यहेज्केल16
1फाशोअ यहोवाआ वसन माआ जागे पोतो.2“ए मोनवीइ पोऱ्या, येरुसालेमोअ सोगद्ये कामे तियाआ दिहानोम लेतावीत आप.3“तियांहां एहें को: यहोवा येरुसालेमोहों कोहे, तु कनान देसोम जल्म लेत वोडो ओवोहो, ताआ आब्हू एमोरी आन ताआ आयही हित्तीवाली ओती.4ताआ जल्म जेदिहीं ओवो, तेदिहीं ताआ नाल ने तोड़ाअयी, आन ताहूं सोकी ओवे तेहें काजे नाहां उंगलावयी, नाहां ताहूं खारो लागाड़्यो आन नाहां कोडे ताहूं सिवराम वेटाल्यी.5यां कामोमेहें रोत तु एक बी काम कोए एहेलिही कोडाआ दयाअ नजर तापोअ ने ओवी; एतोज नाहां पोन ताआ उब्जीइल्ये दिहीज तु ने हाजी कोतीज ताहूं रानोमेहें टाकी देदीते.6“तेहेलाम आंय ताआ आहनेज रोत सोरक्यू, आन ताहूं रक्ताआ उंडूज वेटालीत मिकल्यी देख्यी, ताहां आंय ताहूं कोयो, ‘ए रक्ताआ उंडूज वेटालल्यी, तु जिवती रो;’ होव, आंय ताहूंज कोहो, ‘ए रक्ताआ उंडूज वेटालल्यी, तु जिवती रो;’7ताहां आंय ताहूं खेतोमेऱ्याआ साड़ोअ होस वोडी कोअयी, आन देखता देखताइज वोडी ओत गोयी आन बाहरी देखाइ वोल्यी; आन ताआ साती निहींयी आन ताआ सिंग्ये बी वाद्ये, तेबी तु उगड़ाअलीज ओती.8“आंय फाशुउ ताआ जागे रोत सोरकीइत्लू तेहेलाम ताहूं पाल्यो, ओमे तु पुरी बोईंज बोणीत गोयीते; तियाहा काजे आंय माआ साअको ताहूं फांगाड़्यो; आन शप्पत लेत कोइत ताअरी वायदो कोअयो, आन तु माआ बोणीत गोयी, प्रभु यहोवाआ ओं वसन होय.”9“ताहां आंय ताहूं पाअयों वाअहीं उंगलावीत कोइत रक्त तुवी देदो, आन ताआ डिलोअरी तेल हाऱ्यो.10मी ताहूं बाहरीमेएं साअके आन हाजा सुसोअ सांबड़ाआ खाहाडे गुडाम पोवाड़्ये; आन ताआ कंबरेमेहें हाजु दोरु बांद्यु, आन ताहूं हुत्राव आंगड़े पोवाड़्ये.11आंय ताहूं हिंग्रावी देदी, आन ताआ आथोम बांगड़्यी, आन गोलाम हाकल पोवाड़्यी.12फाशुउ आंय ताआ नाकोम नाकन्यी आन कानोम बिजल्ये पोवाड़्ये, आन ताआ मुन्कापोअ बाहरी एतोज गोवणो पोवाड़्यो.13तु होना सांदी वाअहीं हिंग्राअयी आन ताआ पेरोठ हुत्राव आन मोवा साअकाआ ओतू; आन ताआ खाअलोअ मोयदो, मोद आन तेल ओतो. तु जुदी बाहरी एतीज ओती, तेतोज नाहां पोन तु राणी बोणुहूं जोगीही ओत गोयी.14ताआ बाहरी रुप देखीत आखा देसोम ताआ नाव गाजीत गोयो; काहाके ताहूं होबाड़नारु आंयुज ओतू. एहें कोत यहोवा देव कोहे.”15“पोन तु ते ताआ हाजला रुपोअ आन गाजल्या नावोअ वापर कोइत सिनालो कोइ वोल्यी, आन आखा वाटहाऱ्याअरी जुदे खाराब कामे कोअये, जों कोडो ताहूं गोमतोतो, तु तियाहा मिलतीते.16तुमे ताआ साअके लेत कोइत हाजा हाजा जागा बोणावीत लेदा, आन तिहीं सिनालो कोअयो, एहलीही सोगदाय कोअयी जे केदिहीं नाहां ओवी आन