Jeremiah12
1Keheidau de Ih ncu ngngwa kesamlim kecudau de, RAMPAUBE, nang au masangla. Ih n dage ncam kera kiebe ranglia maisia: Daitei kemaume ma teidau lu lano? Mina kenlum kegame leune ma teidau lula.2Nang penuide linggai nah penui penui mah himlu. Penui au penui tsi kei jüja bam. Nang penui mui dwaga mna bamla, dede penui mlungdung gade mdeila.3Dede, RAMPAUBO, nang acu cibam. Nang acu ngaula nah a mlung n lambie ge kedak pie la. Meurün de daptset kera nzwa a ngauraume de ngngwa tet dilu, nah daptset kera benai ziemne penuide mteilu!4Cika kelunghmedung kesia dene daitie ge kideube cangh nah luhdung ga mabangdung regui bam zieno? Hekaunedung nah nruinedung de keu tetdi da. Kesangbe au minadung rangla, “Anui dage daitei gai bi Tinggwang ngau lak.”5RAMPAUBE rangla, “Kesangbe, Jeremiah nang magade reugwamedung de ngngwa pak nah penui leudi liecai, nang dainzwa hekündung de renia lu laino? Nang madukemak deu gade kau dicai nang Jordan reuki taiga renaam ziu gade dainzwa zie no?6Kedanemene magade n siname nah n pei kilungme ncu cwa dicai nah sahbak eh rang mci gai cai, penui n dage makeyibedung ranglia liede penuide nlum so.7RAMPAUBE rangla, Ih a ki de gi dida; Ih mabam gum kerame de nsungta dida. Ih acu kehungbe pui de pe ngauraume ba gage kai dida.8A maa kegumme a dade hegungkang ga hingho nzwa dida; pa pekatei pe kwa le acu renia kera mtei luda, cine Ih pecu ngaunghet.9Ih kehung a minadung au nruine ge, lingcingnadung ne petu pelane gade gwaketang kecu ge nzwada. Nruine de tuityeilu kerane mie delwe renaamkaune leune de qu hekwalu.10Meurün kekwame kekiee ge ne a kubetsi luh tei msia dida. Penui a deu pelane dau msiasüt dida, Penui a deu hezukeyi de teipwa hetaideu ge teidi.11Penui pecu teipwa gi kedi ge tei dida. Ih pe ziemne hei eh hap; pecu gi dida. Hangdeu pelane de gikedi tei dida, kedanemene migede cide ziemne helung nei ta dida.12Hetaideu kehu leune ga tei ngkau kera minadung gwanglu,kedanemene RAMPAUBE kingtie au tei ngkap eh kideutu ket lamde kedale gwang.Kideu cika ringkela kaune ziemne kwaklu kera gah.13A minadung wheat taa gai dede hetudung luhlwetlu. Penui au penui tahdung gade leu sütdi dede magede gie luma.Cine RAMPAUBE rata nnui gie kelu de ziemne ngngam lulo.”14RAMPAUBE aide a kidame leune de renia eh rangla, mina kesiame Ih a mina Israel de peu gum kedi mabam dede ketang kecune, “Pielo, penuide penui deu gade keu mpetdi lai eh kebamde Ih delie nah Ih Judahme de penui kak gade teu mpet dizie.15Ih heleuhdung de pai mpet kedicai Ih penuide ngaunggia beu dai zie nah penuide ngngwa cailigwang dai zie; Ih penui hangge ge de, pa gum kera nah pe deu de keu caili beu zie.16Magade heleuh cidungde sünne eh a mina lampui ci lucai a zi gade sampet eh ‘RAMPAUBE ringla’ de penui a minadung de Baal zi teu sampet eh ledeu kebeu nzwa cai, ge penuide a minadung kakga heni ge peuzie.17Dede keheibe de kingnei mecai, iciucai Ih cipau leuh dede paimpet dizie. Cide paidi bizie nah ngkap dizie, aide RAMPAUBE ne ndugai.”
Bridge Connectivity Solutions Pvt. Ltd.