Hibulu11
1Asigi ule ufulune manamo eweguba. Ninihe asigi ule ofelesiamo, kegele nini diyobasuba hame diba ofogofia yasifemo, nini seale diyoba asigibu. Kegele amo nine si aso besabalenagada, waagima. Ninihe asigi ule ofelesia, kegele amo seale dobuba hilisebu.2Nine nauwadali ine asigi ule ofolabia mulu amone bafasia, Godehe ili henesia, ine mana nafuluba solu.3Nini asigi ule ufulu amohe nini hilisebu, Godehe anakiwida, helefealuda molosiamo, Ene sulufea alefasia mololu. Sulu amo, bolale kegele. Aulugulu, kegele sunia nini aga bosolu ewe, bolale kegele amofea alefasia mololu dobu.4Aibele e Godefea asigi ule ufulu amo alefasia, ehe Efea ulu soba melu. Ausi, e soba melu amohe, Keinine soba melumo wasolu. Aibele e asigi ule ufulu mau amo alefasia, Godehe e ulu soba melumo henelu. Aulugulu, ewe ninifea walesia, Godehe e isolu inoloba solu. Aibele e olaluso, ene asigi ule ufulu amohe, aga aso ninifeamo sulu selaba labe.5Inogohe Efea asigi ule ufulu amofea alefasia, Godehe e olamesiale lubia hebene daalu. “Idele inolohe e isaluso, ili e abuluale. Mau enebamo, Godehe e lubia daalu.” Inogo aso dibale labimo, idele inolo e saaba selesia, ehe Gode heneba ofelesi, Godehe e heneba besabeoba solu.6Asigi ule ofale ligia, inolo ulenohe Gode heneba ufiyodoluale koleba. Mau enebamo, idele inolo abehe Gode labea miyo ligiamo, Gode E labeba asigi ule ofasiasu miyobafe. Aufia, idele inolo Godeda isafemo, Godehe ili amofea elebe nafulu meyobafeba, ili asigi ule auba ufiyo dobu.7Noa eda, asigi ule ufulu amofea alefasia, Godehe efea hagugulu sulu eweguba saaba melu. Helefealu sunia hano galuba naiyobafeba solu. Amo aso babale ligia, Noa Gode sisa ligia, Ene sulu kuliba abia, asigi ule ufulu amofea alefasia, hano sibi uleno mololu. Aufia, eda, ene eamonoda, ene faibilida, sibi usu sugafia, ili woba dafelesiale, nafulu asulu. Ene asigi ule ufulu amofea alefasia, ehe helefealu idele inolo wolu mololusia, sefia osolaba dafulu. Aufia ene asigi ule ufulu amofea alefasia, ehe isolu mana amone daalo diyo inolo holobagalu.8Abalahama eda, asigi ule ufulu amofea alefasia, Godehe e wesimo, e Ene sulu kuliba abia, hele efea mefea ami daalu. E auba abiamo, hele amoguiya aasuba hilisebale ligia, Godefea asigi ule ofasia daalu.9Hele Godehe efea meyoba soiya ami goasiamo, e asigi ule ufulu amofea alefasia, hele ami haiba mulu inologulu ligia, seele molosu asulu. E seele molo asulu amoguba, Aisegeda, Yekoboda, aaluda auba aselabia daalu. Godehe Abalahamafea daalo meyoba saaba ufulu ule hamagane, aaluda edai ua diyo inolo alolu.10Abalahama e sidi ikau koleluda dulu amo holobagasi babaiyefia, kiwigaafia koleba yasifia alolu. Sidi amone diyone, iwafuloda, diyoda, Gode E-su labe. Sidi amo holobagamesi yasisiamo, Abalahama e seele molosu asulu.11Sela eda, Godefea asigi ule ufulu. Asigi ule ufulu amofea alefasia, Godehe ene ela molo amo sogoba