', re' i soldado q'e' kow riib' chi q'aq'inik naa ruq'eb'em kahnoq i ruch'ihch' reh q'aq'inik noq naa rumolom chi elik, inki i Dios. Re' i xuq'or i jalal ruq'oral i Dios1Hat taq aj Israel chab'iraj taq i ruq'or chawiij i QaJaaw Dios chawunchelaal i xat risaj taq chaloq Egipto je' wili i xuq'or:2Eh xa re' wo' naq taq i hat xnusik' taq chaawach Chi kixilak i tinamit wach ak'al. Ruum aj re' naa taq kaat nuye'em chutojariik amahk ruum i ma' k'isa yiib' wach na'ojb'al taq i na a'n, inki.3¿Mi neerub'an chi neenkuhch'ileej kiib' i ki'ib' chi ma' nkaaj ta kiwach?4Eh ¿Mi neeruk'er chii' kaq b'ahlam panch'ahn noq komajaa' i ruchop i rutiib'? Eh ¿Mi neeruk'er chii' i rak'uun kaq b'ahlam parujuul noq komajaa' i ruchop i rutiib'?5Eh ¿Mi neenchoparik jino'q i tz'ikin wach ak'al rupinik i rub'an wila' ma' xkojarik i xirob'? Eh ¿Mi neenq'orik i xirob'aal mi ma' chih i xuchop?6Eh ¿Mi ma' neekiyo'jik re' i tinamit wila' inxuuljik i tuun pan jino'q tinamit? Eh ¿Mi wilik i ti' k'axik neenchalik chinaah i tinamit wila' ma' re' i Dios neen ye'wik reh?7Eh re' i QaJaaw Dios ma' xtaj i ti' k'axik i ruyeew chaloq chi ma' ta nee ruyeew chi naab'jik keh taqe i jalal ruq'oral.8Eh wixq'orik i kaq b'ahlam ¿Mi ma' neekiyo'jik re' tinamit? eh wila' xuq'or i QaJaaw Dios chi naa ruq'orariik rib'iral, ¿Mi neerub'an re' chi ma' nee ta q'orarik rib'iral? Re' rusachariik kiwach i aj Samaria9Re' taq i hat je' wili i naa taq aq'orom chupaam taqe paat imb'aan wii' taaq'anik ar Asdod, eh chupaam taqe i paat imb'aan wii' taaq'anik ar Egipto: Chamol taq awiib' chinaah i yuuq' Samaria, nee taq inawilow i tukinik wachiis, taqe i yiib' wach na'ojb'al k'achi' keeb' ar, tiko'q taq keh.10Re' QaJaaw Dios je' wili i xuq'or: Re' keh ma' inki a'n taj i korik inkimol wach pankipaat inki a'n wii' i taaq'anik inkiq'uch reh i kas kichaaq' pank'aah, inki.11Eh je' wili i ruq'or i QaJaaw Dios: Re' taqe i ki-ixowanik taq awach k'ul naa kichaliik naakich'ahaam i paat i nako'leej taq wii' awiib', eh naa kelq'aam i chib'ih taq aweh wilik chupaam taq aapaat.12Re' i QaJaaw Dios je' wili xuq'or: Re' cha'jen tentzun neeruq'uch i rutentzuun panchii' i kaq b'ahlam xa re' la' xa re' wo' ki'ib' chi rooq, i ruqox i xikin neeruq'uch. Je' wo' re' taq hat aj Israel, xakiib' ixib' wo' taq i naa ako'leem awiib' ar Samaria. Yu'naak kosuq taq hi'lik aweh chinaah taqe i holohaq ch'aht ar Damasco, inki.13Re' QaJaaw Dios nim rajaawriik je' wili i xuq'or: Re' taq i hat cha q'or taq rib'iral i ti' k'axik naakik'ulum taqe i riih rumaam i Jacob.14Eh re' hin naa nuye'em taqe chutojariik i kimahk i aj Israel ruum i yiib' wach na'ojb'al inki a'n Eh naa nuyojom kiartaal ar Bet-el, eh re' i kuk'aa' i artaal naakiyok'ariik naa kiq'ehb'iik wach ak'al.15Eh naa nusacham wach i kipaat kiwihik wii' pan siq'jil, i kipaat kiwihiik wii' pan q'ilej. Eh naa nusacham wach i kipaat marfil korjinaq wii', je' wo' i kipaat inki a'n wii' i taaq'anik, inki i QaJaaw Dios.1Chab'iraj taq i hat ixoq aj Samaria, je' taq akab' ixoq wakax wilkeeb' Basán inaq'uch taq i chib'ih keh i neb'aa', i nayeew taq panti' k'axik i ma' xta wilik keh. Eh inataq'aaj taq ab'ahiil chuk'amariik i k'ah laj ha', reh chi naawuk'ej taq.2Re' QaJaaw Dios xuq'or i korik ruuk' i rusantohiil, je' wili xuq'or: Eh je' naa ruuk' i lok lok laj ch'ihch' naa taq kaat nuk'amam reje je' rukab' noq inehteesjik i kar panha' ruuk' i k'isa lok lok laj ch'ihch'. Je' wo' re' i naa nub'anam keh taq awak'uun awixq'uun.3Eh naa kehteesjiik reje chupaam i paat inki a'n wii' taaq'anik naakimolom chi elik, ar naa kikutum reje kiib' chinaah i yuuq' Hermón, inki.4Hiy taq ar Bet-el, eh Gilgal cha a'n taq i mahk, cha a'n taq aq'et wachiil, hiy taq chak'at mayiij eqal eqal chikiwach i tiyoox pantaq wahq'eq, chak'am taq reje i ru lajeeb' sentabohiil i jinaj ketzal chi roox q'iij.5Hiy taq chayeew chi amayiij i kaxlanwi'k kojooj ch'amb'esb'al reh eh cha q'or rib'iral xa aha' yuuq' nik' nimaal taq amayiij xayeew, ruum je' taq re' imponik chawach i hat taq aj Israel, inki i Dios.6Re' hin xat nuyeew taq chi kuyariik awa' ahaa' chupaam taq aatinamiit, eh xnuyeew wo' i wi'jaleel chupaam taqe i kok' tinamit. Eh re' taq i hat ni xata ruum i re' xat chalik wo' chik taq wuuk', inki i QaJaaw Dios.7Eh ma' xnuyeew ta chik i jab' chuwach ixib' poh, re' noq komajaa' taq inasik' i wach atik. Wilik i tinamit xnuyeew wii' i jab', eh wilik i tinamit ma' xnuyeew ta wii' i jab'. Wilik xub'an wii' i jab', eh wilik i xi chiqik ruum ma' xub'an ta chik i jab'.8Re' taqe i tinamit xak'ul chik kiooj pantaq tokoom tinamit chi rusik'ariik kihaa', ruum i kichiqchi'iil. Eh re' taq i hat ni xata ruum taqe re' xat sutinik wo' chik taq wuuk', inki i Dios.9Eh xnuyeew wo' itz'a' laj teew taq cha naah, ruum i re' xi chiqik taq atik wilkeeb' taq panakoraal, xnuchiqsaj wo' taq aa-uuva. Eh re' taqe i nimaq chili'l xkik'ux taq i xaq aa-higo je' wo' hoq i xaq taq aa-olivo. Eh re' taq i hat ni xata ruum taqe re' xat sutinik wo' chik taq cho wuuk', inki i Dios.10Eh je' wili i xuq'or: Re' hin xnuyeew taq cha naah i ti' k'axik je' rukab' i xnuyeew chikinaah i aj Egipto. Xnukansaj taq awak'uun panq'aq'inik, eh chi xq'ucharik i kikawayu reh q'aq'inik kuum i aj ixowaal. Eh xkik'raaj ruchuhkiil taqe i kamnaq chupaam i kiye'aab'. Eh re' taq i hat ni xata ruum taqe re' xintohq'ik wo' chik taq animam, inki i Dios.11Re' hin wilik wo' naq i xnusach kiwach taq chaxilak ruuk' i ti' k'axik, je' rukab' noq xnusach kiwach i tinamit Sodoma, i Gomorra. Re' taq i hat xa je' chik rukab' noq inehteesjik iloq i ju'sii' wach q'aaq' noq xako'leej taq awiib'. Eh ni xata ruum taqe re' xat sutinik wo' chik taq wuuk'.12Re' hin naa taq kaat nuye'em chutojariik riij taq ayiib' wach na'ojb'al i na a'n re' taq i hat, hat taq aj Israel, cha yejaa' taq awiib' chi nuk'ulariik, ruum re' hin naa nuq'atwiik i q'orik taq cha naah, inki.13Re' i QaJaaw wili xyej-anik reh taqe inajt kinaah yuuq', re' reh xtz'uhkrisanik cho reh i teew, re' reh inye'wik chi naab'jik reh i winaq chib'ih jariik i naa rub'anam. Eh re' reh insutinik reh chi q'equm i saqum, eh re' reh xa aha' wilik chinaah chu'nchel i wach ak'al. Re' Dios nim rajaawriik, Re' Dios xq'orik chi riij i yot'oj k'uxliis1Re' taq i hat aj Israel chab'iraj taq i ruti'kiil ak'ux naa nuq'orom aweh panutz'uuy, re' naa nuq'orom taq chawiij chi je' wili:2Re' taq i hat aj Israel xaq'eb' taq i rusaqiil awach, ma' naa ta chik taq awuktiik. Xa q'eb' taq awiib' chupaam taq aa ye'aab', ma' awach ta chik i nuksanik taq cha weh.3Re' i QaJaaw Dios je' wili i xuq'or keh i aj Israel: Eh noq re' tinamiit nee rutaq'aaj reje chi q'aq'inik jino'q miil i ru soldado ach jinaj siento i naakisutiniik chaloq. Eh re' i nee rutaq'aaj jino'q siento i ru soldado ach lajeeb' i naakisutiniik chaloq, inki.4Eh je' wo' chik wili i xuq'or i QaJaaw Dios keh i aj Israel: Kinasik' taq i hin nee taq inwihik ak'achariik.5Mat'ooj taq Bet-el, eh Gilgal. Eh mat'ooj taq Beerseba, ruum re' taqe i aj Gilgal naa kik'amariik reje pankowlaj kamanik pan tokoom tinamit ma' naa ta rik'iik wach, eh re' taqe i aj Bet-el naa rusachariik kiwach, inki.6Kinasik' taq i hin nee taq inwihik ak'achariik, eh wila' ma' xinasik' taq naa nutaq'aam taq cha naah i ti' k'axik, i hat taq aj Israel chi je' jinaj runimaal q'aaq'. Eh ma' awach ta jino'q i aj Bet-el naa rub'anam ruchupariik, inki Dios.7Xiik' naah ti'kiil i naa taq ak'ulum i hat ruum xasutej taq chi yiib' wach i korik, eh inawesaj taq i rajaawriik i ma' xta reet chi b'anarik.8Chasik' taq i QaJaaw Dios xyej-anik keh taqe i ch'umiil, insutinik reh i q'equm chi saqum, insutinik reh chi saqum i q'equm. Re' ineesanik cho reh i jab' chinaah i palaw, eh i ruyeew chaloq chinaah chu'nchel i wach ak'al, re' i Dios nim rajaawriik rub'ihnaal.9Re' reh ineesanik i runimaal kiwach taqe i nimaq kiwach. Eh