2 Кур.кн31
1Пайрем пытымеке, тушто улшо израиль эрге-влак Иуда мландысе олалаш каеныт. Нуно онакӱ-влакым шалатеныт, Ашера меҥге-шамычым руэныт, кӱкшакаласе кумалме вер ден жертвенник-влакым Иуда мланде мучко, тыгак Вениамин, Ефрем да Манассий мландылаште икте кодде шалатеныт. Тидын деч вара гына израиль эрге-влак кажныже шке мландышкыже, шке олашкыже пӧртылыныт.2Шке пашаштым ыштышт манын, Езекий иерей ден левит пӧлка-влакым угыч служитлаш шогалтен. Кажне пӧлка палемдыме шке пашажым шуктен шоген: йӱлалтен пуымо надыр ден татулык надырым конден, Господьын пӧртшын капкаж воктене оролен, Господьым моктен мурен.3Йӱлалтен пуышаш надырым кугыжа шке погыж гыч ойыраш палемден. Господьын законыштыжо возымо семынак, йӱлалтен пуымо надырым эрдене да кастене, шуматкече еда, у тылзын да кажне ийын палемдыме пайремла годым конденыт.4Иерей ден левит-влак Господьын законыштыжо возымо сомылым тыршен шуктышт манын, кугыжа нунылан палемдыме ужашым пуэн шогаш Иерусалимыште илыше калыклан кӱштен.5Тиде кӱштымашым увертарымеке, израиль эрге-влак шурнын, йошкар аракан, олив ӱйын, мӱйын, пасусо тӱрлӧ саскан икымше погымо лектышыжым пеш шуко конденыт. Тыгак луымшо ужашат пеш шуко погынен.6Иуда олалаште илыше израильтян ден Иуда эрге-влакат шолдыра ден тыгыде вольыкышт деч луымшо ужашым конденыт. Господь Юмыштлан пуымо святой пӧлек деч эше луымшо ужашым ойыреныт. Чыла кондымым ора дене оптеныт.7Пӧлек-влакым нуно кумшо тылзын погаш тӱҥалыныт да тиде пашам шымше тылзын мучашленыт.8Кунам Езекий ден он-влак толыныт да погымо ора-шамычым ужыныт, нуно Господьлан да Тудын Израиль калыкшылан тауштеныт.9Езекий тиде погымо шапаш шотышто иерей ден левит-влак деч йодын.10Азарий, Садок тукым гыч кугу иерей, тудлан вашештен: «Господьын пӧртышкыжӧ пӧлекым кондаш тӱҥалме жап деч вара ме теммеш кочкынна, тышечын эше шуко кодын. Вет Господь шке калыкшым суапландарен, мо кодшо гыч тынар шуко погынен».11Езекий Господьын пӧртшӧ пелен улшо пӧлем-влакым ямдылаш кӱштен. Каласымыжым шуктеныт.12Кондымо чыла святой пӧлекым, луымшо ужашым пӱтынек тушко наҥгаеныт. Пӧлем-влакын тӱҥ эскерышыже левит Хонаний, а полышкалышыже Симей шольыжо лийыныт.13Нунылан тушто Иехиил, Азазий, Нахаф, Асаил, Иеримоф, Иозавад, Елиил, Исмахий, Махаф, Бенай полшен шогеныт. Езекий кугыжа ден Азарийын, Юмын пӧртын вуйлатышыжын, кӱштымышт почеш Хонаний ден Симей шольыжо нунын вуйлатышышт лийыныт.14Левит Коре, Имна эрге – Эрвел капка орол – Юмылан шке кумылын пуымо пӧлек-влаклан вуйын шоген. Тудо Господьлан пуымо пӧлек ден поснак святой надыр-шамычым пуэден.15Иерей-влакын илыме олалаштышт тудлан Еден, Миниамин, Иешуа, Шемай, Амарий да Шеханий полшен шогеныт. Нуно кондымо пӧлекым шке тукым иза-шольыштлан – изиланат, кугуланат – пӧлка еда тӧр пайлен пуэденыт.16Тидын деч посна нуно тукымвож лӱмерыш пуртымо кум ияш да тылеч кугурак ийготан чыла рвезе ден пӧръеҥлан пуэденыт. Тиде лӱмерыш Господьын пӧртыш кажне кечын ыштышаш пашашке шке пӧлкашт дене коштшо еҥ-влак пуреныт.17Лӱмерыште иерей-шамыч урлык дене ончыкталтыныт, а коло ияш деч кугурак ийготан левит-влак ыштышаш пашашт да пӧлкашт дене келшышын тушко пуртымо лийыныт.18Тиде тӱшкаш пурышо еҥ-шамыч дене пырля лӱмерыште нунын чыла изи йочашт, ватышт, эрге-ӱдырышт лийыныт, вет нуно шкеныштым ӱшанлын служитлыме пашалан пуэныт.19А ола-влак воктенысе яллаште илыше Аарон тукым иерей-шамычлан кажне олаште лӱмышт дене ончыктымо еҥ-влакым шогалтеныт. Нунышт кажне иерей ден лӱмерыш пуртымо левитлан пайыштым пуэденыт.20Теве мом Езекий пӱтынь Иуда мландыште ыштен. Тудын пашаже-влак Господь Юмыжо ончылно сай, чынле лийыныт.21Мом тудо Юмын пӧртшылан, Тудын законжо ден кӱштымашыже-влакым шукташлан ыштен, чылаж годымат Юмым кычалын, уло шӱм-чонжо дене тыршен, сандене чыла пашаже воранен толын.
Institute for Bible Translation, Finland