2 Samwẹl8
Nkhema s'Devid
1Ukwu ukpira k'okpe ma, Devid okhema aPhilistiya, ọbạra ochok bẹ k'isekhisek kwẹ. Orengi ofhon kw'Mẹtẹg-Amma k'mbọhk s'aPhilistiya.2Wa Devid ọbạra okhema anạng p'Moab. Usi abẹ ayima k'isisek k'akpakhaana attaan, ọfhọ akpakhaana afa, otte rạnẹ ọbọhk iruk akpen. Wa anạng p'Moab p'arikhi-urik n'aning k'isekhisek kw'Devid, abẹ n'anạng-ẹ ntum.3Ayongu ma, wa Devid ọbạra okhema Hadadẹzẹr, kw'ode ọvaarnạng kw'Zoba, kw'ọbạra ode nnwa kw'Rehob. Wa okhem-ẹ k'okpe kw'ọta bẹ́, ọbạra ọta uttima ẹvaar chẹ arạnga k'ukhubha kw'Ọraanga kw'Yupharetes.4Wa Devid ọvạk ijaar s'nnyạnyaang n'itwạr nnọhna mfa ukuma arạbh jobh, ọttạra ayaar-nnyạnyaang nnọhna chi ukuma mfa ukuma arạbh jobh, ọttạra akpongnạng p'aseng k'mfhok nnọhna arạbh afa ukuma jobh. Wa Devid ọphyạkhẹ nnyạnyaang s'n'itwạr ijaar nnọma mfhok, urik nnyạnyaang s'ijaar arạbh asen.5Masẹ anạng p'Aram p'abin Damaskọs akwu bẹ́, akwu akkaana Hadadẹzẹr kw'ode ọvaarnạng kw'Zoba, Devid o ukwu ọfhọ bẹ anạng nnọnhna arạbh afa ukuma chi.6Wa Devid ọbạra ochok akpongnạng pẹ abaabha ẹbaakhamma ch'ẹkhạma ch'anạng p'Aram p'abin Damaskọs. Anạng p'Aram n'aning k'isekhisek kwẹ, abẹ abạra akken-ẹ ntum. Wa Ọvaar Ubinọkpaabyi ọnạngẹ Devid ekhema k'ibyi sidede s'ọta.7Wa Devid ọtạk akhọhnkpa p'gol, p'atọhmnạng p'Hadadẹzẹr utima ukwuna k'Jẹrusalẹm.8Ọvaar Devid ọbạra ọtạkha abrons k'ọsaabh k'Teba ọttạra Bẹrotayi s'ide ifhon s'Hadadẹzẹr ọdạbhẹ.9Masẹ Toi kw'ode ọvaarnạng kw'Hamat ọbhaang bẹ́, Devid kk'akpongnạng p'Hadadẹzẹr okhema phyibh-phyibh,10ọtọhm nnwa kwẹ Joram bẹ́, ọta usima Ọvaar Devid, ọbạra ọtọhng-ẹ s'okhem Hadadẹzẹr k'ekpong. Wa Hadadẹzẹr kk'ekpong ọbạra urima Toi abẹ. Wa Joram utim nnạnga s'silva ọttạra s'gol ọttạra s'brons utima ofona.11Wa ọvaar Devid otte ọbọhk k'nnạnga nnọ ọnạng Ọvaar Ubinọkpaabyi, k'oche kw'kk'usia ọttạra silva ọttạra gol p'uwa ọtạk k'idifhon phyi-phyibh s'kk'okhema,12s'ide Edom, ọttạra Moab, ọttạra Ammọn, ọttạra Philistiya, ọttạra Amalẹk. Wa ọbạra otte ọbọhk k'ekpo py'uchi k'ekpong k'mbọhk s'Hadadẹzẹr, kw'ode ọvaarnạng kw'Zoba, kw'ọbạra ode nnwa kw'Rehob, ọnạng Ubinọkpaabyi.13Wa Devid ọbạra uyin eche s'ukwun ekpong ch'ọfhọ anạng p'Edom nnọhna arạbh afa ukuma asen k'Ipekhuma s'Unung.14Wa ochokhu akpongnạng pẹ abaabha Edom, anạng p'Edom phyibh n'aning k'isekhisek kw'Devid. Wa Ọvaar Ubinọkpaabyi ọnạngẹ Devid ekhema k'ibyi sidede s'ọta.Atọhmnạng p'Devid
15Wa Devid ọdạbhẹ Israẹl ọbaabh-ọbaabha, ọbạra usi aponga p'ator-otor, abạra ajibh anạng anạng pẹ phyibh.16Wa Joab kw'ode nnwa kw'Zẹruya wọ ode odecho kw'akpongnạng; Jẹhosaphat kw'ode nnwa kw'Ahilud, ode ọkkẹrẹ kw'idik s'kk'iyina.17Zadọk kw'ode nnwa kw'Ahitub ọttạra Ahimẹlẹk kw'ode nnwa kw'Abiyata, bọ wa ade afọhnẹja; Sẹraya ode ọkkẹrẹ.18Bẹnaya kw'ode nnwa kw'Jẹhoyada wọ ode odecho kw'anạng p'Kẹrẹt, ọttạra anạng p'Pẹlẹt. Ajunungva p'Devid ade afọhnẹja.The Seed Company