xusach kiwach i paat inako'leej naq taq wii' awiib' i hat taq aj Israel.10Re' taq i hat ti' taq i naa ak'ulum ruum i nawixowaaj taq wach inko'linik riij i korik. Eh ma' nawaaj ta taq wach inq'orik reh i korik noq imb'aan i q'ataj q'orik11Eh ruum chi ma' xponik ta taq panaq'awach taqe i neb'aa' k'ih taq i tojb'al riij i ki trigo xapahqaaj. Ruum aj re' ma' naa ta taq aak'achariik chupaam taqe i paat i ab'aj korjinaq wii'. Eh ma' nee ta wo' taq inawuk'ej aweh i riis i ki uuva.12Re' hin weht'al chu'nchel i yiib' wach na'ojb'al taq i na a'n, je' wo' taq amahk ma' xata pajooj taq i na a'n. Eh i nak'am taq i chib'ih keh i neb'aa' ruuk' ileq', eh noq tiooj taq pa'lojoq pan q'atb'al q'orik inatoj taq reh chi ma' nelik ta korik i neb'aa'.13Eh re' i wilik runa'ojb'al ma' teheeh ta wach chi q'orik, ruum yu'naak ma' b'aan ta chik i q'ataj q'orik parub'ehel.14Re' taq i hat re' i holohik laj na'ojb'al cha sik' reh chi nee wihik taq ak'achariik, eh korik taq i neenaq'or, re' i QaJaaw Dios nim rajaawriik neen wihik taq awuuk'.15Eh cha kanaa' taq i yiib' wach na'ojb'al, re' taq chik i holohik cha a'n. Eh cha a'n taq i q'ataj q'orik parub'ehel konee oon naq i ruketelaaj taq awach i Dios nim rajaawriik i hat taq cho ruqox i aj Israel.16Re' i QaJaaw Dios nim rajaawriik je' wili i xuq'or: Chu'nchel i naa kiwihiik pank'ayb'al pantaq b'eeh naa koq'iim ruum i ti' k'axik. Eh naakiyuq'eem kuuk' i xa panab'iix kikamanik, taqe i nimaq wach kikamaj reh chi junokiik taqe chi oq'ik.17Eh chupaam chu'nchel i ye'aab' tikooj wii' uuva naa wo' ruwihiik i ma' k'isa oq'ik ruum re' hin naa nuye'em i nujosq'iil ar, inki.18Q'e' taq ti' i naa ak'ulum i xanawaaj taq chik chi nee ruyeew i rujosq'iil i QaJaaw Dios. ¿Mi nawaaj taq re' chi neemponik chi jumehq'iil i q'iij re' re'? eh re' i q'iij re' re', runimaal q'equm taq cha weh ma' re' ta saqum.19Ruum na' chub'an i re' je' rukab' noq imb'aan elik chuwach i kaq b'ahlam eh inooj k'ularoq i josq'laj oso. Eh je' rukab' noq insutinik cho parupaat jino'q i winaq i ruyeew i koq i q'ab' wach tz'aq eh inti'arik cho ruum i aaq'.20Korik noq na' chuyeew chaloq i rujosq'iil i QaJaaw Dios je' runimaal q'equm ma' saqum ta k'isinoq.21Re' QaJaaw Dios je' wili i xuq'or: Re' hin ma' mponik ta chi nuwach i moloj iib', ninq'iij, i loq'inik taq i na a'n, i ruyoj nuk'ux.22Re' hin ma' nee ta taq i nuk'ul aweh ak'atoj mayiij, inaq'wach taq atik, i rak'uun taq awaakaax q'e' q'ina' nee nak'am taq cho chi nuwach reh chi nee wo' chik i nak'am taq awiib' panotob'il wuuk'.23Je' re' noq maa a'n taq chik chi nuwach atz'uuy taq i na a'n Ma' waaj ta chik b'iram i q'ooj i na a'n taq ruuk' aawarpa24Re' la' taq i korik cha a'n, ruch'ihil i holohik chi b'anarik. Eh je'-oq rooq ha', je'-oq k'achlik ha' ma' jaruuj inchiqik.25Hat taq aj Israel mi xayeew taq cho amayiij ¿Mi xak'am taq chaloq re' amayiij chi nuwach noq xat b'ehik taq chaloq panchiq yuuq' chuwach i ka'winaq haab'?26Re' la' taq i hat xawihqaaj taq chaloq i rupaat aatiyoox Moloc, je' wo' taq aatiyoox Quiiún, je' wo' i ch'umiil xayejaa' taq chi rehtalil taq aatiyoox, re' wo' taqe re' xayeew taq kiloq'il.27Ruum i re' naa nuye'em q'ab' chi naa taq ak'amariik reje pankowlaj kamanik ko chi junch'aq i tinamit Damasco, inki i Dios, nim rajaawriik. Re' ruq'orariik i rusachariik kiwach i aj Israel1Re' taqe suq wilkeeb' ar Sión, re' taqe i ch'iklik kik'ux chinaah i yuuq' Samaria q'e' ti' i naakik'ulum. Re' taqe i ki'ib' chi tinamit re' re' q'e' nimaq kiwach chi kixilak i tinamit wilkeeb' ar, eh ar inkisik' rukowiil kik'ux i aj Israel2Hiy taq ar Calne chawil taq chaloq. Eh kore' taq nee tiooj ar Hamat, nee taq tiqajik qohoq Gat i wilkeeb' wii' i aj filisteo. ¿Mi q'e' taq hat chihooj re' hat chikiwach taqe re'? ¿Mi q'e' chihooj re' taq aatinamiit i hat chikiwach i tinamit re' re'?3Re' taq i hat ma' nawaaj ta naq chi neemponik i q'iij reh i ti' k'axik, xa re' la' chalik taq chik i rub'an cha naah i ti' k'axik.4Re' taq i hat xasuq taq chik hi'lik aweh chuwach ach'aht marfil korjinaq wii'. Eh i nak'ux taq i rak'uun aatentzuun, i rak'uun aa-wakax q'e' q'ina' inawesaj taq cho pankoraal.5Re' taq i hat inaxulej taq aa-suub' xama' inkan ta wo' chi riij taq i naxulej, eh inayejaa' taq i xa reh reh wach chi q'ooj inawaaj naq taq a'nam aweh i xub'an i reey David.6Re' taq i hat i naawuk'ej i riis uuva panimaq kulk eh re' taqe i q'e' k'ih tz'aaq inkohnik laj iq'oom taq inakoj, ma' xta taq inawaaj reh chi k'ahchi' runeb'a'riik taq aatinamiit7Re' taq i hat peet naa ak'amariik reje pan kowlaj kamanik pan tokoom tinamiit, naa rusahchiik wach taq aninq'iij i na a'n re' inareq naq taq wii' i rusuqkiil ak'ux.8Re' i QaJaaw Dios nim rajaawriik xuq'or i xti korik chi je' wili: Re' hin ma' imponik ta chi nuwach chi nkinimb'isaj kiib' i riih rumaam i Jacob. Eh ma' imponik ta chi nuwach taqe i paat imb'aan wii' i q'ataj q'orik, ruum aj re' naa nuq'asam i kitinamiit pan kiq'ab' i aj ixowaal, je' wo' chu'nchel i wilkeeb' ar, inki.9Je' re' noq atoob' ta nee kikahnik lajeeb'-oq chi winaq, pampaat xanaa wo' rukuxiik kikimiik.10Eh noq naa rokiik pampaat jino'q i awach reh i kamnaq chi rehtesjiik i ruti'jolal ree ruk'atariik, je' wili i naa ruq'orom i koq reh pampaat i xkahnik chi k'achlik: ¿Mi ko wilik chik jino'q i xkahnik awuuk' chi k'achlik? inko'q. Ma' awach ta chik ach wo' re' hin, Inko'q chaloq Ma' chih chik aq'or ruum nee-oq inaq'or i b'ih i QaJaaw Dios, inuchjoq.11Ruum re' i QaJaaw Dios ruq'orom chi naa rusacham kiwach chu'nchel chi je' nimaq paat chi je' kok' paat.12¿Mi nee nkian re' i kawáyu johtik chuwach taqe i saqrehp ab'aj? ¿Mi neemb'aan re' i b'anaj arado nah i palaw? Wila' ma' neemb'aan i je' re' ¿Chib'ih reet noq xasutej taq chi reh kaansanik i holohik laj na'ojb'al? ¿Chib'ih reet noq xasutej taq chi ma' holohik taj i korik?13Re' taq i hat insuuqb'ik taq ak'ux ruuk' i xama' xta ruk'am chaloq, je' taq wili inaq'or: Re' hoj xachiqib'il qiib' xqareq i qajaawriik, tiki taq.14Re' i QaJaaw Dios nim rajaawriik je' wilik i xuq'or: Re' taq i hat aj Israel, naa nuk'amam taq cho cha naah jino'q i tinamit chi naa taq rusacham awach, ar naa rutoq'aam reje Hamat pantz'eet reh i rookb'aal q'iij, eh naa ruponiik chi chii' i rooq ha' Arabá pansak'aaj reh i rokb'aal q'iij, inki. Re' ixib' chi ti' k'axik xk'uhtjik reh i Amós parusaq wirik1Re' Amós je' wilik xuq'or: Re' hin i xuk'uhtaaj weh i QaJaaw Dios panusaq wiriik chi k'ahchi' rutz'uhkrisam i ma' k'isa nimaq chili'l. Reh chi naa kik'uxum i wach chu'nchel i tik, re' i nelik koq'uun, re' noq elinaq chik inye'arik ree i reey.2Eh noq re' taqe nimaq chili'l xkitz'ap wach i tik, je' wili i xnuq'or reh i QaJaaw Dios: Jaaw cha kuy qamahk i hoj, hoj aj Israel, hoj riih rumaam i Jacob maayeew tii chi qanaah i ti' k'axik re' re' ruum ma' nee ta nqa a'n ruko'ljiik qiib', ruum xama' hoj ta wo' tii k'ih.3Eh re' i QaJaaw Dios xujal wach i rukapeb'aal, je' wili i xuq'or: Ma' naa ta nuye'em qohoq i ti' k'axik re' re', inki.4Eh re' i QaJaaw Dios xuk'uhtaaj wo' chik weh panusaq wiriik chi xuqasaj chaloq i q'aaq' pan taxaaj yohb'aal wach i qopik i rub'an reh tojb'al kimahk i tinamit. Eh ruum i rutz'a'iil xchiqik chik i palaw, je' wo' taqe i yuuq' k'ixkaab'.5Eh re' i hin je' wili i xnuq'or: Jaaw cha kuy maayeew tii cho chi qanaah i ti' k'axik re' re' i hoj, hoj riih rumaam i Jacob ruum ma' nee ta qako'leej qiib' chuwach, ruum xama' hoj ta wo' tii k'ih, kinki.6Eh re' i QaJaaw Dios xujal wach i rukapeb'aal je' wili xuq'or: Re' hin ma' naa ta nuye'em i ti' k'axik re' re', inki.7Re' i QaJaaw Dios je' wo' chik wili i xuk'uhtaaj weh panusaq wiriik: Re' QaJaaw pa'lik i koq chuwach i tz'aq pab'amaj chi korik ruuk' plomo eh ruyohq'eem wo' chik jinaj i plomo b'amb'al tz'aq.8Eh re' i QaJaaw Dios xupahqaaj b'ila' weh chi je' wili:
Amós ¿chib'ih jariik i k'ahchi' awilom wach? inki.