ने केदिहीं ओवनारे.17तुमे मी आपल्या होना सांदीइ गोवणाआ वापर कोइत माट्योअ मुर्ती बोणायी आन तियांअरी सिनालो कोअयो.18तुमे मी आपल्ये साअके लेतावीत तियांहां फांगाड़्ये, आन माआ तेल आन धुप तियांआं सामने गाराहा आप्यी.19आंय ताहूं खाय तेहें आपल्यो ओन मोयदा, तेल, मोद लेत कोइत तियीं मुर्तीइ सामने हाजी गोंदेए भेट मिक्यी, एहें कोत प्रभु यहोवा कोहे.”20“जियां पोऱ्याहा तु माआ काजे जल्म आप्यो, तियीं मुर्तीही गाराहा कोइत सोड़वी देदी. केहें ताआ सिनालो एहेलिही हानी गोठ ओती के?21काहाके तुमे माआ पोऱ्याहा तियीं मुर्तीइ आगाड़ी आगीम गाराहा कोई देदे.22ताहूं ए आखी सोगदाय आन रांडीइ कामे कोअताम जेहेलाम तु उगड़ाअलीज रक्ताआ उंडूज लुड़्या कोअतीते ओं ओर कायनाहां.”23“ताआ खाराब कामोवाअहीं ताआ जुदी विते! ताआ विते! यहोवाआ ओंज वसन होय.24तुमे एक उसो कोअ बोणावीत लेदो, आन हारेक सोवकड़ीपोअ एक उसू जागु बोणावीत लेदू;25आन एकी एकी सड़केए मेरेपोअ बी तुमे ताआ उसा जागा बोणावीत कोइत ताआ होबा बिगाड़ी देदी, आन हारेक वाटसालुहू खाराब कामोअ काजे हादीत कोइत वोडी सिनालीइं ओत गोयी.26तुमे ताआ आहने वाला मिसरी माअहोंअरी बी सिनालो कोअयो, जें हाजे मात्ले होय, आन माहूं खोत लागाड़ीइलोअ काजे ताआ सिनालो वादाड़ती गोयी.27“तिहींइं काजे आंय ताआ विरुद्दाम माआ आथ सालाड़ीत कोइत, ताआ दाड़ख्याआ रोटाआ कमी पाड़्यी, आन आंय ताहूं ताआ सीस कोअनारी पलिश्तीवाली बोईंइं मोर्जीपोअ सोड़ी देदीही, जे ताआ वोडा पाप कामों वाअहीं लाजवाअतीही.28“तेबी ताआ फुक ने हेलाअयी, तियाहा काजे आश्शूरी माअहोंअरी बी सिनालो कोअयो; आन तियांअरी सिनालो कोइला वाअहीं बी ताआ फुक ने उलाअयी.29लेणा-देणाआ देसोम सिनालो कोअती कोअती खास्द्याआं देसोम जाआं पोती, आन तिहीं बी ताआ फुक ने हेलाअयी.30“प्रभु यहोवा एहें कोहे, तु विणलाज्यी रांडीइ होसे एं आखे कामे कोअतीही; ताहां तु केतीही विणलाज्यी लाल-फुल्यी बोयोंअ होय!31तुमे हारेक सड़केए मेरेपोअ जे ताआ उसे कोएं, आन हारेक सोवकड़ीपोअ खास जागा बोणायाहा, केहें तु यांज मेहें रांडी ने गोणाअयी के? काहाके तु एहेलिही कामायीपोअ ओंहेंहे.32तु सिनालो कोअनारी बोईं होय. तु खाजगी माट्योअ वोतीइ पारका माट्योहो माटी कोत मानित लेदुहू.33बादी रांडीहीं ते पोशा जोड़ताहा, पोन तुमे ते ताआ आखी वोगऱ्याआ दोस्त्योहों ताअरी सिनालो कोए तेहें काजे सोताहा पोशाआ लालोस देखाड़ीत हाद्या.34तियाहाज तोम तामेहें आन बिहीरी सिनाल बोईंमेहें फरक होय, तु जाअहूं जाआं पोशा आपीत ताअरी हुवे तेहें नाहां हादती, ताअहूं जाआं ताअरी कोडोज