2 Куг3
1Саул ден Давидын тукымышт-влак коклаште сар эше кужу жап шуйнен. Давид вияҥ толын, а Саулын тукымжо начарештын.2Хевронышто Давидын [куд] эргыже шочын. Кугэргыже – Амнон, Изреель гыч улшо Ахиноама деч.3Кокымшо эргыже – Далуиа, Кармил гыч улшо Авигея деч, Навалын тулык ватыж деч. Кумшо – Авессалом, Гесурын Фалмай кугыжажын Мааха ӱдыржӧ деч.4Нылымше – Адоний, Аггифан эргыже. Визымше – Сафатий, Авиталан эргыже.5Кудымшо – Ифреам, Давидын Эгла ватыж деч. Давидын нине эргыже-шамыч Хевронышто шочыныт.6Кунам Саул ден Давидын тукымышт коклаште сар каен шоген, Авенир Саул тукымышто чотрак да чотрак озаланаш тӱҥалын.7Саулын Рицпа лӱман кулватыже, Айан ӱдыржӧ, лийын. [Авенир тудын дене мален лектын.] Иевосфей Авенирлан каласен: «Молан тый ачамын кулватыж дене маленат?»8Авенир Иевосфейын тыге ойлымыжлан чот шыдешкен да каласен: «Мо, мый ала-могай пий вуй улам мо?! Иуда ваштареш шогалын, кызыт мый Саул ачатын суртшылан, йолташыже-влаклан ӱшанлын служитлем! Мый тыйым Давидын кидышкыже пуэн омыл. А тый кызыт мыйым ала-могай ӱдырамаш верч титаклет?!9Господьын Давидлан мом сӧрымыжым [таче кечын] ом ыште гын, тек Юмо мыйым пеҥгыдын мут кучаш шогалта!10Саул тукымым кугыжан верже гыч кораҥдем да Давидын престолжым Израиль ден Иуда мландыште, Дан гыч Вирсавий марте, пеҥгыдемдем».11Иевосфей тудын ваштареш нимом пелештен кертын огыл: тудо Авенир деч лӱдын.12Авенир Давид деке [Хевроныш] уверзе-влакым колтен. Нунылан тыге каласаш кӱштен: «Кӧн тиде мландыже? Мый денем ойпидышым ыште. А мый, пӱтынь Израиль тыйын велне лийже манын, тыланет полшем».13«Туге лийже, – вашештен Давид, – мый тый денет ойпидышым ыштем. Но мыйын тый декет ик йодмашем уло. Мый декем толмет годым пеленет Мелхолам, Саулын ӱдыржым, нал. Тудым от кондо гын, мыйым от уж».14Давид шке уверзыже-влакым Саулын Иевосфей эргыж дек тыге ойлаш колтен: «Пу мылам Мелхола ватем. Тудым мый шӱдӧ филистим еҥын тарман мучашысе пӱчмӧ коваштыштым пуэн налынам».15Иевосфей шке еҥже-шамычым колтен да Мелхолам Фалтиил марийже деч, Лаиш эрге деч, налын.16Фалтиил шортын-шортын ватыже почеш Бахурим марте миен. Авенир тудлан мӧҥгыжӧ пӧртылаш кӱштен, да тудыжо мӧҥгеш каен.17Авенир Израиль калыкын кугуракше-влаклан каласен: «Те вет ондак Давидым шке кугыжадам ыштынеда ыле.18Тидым ынде шуктыза, вет Давидлан Господь тыге каласен: ”Давид тарземын кидше дене Мый шке Израиль калыкемым филистим да чыла моло тушманже деч утарем”».19Тидымак Авенир Вениамин тукым калыклан каласен. Вара тудо Давид деке Хевроныш Израиль ден Вениамин тукым калыкын мом ышташ шонымышт нерген каласаш каен.20Авенир Давид деке Хевроныш толын, пеленже коло еҥ лийын. Давид Авенир ден тудын еҥже-влаклан сийым ямдылен.21Авенир Давидлан каласен: «Мый каем да тый декет, мыйын кугыжа озам дек, уло Израиль калыкым погем. Нуно тый денет ойпидышым ыштат, да тый чыла шонымо еҥет дене кугыжаланаш тӱҥалат». Давид Авенирым колтен, да тудыжо тыныс дене каен.22Лач тиде жапыште Давидын сарзыже-влак Иоав дене поход гыч толыныт. Пеленышт тушман деч поген налме пеш шуко погым конденыт. Но Авенир тиде жапыште Давид дене Хевронышто лийын огыл: Давид тудым колтен, да тудыжо тыныс дене каен.23Кунам Иоав да пеленже лийше сарзе-влак толыныт, Иоавлан каласеныт: «Кугыжа дек Нир эрге Авенир толын. Кугыжа Авенирым колтен, да тудыжо тыныс дене каен».24Иоав кугыжа деке пурен да каласен: «Мом тый ыштенат? Тый декет Авенир толын. Молан тудым колтенат? Ынде тудо каен!25Тый Авенирым, Нир эргым, от пале мо? Тудо, тыйым ондален, лекметым да пурыметым, мом ышташ шоныметым чыла пален налаш толын!»26Иоав Давид деч лектын да Авенир почеш уверзе-влакым колтен. Нуныжо тудым Сира лӱман таве дене поктен шуыныт да мӧҥгеш конденыт. Давид тидын нерген пален огыл.27Авенирын мӧҥгеш Хевроныш толын шумекше, Иоав, коктын гына шолып кутыраш кӱлеш манын, тудым ола капкасе пӧлемыш пуртен да мӱшкыржӧ гыч шуралтен. Авенир колен. Тыге Иоав Авенирлан Асаил шольыжым пуштмылан ӱчым шуктен.28Кунам Давид мо лийме нерген пален налын, тудо каласен: «Мый да кугыжанышем Господь ончылно Нир эрге Авенирын колымыжлан титакан огынал.29Тек Иоав шкеже да ачажын уло урлыкшо тидлан вашмутым кучаш тӱҥалыт! Тек Иоав урлыкышто пӧръеҥ тарман гыч йоген лекмаш дене орланыше, проказе дене черланыше, тояш эҥертен коштшо, керде деч колышо да шужен орланыше эре лийыт!»30Тыге Иоав ден тудын Авесса шольыжо Авенирым пуштыныт, Гаваон воктенысе кредалмаште Асаил шольыштым пуштмылан ӱчым шуктеныт.31Иоавлан да пеленже улшо еҥ-влаклан Давид каласен: «Вургемдам кушкедса да чоштыра вургемым чийыза, Авенирын колымыжлан шортса». Колышо капым нумалше-шамыч почеш Давид шкежат ошкылын.32Авенирым Хевронышто тойымо годым кугыжа тудын шӱгарже воктене мӱгырен шортын. Тыгак уло калык шортын.33Теве Авенир шотышто кугыжан шортын мурымыжо:«Авенир ушдымо еҥ семын колышаш ыле мо?34Лийын огыл кылдыме тыйын кидет,йолет лийын огыл кепшылтыме. Коленат тый аген коштшо-влакын кидышт деч колымо семын».Да уло калык Авенир шотышто эшеат чот шортын.35Кечывал кечын Давид деке калык толын да кочкаш темлен. Но Давид тыге товатлен каласен: «Кече шичмешке киндым але иктаж вес кочкышым кочкам гын, тек Юмо мыйым пеҥгыдын мут кучаш шогалта».36Тидым калык пален налын да сайлан шотлен – Давидын чыла мом ыштымыже еҥ-влаклан келшен.37Давидын чыла еҥже да уло Израиль тиде кечын пален налыныт: Авенирым, Нир эргым, пуштмаште Давидын кидше лийын огыл.38Кугыжа шке еҥже-шамычлан каласен: «Таче Израильыште он, кугу айдеме колен – тидым огыда умыло мо?39Кеч мый кугыжа лияш шӱрен палемдыме улам, но эше пеҥгыдылыкем ок сите. А Саруян нине эргыже-влак мый дечем виянрак улыт. Тугеже тек нунылан Господь осалым ыштымыштлан пӧртылта!»
Institute for Bible Translation, Finland