ofelesia, efea faibe seba diyone kiwi melu. E saune ligia, aufia faibe misiyone fogomo suniafasia aloluso, Gode moloyobafeba oloba huliale saaba ufulumo, seale sodoba, e asigi ule ufulugulu, ami faibe asulu.12Fogo amimo, Abalahama ene domala falalu aloluso, ule efeafiasu enauwa wedinale holobagagalu. Aulugulu, ene enauwadalimo, ili wedinale holobagagafasia, anakiwi lagone sigabi alegaeyo babealoguba alebaibu. Ili hano saiigulu, saludiale holobagagalu alebaibu.13Idele inolo, nini lagi saaba solu amo, ili sunia helefealu iwi ligiamo, kegele nafulu Godehe meyoba oloba huliale sulu saaba ufulumo, ili duluale. Aubale, ili dibale ligia danelu. Auluso, ili aso Godefea asigi ule ufulumo ufiasu daaba ligia, danelu. Enebamo, ili aso olabale ligia, kegele nafulu holobagaeyobafe amo, hago ligia, heleso bologuba, abulu. Aufia, ilihe amo diyoba asigisia, henelu. Aulune, ili yuabale eweguba solu. “Nini helefealu iwi fogo bilale misiyo mulu idele inolo ligia, hele aga ninida labea iwi, haiba mulu idele inolo amogulu lolu.”14Idele inolo sulu auba sodomo, amo ili ine mosomu seale amone isaeyo weiyaafe.15Ausi, ili ine mosomu gadefia mulu amo asigisiabiaga, ili isoba ine helea obegeba daabaiyo.16Auluso, ilihe ine hele amakelelu ami obegeyo hilisebale ligia, hele no, amakelelumo wasefasia, nafulu koleba dobia ami dabaiyeba hiliselu. Hele amo hebene. Idele inolo ili auba asigi ule ofelesia, Godefea eweguba sodo, “Ga nine Gode.” Auba selesi, Godehe ine sulu auba Efea selefe amofeamo yualale. Aulugulu, Ehe sidi amo ili mesesifia madeneba ufulu.17Abalahama e asigi ule ufulu amofea alefasia, Godehe e dedeba besabi, ehe Aisegemo Efea ulu melu. Saminimo, Gode Ehe Abahalamafea eweguba solubiyo. “Aisege efeasufia, ge gauwadali mosomu holobagaeyobafe.” Abalahama, efea oloba huliale sulu auba saaba ufulumo, fedoba sefia ligia, ehe asigi ule ofelesia, ene faibe ulelu amo Godefea ulu mesia dufa meyone alolu.19E auba meyone ligia, e eweguba hiliselu. Aisege olasenaga, amo hama. Godehe e haiba degeba ifoyodolu labe. Aulugulu, Abalahama ehe ene faibemo olaiyafia obegeba dulu. Auba holobagalu amohe, dufia holobagalu amone iminilu.20Aisege e Godefea asigi ule ufulu amofea alefasia, ehe Yekobodai, Isodaifea, kegele aalufea dufia holobagaeyobafe amone ediliba ofa sulu solu.21Yekobo e Godefea asigi ule ufulu amofea alefasia, e olaeyo hagoalesia, Yosebene faibe aida amofea ediliba ofa sulu solu. Kaidamo ene seba ado hau amofea, waafia, anifia ligia, e Godefea gulugululu.22Yosebe e Godefea asigi ule ufulu amofea alefasia, e olaeyo hagoalesiamo, e saaba ofa selesia, dufiamo Isolaele ili Isibi hele gadefia maiyobafe. Aufia, ili abiamo, ene kiwimo dibia malaleba solu.23Mosesene enaedai enaodai, aaluda asigi ule ufulu amofea alefasia, aine faibe subobomo muguba ufulu. Fogo ami, Isibine kini, Felau, ehe Isolaelene inolo faibe subobo sunia yasoba danemaleba