2 Samwẹl2
Abẹ abyengi Devid ana k'echo ọdạbh ẹvaar ch'Juda
1Ukwu ukpira k'okpe ma, Devid ọbạbh Ọvaar Ubinọkpaabyi bẹ́, “Ma, n'mbin mfona k'ofhon gwạnọ k'ẹkhạma ch'Juda o?”Ọvaar Ubinọkpaabyi ubhin-ẹ bẹ́, “Sọhng.”
Devid ọbạbh bẹ́, “M'ntena mạn?”
Ọvaar Ubinọkpaabyi ubhin-ẹ bẹ́, “Tena k'Hẹbrọn.”2Ma wọ Devid ubin ofona k'Hẹbrọn ọttạra ipanạng pẹ afa p'ade, Ahinoam kw'ubin Jẹzrẹl, ọttạra Abigẹl, kw'ode opokwa kw'Nabal kw'ubin Kaamẹl.3Wa Devid ọbạra utima ajunung p'aning abẹ, ọnạng-ọnạng ọttạra ẹchọhmfhạr chẹ, abẹ ata aruk k'ifhon s'Hẹbrọn.4Wa ajunung p'Juda abin akwu k'Hẹbrọn, ma wọ, Devid abẹ abyeng-ẹ ana k'echo asi-ẹ ọvaarnạng kw'Juda.
Masẹ abẹ akpaakhẹ Devid bẹ́ ajunung p'Jabẹsh-Gilead bọ annọhng Saul,5Devid ukwu ọtọhm akpaakh-nkkaabha ọnạng ajunung p'Jabẹsh-Gilead bẹ́, “Tte Ọvaar Ubinọkpaabyi odo bạnga k'ọphyaam f'abạnga asi anạng aro kwabạnga Saul, s'abạnga annọhng-ẹ.6Tte Ọvaar Ubinọkpaabyi usi bạnga ọphyaam, ọbạra ọkhọhkha bạnga idạdaakha. Amma m'mbạra nsi ọphyaam nnạng bạnga, ukwuru udik kw'abạnga asi maa.7Ma o, abạnga akpọhkhọ ifor, abe bẹ́ gwuk masẹ ajunung, s'Saul kw'ode aro kwabạnga kk'upua. Ẹgwọ usi ajunung p'Juda abyeng-m ana k'echo bẹ́, nde ọvaarnạng kwabẹ.”
Ekpong ch'anạng p'Devid ọttạra iva p'iva p'Saul
8Ma okpe ngwọ, wa Abnẹr kw'ode nnwa kw'Nẹr, wọ ode ocho kw'akpongnạng p'Saul. Ẹma wọ ọtạk Ish-Boshẹt kw'ode nnwa kw'Saul, utima ojekha k'Mahanayim.9Usi ẹ ọvaarnạng kw'Gilead, ọttạra Ashur, ọttạra p'Jẹzrẹl, ọttạra Ephraim, ọttạra Bẹnjamin, ọttạra p'ẹkhạma ch'Israẹl phyi-phyibh.10Wa Ish-Boshẹt kw'ode nnwa kw'Saul, ode icho arạbh afa s'ọtạm ẹvaar ch'Israẹl dạdạbh. Ukwu ọdạbhẹ bẹ k'icho ifa. Okhenka, wa efona ch'Juda etor ikhaana s'Devid.11Wa Devid urukhu ma Hẹbrọn, masẹ ọvaarnạng, ọdạbhẹ Juda k'icho isenọfa ukuma aphye asajạnẹ.12Abnẹr kw'ode nnwa kw'Nẹr, ọttạra ajunung p'Ish-Boshẹt kw'ode nnwa kw'Saul, abin k'Mahanayim afona k'Gibeọn.13Wa Joab kw'ode nnwa kw'Zẹruya, ọttạra ajunung p'Devid ata attạma ayok abẹ k'isipe ch'Gibeọn. Ikhaana rạnẹ ining ẹyạr k'ukhubha gwạnọ kw'isipe, nnọkha ininga k'ukhubha ngwọkha.14Ma wọ Abnẹr obeni Joab bẹ́, “Tte adikkobh pamạna bạnọ abina ayoma ayok mbọhk maa amạna k'ititikha.”Joab ọbẹ́, “Ujibhi ma! Tte abẹ ayoma.”15Mạnna wọ abẹ abhikhi anạng jobh-kamfa p'Bẹnjamin ọttạra Ish-Boshẹt, kw'ode nnwa kw'Saul. Abẹ abạra abhik anạng jobh-kamfa p'Devid.16Ma o, ọnạng-ọnạng ubina, ọdạbh urima-nạng kwẹ ma echo, ukhum-ẹ ọkkangkkang-kkro k'atạtaang, abẹ atwạn atto, ape. Osenga ma, abẹ ayeri ibyi nnọ k'Gibeọn, Helkat-Hazurim .17Wa ekpong ẹkhạmọ ma iwu njọ tạrr anạng p'Devid akhema anạng p'Abnẹr ọttạra anạng p'Israẹl.18Wa iva attaan p'Zeruya aning ma p'ade Joab, ọtttạra Abishayi, ọttạra Asahẹl. Asahẹl wa ogwengi masẹ otenwuru.19Asahẹl ukhubhu Abnẹr, nnạm nọ́bhạkha bẹ́ ọkkeri k'udimbọhk, ọbạra ode k'ọkwabọhk.20Abnẹr ọbhạkẹ nnạm ọbạbh bẹ́, “Asahẹl ọma wọ ma?”