Re' hin je' wili xnuq'or reh:
Jinaj i plomo b'amb'al tz'aq ayohq'eem, kinki reh.
Je' wili i xuq'or weh i reh:
Ruuk' aj i plomo wili naa nupajam i nutinamiit Israel, ruum re' hin ma' naa ta chik nukuyum kimahk nik'-oq najtiil, inki.9Re' taqe i ye'aab' kiloq'inik wii' i riih rumaam i Isaac naa rusachariik kiwach, eh re' taqe i paat kiloq'inik wii' i riih rumaam i Israel naakiyojib'iik. Eh naa nusacham wach ruuk' q'aslaj ch'ihch' i Jeroboam, haa' taqe i rak'uun rixq'uun.10Re' i Amasías k'amal kib'eeh aj tiij ar Bet-el je' wili i xutaq'aaj ruq'orariik reh i Jeroboam kireey i aj Israel: Re' Amós i ruyeq' panak'al awajaawriik, ma' k'isiin i ruq'or keh i tinamit chawiij. Re' taqe i tinamit ma' nkikuy ta chik i ruq'or.11Ruum re' reh je' wili i ruq'or: Re' i Jeroboam naa rukanteesjiik ruuk' q'aslaj ch'ihch', eh chu'nchel i tinamit Israel naa kik'amariik reje pankowlaj kamanik pan tokoom tinamit, inki.12Eh re' Amasías je' wili i xuq'or reh i Amós:
Re' hat inaq'or chi wilik ink'uhtjik aweh, eleen reje ayu' reh chi ma' nee ta tikimik hiy ar Judá ar neena a'n awa' ahaa', eh neenaq'or i ruq'oral i Dios.13Ayu' Bet-el matchalik chik chuq'orariik i ruq'oral i Dios, ruum re' i ye'aab' wili re' inloq'inik wii' i reey, eh re' i wilik wii' i ru nimlaj paat, inki.14Eh re' Amós je' wili i xuq'or reh Amasías:
Re' hin ma' hin ta jalal ruq'oral i Dios, ma' re' ta wo' re' nukamaj. Xa ruuk' la' tii nuk'isatz'aaq inkiyeew chi riij i cha'jinik tentzun inwik'saj wii' i q'iij, eh xa ruuk' i sik'ij higo i nub'an pantaq ch'ahn.15Xa re' la' re' i QaJaaw Dios x-esanik cho weh chi cha'jinik tentzun je' wili i xuq'or weh: Yu'naak hiy cha q'or keh i nutinamiit Israel chi ma' holohik ta kib'anik, inki.16Eh re' hat inab'iraj i ruq'oral i QaJaaw Dios, inaq'or chi ma' naa ta nuq'orom keh i aj Israel chib'ih naa rub'anam i Dios kuuk'. Eh ma' nawaaj taj chi wilik i naa nuq'orom chikiij i riih rumaam i Isaac, inki.17Ruum aj re' je' wili i xuq'or i QaJaaw Dios chawiij: Re' awehk'een naa rub'anam i k'oyomal pan tinamit, eh re' taqe awak'uun awixq'uun naa kikanteesjiik ruuk' q'aslaj ch'ihch', re' awak'aal naa ruch'aqib'iik keh i tokoom. Eh re' hat ar naa akimiik chi kixilak i ch'uwa' kiwach, re' taqe i aj Israel naa kik'amariik reje pan tokoom tinamit, inki. Re' jinaj chakach chi wach tik mu'uun xa q'an chik xk'uhtjik reh i Amós1Eh re' i QaJaaw Dios jinaj chik chakach i wach i tik mu'uun xiik' naah q'aniil xuk'uhtaaj weh panusaq wiriik.2Eh re' Dios xupahqaaj weh chi je' wili: Amós ¿chib'ih jariik i k'ahchi' awilom wach? inki.
Re' hin jinaj chakach i wach i tik mu'uun xiik' naah q'aniil k'ahchi' wilom wach, kinki reh.
Re' taqe aj Israel je' kiq'aniil taqe i wach i tik re' re', xa ilook' chik i nuyeew taqe chutojariik i kimahk, inki.3Eh re' taqe i tz'uuy imb'aan chupaam i paat imb'aan wii' i q'ataj q'orik naa rusutiniik chi oq'ik. Eh ma' k'isiin taqe i naa kikanteesjiik ar, re' i kiti'jolal naa rukutariik cho rij paat chi ma' eht'alimaj, inki. Xa ilook' chik inchalik i ti' k'axik chikinaah i aj Israel4Chab'iraj taq i naa nuq'orom i hat i ti minwik taq keh panti' k'axik i xama' nimaq ta kiwach, eh inaq'uch taq i chib'ih keh i neb'aa'.5Re' taq i hat je' taq wili inaq'or: ¿Kojaruuj chik i ninq'iij reh i ak' poh? ¿Kojaruuj chik i ninq'iij reh i hi'limb'al q'iij reh chi neenqak'ayej i qatrigo taqe naq'wach i qatik chi k'ih neen qayeew wii' nee nqak'isiimb'isaj i qapajb'aal, eh ma' manlik taj i qapexu neenqa a'n?6Eh naa qakanaam chi ma' xta chik chib'ih keh i neb'aa', korehtaal inkik'ayej kiib' quuk' tojb'al reh i kik'aas atoob' ta xa junk'uhl chi xijab' i kik'aas. Eh k'ih naa qak'ayem wii' keh i ruyib'kiil wach i trigo, tiki taq.7Re' QaJaaw Dios ruq'orom i xti korik, je' wili i xuq'or: Re' hin ma' jaruuj naa rusahchiik panuk'ux chi xkinimb'isaj kiwach i riih rumaam i Jacob, je' wo' hoq i xkian, inki.8¿Mi ma' k'uyu'jik re' i wach ak'al ruum i xkian re' re'? ¿Mi ma' nee kioq'ik re' i tinamit ruuk' i ti' k'axik naakik'ulum? Eh chu'nchel i wach ak'al naa ruqajiik naa rujohtiik je' rukab' i rub'an i rub'ohl i nim ha' Nilo wilik ar Egipto.9Re' QaJaaw Dios je' wili i xuq'or: Chupaam taqe i q'iij re' re' naa nuq'equm b'risam wach i q'iij manlik kab'lajora, eh manlik parusaqumaal wach i q'iij naa ruq'equumriik chu'nchel i wach ak'al.10Re' taq aa-ninq'iij naa nusutem chi ruti'kiil k'uxliis, re' aa-tz'uuy naa nusutem chi oq'ik, je' rukab' noq inooq'jik i kamnaq. Eh naa taq akojom aq'eq' so', eh chi naa taq ajoyom i rismaal aanaah, naa taq awoq'iim, je' rukab' noq inoq'ik ixoq xkimik i rak'uun xa jinaj chuwach. Chu'nchel naa rusutiniik chi ruti'kiil k'uxliis, inki.11Re' i QaJaaw Dios je' wili i xuq'or: K'ulik iloq reh i q'iij chi re' hin naa nutaq'aam i wi'jaleel chinaah chu'nchel i tinamiit wach ak'al. Xa re' la' ma' re' ta wi'jaleel reh wi'k ha', wi'jaleel la' reh i rib'irjiik i nuq'oral.12Re' keh xak'ul chik naa kojiik pansak'aaj reh i rookb'aal q'iij, eh pareelb'aal i q'iij, nah taq palaw chi rusik'ariik i nuq'oral naa naq chik kaajwaam rib'irjiik xa re' la' xama' naa ta wo' chik kireqem.13Re' taqe i holohaq xq'un, taqe i kowlaj k'ijool naakiq'ehb'iik wach ak'al ruum i ruchiqkaal kichii' reh i rib'irjiik i nuq'oral.14Eh re' taqe i kiq'orik i korik parub'ihnaal i tiyoox wilik Samaria. Re' taqe i kiq'orik parub'ihnaal i tiyoox wilik Dan, taqe i kiq'orik pankib'ihnaal i kitiyoox i aj Beerseba, naa rusachariik kiwach, inki. Ma' wach ta jino'q i neeruko'leej riib' chuwach i ti' k'axik i nee ruyeew i Dios1Re' Amós je' wili i xuq'or: Re' hin xwilow wach i QaJaaw Dios chi pa'lik i koq wach artaal je' wili i xuq'or weh:
Chak'uyu'saj chi kow i paat kinlooq'jik wii' korehtaal inxereb'ik chikinaah chu'nchel i tinamit. Eh awach i ma' naa ta rukimiik ruum i re', ruuk' i q'aslaj ch'ihch' naa rukimiik, reh chi ma' jino'q i naa ruko'leem riib'.2Eh atoob' ta naq nee nkikeb'aa' kiib' pan chaam laj jul naa wo' nureqem taqe ar, atoob' ta naq neenooj kikeb'aa' kiib' kopan taxaaj naa wo' nureqem taqe ar.3Atoob' ta naq neenooj kikeb'aa' kiib' chinaah inajt naah yuuq' Carmelo naa wo' i nureqem taqe ar, atoob' ta naq neenooj kikeb'aa' kiib' ko paruchamiil i palaw neenutaq'aaj reje i josq'laj chikop reh chi nee kik'uxarik ar.4Atoob' ta nee kik'amarik reje pan tokoom tinamit, wilik taqe i naa nutaq'aam reje, reh chi nee kikanteesjik ruuk' q'aslaj ch'ihch'. Eh naa taqe nuye'em panti' k'axik ma' re' ta otob'il i naa nub'anam keh, inki.5Eh re' i QaJaaw Dios nim rajaawriik, noq inq'orik ink'uyu'jik i wach ak'al, kioq'ik chu'nchel i k'achareel wilkeeb' chinaah. Re' i wach ak'al naa ruqajiik, naa rujohtiik, je' rukab' i