saaba ufulubiyo. Auluso, aaluhe sulu auba saaba ufulu amo sagilisiale, Mosese seba difasia, e faibe yogolelu labe baafia, e muguba ufia ligia, aube osoloa alolu.24Ausi, kini Felaune elewelihe e fofoba dulu. Mosese auba fofoba labi, e bulefasia, asidalu adesimo, e asigi ule ufulu amofea alefasia, ilihe e-mo kini Felaune eleweline faibeba, auba samesialesia haboba alolu.25E Felaune enauwa ligia, e elebeda dulu inolo asulubiyo. Auba ligia, ene miliyolu usu e wolune nenalebalu kegele naba alebaiyo. Auluso, auba misiyomo afelesia, e Godene idele inolodai naga ua diyone daalu.26Ehe elebe nafulu Gode alefasia efea meyobafe amone ama hiliseba ligia, e bisigia, yualo e Kelisone wi saabia dife amohe, Isibine moleda, momadada, kegeleda amo wasolu dobi abulu.27Mosese ene asigi ule ufulu amofea alefasia, e Isibi kinine kanolo bule amone baaba sagilisiale, e Isibi gadefia daalu. Idele inolone simo Gode bolaleso, Mosese e Gode bologulu alefasia, e kiwigaafia alolu.28Mosese asigi ule ufulu amofea alefasia, Obegeba Dulumone Henesia Sigilo amone manamo e maugalu. Dufa Dafalilo ehe inigia, ine faibe olaibomo dufa dafalimesiale, Mosesehe, idele inolofeamo, dofene sibi edone ibimo gefasia, eno salibane higidai, keadaifea, heeba yaamaleba solu. Dofene sibi edone ibi eno salibane higidai, keadaifea, heefe.29Isolaele idele inolo ili Godefea asigi ule ufulu amofea alefasia, salu hano Genelumo osolaba dafelesia, hele falalu holobagasi, ili amo segeba dedalelu. Auluso, ili aafe auba, Isibi inolo ilida auba maiyone dedeba kuliba aasi, ilimo hano amo gifiaba daneba yaalu.30Isolaele idele inolo ili Godefea asigi ule ufulu amofea alefasia, Yeligo dauno bulemo, hilia domoba amohe amaleba galisi, Yeligo dauno abane yalaba galilu amo, ene asiba olaboba suga dalelu.31Susugu ido Lahabo e Godefea asigi ule ufulu amofea alefasia, Isolaele inolo aida aibasilo mulumo heneba uluba alolu. Aulune, Godene sulu saidafolo idele inolo amo dufa danesimo, e ilidai ua dufa olaluale.32Aufia, sulu amone haisimo, na halaguba gegoaba saeyobi? Gidiyonoda, Balagoda, Samosonoda, Yefededa, aufia Deibidida, Samueleda, aufia saaba ofolo inolo ilida, ili moloba alolu amomo, gilifea awaeyo hilisefeso, na fogo malebu.33Inolo ili amone asigi ule ufulu amofea alefasia, ilihe kini noolodai belagulumo, kaamo alolu. Isoluale besabemo, ili isoba moloba ofolo. Aufia, Godehe ilifea meyoba oloba huliale saaba ufulu amone, ili dulu. Aufia, ilihe laeono amone mofeyo gaduba yaalu.34Ine asigi ule ufulu amohe, de waiya bulemo usuba dafulu. Helebesi ili dufa olaeyo weiyaasi, ili siba dafia dedalelu. Aufia, ili kiwi saneba yaalu adesimo, Godehe ili kiwigaaba ufulu. Aufia, ilihe belagusia, kiwigagalu adesia, hele nolobalone yobolo inolomo aiba gasaba dafalilu.35Idele noolo ine asigi ule ufulu amofea alefasia, Godehe ine faibe olalumo haiba degeba ifofasia, inefea obegeba melu.
