Hiziqi'eelikaa Raaga9
Fakkuwwa Magenoffatemmake Mannixxa Shiyema
1Ookkoneechchi uduma ani laqa'naa'nni hafuura gikki assee «Mitti mitting looliinka miya anga abixeek konne qachcha gano'a ergemeekiir kaba'a daga'neen» hiyye.2Tami asse uudanno wodda balleesatee looliinka miya anga abixxe'eek jaani manni middi darrexxe hulake oribaa'n dage; insa'ne giddo mitti layinotixxa seemma odo'week, hidhake'n borreeessatike miyixxa buuda abixxeek mitti manji hedhemman; insa'nenna e'yineexxi sageetotike sibiljik tolchimalchi bira uurrine.3Ookkoneechchi uduma Isira'eelike Mageniink gaachchanni hedhemmabaa'n Kirubeeli hanii'n ke'eexxi galmiinxe hulaba'a me'eedhemman; Duuchchi Woddik Goottinna layinotixxa seemma oddo'weexxi hidhake'n borreessatike miyixxa buuda anga abixxeemmaka manjichcho ye'ee.4«Iyyerusaalemik qachchi giddo duuchcha me'etettexxi isi giddo hujenda'neexxe diqachchisa'neexxi yaane'a yaada'ninna oodha'ne hedhemmake mannike alba'n beessisa uggi» hiyye.5Aninna laqa'naanni isi wele manna «Qachchi giddo isoo hordofine mammarendina'n shiwwe; marartinoqqe'e yookaan owitinoqqe'e.6Geercho dargageessa, dubarchotanna melaalle oose haranga birre; yaane kinni beessisa afeeka manjo tuqqinoqqe'e; anke galmi giddii'n saffe.» Tennexxee insa'ne galmi edi darree hexxeexxe geedhuwwaa'n shiyya sanfe.7Ookkoneechchi uduma isinna insa'nee «Marre, galma anka battoosse; baxxe galaminxe'inna rensha wonshe» hiyye; insa'nenna dangeexxi qachchi giddo duuchcha mammarema'n shiyya sanfe.8Insa'ne shina'n he'ne'naa ani qofi hedhee albik gonbisemennexxi oodhe hunbaashsha'n «Aane'e, koo Lumoke Duuchchi Woddike Goottaa Iyyerusaalemi'n bala atixxa ibisati Isira'eelixxa hafe duuchcha biritattota?» hiyyenne.9Isinna ane'n «Isira'eelikenna Yihudake ardixxi cubbo hara bira saxxe'een; bogikinna mundeti mundete kade'een; qachchake'ninna xaqaro assa wo'mite'een; insa'nee ‹Duuchchi Woddik Gootti boga waaledheen; Duuchchi Woddik Gootti afa'nebaan› hina.10Tennexxee ani insa'ne hunjeexxa huje insa'ne'n wirri assannon malee insa'nee o'witeexxe illenni uudabe'non» hiyye hiisse haaso'e.11Ookkoneechchi uduma layinotixxa seemma ode'weexxi hidhake'n borreesatika miyixxa buuda anga abixxeemmak manjichchi illeema higeexxi «Ati anee ajajeteshshanni muuxeennen» hiyye.The Word for the World International