rub'an i rub'ohl i nim ha' Nilo ar Egipto.6Re' i QaJaaw Dios xuyejaa' i ruye'aab' pan taxaaj, eh xuyejaa' i taxaaj chi taklik cho chinaah i wach ak'al. Eh re' reh ineesanik chaloq i jab' chinaah i palaw, ruuk' i re' i rut'aqsaj chu'nchel i wach ak'al, QaJaaw Dios i rub'ihnaal.7Re' i QaJaaw Dios je' wili i xuq'or keh i aj Israel: Chi wee hin eliik taq awach kuuk' i aj Etiopía, nik' wach noq xat wesaj taq chaloq i hat Egipto, je' wo' re' noq xwesaj taqe cho Creta i aj filisteo, je' wo' re' noq xwesaj taqe cho Qir i aj arameo, inki.8Eh je' wo' chik wili i xuq'or: Re' hin inwilow chu'nchel i mahk inki a'n i tinamit, ruum aj re', naa nusacham kiwach chinaah i wach ak'al. Xa re' la' ma' naa ta rukuxiik nusacham kiwach taqe i riih rumaam i Jacob.9Re' hin naa nuye'em q'ab' chi naa rub'aan ti' k'axik keh i aj Israel kuum i tokoom tinamit, je' rukab' imb'aan reh i trigo noq inkichahchuuj wach chupaam i tz'irb'al wach, eh ma' jino'q inaq'wach inq'ehb'ik wach ak'al.10Re' taqe i nutinamiit kib'anik reh i mahk, ruuk' q'aslaj ch'ihch' naa kikimiik: Re' taqe i kiq'orik reh chi je' wili: Ma' jaruuj nee qoh k'ulik rureq i ti' k'axik ayu' inki taqe, inki. Re' Dios xuq'or chi naa wo' chik ruko'leem i tinamit Israel11Re' i QaJaaw Dios je' wili i xuq'or: Re' hin naa nukojom chi reyil i riih rumaam i reey David Naa nub'anam kuuk' aj Israel je' rukab' noq inyejeb'jik wo' chik i paat yojinaq naq. Naa wo' chik wuksam, naa wo' chik ruwihiik runimaal wach je' rukab' i pampeet.12Re' chi re' taqe i kiqox i aj Edom, eh chu'nchel i tinamit wihinaq taqe chi nutinamiit naa wo' chik kehchaam i ye'aab' Israel, inki. Re' wili naa rojiik eloq wach ruum re' i QaJaaw Dios xq'orik.13Eh je' wili i xuq'or: Naa ruponiik i q'iij noq re' taqe i tik naa kiwachiniik chi korik, xakomajaa' wo' inkikohlaaj rumolariik i wach i naa wo' chik kokiik chi iwik. Eh xakomajaa' wo' inkikohlaaj ruyitz'ariik i uuva naa wo' chik kokiik chi iwik. Re' taqe i uuva wataq yuuq' k'ixkaab', ma' k'isiin i riis naa ruwihiik xa je' chik rooq ha'.14Eh re' hin naa wo' chik wesam taqe chaloq i nutinamiit Israel pan tokoom tinamit, naa wo' chik kiyejaam taqe i tinamit yojinaq, ar wo' chik naakipatiniik. Eh naa kitikim ki uuva naa kuk'em i riis, eh naa kitikim chib'ih keh pan kikoraal naa wo' kik'uxum i wach.15Re' hin naa wo' chik nuye'em taqe pan kiye'aab' re' i nuye'em cho keh najtir. Eh ma' awach ta chik naa resaniik keh chupaam i kiye'aab' xnuyeew, inki i QaJaaw Dios.
Chinaah i yuuq' Sión wilik Jerusaleem: Re' taqe i chee' k'ahaam naakichiqiik, eh naakichiqiik i k'im wilkeeb' chuwach i yuuq' Carmelo.3Re' QaJaaw Dios je' wili xuq'or: Re' taqe i aj Damasco ma' k'isiin i mahk xkian, ruum i re' naa nuye'em taqe chutojariik i kimahk. Eh xkian i ti' k'axik reh i tinamiit Galaad je' rukab' noq inq'ojarik paam i trigo chi ch'ihch' xkian reh.4Ruum aj re', re' hin naa nukojom ruq'aq'al i rupaat i reey Hazael, eh naa ruk'ahtiik i paat i rub'an wii' taaq'anik i reey Ben-hadad.5Re' hin naa nuq'eb'em taqe i ru puertahiil i tinamit Damasco, naa nusacham kiwach, i aj wach k'ixkaab' Avén. Eh re' i wilik chi taaq'anik Bet-edén naa nusacham wach. Re' taqe i aj Siria naa kik'amariik reje pankowlaj kamanik pan tinamit Qir, inki.6Re' QaJaaw Dios je' wili xuq'or: Re' taqe i aj Gaza ma' k'isiin i mahk xkian, ruum aj re' naa nuye'em taqe chutojariik i kimahk. Re' keh xkik'ayej reje pankowlaj kamanik i nutinamiit pan tinamit Edom.7Ruum aj re', re' hin naa nukojom ruq'aq'al i tz'aq kotimaj wii' riij i tinamit Gaza, naa ruk'ahtiik taqe i paat imb'aan wii' i taaq'anik.8Eh naa wo' nusacham kiwach i aj Asdod. Je' wo' taqe i wilkeeb' chi taaq'anik chinaah i tinamit Ascalón, eh naa wo' nusacham kiwach tinamit Ecrón, je' wo' chu'nchel i aj filisteo, inki.9Re' QaJaaw Dios je' wili xuq'or: Re' taqe i aj Tiro ma' k'isiin i mahk xkian, ruum aj re', re' hin naa nuye'em taqe chi tojariik i kimahk. Ruum xkiq'asaj pankowlaj kamanik i nutinamiit ar Edom, ma' xkik'am ta kiib' pansuqkiil chi xa kas kichaaq' kiib' je' naq rukab' i kiyejaam wach.10Ruum aj re', re' hin naa nukojom ruq'aq'al i tz'aq kotimaj wii' riij i tinamit Tiro, eh naa ruk'ahtiik taqe i paat imb'aan wii' taaq'anik, inki.11Re' QaJaaw Dios je' wili xuq'or: Re' taqe i aj Edom ma' k'isiin i mahk xkian, ruum aj re' naa nuye'em taqe chutojariik i kimahk. Re' keh yohb'aal wach i kijosq'iil, ruuk' q'aslaj ch'ihch' xkikansaj i kas kichaaq' aj Israel ma' xkiketelaaj ta wach.12Ruum aj re', re' hin naa nu kojom ruq'aq'al i tinamit Temán, eh naa wo' ruk'ahtiik taqe i paat imb'aan wii' i taaq'anik, inki.13Re' QaJaaw Dios je' wili i xuq'or: Re' taqe i aj Amón ma' k'isiin i mahk xkian, ruum aj re' naa nuye'em taqe chutojariik i kimahk. Re' keh xkiyeew runimaal wach i kitinamiit xkixih chi q'aslaj ch'ihch' i kipaam taqe i yowaab' ixoq wilkeeb' ar Galaad.14Ruum aj re', re' hin naa nukojom ruq'aq'al i tz'aq kotimaj wii' riij i tinamit Rabá. Eh naa ruk'ahtiik taqe i paat imb'aan wii' taaq'anik. Xa je' chik ink'uloq kaq suut teew noq naa nutaq'aam chaloq i aj q'aq'ineel taq cha naah.15Eh re' i kireey re' taqe i nimaq wach kikamaj ruuk', naa kik'amariik reje pankowlaj kamanik, inki i Dios.1Re' QaJaaw Dios je' wili xuq'or: Re' taqe i aj Moab ma' k'isiin mahk xkian, ruum aj re' naa nuye'em taqe chutojariik i kimahk. Re' keh xkik'at xkikanaa' chi xa chaaj chik i rub'aqil i wilik naq chi reey ar Edom.2Ruum i re' naa nukojom ruq'aq'al i tinamit Moab, eh naa ruk'ahtiik taqe i paat imb'aan wii' i taaq'anik ar Queriot. Re' taqe i aj q'aq'ineel k'erlik kichii', eh naakixulem i tuun noq naa rukuxiik kikansam taqe i aj Moab.3Eh naa wesam i wilik chi reyil chikinaah, eh junkanteesjiik naa nub'anam ruuk' taqe i k'amal b'eeh inki i QaJaaw Dios.4Re' QaJaaw Dios je' wili xuq'or: Re' taqe i aj Judá ma' k'isiin mahk xkian ruum aj re' naa nuye'em taqe chutojariik i kimahk. Re' keh ma' xponik ta panaq' kiwach i nutijiniik. Eh ma' xkik'am ta naah i nuk'uhb'aal, re' chik taqe i tiyoox xkiloq'ej re' ixkiloq'ej chaloq i kimaam kati't.5Ruum aj re', re' hin naa nukojom ruq'aq'al i tinamit Judá, eh naa nuk'atam taqe i paat imb'aan wii' taaq'anik ar Jerusaleem, inki. Re' QaJaaw Dios xuq'or chi naa ruye'em taqe chutojariik i kimahk i aj Israel6Re' QaJaaw Dios je' wili i xuq'or: Re' taqe i aj Israel ma' k'isiin i mahk xkian ruum aj re' naa nuye'em taqe chutojariik i kimahk. Re' keh inkik'ayej reje ruuk' tumiin i ma' xta kimahk, eh xa ruuk' i junk'uhl chi xijab' inkik'ayej i neb'aa'.7Eh ma' mponik ta panaq'kiwach inkiye'q' panak'al taqe i neb'aa', ma' korik ta wach kik'ux kuuk' i ma' nimaq ta kiwach, eh re' irixooq i