Mbu'ki'49
1Haho Yakobo wav'itanaga v'ana v'akwe na ku'v'awi'la ati', “Mwikuminge haki'mo, ki'gele mmuwi'le ago galamupandi'ke ku' nsiku' i'zyo zizile.2Ikumingi, inywe v'ana v'amwa Yakobo, mundegeleke ene Izilaeli, sinywe.3Lubeni, ev'e u'li' muv'yalwa wanne wa mbele, nguzu zyanne na ki'sumo cha wu'su'mba wanne, ev'e u'v'aki'lile v'adu'gu'yo ku' wu'hanya na ku' nguzu.4Ali'vi u'li' ki'ti' minzi' ga muhu'mo, u'kasye u'v'e mutongelezi hangi', ku'nguno waliinile ha wu'li'li' wanne, ene so, na ku'wu'v'ezezya zoma wu'li'li' wanne.5Simiyoni na Lawi lyav'o li'mo, mpanga zyav'o zili' vilwani'lo vya ku'v'ezezya wu'kandi.6Ev'e moyo gwanne, ku'du' wingi'le mu mbisi'i'la zyav'o, ninga ku'du' wikale mu mav'anza gav'o. Ku'nguno v'awu'lagile v'antu' ku' ki'sila chav'o, na ku' wu'pu'lu'nganu wav'o v'aputile matimba ga ng'ombe.7Ki'fwizi'i'lwe ki'sila chav'o ku'nguno ki'daki muno, na ku'kilwa kwav'o ku'nguno ku'li' wu'du'hu' ki'sa. Ndav'agawu'lanie mu nsi' yamwa Yakobo, ndav'asambazye mu nsi' yamwa Izilaeli.8Ev'e Yuda, v'adu'gu'yo v'alaku'kumi'li'zye. Mukono gwako gu'lanige nhingo zya v'anisi v'ako, na v'av'yalwa v'ichako v'alaku'ku'v'i'i'le.9Yuda ali' ki'ti' mwana wa nsimba, i'yo yamali'laga ku'lya nyama na ku'su'v'a ku'fuma ku' iv'enda, i'yo yi'li'wigolola na ku'lala ha nsi'. Mwana wanne ali' ki'ti' nsimba nki'ma. Nde wa ku'gima ku'yi'tunu'zya?10Mulanga gwa ndekeli gu'kasye gu'fume ku'mwa Yuda, ninga isumbi' lya wu'temi ku'fuma mu magu'lu' gakwe, mpaka aho alafike musav'a wu'temi, u'yo nsi' zyose zilamuku'zye.11Mwene alav'e na wu'poni wa mizabibu mingi muno, ninga alatunge mpunda yi'lye muzabibu musoga. Alakanze myenda zyakwe ku' ki'neneko, na vizwalo vyakwe mu minzi' ga mizabibu gazaa ki'ti' magazi.12Minso gakwe galazalu'ke ku' ki'neneko, na mino gakwe galav'e gape ku' mav'eele.13Sebuloni alikale ha mpwani ya nyanza, na henanho halav'e ha lwandi' lwa wu'salama kwi'mi'ki'zya mato. Lu'v'i'mbi' lwakwe lu'lagali'nhe ku'ya ku' Sidoni.14Isakali ali' ki'ti' mpunda ya malupo, i'yo yi'li'wilali'ki'zya hagati' na miligo zyayo.15Yi'li'wona ku'v'a ha lwandi' lwa ku'suuhi'la lu'li' lu'soga, na nsi' yi'li' ya kwiv'elelwa. Yi'li'kundamya mugongo gwayo mu ku'sola muligo, yi'lifumye ku'v'a nsese ya mili'mo milambu.16Dani alav'e muyangu'zi wa v'antu' v'akwe, ki'ti' yu'mo mugati' na magongo ga mu Izilaeli.17Dani alav'e ki'ti' nzoka mu nzi'la, nzoka ya ndu'li'la