हुवीइलोअ काजे तियार नाहां ओवतो.”35तियाहा कोत, ए रांडी, यहोवाआ वसन उनाआ,36प्रभु यहोवा एहें कोहे: “तु सिनालावाअहीं विणलाज्यी ओत कोइत ताआ डील ताआ दोस्त्योहों देखाड़्यो, आन ताआ मुर्ती वाअहीं सोगद्ये कामे कोअये, आन सोताआ पोऱ्याआ रक्त गाराहा कोत वोहाड़्यो,37तियाहा काजे पाल, तापोअ मेर कोअनारा ताआ दोस्त्योओं आन ताआ दुस्मोनोअ, आन आखा आसे-पासे वालाहां टोलु वालीत कोइत तियांआं सामने आंय ताहूं उगड़ाअलीज देखाड़ीहीं.38ताहां आंय ताहूं फोला सिनालो कोअनारी, आन खुन कोअनारी बोईंहीं डोंड आपतेहे, तेहेलुहू आंय ताहूं डोंड आपीहीं; आन खोतेए बाल्लायी आंय ताहूं माइत टाकीहीं.39एहें कोइत आंय ताहू तियांआं ताबाम कोइ देहीं; आन ताआ कोएं ओदालीत टाकीहीं, आन ताआ उसा जागा तोड़ी देहीं, आन उदाबादीज ताआ साअके काडा वोले, आन ताआ हाजलो गोवणो बुउसीत लेये, आन ताहूं नागी कोइत सोड़े.40“ताहां ताआ विरुद्दाम पोन्सू टोलु वालीहीं आन ते ताहूं डोणाटे, आन तारवाइ वाअहीं साटकीत पुकरा कोइ देय.41ताहां ते ताआ कोअ पेटाड़ी देये, आन जाअखीलीही बोईंइं देखताइज ताहूं डोंड आपे; आन आंय ताआ सिनालाआ कामे बंद कोइ देहीं, आन ओमे तु सिनालो कोइलाअ काजे कोडाहाज पोशा ने आपही.42जाहां आंय तापोऱ्यीइ पुरी खोत उलवी देहीं, ताहां तापोअ आंय फाशुउ ने खोत कोअ, आन फाशुउ तापोअ केदिहीं ने खिजवाओ.43जेहेलाम तु हानी ओती तेहेलामेऱ्याआ दिही तुमे ओर ने मिक्या, एतोज नाहां पोन यीं आखी गोठी वाअहीं तुमे माहूं खोत लागाड़्यी, तियाहा काजे आंय ताआ सालसलन ताआज बोसी टाकीहीं आन फाशीइ तु ताआ पेल कोअहे तेहलेहे सोगद्ये कामे आन वोडू पाप ने कोअही, प्रभु यहोवाआ ओंज वसन होय.”44“पाल, ताआ बाप्तिम आखे ए काईं कोय, ‘जेहेली आयही तेहेली पोऱ्यी.’45सोताआ माट्योअरी आन पोऱ्याअरी सीस कोअनारी ताआ आयही, तु बी बोराबर तियीइ पोऱ्यी बोणीहीं; आन सोताआ माट्योअरी आन पोऱ्याअरी सीस कोअनारी ताआ बोअह्हीं, तु बी बोराबर तियींइं बोअह्हीं निहींयी. ताआ आयही हित्तीवाली आन ताआ आब्हू एमोरीवालू ओतू.46“ताआ बांगाड़्यीइ वोल सोताआ पोऱ्यीइरी रोनारी ताआ डायी बोअह्हीं शोमरोन होय, आन ताआ हानीइली बोअह्हीं, जे ताआ हाजाड़्यीइ वोल रोहे ते तियीइ पोऱ्यी नेहें सदोम होय.47तू तियींइं होस नाहां साल्यी, आन तु तियींइं होस घाण कामोवाअहीं खुस नाहां ओवी; ए ते खुब हानी गोठ ठरती, पोन ताआ सोभाव तियींइं रोत बी वादार बिगड़ीत गोयू.48“प्रभु यहोवाआ ओं वसन होय, माआ जिवनोअ शप्पत, ताआ बोअह्हीं सदोमे आन तियीइ पोऱ्यी जाआं तुन ताआ पोऱ्यी नेहें कोअयेहे तेहेलेहे कामे नाहां