ajaab'ees irixoqb'eej wo' chik ak'uunb'ees. Ruuk' taqe i inki a'n re' re' inkesaj i wajaawriik.8Ma' k'isiin itz'ihy inkimol wach re' inkahnik kuuk' xa chi riij k'aas, kiokik haa' chi wi'k noq kilooqjiik taqe i tiyoox. Eh ruuk' i tumiin inkesaj reh i xama' xta wo' kimahk inkiloq' i k'ah laj ha' inkuk'ej chupaam i rupaat i kitiyoox.9Eh ma' nk'ulik ta chik pankik'ux noq xwesaj taqe reje pan kiye'aab' i aj amorreo, eh xnusach kiwach, atoob' ta chi xanimaq chik kooq, je' ninqaal kooq chee' chakaltee', eh kowlaj winaq taqe je' kikab' i tz'inuj.10Eh re' taq i hat aj Israel, re' hin xineesanik taq chaaweh Egipto, ka'winaq haab' xat nub'esaj taq chaloq chupaam i ye'aab' chiq yuuq', reh chi xnuyeew taq aweh i kiye'aab' i aj amorreo.11Re' hin korik taq i nuq'or aweh chi chaxilak taq i hat wilik i xnukoj chi jalal nuq'oral. Eh xnusik' kiwach i k'ijolaq chi xi kahnik panukamaj chi ma' yok'ooj taj i rismaal kinaah, inki i QaJaaw Dios.12Eh re' taq i hat xamin taqe i k'ijool re' re' chi ruuk'jiik i k'ah laj ha' inxohk'risanik, eh ma' xayeew ta taq q'ab' keh i jalal nuq'oral chi xkiq'or rib'iral i nub'ihnaal.13Ruum taq i xa a'n re' re' naa nuye'em taq i ti' k'axik cha naah, naa taq aqahb'aniik ruum i ruti'kiil je' rukab' i choqik i rub'an i kareta noq ahl i trigo rihqaam.14Eh re' neerumol chi elik xama' naa ta wo' ruko'leem riib', eh re' i kow riib' naa rukahniik chi ma' xta raansil. Eh re' i kow riib' xama' naa ta wo' ruko'leem riib' chuwach i ti'.15Eh ni xata re' inchol peleto ruuk' i flecha naa ruko'leem riib', ni xata re' i kow inajiminik, eh ni xata re' inarumolom chi elik chi riij i kawayú naa ruko'leem riib'.16Chupaam taqe i q'iij re' re', re' i soldado q'e' kow riib' chi q'aq'inik naa ruq'eb'em kahnoq i ruch'ihch' reh q'aq'inik noq naa rumolom chi elik, inki i Dios. Re' i xuq'or i jalal ruq'oral i Dios1Hat taq aj Israel chab'iraj taq i ruq'or chawiij i QaJaaw Dios chawunchelaal i xat risaj taq chaloq Egipto je' wili i xuq'or:2Eh xa re' wo' naq taq i hat xnusik' taq chaawach Chi kixilak i tinamit wach ak'al. Ruum aj re' naa taq kaat nuye'em chutojariik amahk ruum i ma' k'isa yiib' wach na'ojb'al taq i na a'n, inki.3¿Mi neerub'an chi neenkuhch'ileej kiib' i ki'ib' chi ma' nkaaj ta kiwach?4Eh ¿Mi neeruk'er chii' kaq b'ahlam panch'ahn noq komajaa' i ruchop i rutiib'? Eh ¿Mi neeruk'er chii' i rak'uun kaq b'ahlam parujuul noq komajaa' i ruchop i rutiib'?5Eh ¿Mi neenchoparik jino'q i tz'ikin wach ak'al rupinik i rub'an wila' ma' xkojarik i xirob'? Eh ¿Mi neenq'orik i xirob'aal mi ma' chih i xuchop?6Eh ¿Mi ma' neekiyo'jik re' i tinamit wila' inxuuljik i tuun pan jino'q tinamit? Eh ¿Mi wilik i ti' k'axik neenchalik chinaah i tinamit wila' ma' re' i Dios neen ye'wik reh?7Eh re' i QaJaaw Dios ma' xtaj i ti' k'axik i ruyeew chaloq chi ma' ta nee ruyeew chi naab'jik keh taqe i jalal ruq'oral.8Eh wixq'orik i kaq b'ahlam ¿Mi ma' neekiyo'jik re' tinamit? eh wila' xuq'or i QaJaaw Dios chi naa ruq'orariik rib'iral, ¿Mi neerub'an re' chi ma' nee ta q'orarik rib'iral? Re' rusachariik kiwach i aj Samaria9Re' taq i hat je' wili i naa taq aq'orom chupaam taqe paat imb'aan wii' taaq'anik ar Asdod, eh chupaam taqe i paat imb'aan wii' taaq'anik ar Egipto: Chamol taq awiib' chinaah i yuuq' Samaria, nee taq inawilow i tukinik wachiis, taqe i yiib' wach na'ojb'al k'achi' keeb' ar, tiko'q taq keh.10Re' QaJaaw Dios je' wili i xuq'or: Re' keh ma' inki a'n taj i korik inkimol wach pankipaat inki a'n wii' i taaq'anik inkiq'uch reh i kas kichaaq' pank'aah, inki.11Eh je' wili i ruq'or i QaJaaw Dios: Re' taqe i ki-ixowanik taq awach k'ul naa kichaliik naakich'ahaam i paat i nako'leej taq wii' awiib', eh naa kelq'aam i chib'ih taq aweh wilik chupaam taq aapaat.12Re' i QaJaaw Dios je' wili xuq'or: Re' cha'jen tentzun neeruq'uch i rutentzuun panchii' i kaq b'ahlam xa re' la' xa re' wo' ki'ib' chi rooq, i ruqox i xikin neeruq'uch. Je' wo' re' taq hat aj Israel, xakiib' ixib' wo' taq i naa ako'leem awiib' ar Samaria. Yu'naak kosuq taq hi'lik aweh chinaah taqe i holohaq ch'aht ar Damasco, inki.13Re' QaJaaw Dios nim rajaawriik je' wili i xuq'or: Re' taq i hat cha q'or taq rib'iral i ti' k'axik naakik'ulum taqe i riih rumaam i Jacob.14Eh re' hin naa nuye'em taqe chutojariik i kimahk i aj Israel ruum i yiib' wach na'ojb'al inki a'n Eh naa nuyojom kiartaal ar Bet-el, eh re' i kuk'aa' i artaal naakiyok'ariik naa kiq'ehb'iik wach ak'al.15Eh naa nusacham wach i kipaat kiwihik wii' pan siq'jil, i kipaat kiwihiik wii' pan q'ilej. Eh naa nusacham wach i kipaat marfil korjinaq wii', je' wo' i kipaat inki a'n wii' i taaq'anik, inki i QaJaaw Dios.1Chab'iraj taq i hat ixoq aj Samaria, je' taq akab' ixoq wakax wilkeeb' Basán inaq'uch taq i chib'ih keh i neb'aa', i nayeew taq panti' k'axik i ma' xta wilik keh. Eh inataq'aaj taq ab'ahiil chuk'amariik i k'ah laj ha', reh chi naawuk'ej taq.2Re' QaJaaw Dios xuq'or i korik ruuk' i rusantohiil, je' wili xuq'or: Eh je' naa ruuk' i lok lok laj ch'ihch' naa taq kaat nuk'amam reje je' rukab' noq inehteesjik i kar panha' ruuk' i k'isa lok lok laj ch'ihch'. Je' wo' re' i naa nub'anam keh taq awak'uun awixq'uun.3Eh naa kehteesjiik reje chupaam i paat inki a'n wii' taaq'anik naakimolom chi elik, ar naa kikutum reje kiib' chinaah i yuuq' Hermón, inki.4Hiy taq ar Bet-el, eh Gilgal cha a'n taq i mahk, cha a'n taq aq'et wachiil, hiy taq chak'at mayiij eqal eqal chikiwach i tiyoox pantaq wahq'eq, chak'am taq reje i ru lajeeb' sentabohiil i jinaj ketzal chi roox q'iij.5Hiy taq chayeew chi amayiij i kaxlanwi'k kojooj ch'amb'esb'al reh eh cha q'or rib'iral xa aha' yuuq' nik' nimaal taq amayiij xayeew, ruum je' taq re' imponik chawach i hat taq aj Israel, inki i Dios.6Re' hin xat nuyeew taq chi kuyariik awa' ahaa' chupaam taq aatinamiit, eh xnuyeew wo' i wi'jaleel chupaam taqe i kok' tinamit. Eh re' taq i hat ni xata ruum i re' xat chalik wo' chik taq wuuk', inki i QaJaaw Dios.7Eh ma' xnuyeew ta chik i jab' chuwach ixib' poh, re' noq komajaa' taq inasik' i wach atik. Wilik i tinamit xnuyeew wii' i jab', eh wilik i tinamit ma' xnuyeew ta wii' i jab'. Wilik xub'an wii' i jab', eh wilik i xi chiqik ruum ma' xub'an ta chik i jab'.8Re' taqe i tinamit xak'ul chik kiooj pantaq tokoom tinamit chi rusik'ariik kihaa', ruum i kichiqchi'iil. Eh re' taq i hat ni xata ruum taqe re' xat sutinik wo' chik taq wuuk', inki i Dios.9Eh xnuyeew wo' itz'a' laj teew taq cha naah, ruum i re' xi chiqik taq atik wilkeeb' taq panakoraal, xnuchiqsaj wo' taq aa-uuva. Eh re' taqe i nimaq chili'l xkik'ux taq i xaq aa-higo je' wo' hoq i xaq taq aa-olivo. Eh re' taq i hat ni xata ruum taqe re' xat