ha mpelo na wu'v'i'ti'lo, i'yo yi'li'luma tu'sinsila twa falasi zya v'anisi, ki'gele u'yo ayi'liinile agwe kansaga.18Ev'e Gu'ku' Mulungu nu'lindi'la wu'pi'zya wako!19Gadi alagwi'li'lwe na v'anisi, ali'vi alav'agalu'ki'le na ku'v'akinda.20Nsi' yamwa Asheli yi'lafumyage viliwa vingi, viliwa visoga mu ku'lya mutemi.21Nafutali ali' ki'ti' nsya ya wiyagalu'le, i'yo yi'li'wu'ta v'ana v'asoga.22Yosefu ali' ki'ti' muzabibu u'go gu'li'pamba visumo, u'go gu'li' ha mpelo na kasela ka minzi', na matambi' gakwe gali'landala ku' igu'lya na magelele.23V'alasani ndi' v'amulasa ku' wu'daki, v'amutagi'li'lile masonga na ku'mutusya muno.24Ali'vi wu'ta wakwe wav'age wu'jaamu, makono gakwe gongeziv'agwa nguzu, ku' wu'kowozi wamwa Gu'ku' Mutatambi' wamwa Yakobo, na ku' makono ga Mudi'mi na Itale lya Izilaeli.25Mulungu wamwa so alaku'gwasye, Gu'ku' Mulungu wa Nguzu alaku'dosye, u'pandi'ke lu'v'ango lwa nvula ku'fuma ku' igu'lya, lu'v'ango lwa minzi' ga kasela ga ha nsi', na lu'v'ango lwa mav'eele na wu'v'yazi.26Lu'v'ango lwamwa so lu'ki'lile lu'v'ango lwa ngu'lu' zya nhananhana. Lu'ku'lile ku'ki'la hazina ya ngu'lu' zya kale. Lu'v'ango lwenu'lo lwikale ha igu'lya na mutwe gwamwa Yosefu, ha igu'lya na u'yo wasogolilwe av'e mutemi mugati' na v'adu'gu'ye.27Benyamini ali' ki'ti' ipu'u'ge idaki. Ndiyu' li'li'lyaga masapi'i'lo galyo na mpi'ndi' li'li'gawu'laga i'vyo lyadimaga.”28Genago hu' magongo iku'mi na av'i'li' ga Izilaeli, na zyeni'zyo hu' mihayo i'zyo Yakobo wav'awi'laga v'ana v'akwe ha itungo lya ku'v'adosya. Wav'adosyaga yu'mo yu'mo, v'ose ki'la yu'mo i'vyo yi'mugelani'lile.29Haho Yakobo walagi'li'zyaga ati', “Ene negelaga ku'fwa mbe haki'mo na v'agu'ku' v'anne. Mulanzyi'ke haki'mo na v'anamala v'anne mu ipilinga i'lo li'li' mu ilale lyamwa Efuloni, Muhiti.30Ilale lyeni'lo li'li' ku' Makipela, lwandi' lwa ki'ya ya Mamule, mu nsi' ya Kanaani. Ipilinga lyeni'lo hu' i'lo Abalahamu ndi' wagu'la ku'mwa Efuloni, Muhiti, hav'e ha ku'zyi'ki'la v'antu' v'akwe.31Mu ipilinga mwenu'mo, v'amuzyi'ki'laga Abalahamu na muki' wakwe Sala, Isaka na muki' wakwe Lebeka, na Leya namuzyi'ki'laga mwenu'mo.32Ilale lyeni'lo na ipilinga lyeni'lo lyagu'lilwe ku'fuma ku' V'ahiti.”33Hohene Yakobo aho wamali'laga ku'v'alanga v'aane, wasu'v'yaga magu'lu' gakwe ha wu'li'li', wakindi'laga myu'ye, wagulalaga, na walondaga nzi'la ya v'agu'ku' v'akwe.
Pioneer Bible Translators