Edwɛndolɛ42
Nana Nyamenle anwo Nzuhɔne
1Kɛmɔ weɛlɛ kpɔsa fɛ a, ɔ ti akunlu ba nzule weɛlɛkɔkɔ zo la, zɔhane ala yɛɛ me ɛkɛla ne anwo dɔ wɔ a, O me Nyamenle.2Me ɛkɛla anwo ɛlɛdɔ Nana Nyamenle, Nyamenle ne mɔɔ de aze dahuu la. Kenle nzu bɔbɔ a menwɔhɔ menwɔhɔzonle wɔ Nana Nyamenle anyunlu a?3Alehyenlɛ nee aledwolɛ muala mesu; me aleɛ a le monle ala. Mekɛ ɛhye amuala anu, me kpɔvolɛma biza me kɛ, “Na wɔ Nyamenle ne wɔ nienwu?”4Mekakye dɛba ne mɔɔ medi menli ekpunli ne ati, yɛkɔ Nana Nyamenle sua nu la; ekpunli mɔɔ le fɛlɛkolilɛ, ayɛlɛyelɛ edwɛne nee anyelielɛ ɛlɛkanvo Nana Nyamenle la.5Duzu ati a alɔbɔlɛ kpole ku me a? Duzu ati a melɛnwu amaneɛ a? Mebava me anyelazo meawula Nana Nyamenle nu; na meahanvo ye bieko kɛ, ɔle me pepɛdievolɛ nee me Nyamenle.6O me Nyamenle, me ɛkɛla ɛlɛdi nyane wɔ me nu; ɛhye ati mebahakye wɔ meavi azɛlɛ kɛnlɛma ne mɔɔ Azule Dwɔdan lua zo, na Boka Hɛmɔn nee Boka Mezaa noko gyigyi zo la azo.7Awozinli ɛheda awozinli zo, na alɔbɔlɛ ɛva me aze kɛ azuyilɛ la.8Awulae ɛva ye ɛhulolɛ kpundii ne ɛwula me nu wɔ alehyenlɛ ye anu; ɛhye ati mebado ayɛlɛyelɛ edwɛne meahanvo ye nɔɔzo. Mebazɛlɛ Nana Nyamenle ngoane mɔɔ ɔnlɛ awieleɛ a.9Mebaze me pepɛdievolɛ Nana Nyamenle kɛ, “Duzu ati a ɛ rɛle ɛvi me ɛ? Duzu ati a ɔwɔ kɛ mekɔ zo medi nyane wɔ me agbɔvolɛ amumuyɛvoma asa anu a?”10Medie bɛ aholoba mevɛ; alehyenlɛ biala bɛbiza me kɛ, “Wɔ Nyamenle ne wɔ nienwu?”11Duzu ati a alɔbɔlɛ kpole ku me a? Na duzu ati a melɛnwu amaneɛ ɛ? Mebava me anyelazo meawula Nana Nyamenle nu; na meahanvo ye bieko kɛ ɔle me pepɛdievolɛ nee me Nyamenle.Biblica, Inc.