sutinik wo' chik taq cho wuuk', inki i Dios.10Eh je' wili i xuq'or: Re' hin xnuyeew taq cha naah i ti' k'axik je' rukab' i xnuyeew chikinaah i aj Egipto. Xnukansaj taq awak'uun panq'aq'inik, eh chi xq'ucharik i kikawayu reh q'aq'inik kuum i aj ixowaal. Eh xkik'raaj ruchuhkiil taqe i kamnaq chupaam i kiye'aab'. Eh re' taq i hat ni xata ruum taqe re' xintohq'ik wo' chik taq animam, inki i Dios.11Re' hin wilik wo' naq i xnusach kiwach taq chaxilak ruuk' i ti' k'axik, je' rukab' noq xnusach kiwach i tinamit Sodoma, i Gomorra. Re' taq i hat xa je' chik rukab' noq inehteesjik iloq i ju'sii' wach q'aaq' noq xako'leej taq awiib'. Eh ni xata ruum taqe re' xat sutinik wo' chik taq wuuk'.12Re' hin naa taq kaat nuye'em chutojariik riij taq ayiib' wach na'ojb'al i na a'n re' taq i hat, hat taq aj Israel, cha yejaa' taq awiib' chi nuk'ulariik, ruum re' hin naa nuq'atwiik i q'orik taq cha naah, inki.13Re' i QaJaaw wili xyej-anik reh taqe inajt kinaah yuuq', re' reh xtz'uhkrisanik cho reh i teew, re' reh inye'wik chi naab'jik reh i winaq chib'ih jariik i naa rub'anam. Eh re' reh insutinik reh chi q'equm i saqum, eh re' reh xa aha' wilik chinaah chu'nchel i wach ak'al. Re' Dios nim rajaawriik, Re' Dios xq'orik chi riij i yot'oj k'uxliis1Re' taq i hat aj Israel chab'iraj taq i ruti'kiil ak'ux naa nuq'orom aweh panutz'uuy, re' naa nuq'orom taq chawiij chi je' wili:2Re' taq i hat aj Israel xaq'eb' taq i rusaqiil awach, ma' naa ta chik taq awuktiik. Xa q'eb' taq awiib' chupaam taq aa ye'aab', ma' awach ta chik i nuksanik taq cha weh.3Re' i QaJaaw Dios je' wili i xuq'or keh i aj Israel: Eh noq re' tinamiit nee rutaq'aaj reje chi q'aq'inik jino'q miil i ru soldado ach jinaj siento i naakisutiniik chaloq. Eh re' i nee rutaq'aaj jino'q siento i ru soldado ach lajeeb' i naakisutiniik chaloq, inki.4Eh je' wo' chik wili i xuq'or i QaJaaw Dios keh i aj Israel: Kinasik' taq i hin nee taq inwihik ak'achariik.5Mat'ooj taq Bet-el, eh Gilgal. Eh mat'ooj taq Beerseba, ruum re' taqe i aj Gilgal naa kik'amariik reje pankowlaj kamanik pan tokoom tinamit ma' naa ta rik'iik wach, eh re' taqe i aj Bet-el naa rusachariik kiwach, inki.6Kinasik' taq i hin nee taq inwihik ak'achariik, eh wila' ma' xinasik' taq naa nutaq'aam taq cha naah i ti' k'axik, i hat taq aj Israel chi je' jinaj runimaal q'aaq'. Eh ma' awach ta jino'q i aj Bet-el naa rub'anam ruchupariik, inki Dios.7Xiik' naah ti'kiil i naa taq ak'ulum i hat ruum xasutej taq chi yiib' wach i korik, eh inawesaj taq i rajaawriik i ma' xta reet chi b'anarik.8Chasik' taq i QaJaaw Dios xyej-anik keh taqe i ch'umiil, insutinik reh i q'equm chi saqum, insutinik reh chi saqum i q'equm. Re' ineesanik cho reh i jab' chinaah i palaw, eh i ruyeew chaloq chinaah chu'nchel i wach ak'al, re' i Dios nim rajaawriik rub'ihnaal.9Re' reh ineesanik i runimaal kiwach taqe i nimaq kiwach. Eh xusach kiwach i paat inako'leej naq taq wii' awiib' i hat taq aj Israel.10Re' taq i hat ti' taq i naa ak'ulum ruum i nawixowaaj taq wach inko'linik riij i korik. Eh ma' nawaaj ta taq wach inq'orik reh i korik noq imb'aan i q'ataj q'orik11Eh ruum chi ma' xponik ta taq panaq'awach taqe i neb'aa' k'ih taq i tojb'al riij i ki trigo xapahqaaj. Ruum aj re' ma' naa ta taq aak'achariik chupaam taqe i paat i ab'aj korjinaq wii'. Eh ma' nee ta wo' taq inawuk'ej aweh i riis i ki uuva.12Re' hin weht'al chu'nchel i yiib' wach na'ojb'al taq i na a'n, je' wo' taq amahk ma' xata pajooj taq i na a'n. Eh i nak'am taq i chib'ih keh i neb'aa' ruuk' ileq', eh noq tiooj taq pa'lojoq pan q'atb'al q'orik inatoj taq reh chi ma' nelik ta korik i neb'aa'.13Eh re' i wilik runa'ojb'al ma' teheeh ta wach chi q'orik, ruum yu'naak ma' b'aan ta chik i q'ataj q'orik parub'ehel.14Re' taq i hat re' i holohik laj na'ojb'al cha sik' reh chi nee wihik taq ak'achariik, eh korik taq i neenaq'or, re' i QaJaaw Dios nim rajaawriik neen wihik taq awuuk'.15Eh cha kanaa' taq i yiib' wach na'ojb'al, re' taq chik i holohik cha a'n. Eh cha a'n taq i q'ataj q'orik parub'ehel konee oon naq i ruketelaaj taq awach i Dios nim rajaawriik i hat taq cho ruqox i aj Israel.16Re' i QaJaaw Dios nim rajaawriik je' wili i xuq'or: Chu'nchel i naa kiwihiik pank'ayb'al pantaq b'eeh naa koq'iim ruum i ti' k'axik. Eh naakiyuq'eem kuuk' i xa panab'iix kikamanik, taqe i nimaq wach kikamaj reh chi junokiik taqe chi oq'ik.17Eh chupaam chu'nchel i ye'aab' tikooj wii' uuva naa wo' ruwihiik i ma' k'isa oq'ik ruum re' hin naa nuye'em i nujosq'iil ar, inki.18Q'e' taq ti' i naa ak'ulum i xanawaaj taq chik chi nee ruyeew i rujosq'iil i QaJaaw Dios. ¿Mi nawaaj taq re' chi neemponik chi jumehq'iil i q'iij re' re'? eh re' i q'iij re' re', runimaal q'equm taq cha weh ma' re' ta saqum.19Ruum na' chub'an i re' je' rukab' noq imb'aan elik chuwach i kaq b'ahlam eh inooj k'ularoq i josq'laj oso. Eh je' rukab' noq insutinik cho parupaat jino'q i winaq i ruyeew i koq i q'ab' wach tz'aq eh inti'arik cho ruum i aaq'.20Korik noq na' chuyeew chaloq i rujosq'iil i QaJaaw Dios je' runimaal q'equm ma' saqum ta k'isinoq.21Re' QaJaaw Dios je' wili i xuq'or: Re' hin ma' mponik ta chi nuwach i moloj iib', ninq'iij, i loq'inik taq i na a'n, i ruyoj nuk'ux.22Re' hin ma' nee ta taq i nuk'ul aweh ak'atoj mayiij, inaq'wach taq atik, i rak'uun taq awaakaax q'e' q'ina' nee nak'am taq cho chi nuwach reh chi nee wo' chik i nak'am taq awiib' panotob'il wuuk'.23Je' re' noq maa a'n taq chik chi nuwach atz'uuy taq i na a'n Ma' waaj ta chik b'iram i q'ooj i na a'n taq ruuk' aawarpa24Re' la' taq i korik cha a'n, ruch'ihil i holohik chi b'anarik. Eh je'-oq rooq ha', je'-oq k'achlik ha' ma' jaruuj inchiqik.25Hat taq aj Israel mi xayeew taq cho amayiij ¿Mi xak'am taq chaloq re' amayiij chi nuwach noq xat b'ehik taq chaloq panchiq yuuq' chuwach i ka'winaq haab'?26Re' la' taq i hat xawihqaaj taq chaloq i rupaat aatiyoox Moloc, je' wo' taq aatiyoox Quiiún, je' wo' i ch'umiil xayejaa' taq chi rehtalil taq aatiyoox, re' wo' taqe re' xayeew taq kiloq'il.27Ruum i re' naa nuye'em q'ab' chi naa taq ak'amariik reje pankowlaj kamanik ko chi junch'aq i tinamit Damasco, inki i Dios, nim rajaawriik. Re' ruq'orariik i rusachariik kiwach i aj Israel1Re' taqe suq wilkeeb' ar Sión, re' taqe i ch'iklik kik'ux chinaah i yuuq' Samaria q'e' ti' i naakik'ulum. Re' taqe i ki'ib' chi tinamit re' re' q'e' nimaq kiwach chi kixilak i tinamit wilkeeb' ar, eh ar inkisik' rukowiil kik'ux i aj Israel2Hiy taq ar Calne chawil taq chaloq. Eh kore' taq nee tiooj ar Hamat, nee taq tiqajik qohoq Gat i wilkeeb' wii' i aj filisteo. ¿Mi q'e' taq hat chihooj re' hat chikiwach taqe re'? ¿Mi q'e' chihooj