Hibruw1
1Yēhē ige mino Tujuw. Me am̄ag yeh en, Ḡod mohole me hiy ige yatqōtqōngēn heylō ige et lēgēlgēg. Vag m̄adeg kēy mavasemlō van noyoy non Ḡod a lemtehal tegtegha.2Ba togtōkē, a sisqet babah ne qōn̄ en, Ḡod mohole me hiy gēn heylō Ēntēn. Ḡod mitin̄ namyam gōh heylō kē. Tō Ḡod metyak kē so kē nim̄agoy vel haphap del.3Tō Ēntēn nesben goy vel haphap del lemyam gōh mi naman ne hohole nonon. Tō nēlēn̄as non Ḡod nihin̄yeg heylō kē. Tō kē en nitiy totgal non Ḡod. Mahē kē mak wenwen bah ige nonon den nubug nonoy en, tō kē mēvēykal lok alge. Tō kē mahaghiy how letno liwo a lemtō non Ḡod a neketket yeh.4Tō Ēntēn Ḡod gōh mavan me nitiy ketket veteg ige in̄sel del. Wa tō nahah mey a Ḡod melep van hiy Ēntēn en, nahah nan neketket yeh den nahan ige in̄sel.5Kē nim̄ōleg me so Ēntēn neketket den ige in̄sel veg Ḡod et vap te van hiy nin̄sel vitwag so,Inēk intik. Tō qiyig gōh en, nok van me Imam nōnōm.Si so mavap se so,Ino Imam nonon, wa ikē Intik.Nohohole gōh en, Ḡod mavap ēwē veg Ēntēn.6Tō mahē a Ḡod mēvētleg me Ēntēn lemyam gōh, a nitiy Ēntēn a kē nam̄agoy vel haphap del, kē mavap so, “Yēhē ige in̄sel del non Ḡod, atmi mogmogo goy kē.”7Tō Ḡod mohole gatay lokse ige in̄sel, qelegēn so,No magaleg so ige in̄sel mino van me qeleso nelen̄,wa kēy yowyowveg mino qeleso nagayme ep.8Ba mahē Ḡod mohole veg Ēntēn en, kē wo,Inēk Ḡod, inēk namyanag liwo, wa natno liwo ne mayanag nōnōm tit bah vēhte,tō letno liwo nōnōm en, nēmētvu netgolgol hiy ige sil nōnōm.9Nēk temyōs nahaphap mey netnenen vēlēs, ba nēk tepsipteg nahaphap mey nehet.Veg bege gōh en, ino, a Ḡod nōnōm, mal tan̄ōp nēk mi nisim yon̄ ne malaklak,tō m̄ōk ketket nēk den ige viwti et nōnōm.10Tō Ḡod mavap lokse so,Welan, me am̄ag en, nēk mitin̄ nōtōti mayam,wa tō nēk mitin̄ nahaphap hag lemyayawoy en mi namnē.11Vel haphap geh nen teqleqlen̄ qēt, qeleso namalmal mey a num̄usm̄us.12Ba nēk tō lokveg yak kēy qeleso namalmal mahayhay busuwsuwyeg yak,tō nēk teleh kēy.Ba inēk en, nēk totogtog lap qelenen a tit leh vēhte.Wa n̄ēh en, nēh nōnōm tit bah vēhte.13Ba Ḡod et vap hōnqal te van hiy nin̄sel vitwag nonon so,Nēk haghiy letno liwo a lemtō mino, ba nēk dēyēgaydēn̄ a nok m̄ōk tēqēl ige tavale nōnōm hōw antan, tō nēk tavayvay vēh apwoy.14Ba kimi nēglal vatag so ige in̄sel en, kēy noyowyowveg non Ḡod. Tō kēy nuvu, a Ḡod mēvētleg kēy me so nimyin̄ ige et mey a kē tavaēh kēy.
The Seed Company