Kesikpɛkpɛ46
Yakɔb Avɛ Egipte
1Kliso Israɛl alɔ atɔnɔ kidzo nɛ̀ kɛkanyiaka gɛ kɛlɛ yɛahɔɛ, kɛlɛ gɛ ediku Biɛshɛba, apɔɛ bɔdɔ̃ akɔ yɛaka Isak yɛ Owusoso Akaa.2Kɛlɛ Owusoso Akaa aɖɔaɖɔ akɔ Israɛl nɛ bɔlalá mɛ nɛ elishi asɛ, "Yakɔb! Yakɔb!"Ebuiliulũ asɛ, "Mɛ naalɛ."3Aɖɔ asɛ, "Mɛinu Owusoso Akaa, Owusoso Akaa akɔ wɔaka. Kifu tiyì wɔ tɛ ozhyi ɔvɛ Egipte, ɔmɔsɛ ɛbabhɛtɛ wɔ kɛmadi gbagbla nɛ ɛkɛlɛ.4Ɛba vɛ Egipte nɛ wɔ, kɛlɛ ɛba dzini wɔ mana. Kɛlɛ Yosɛf yɛahɔɛ yɛabadã wɔ aŋuhu."5Kɛlɛ Yakɔb ashɛ nɛ Biɛshɛba, kɛlɛ Israɛl yɛeyianyɛ alɛ bagbanà balɛ akaa Yakɔb nɛ̀ balɛ eyialɛ nɛ̀ balɛ edzini alɛ akpɛ ihuɔ gɛ baagã eeteɛ gɛ Faɖawo asɛsɛ asɛ tɛ betuku yɛ.6Balɔkɔ balɛ kepi baagã nɛ̀ bɔdɔ̃ gɛ bamɔ nɛ Kana tsyɛ, kɛlɛ Yakɔb nɛ̀ yɛ hihui nɔ petee bavɛ Egipte.7Alɔkɔ aplɛnɔ yɛɔmɔɔ avɛ Egipte nɛ̀ yɛeyianyɛ alɛ, yɛ beshui nɔ nɛ̀ yɛeyiadzɛ alɛ nɛ̀ yɛeshui badɛnuvɔɛ-yɛ kihui nɔ petee.8Banɔ alɛ enyeɛ alɛ enu Israɛl yɛeyialɛ (Yakɔb nɛ̀ yɛ bɔmɔɔ) gɛ bavɛ Egipte.:
Rubɛn eyi kusi akɔ Yakɔb.9Rubɛn yɛ beyianyɛ naalɛ: Hanɔk, Palu, Hɛzrɔn nɛ̀ Karmi.10Simeɔn yɛ beyianyɛ naalɛ: Yemuɛl, Yamin, Ohaɖ,, Yakin, Zoha, nɛ̀ Shɔl Kanadzi yɛeyianyɛ.11Levi yɛ beyianyɛ naalɛ: Gɛsɔn, Kohat nɛ̀ Mɛrari.12Yuɖa yɛ bɛeyianyɛ naalɛ: Er, Onan, Shila, Pɛrɛz, nɛ̀ Zɛra (pɔ Er nɛ̀ Onan betsí nɛ Kana kesiakpa mɛ). Pɛrɛz yɛ beyianyɛ naalɛ: Hɛzrɔn nɛ̀ Hamul.13Isaka yɛ beyianyɛ naalɛ: Tolà, Puah, Yashuɖ nɛ̀ Shimrɔn.14Zebulɔn yɛ beyianyɛ naallɛ: Sɛrɛɖ,, Elɔn nɛ̀ Yaaliil.15Banɔ alɛ balɛenu beyianyɛ gɛ Leya amɔ́ akɔ Yakɔb nɛ Paɖan Aram ɔplɛnɔ yɛeyidzɛ Ɖina. Yɛ beyianyɛ alɛ nɛ̀ beyiadzɛ alɛ petee tɛkakalà mɛ lɛ afɛata nɛ̀ taata.16Gad yɛ beyianyɛ naalɛ: Zɛfɔn, Hagi, Shuni, Ɛzbɔn, Ɛri, Aroɖi nɛ̀ Areli.17Asha yɛ beyianyɛ naalɛ: Imna, Ishva, Ishvi nɛ̀ Bɛria. Balɛ ada yɛedzì Sɛra Bɛɖia yɛ bɛeyianyɛ naalɛ: Hɛba nɛ̀ Malkia.18Bunuvɔɛ alɛ Zilpa amɔ́ akɔ Yakɔb, gɛ Laban alɔkɔ akɔ yɛeyiadzɛ Leya-kɛfɔ nɛ̀ teehlo nɛ tɛkakalà mɛ petee.19Yakɔb yɛedzini Ratsɛl yɛ beyianyɛ naalɛ: Yosɛf nɛ̀ Bɛndzamin.20Nɛ Egipteɛ Asɛnaf gɛenu Potifɛra On yɛakpukpudzi yɛeyiadzɛɛ amɔ́ Manase nɛ̀ Efraim akɔ Yosɛf.21Bɛndzamin yɛ beyianyɛ naalɛ: Bɛla, Bɛka, Ashbɛl, Gɛɖa, Neeman, Ɛhi, Rosh, Mupin, Hupin nɛ̀ Aaɖ.22Beyiɛanyɛ gɛ Ratsɛl amɔ́ akɔ Yakɔb naalɛ-kɛfɔ nɛ̀ taalɛ nɛ tɛkakalà mɛ petee.23Ɖan yɛeyianyɛ naalɛ: Hushin.24Naftali yɛ beyianyɛ naalɛ: Yaziɛl, Guni, Yɛza, Shilɛm.25Beyianyɛ alɛ balɛenu Bilxa, gɛ Laban alɔkɔ akɔ yɛeyiadzɛ Ratsɛl pɛ amɔ́ akɔ Yakɔb-tegegene nɛ tɛkakalà mɛ petee.26Bagɛ avɛ Egipte nɛ̀ Yakɔb petee-bagɛ enu yɛ bɔmɔ́ɔ gɛ onu bagɛ kalà yɛeyiridze alɛ-balɛ tɛkakalà mɛ lɛ banɔ afeteehlo nɛ̀ teehlo.27Odenɔ beyianyɛ taabha gɛ bamɔ́ akɔ Yosɛf nɛ Egipteɛ, Yakɔb yɛeshopo alɛ, gɛ bavɛ Egipte, balɛ tɛkakalà mɛ petee lɛ afɛtegegene.28Otsi Yakɔb akpɛ Yuɖa nɛ Yosɛf ɔkɔ akpɛ otugbà tɛ akasɛ yɛidzoɔ gɛ abagã vɛ Gɔshɛn. Gɛ bediku Gɔshɛn kɛkɔtɔ mɛɛ,29Yosɛf abalɛ̀ ohuɔ gɛ baagã eeteɛ babalɛ ohuɔ elu akɔɛ kɛlɛ avɛ Gɔshɛn tɛ adɛtsyanà yɛaka Israɛl. Gɛ Yosɛf eku yɔɛbhà kɔo, atáhɔɛ akpɛ yɛaka ishu, kɛlɛ ebieyo kibe dzlolo.30Israɛl etseɖe Yosɛf asɛ, "Otsiɛnɔ ɛbalà tsí, gɛ ɛmɔ̃ kɔ mɛishu sɛ ɔkɔ lɛ nɛkpã."31Kɛlɛ Yosɛf etseɖe yɛadzalɛ nɛ̀ yɛaka bɔpãmɛ anɛ asɛ, "Ɛbà wuvɛ tɛ ɛɖɔaɖɔ akɔ Faɖawo kɛlɛ ɛbatseɖe yɛ sɛ, 'Mɛadzalɛ nɛ̀ mɛaka yɛɔpã, gɛ bazã Kana kesiakpa nabha, babá mɛɔkɔ.32Baanyɛ benu ibhoshi agbagbanà elete; beɖi kepi agãa abha, kɛlɛ balɔkɔ balɛ baagã azaa amanà nɛ̀ banɛntsyɔɛ nɛ̀ kɛkanyiaka gɛlɛ balɛ ahɔɛ.'33Onupɛ Faɖawo ekulu nɔ pɛ ebisiɛ sɛ, 'Kɛxɔ̃ɛ ɖuwoelu awɔawɔa nonu?'34nɔ builɛulũ ɔsɛ, 'Wɔaxɔɛdɛɛ beeɖi kepi aagã abha odenɔ balɛ bunuvɔmɛ bɔkpɛnɔ otsiɛ, asɛ kana gɛ bɔlɔ akaa alɛ abhɛtɛ.' Kɛlɛ babà kɔ wɔnɔ kidzo tɛ nɔzã Gɔshɛn kɛkɔtɔ mɛ, ɔmɔsɛ ibhoshi agbagbana elete petee benù ogũ ɔkɔ Egipteanɛ."
The Seed Company