Romans1
1Paul, Khrista Jisu kila ge de, langkegaime ge tei kerane qulu nah Tinggwang samlia ziemne kedet ntsamlu,2cide pa kemci kesanglaisiu gage caihakecimedung dade mrairang eh pe sampet kaibeu,3pe Na ziemne, pa au pumteih zaibe gade hegwangpei David leuhme ge.4Kemci Rabe kengkieng gade pa au Tinggwang Nabe lie de eh ketsai gade ringcuh daikelu gade ndulia da, pa au anui Rampaube Jisu Khrista.5Pe zi ziemne, pe dade anui ngaugia nah langkegai ta tei kera ngaulu, heleuh pelane de kenlum ga peu bamlu kerane.6Heleuh aidungde kakga, nnuide de Jisu Khrista gu tei zielie qulu.7Aipau laisiu de Rome namdi ga kebam Tinggwang kumedung, mina kemcime lie qu kelumedung pelane ziemne. Ngaugia depeu nnuida lalu, nah kezuyibe anui Pei Tinggwang nah Rampaube Jisu Khrista dade peu nnuida bam kelube tei lulo.8Keraibe, nnui pelane ziemne Ih Jisu Khrista gade a Tinggwang de twa, kedanemene nnui kenlum au kideu pelane ga rangla kedine.9Kedanemene Ih mtakmene a kekie gade nnuide nsungbam muila kecude au Tinggwang ne a zierang da, pecu Ih a rabe gade samliakeyi teu eh pe Na ha paukela gade pe ta teila la.10Ih a kekie gade kiebam muila, Ih kehei tei liede Tinggwang lungning gade nnuida gwangcang bilu kerane.11Kedanemene Ih nnuide ngauneu bamla, iciu eh Ih nnuide rabe mapeu kesa peu kerane, nnui kenlum teingkieng lu kerane.12Cide cai, nnui kakgade acu de nah nnuide de kecunglu kera Ih regui bamlei, hangge ge kenlum, n kenlum nah a kenlum gade.13Sinamedung cu Ih nnuide peu cimene bam kecu teineu ma, Ih nnuida gwang kera pia kekiee mtei, (dede acu cu kecangde kaamdi zeu), Ih Gentileme kakgage teikegai nzwa eh, nnui kakgade petsi keyi builu kerane.14Ih au Greekme nah sangmedung, makecime nah cikemakme dage de penui pau kepungme ge dida.15Cine, a ziemne au, nnui Rome ga kebamme dage de samliakeyi de paulia kera Ih au mtei pwabam.16Kedanemene Ih samliakeyi de ziemne ngngam lama, kedanemene cide Tinggwang kengkieng gade keheibe de nlum kelume de kelilu kerabe kecune, keraibe Jewme ziemne nah pecai Jewme kemakme ziemne de.17Kedanemene cikade Tinggwang masangbe kenlum ge gade kenlum ge eh keulia kecune, Kesanglaisiu ga ainzwa rauteu kelanzwa, “Dede makesangme kenlum gade ring luzie.”18Kedanemene mci kemak nah mina masang kemakme leude, penui masang kemak gade kesangbe de kaam kedi ziemne tinggim gade Tinggwang lunghop ndulia dida.19Aide au kedanemene Tinggwang ha ci kelade penui ngau mcigi kebamne. Tinggwang ne penuide cide teimci laigai delu.20Pecu ngaugai kelakbe zairehidung, kelungta kengkieng nah rabe zairehi, kideu teikelu gade ngau mcigi luda, bata teikegai gade cilu eh. Cine penui penui nzeu ranglu kera gah da.21Aide kedanemene, penui Tinggwang ha cibam liede, penui pecu le Tinggwang lie eh hetwa peu ma, mede penui pecu suiyisam de pwapeu ma. Meliene, penui kecetdung miedi, nah penui lungcet kegah mlungdung muidi.22Penui maci lie rangla, dede penui mie dida.23Penui rim dila kemak Tinggwang kendu de keu, rimdi kela mina mie kenzwadung, nah nruinedung, nah makaune pe pi mdaidung, nah bwakela kaunedung de rehiak di.24Ciziemne Tinggwang penui lung herakedi ziemne penuide peu penui mlung hengin dungde teu penui zaira tei kera gage kai dida, penui katei penui kakgade penui pum de kengkau ta tei kerane.25Penui ne kemretpe le teu Tinggwang sam kesangbe rehiak di, nah Damkegaibe de, mene damkegai batadung de reca nah cide gwatei la dida. Damkegaibe depeu kelungta hetwa pung kelube tei lulo. Amen.26Aide ziemne, Tinggwang penuide peu penui kengkau lungning dungde teu penui zaira tei kera gage kaidi, penui mipuidung hezai petaube gidi eh petau kemakbe teila dida.27Cinzwa eh, mipeidung de mipuidung de kengngwa petaube gidi nah penui katei hangge gede ngngwa pumteih henginbe teila dida. Mipeidung aidungde mipei kerai ngngwa ngngam kemak ta teila nah penui mau ziemne penui keherei ziehi ngau lula.28Kedanemene penui Tinggwang de penui lungcet gade mnei kemakne, Tinggwang penuide penui lungcet kesia teu penui zaira peu teila dida, penuide depeu petau kemakdung tei kera ziemne.29Penui kesang kemak, hezai kesia, migu luu keneu, nah periak kesia, ma aidung le kepui teila. Penui au ma kehengin, dapketset, rata, kecwa, nah kesia lungcet le pui pung. Penui au mi ha kerang,30mide kekii, Tinggwang ngauraume, mide kemneume, pekatei pecu mning mdi, ngang kecu, kesia tei kera tei kempet; penui pui peidung samzai teila ma.31Penui au penui kecet gah, kenlum gah, lungning gah nah mide ngaunggia lama.32Penui Tinggwang kesang zaide ci bamla, cikenzwa ta tei kelame ketsai ngaulu buisiak lie kecu. Dede penui aidungde teikecu rünne ma, penui kedame cidungde teikecu petau delie beula.
Bridge Connectivity Solutions Pvt. Ltd.