Job1
1Uz namdi deu cika mige la pezi Job; nah Job au kemmau gede gah nah mzui, pa Tinggwang mie hingla nah kesia gade nreu tetdi kelame ge.2Pa pe na mipeina hanghena nah mipuina hangcum bamla.3Pe mahei meurün canghena, ut cangcum, hetumseu zura haimengei, gada lei haimengei nah pe kilamedung kekiee ge bamla. Pa au Jordan reuki tingnaimiak kepetle de mina pelane dade heitume ge.4Pe napeimedung pe nlia tei eh, pe ki gage taktyei ngyi kai beula . Penui time hangcum de penuide ngngwa matyei nah sak kera mide langgai eh qula.5Taktyei tingba ngyi cang kedi dau, Job penui ziemne langgai nah pa penuide ratak tei eh teimci la. Pa tingcang nuge cuhlu delwe pe namedung hangge ge ziemne keru recadung teigai la, kedanemene pa rang cu, “A name kemau tei nah Tinggwang de penui nlungdung gade reset de bamlu builu.” Job aide tei muila.6Ge Tinggwang namedung penuikatei RAMPAUBE dwaga gwang kecu benai, Satan de penuide ngngwa gwang.7RAMPAUBE Satan dage keteugai, “Nang dai gade gwang lano?” Ge Satan RAMPAUBE sam keligai, “Kideube ga rwa hui kela, nlüt mpet kela gade lie.”8RAMPAUBE Satan dage ranggai, “Nang a kilabe Job de pie ncet lami? Kideu ga migede pa kenzwa gah kecu ziemne, kemmau ge de gah nah mina kemzuime ge, Tinggwang mie hing nah kesiabe gade nreutetdi kelame ge.”9Ge Satan RAMPAUBE sam keligai, “Job pekie kega gade Tinggwang mie hing lani?10Nang pecu, pe ki, nah ma pelane twagwa kebamdung de rie gum pwabam meni? Nang pe bata leunedung samlam beula, nah pe kauruine kideu ga puilu.11Dede magade n ba hetwa mpet gai delwe pe da makebam pelane keugi dicai, pielo pa n dwa gade ncu reset dizie.”12RAMPAUBE Satan dage ranggai, “Ainie, peda ma pelane kebamdung n ba ga kengkieng bam da. Dede nang pecu mmau eh pe reu gage n ba kai so.” Ge RAMPAUBE dwa gade Satan tetdi.13Langnaige, Job napeimedung nah pe napuimedung cingtube pei ki gade matyei nah zau sak bam.14Samgwame ge Job da gwang eh rang, “Ketumseudung luh puh bam nah gadadung au penui taiga ma peei tyei la.15Cidau Sabeanme mina kangge penuide ketang nah penuide keuteu tetdi. Kilamedung de liecai, penuide kingtie tün le teitsetdi. Ih rünne n dage paubeu kera paklu.”16Pa marang bam kecu dau, keda ge de gwang eh ranggai, “Tinggwang mi tinggim gade cakmie eh meuründung nah kilamedung de ru nggah ciak dida, Ih rünne n dage paubeu kera paklu.”17Pa marang bam kecu dau, keda ge de gwang eh ranggai, “Chaldeame hemaa kecum teilwe, utdung de gwa ketang, nah penuide teu tetdi. Kilamedung de liecai, penuide kingtie tün le teitsetdi. Ih rünne n dage paubeu kera paklu.”18Pa marang cang kemakne, keda ge gwang dai eh ranggai, “N napeidung nah n napuidung cingtube pei ki gade matyei nah zau sak bam.19Hetaideu gade tingkai ngkieng süt kecu gwang eh ki tu mdai gage beu gai. Cide penui reu ga cakmie, nah penui tsaidi. Ih rünne n dage paubeu kera paklu.”20Ge Job cuhlu, pe suisia eh pe paini hietdi, pe peu taidi, hangdeu ga pe zu ngkum mie zeudi, nah Tinggwang dage hap eh kekie tei recadi.21Pa rangdi, “Ih a pui pok gade kempet dau mta eh gwang, nah Ih mta eh tetdai zie. Cide RAMPAUBE ne peu, nah cide RAMPAUBE ne keuteu dai dida. Peu RAMPAUBE zi de samlampung kelube teilo.”22Ma aidung pelane gade de, Job kemau teidi ma, mede Tinggwang de mmau eh rang msia dima.
Bridge Connectivity Solutions Pvt. Ltd.