re' taq aatinamiit i hat chikiwach i tinamit re' re'?3Re' taq i hat ma' nawaaj ta naq chi neemponik i q'iij reh i ti' k'axik, xa re' la' chalik taq chik i rub'an cha naah i ti' k'axik.4Re' taq i hat xasuq taq chik hi'lik aweh chuwach ach'aht marfil korjinaq wii'. Eh i nak'ux taq i rak'uun aatentzuun, i rak'uun aa-wakax q'e' q'ina' inawesaj taq cho pankoraal.5Re' taq i hat inaxulej taq aa-suub' xama' inkan ta wo' chi riij taq i naxulej, eh inayejaa' taq i xa reh reh wach chi q'ooj inawaaj naq taq a'nam aweh i xub'an i reey David.6Re' taq i hat i naawuk'ej i riis uuva panimaq kulk eh re' taqe i q'e' k'ih tz'aaq inkohnik laj iq'oom taq inakoj, ma' xta taq inawaaj reh chi k'ahchi' runeb'a'riik taq aatinamiit7Re' taq i hat peet naa ak'amariik reje pan kowlaj kamanik pan tokoom tinamiit, naa rusahchiik wach taq aninq'iij i na a'n re' inareq naq taq wii' i rusuqkiil ak'ux.8Re' i QaJaaw Dios nim rajaawriik xuq'or i xti korik chi je' wili: Re' hin ma' imponik ta chi nuwach chi nkinimb'isaj kiib' i riih rumaam i Jacob. Eh ma' imponik ta chi nuwach taqe i paat imb'aan wii' i q'ataj q'orik, ruum aj re' naa nuq'asam i kitinamiit pan kiq'ab' i aj ixowaal, je' wo' chu'nchel i wilkeeb' ar, inki.9Je' re' noq atoob' ta nee kikahnik lajeeb'-oq chi winaq, pampaat xanaa wo' rukuxiik kikimiik.10Eh noq naa rokiik pampaat jino'q i awach reh i kamnaq chi rehtesjiik i ruti'jolal ree ruk'atariik, je' wili i naa ruq'orom i koq reh pampaat i xkahnik chi k'achlik: ¿Mi ko wilik chik jino'q i xkahnik awuuk' chi k'achlik? inko'q. Ma' awach ta chik ach wo' re' hin, Inko'q chaloq Ma' chih chik aq'or ruum nee-oq inaq'or i b'ih i QaJaaw Dios, inuchjoq.11Ruum re' i QaJaaw Dios ruq'orom chi naa rusacham kiwach chu'nchel chi je' nimaq paat chi je' kok' paat.12¿Mi nee nkian re' i kawáyu johtik chuwach taqe i saqrehp ab'aj? ¿Mi neemb'aan re' i b'anaj arado nah i palaw? Wila' ma' neemb'aan i je' re' ¿Chib'ih reet noq xasutej taq chi reh kaansanik i holohik laj na'ojb'al? ¿Chib'ih reet noq xasutej taq chi ma' holohik taj i korik?13Re' taq i hat insuuqb'ik taq ak'ux ruuk' i xama' xta ruk'am chaloq, je' taq wili inaq'or: Re' hoj xachiqib'il qiib' xqareq i qajaawriik, tiki taq.14Re' i QaJaaw Dios nim rajaawriik je' wilik i xuq'or: Re' taq i hat aj Israel, naa nuk'amam taq cho cha naah jino'q i tinamit chi naa taq rusacham awach, ar naa rutoq'aam reje Hamat pantz'eet reh i rookb'aal q'iij, eh naa ruponiik chi chii' i rooq ha' Arabá pansak'aaj reh i rokb'aal q'iij, inki. Re' ixib' chi ti' k'axik xk'uhtjik reh i Amós parusaq wirik1Re' Amós je' wilik xuq'or: Re' hin i xuk'uhtaaj weh i QaJaaw Dios panusaq wiriik chi k'ahchi' rutz'uhkrisam i ma' k'isa nimaq chili'l. Reh chi naa kik'uxum i wach chu'nchel i tik, re' i nelik koq'uun, re' noq elinaq chik inye'arik ree i reey.2Eh noq re' taqe nimaq chili'l xkitz'ap wach i tik, je' wili i xnuq'or reh i QaJaaw Dios: Jaaw cha kuy qamahk i hoj, hoj aj Israel, hoj riih rumaam i Jacob maayeew tii chi qanaah i ti' k'axik re' re' ruum ma' nee ta nqa a'n ruko'ljiik qiib', ruum xama' hoj ta wo' tii k'ih.3Eh re' i QaJaaw Dios xujal wach i rukapeb'aal, je' wili i xuq'or: Ma' naa ta nuye'em qohoq i ti' k'axik re' re', inki.4Eh re' i QaJaaw Dios xuk'uhtaaj wo' chik weh panusaq wiriik chi xuqasaj chaloq i q'aaq' pan taxaaj yohb'aal wach i qopik i rub'an reh tojb'al kimahk i tinamit. Eh ruum i rutz'a'iil xchiqik chik i palaw, je' wo' taqe i yuuq' k'ixkaab'.5Eh re' i hin je' wili i xnuq'or: Jaaw cha kuy maayeew tii cho chi qanaah i ti' k'axik re' re' i hoj, hoj riih rumaam i Jacob ruum ma' nee ta qako'leej qiib' chuwach, ruum xama' hoj ta wo' tii k'ih, kinki.6Eh re' i QaJaaw Dios xujal wach i rukapeb'aal je' wili xuq'or: Re' hin ma' naa ta nuye'em i ti' k'axik re' re', inki.7Re' i QaJaaw Dios je' wo' chik wili i xuk'uhtaaj weh panusaq wiriik: Re' QaJaaw pa'lik i koq chuwach i tz'aq pab'amaj chi korik ruuk' plomo eh ruyohq'eem wo' chik jinaj i plomo b'amb'al tz'aq.8Eh re' i QaJaaw Dios xupahqaaj b'ila' weh chi je' wili:
Amós ¿chib'ih jariik i k'ahchi' awilom wach? inki.
Re' hin je' wili xnuq'or reh:
Jinaj i plomo b'amb'al tz'aq ayohq'eem, kinki reh.
Je' wili i xuq'or weh i reh:
Ruuk' aj i plomo wili naa nupajam i nutinamiit Israel, ruum re' hin ma' naa ta chik nukuyum kimahk nik'-oq najtiil, inki.9Re' taqe i ye'aab' kiloq'inik wii' i riih rumaam i Isaac naa rusachariik kiwach, eh re' taqe i paat kiloq'inik wii' i riih rumaam i Israel naakiyojib'iik. Eh naa nusacham wach ruuk' q'aslaj ch'ihch' i Jeroboam, haa' taqe i rak'uun rixq'uun.10Re' i Amasías k'amal kib'eeh aj tiij ar Bet-el je' wili i xutaq'aaj ruq'orariik reh i Jeroboam kireey i aj Israel: Re' Amós i ruyeq' panak'al awajaawriik, ma' k'isiin i ruq'or keh i tinamit chawiij. Re' taqe i tinamit ma' nkikuy ta chik i ruq'or.11Ruum re' reh je' wili i ruq'or: Re' i Jeroboam naa rukanteesjiik ruuk' q'aslaj ch'ihch', eh chu'nchel i tinamit Israel naa kik'amariik reje pankowlaj kamanik pan tokoom tinamit, inki.12Eh re' Amasías je' wili i xuq'or reh i Amós:
Re' hat inaq'or chi wilik ink'uhtjik aweh, eleen reje ayu' reh chi ma' nee ta tikimik hiy ar Judá ar neena a'n awa' ahaa', eh neenaq'or i ruq'oral i Dios.13Ayu' Bet-el matchalik chik chuq'orariik i ruq'oral i Dios, ruum re' i ye'aab' wili re' inloq'inik wii' i reey, eh re' i wilik wii' i ru nimlaj paat, inki.14Eh re' Amós je' wili i xuq'or reh Amasías:
Re' hin ma' hin ta jalal ruq'oral i Dios, ma' re' ta wo' re' nukamaj. Xa ruuk' la' tii nuk'isatz'aaq inkiyeew chi riij i cha'jinik tentzun inwik'saj wii' i q'iij, eh xa ruuk' i sik'ij higo i nub'an pantaq ch'ahn.15Xa re' la' re' i QaJaaw Dios x-esanik cho weh chi cha'jinik tentzun je' wili i xuq'or weh: Yu'naak hiy cha q'or keh i nutinamiit Israel chi ma' holohik ta kib'anik, inki.16Eh re' hat inab'iraj i ruq'oral i QaJaaw Dios, inaq'or chi ma' naa ta nuq'orom keh i aj Israel chib'ih naa rub'anam i Dios kuuk'. Eh ma' nawaaj taj chi wilik i naa nuq'orom chikiij i riih rumaam i Isaac, inki.17Ruum aj re' je' wili i xuq'or i QaJaaw Dios chawiij: Re' awehk'een naa rub'anam i k'oyomal pan tinamit, eh re' taqe awak'uun awixq'uun naa kikanteesjiik ruuk' q'aslaj ch'ihch', re' awak'aal naa ruch'aqib'iik keh i tokoom. Eh re' hat ar naa akimiik chi kixilak i ch'uwa' kiwach, re' taqe i aj Israel naa kik'amariik reje pan tokoom tinamit, inki. Re' jinaj chakach chi wach tik mu'uun xa q'an chik xk'uhtjik reh i Amós1Eh re' i QaJaaw Dios jinaj chik chakach i wach i tik mu'uun xiik' naah q'aniil xuk'uhtaaj weh panusaq wiriik.2Eh re' Dios xupahqaaj weh chi je' wili: Amós ¿chib'ih jariik i k'ahchi' awilom wach? inki.