Idele inolo noolomo, ine asigi ule ufulu hamesifia, gisa inolohe ilimo yaminiba yaalu. Auba yaminiba yaasia, gisa inolohe ilifea selesia, “Ga Godefea faiso mesenaga, na ga waagi beega malaleyo”. Auluso, ili beega maiyomo hiliseluale. Maumo, ili olafia, haiba degesia, miliyolu miliyo nafulu koleba diyo amone hilisefia, ami ili waagi yaminimesi kalugaalu.36Noolomo, gisa inolohe ilimo gaidabofasia, efolo fegosia, seini dofaba yaafia, dibolo dafaliba ilogolu.37Noolomo, olamesi ilihe abane odaba yaalu. Noolomo, sohe, ine domalamo olofa haganaba yaalu. Noolomo, helebe bainadene sihe dufa danelu.
Aufia, asigi ule ufulu idele inolo noolo ili wida male adesia, kegeledale ligia, meme badodai, sibi badodaimo fagulo kakaloguba, kakafia siba alolu. Noolohe ilimo elasabiasia, naga meba yaalu.38Helefealune wolu idele inolo ili hilisesia, asigi ule ufulu idele inolo ninidai ua misiyone lilibuale. Auba hilisesia, ilihe ili aiba gasalu. Ausi, ilimo hele galeada, hele falaiyada sibaisaba ligiamo, sowaea libodai, hele kalebadai haneba alolu.39Idele inolo ili amo sunia, asigi ule ufulu amofea alefasia, Godehe ili amofea wi nafulu koleba mesia, wabialeba selaba yaalu. Auluso, ili amo helefealu iwi sigiamo, Gode ilifea oloba huliale meyoba saaba ufulu amo, ili aso duluale.40Mau enebamo, samini waagi, Godehe nineba nafulu olaibo koleba madeneba ufulu. Aulune, nini aso male labi, Ehe ilidale aso nafulu moloba samodoyo hamefale. Aubale. Ehe nine fogo holobagamesi yasifia, ninidai, ilidai, ua nafulu moloba samodoyo hamefe. Mau amofea alefasia, ili oloba huliale saaba ufulu amo dibale ligia, aso yasiba alolu.
Idele inolo noolomo, ine asigi ule ufulu hamesifia, gisa inolohe ilimo yaminiba yaalu. Auba yaminiba yaasia, gisa inolohe ilifea selesia, “Ga Godefea faiso mesenaga, na ga waagi beega malaleyo”. Auluso, ili beega maiyomo hiliseluale. Maumo, ili olafia, haiba degesia, miliyolu miliyo nafulu koleba diyo amone hilisefia, ami ili waagi yaminimesi kalugaalu.36Noolomo, gisa inolohe ilimo gaidabofasia, efolo fegosia, seini dofaba yaafia, dibolo dafaliba ilogolu.37Noolomo, olamesi ilihe abane odaba yaalu. Noolomo, sohe, ine domalamo olofa haganaba yaalu. Noolomo, helebe bainadene sihe dufa danelu.
Aufia, asigi ule ufulu idele inolo noolo ili wida male adesia, kegeledale ligia, meme badodai, sibi badodaimo fagulo kakaloguba, kakafia siba alolu. Noolohe ilimo elasabiasia, naga meba yaalu.38Helefealune wolu idele inolo ili hilisesia, asigi ule ufulu idele inolo ninidai ua misiyone lilibuale. Auba hilisesia, ilihe ili aiba gasalu. Ausi, ilimo hele galeada, hele falaiyada sibaisaba ligiamo, sowaea libodai, hele kalebadai haneba alolu.39Idele inolo ili amo sunia, asigi ule ufulu amofea alefasia, Godehe ili amofea wi nafulu koleba mesia, wabialeba selaba yaalu. Auluso, ili amo helefealu iwi sigiamo, Gode ilifea oloba huliale meyoba saaba ufulu amo, ili aso duluale.40Mau enebamo, samini waagi, Godehe nineba nafulu olaibo koleba madeneba ufulu. Aulune, nini aso male labi, Ehe ilidale aso nafulu moloba samodoyo hamefale. Aubale. Ehe nine fogo holobagamesi yasifia, ninidai, ilidai, ua nafulu moloba samodoyo hamefe. Mau amofea alefasia, ili oloba huliale saaba ufulu amo dibale ligia, aso yasiba alolu.
Wycliffe Bible Translators, Inc.