Asahẹl ubhina bẹ́, “Uwe e, amma wọ e.”21Abnẹr oben-ẹ bẹ́, “Kkeri k'udimbọhk kwọ, abạra akkeri k'ọkwabọhk, vạkha udikkobh wạnọ ekpong-kpo pyẹ ana.” Asahẹl ofona ororo ukhubh-ẹ masẹ ukhubh-ẹ ma.22Abnẹr ọbạra oben Asahẹl bẹ́, “Dạk kaam kkákhubh! Amma nạ́nnora bẹ́, mfhọ-ọ. De mfhọ-ọ m'nsenga yạn nkkeri nnwatte Joab k'ititikha o?”23Okhenka, Asahẹl nóchera bẹ́, ukuma Abnẹr khukhubh. Osenga ma, Abnẹr utima ẹkhọhn-ma chẹ ukhum Asahẹl k'ẹfhạr tạrr ọkhọhn uyin k'nnạm. Asahẹl otto, ope ma ibua-ibua. Ọnạng kwidede kw'ukpir ma s'Asahẹl uyim ope, m'obe ma k'ikpukpobha.24Okhenka, Joab ọttạra Abishayi akhubhu Abnẹr. Masẹ ududon n'ọsạk o, abẹ akwu akpira k'okpecho kw'Amma, kw'ọbaang Giya, k'ọkkaden kw'ọten k'ukhubha kw'anạng nạnárukha k'Gibeọn.25Ma wọ ajunung p'Bẹnjamin abe atuma Abnẹr. Abẹ atobha k'ikhaana rạnẹ, ata abe k'okpecho k'erạng ado ifor sabẹ.26Abnẹr ukwu oyeri Joab oben-ẹ bẹ́, “Ma n'ode bẹ́, ekpong nja m'efona ororo n'irima tạrr ipimmanitor o? Ọma nákka bẹ́, ọkpicho kw'ekpong nja m'upyibh oseng eden o? M'ubhir ukpira yạn bạrasẹ aben anạng pọ akuma ivọkka pabẹ khukhubh o?”27Joab ubhina bẹ́, “K'oche kw'Ubinọkpaabyi urukhu akpen, de wạra nạn ẹmạng násia, njanna wạra ajunung mbọ m'afona ororo akhubh ivọkka pabẹ tạrr iwu echobha.”28Osenga ma, Joab oge ẹsa, utima oyeri ajunung pẹ phyibh bẹ́, abẹ akuma anạng p'Israẹl khukhubh, abẹ abạra akuma irima.29Ma irungu njọ phyibh, Abnẹr ọttạra anạng pẹ aseng abaabha Araba, abẹ ajekha ọraanga kw'Jọrdan, asenga afona ororo ma ekpebha tạrr, akpira Mahanayim.30Ma wọ Joab n'ukum Abnẹr khukhubh, ukwu otobha akpongnạng pẹ phyibh. De akpẹrẹ Asahẹl ajẹ, akpongnạng sọnẹrạbh p'Devid bọ adimi-udimi.31Okhenka, wa akpongnạng p'Devid kk'akpongnạng p'Bẹnjamin, anạng nạbh chi ukuma arạbh attaan p'atwạnọ Abnẹr abẹ, afha.32Wa abẹ atạk Asahẹl annọhnga k'epekwur ch'otte kwẹ, k'Bẹtẹlẹhẹm. Ma wọ Joab ọttạra akpongnạng pẹ atim irungu njọ phyibh asi osenga tạrr, akpira k'Hẹbrọn s'iwu echobh.
The Seed Company