कोअये.49पाल, ताआ बोअह्हीं सदोमोअ गुनू ओ ओतू, के ते तियीइ पोऱ्यीइरी वोडाय कोअतीते, ताराय ताराय खातीते आन मोज्यामेहें रोतीते; आन गरब्योअ फिकर ने कोअतीते.50तियाहा काजे ते वोडाय कोइत माआ सामने घाण कामे कोइ वोल्यी, आन ओं पालीत कोइत आंय तियीही सेटे कोइ देदी.51“ताहां ते शोमरोन ताआ पापोअरी हारकावीत पाले गोल्ये ते आरदा पाप जाआं नाहां कोअया, तुमे ते तियी रोत वादार घाण कामे कोअयेहे, आन तू ताआ जाअखा घाण कामोवाअहीं ताआ बोअह्हींइं रोत जिकीत गोयी.52तूमे ताआ बोअह्हींइं न्याय कोअयुहू काजे तु होरमाअही, काहाके तू तियींइं रोत वादार घाण पाप कोअयाहा; तिहीं वाअहीं ते ताआ रोते कमी गुनेगार ठोऱ्यीही. तियाहा काजे तू यी गोठीइ लाज कोओ आन लाजवाअती रो; काहाके तुमे ताआ बोअह्हींहीं कमी गुनेगार ठरव्यीही.”53“जाहां आंय तियीं सदोम आन शोमरोनोहों आन तियीइ पोऱ्यीही नेहें गुलामीम रोत वालीत लेताविहीं, ताहां तियींइंरीज ताआ जेलाऱ्याहां बी लेताविहीं.54ताहां तू होरमाअती रोअहूं जोवे, आन ताआ आखा कामोहों देखीत कोइत ताआ सोब पाईंन पाईं ओत जाय; काहाके तू तियांआं शांतीइ कारण बोण्यीहीं.55ताआ बोअह्हीं सदोम आन शोमरोन तियीं तियींइं पोऱ्यी नेहें फाशीइ पेल्लीइ दशामेहें जाती रोये, आन तू बी ताआ पोऱ्यी नेहें ताआ पेल्लीइ दशामेहें फाशीइ जाती रोही.56जाअहूं जाआं ताआ खाराबी सामने ने आयीते, मोन्ज्ये जियी होमसे जाआं तू आसे पासेए माअहुंउरी अरामी आन पलिश्ती बोईंइं नावे पाड़तीते, जे ओमे आखी वोल ताहूं एठी मानतीही,57ताआ वोडायीइ दिहोमेहें तोम तू ताआ बोअह्हीं सदोमोअ नाव बी ने लेतीते.58पोन ओमे ताहूं ताआ वोडा पाप आन घाण कामोअ वोजू सोताहाज आखलुहूं पोड़्युहू, यहोवा देवोअ ओंज वसन होय.”59“प्रभु यहोवा एहें कोहे: जेहेलोहो तुमे माअरी कोअयोहो, तेहेलुज आंय बी ताअरी सालीहीं, काहाके तुमे ते वायदो तोड़ीत कोइत शप्पतेहे एठी मान्यीहीं.60तेबी तु हानी ओती तियां दिहोम खाद्ली माआ शप्पत ओर कोअहीं, आन ताअरी हादाजल्म्योंअ आथवसन लेहीं.61जेहेलाम तू ताआ वोडी बोअह्हीं आन हानी बोअह्हींइं स्विकार कोअही, तेहेलाम तू ताआ सालसलोनोअ ओर कोइत लाजवाअही; आन आंय तियींहीं ताआ पोऱ्यी ठरवी देहीं; पोन ओं ताआ आथवसनोअ पुरमाणे ने कोओ.62आंय ताअरी माआ आथवसन मजबुत कोअहीं, ताहां ताहूं मुंदू जाय के आंय यहोवा देव होय.63तुमे जों कोअयो, तों आंय माफ कोइ देहीं, ताहां तू ओर कोइत होरमाअही, आन लाजवाअलीज फाशीइ सोब ने उगाड़ही. ओं तेहेलाम ओवे, जाहां आंय ताआ आक्खा कामोहों टापीहीं, प्रभु यहोवाआ ओंज वसन होय.”
The Word for the World International