Re' hin jinaj chakach i wach i tik mu'uun xiik' naah q'aniil k'ahchi' wilom wach, kinki reh.
Re' taqe aj Israel je' kiq'aniil taqe i wach i tik re' re', xa ilook' chik i nuyeew taqe chutojariik i kimahk, inki.3Eh re' taqe i tz'uuy imb'aan chupaam i paat imb'aan wii' i q'ataj q'orik naa rusutiniik chi oq'ik. Eh ma' k'isiin taqe i naa kikanteesjiik ar, re' i kiti'jolal naa rukutariik cho rij paat chi ma' eht'alimaj, inki. Xa ilook' chik inchalik i ti' k'axik chikinaah i aj Israel4Chab'iraj taq i naa nuq'orom i hat i ti minwik taq keh panti' k'axik i xama' nimaq ta kiwach, eh inaq'uch taq i chib'ih keh i neb'aa'.5Re' taq i hat je' taq wili inaq'or: ¿Kojaruuj chik i ninq'iij reh i ak' poh? ¿Kojaruuj chik i ninq'iij reh i hi'limb'al q'iij reh chi neenqak'ayej i qatrigo taqe naq'wach i qatik chi k'ih neen qayeew wii' nee nqak'isiimb'isaj i qapajb'aal, eh ma' manlik taj i qapexu neenqa a'n?6Eh naa qakanaam chi ma' xta chik chib'ih keh i neb'aa', korehtaal inkik'ayej kiib' quuk' tojb'al reh i kik'aas atoob' ta xa junk'uhl chi xijab' i kik'aas. Eh k'ih naa qak'ayem wii' keh i ruyib'kiil wach i trigo, tiki taq.7Re' QaJaaw Dios ruq'orom i xti korik, je' wili i xuq'or: Re' hin ma' jaruuj naa rusahchiik panuk'ux chi xkinimb'isaj kiwach i riih rumaam i Jacob, je' wo' hoq i xkian, inki.8¿Mi ma' k'uyu'jik re' i wach ak'al ruum i xkian re' re'? ¿Mi ma' nee kioq'ik re' i tinamit ruuk' i ti' k'axik naakik'ulum? Eh chu'nchel i wach ak'al naa ruqajiik naa rujohtiik je' rukab' i rub'an i rub'ohl i nim ha' Nilo wilik ar Egipto.9Re' QaJaaw Dios je' wili i xuq'or: Chupaam taqe i q'iij re' re' naa nuq'equm b'risam wach i q'iij manlik kab'lajora, eh manlik parusaqumaal wach i q'iij naa ruq'equumriik chu'nchel i wach ak'al.10Re' taq aa-ninq'iij naa nusutem chi ruti'kiil k'uxliis, re' aa-tz'uuy naa nusutem chi oq'ik, je' rukab' noq inooq'jik i kamnaq. Eh naa taq akojom aq'eq' so', eh chi naa taq ajoyom i rismaal aanaah, naa taq awoq'iim, je' rukab' noq inoq'ik ixoq xkimik i rak'uun xa jinaj chuwach. Chu'nchel naa rusutiniik chi ruti'kiil k'uxliis, inki.11Re' i QaJaaw Dios je' wili i xuq'or: K'ulik iloq reh i q'iij chi re' hin naa nutaq'aam i wi'jaleel chinaah chu'nchel i tinamiit wach ak'al. Xa re' la' ma' re' ta wi'jaleel reh wi'k ha', wi'jaleel la' reh i rib'irjiik i nuq'oral.12Re' keh xak'ul chik naa kojiik pansak'aaj reh i rookb'aal q'iij, eh pareelb'aal i q'iij, nah taq palaw chi rusik'ariik i nuq'oral naa naq chik kaajwaam rib'irjiik xa re' la' xama' naa ta wo' chik kireqem.13Re' taqe i holohaq xq'un, taqe i kowlaj k'ijool naakiq'ehb'iik wach ak'al ruum i ruchiqkaal kichii' reh i rib'irjiik i nuq'oral.14Eh re' taqe i kiq'orik i korik parub'ihnaal i tiyoox wilik Samaria. Re' taqe i kiq'orik parub'ihnaal i tiyoox wilik Dan, taqe i kiq'orik pankib'ihnaal i kitiyoox i aj Beerseba, naa rusachariik kiwach, inki. Ma' wach ta jino'q i neeruko'leej riib' chuwach i ti' k'axik i nee ruyeew i Dios1Re' Amós je' wili i xuq'or: Re' hin xwilow wach i QaJaaw Dios chi pa'lik i koq wach artaal je' wili i xuq'or weh:
Chak'uyu'saj chi kow i paat kinlooq'jik wii' korehtaal inxereb'ik chikinaah chu'nchel i tinamit. Eh awach i ma' naa ta rukimiik ruum i re', ruuk' i q'aslaj ch'ihch' naa rukimiik, reh chi ma' jino'q i naa ruko'leem riib'.2Eh atoob' ta naq nee nkikeb'aa' kiib' pan chaam laj jul naa wo' nureqem taqe ar, atoob' ta naq neenooj kikeb'aa' kiib' kopan taxaaj naa wo' nureqem taqe ar.3Atoob' ta naq neenooj kikeb'aa' kiib' chinaah inajt naah yuuq' Carmelo naa wo' i nureqem taqe ar, atoob' ta naq neenooj kikeb'aa' kiib' ko paruchamiil i palaw neenutaq'aaj reje i josq'laj chikop reh chi nee kik'uxarik ar.4Atoob' ta nee kik'amarik reje pan tokoom tinamit, wilik taqe i naa nutaq'aam reje, reh chi nee kikanteesjik ruuk' q'aslaj ch'ihch'. Eh naa taqe nuye'em panti' k'axik ma' re' ta otob'il i naa nub'anam keh, inki.5Eh re' i QaJaaw Dios nim rajaawriik, noq inq'orik ink'uyu'jik i wach ak'al, kioq'ik chu'nchel i k'achareel wilkeeb' chinaah. Re' i wach ak'al naa ruqajiik, naa rujohtiik, je' rukab' i rub'an i rub'ohl i nim ha' Nilo ar Egipto.6Re' i QaJaaw Dios xuyejaa' i ruye'aab' pan taxaaj, eh xuyejaa' i taxaaj chi taklik cho chinaah i wach ak'al. Eh re' reh ineesanik chaloq i jab' chinaah i palaw, ruuk' i re' i rut'aqsaj chu'nchel i wach ak'al, QaJaaw Dios i rub'ihnaal.7Re' i QaJaaw Dios je' wili i xuq'or keh i aj Israel: Chi wee hin eliik taq awach kuuk' i aj Etiopía, nik' wach noq xat wesaj taq chaloq i hat Egipto, je' wo' re' noq xwesaj taqe cho Creta i aj filisteo, je' wo' re' noq xwesaj taqe cho Qir i aj arameo, inki.8Eh je' wo' chik wili i xuq'or: Re' hin inwilow chu'nchel i mahk inki a'n i tinamit, ruum aj re', naa nusacham kiwach chinaah i wach ak'al. Xa re' la' ma' naa ta rukuxiik nusacham kiwach taqe i riih rumaam i Jacob.9Re' hin naa nuye'em q'ab' chi naa rub'aan ti' k'axik keh i aj Israel kuum i tokoom tinamit, je' rukab' imb'aan reh i trigo noq inkichahchuuj wach chupaam i tz'irb'al wach, eh ma' jino'q inaq'wach inq'ehb'ik wach ak'al.10Re' taqe i nutinamiit kib'anik reh i mahk, ruuk' q'aslaj ch'ihch' naa kikimiik: Re' taqe i kiq'orik reh chi je' wili: Ma' jaruuj nee qoh k'ulik rureq i ti' k'axik ayu' inki taqe, inki. Re' Dios xuq'or chi naa wo' chik ruko'leem i tinamit Israel11Re' i QaJaaw Dios je' wili i xuq'or: Re' hin naa nukojom chi reyil i riih rumaam i reey David Naa nub'anam kuuk' aj Israel je' rukab' noq inyejeb'jik wo' chik i paat yojinaq naq. Naa wo' chik wuksam, naa wo' chik ruwihiik runimaal wach je' rukab' i pampeet.12Re' chi re' taqe i kiqox i aj Edom, eh chu'nchel i tinamit wihinaq taqe chi nutinamiit naa wo' chik kehchaam i ye'aab' Israel, inki. Re' wili naa rojiik eloq wach ruum re' i QaJaaw Dios xq'orik.13Eh je' wili i xuq'or: Naa ruponiik i q'iij noq re' taqe i tik naa kiwachiniik chi korik, xakomajaa' wo' inkikohlaaj rumolariik i wach i naa wo' chik kokiik chi iwik. Eh xakomajaa' wo' inkikohlaaj ruyitz'ariik i uuva naa wo' chik kokiik chi iwik. Re' taqe i uuva wataq yuuq' k'ixkaab', ma' k'isiin i riis naa ruwihiik xa je' chik rooq ha'.14Eh re' hin naa wo' chik wesam taqe chaloq i nutinamiit Israel pan tokoom tinamit, naa wo' chik kiyejaam taqe i tinamit yojinaq, ar wo' chik naakipatiniik. Eh naa kitikim ki uuva naa kuk'em i riis, eh naa kitikim chib'ih keh pan kikoraal naa wo' kik'uxum i wach.15Re' hin naa wo' chik nuye'em taqe pan kiye'aab' re' i nuye'em cho keh najtir. Eh ma' awach ta chik naa resaniik keh chupaam i kiye'aab' xnuyeew, inki i QaJaaw Dios.
Bible Society in Guatemala