Edwɛndolɛ98
Bɛmaa Azɛlɛ ye ɛli fɛlɛko; Awulae le Belemgbunli
1Bɛdo edwɛne fofolɛ bɛmaa Nana Nyamenle, ɔluakɛ yeyɛ nwanwane ninyɛne dɔɔnwo! Ɔlua ɔdaye ye tumi ɔ nee ye nwuanzanwuanza anwosesebɛ zo yeli konim.2Nana Nyamenle da ye konimlilɛ ne ali, yemaa maanle maanle ɛnwu ye ngoanelielɛ tumi ne.3Yehakye ye ɛhulolɛ kpundii, ɔ nee ye nɔhalɛlilɛ ne, mɔɔ ɔlɛ ye ɔmaa Yizilayɛ la. Aleɛabo amra amuala ɛnwu yɛ Nyamenle ye konimlilɛ ne.4Aleɛabo amra, bɛdo edwɛne bɛva bɛlielie bɛ nye, bɛdo edwɛne bɛmaa Nana Nyamenle; bɛva fɛlɛkolilɛ bɛyeyɛ ye, na bɛdo ayɛlɛyelɛ edwɛne!5Bɛva sanwunle bɛdo ayɛlɛyelɛ edwɛne bɛmaa Nana Nyamenle! Bɛva getae ɔ nee ɛnelɛ fɛlɛko bɛhanvo ye.6Bɛva aweɛne ɔ nee mɛne aweɛne ne mɔ bɛyɛ alɛra anyelielɛ nu, wɔ Belemgbunli ne mɔɔ le Nana Nyamenle la anyunlu!7Bɛmaa nyevile, ɔ nee ninyɛne mɔɔ wɔ nuhua la kpokpoti ɛhuluhulu; ewiade, ɔ nee bɛdabɛ mɔɔ bɛde nuhua la amuala, bɛdo edwɛne!8Bɛmaa azule muala ɛbɔ bɛ sa nu; na awoka kpokpoti ɛva fɛlɛkolilɛ ɛbɔ nu ɛdo edwɛne,9wɔ Nana Nyamenle anyunlu. Ɔluakɛ yera kɛ ɔbazie ewiade ye. Ɔbava tenleneyɛlɛ yeabua aleɛabo amra ndɛne, na yeava pɛpɛlilɛ yeabua menli mɔɔ de zolɛ la ndɛne.Biblica, Inc.