Taakkakaa Moyanjuwwiinkaa Maxaafa16
1Ookkoneechchi uduma Hanaanike belto raagichchi Iyyu daree'n Ba'ishaxxee Duuchchi Woddike Goottik hiyyichchi hiyyee qici:2«Ani atee'e bukotenaa'n ke'isse; anke ardike Isira'eelike akeekisanjo assenneni; ati kinni Iyyorbi'aamishsha kaddetteeni; cubbo hujje anee mufachchiissashsha anka arda Isra'eli dedhissetteni.3Tennexxee Ba'ishanna isika mini hado bakka balleessannoni; mine atikanna Naabaaxika belto Iyyorb'aamike minishsha assannoni.4Qachchi giddo reyaaka Ba'ishaxxa sanne duuchcha worshi itaani; hadi giddonna reyaaka duuchcha allaattete ittaani» hiyye.5Ba'isha moyeemmake baro'n hujendeexxi; wele hujexxi huje duuchchi Isira'eelike moyanjuwwiinke jirtetike maxaafa'n borreessende hexxeexxeba?6Ba'isha reye; Tirtsa giddonna moogeme; belti isiki Ela isixxe bakka'n moye.7Duuchchi Woddike Goottiki hiyyichchi Hanaanika belto wabeeka Iyyu darree'n Ba'isha'ninna isike mini hado'n wabeekummi kulemeexxi daafe; Ba'oosi hujemmaxxe cubboni Duuchchi Woddika Gootta mufachchiisseemmaxxeeteni; Iyyorbi'aamik mini hadi duuchchi Duuchchi Woddike Gootti edo fuggooxxa huje duuchcha hunjeemmaxxeenna Iyyorbi'aminna isika mini hado shiye bireemmaxxeeten.
Isira'eelika Moyanjo Ellaa'a
8Yihudak moyanji Aasa moyeexxe lame tommenna jaane wogga'ni Ba'ishak belti Ela Isira'eel'i moye; Tirsta hiyyemaaba ofoleexxi lame wogga moye.9Ja'laabuwwi giddii'ni mitti gamisa lolinxa gaaruwwa ajajalli Zimmri Amitso iso'ni ke'e; ookkoone wodda Ella Tirtsake qachcha'ni mootummatike minike akeekisanjo kade'eke Artsake mine'ni ha'we machcho'eemman.10Zimmrinna ookkone mine'n e'yeexxi Ella'a shiye; isinna Ellaxxe bakka'ni fileme Yihudak moyanji Aasa moyemmaxxe lame tommenna torbaane wogga moye.11Zemiri moyeenge hirba'ninna mootete'n ofo'lemashan; Ba'ishaka mini hado duuchcha shiye bire; fira isikanna jaaluwwa ifika labbaka shiye bire.12Konne qicinni Duuchchi Woddik Gootti wabeeka Iyyu darree'ni Ba'isha'ni kuleek raagashsha Zimmiri Ba'ishaka mini hado duuchcha kutti asse bire.13Tinni kadde'ek Ba'ishanna belti isik Ela; la'o afebaake misechixxe fakkuwwaxxe buutonni Isira'eelika Duuchchi Woddika Gootta Mageno mufachchiisate'e hunjeexxe cubbo duuchcha'anna; Isira'eeli'i hujaashsha assineemmaxxeeten.14Ela isike baro'ni wele muuxeexxin asseexxi duuchcha Isira'eelike moyanjuwwiixe jirtetike maxaafa'ni borreessende'en.Isira'eelik Moyanji Zemirii
15Yihudaki moyanji Aasa moyeexxe lame tommenna torbaxxe wogga'ni Zimmiri Tirtsa hedhe torbaane barra calla moye. Konne wodda sannachchi Filisixeemik qachcha kade'eka Gibetooni'i buqe abideemman.16Ookkone olla'a'ni hedhemmak Isira'eelik ardi Zimmir fuggoxxinni ke'e moyanjo shiyeexxa lanqeeshshanni; sannachchinka ajajallo Omiirii'i eettene barra ookkone olla'in giddo Isira'eeli'ni moosinsexxa lassine.17Ookkoneechchi uduma Omiiri isinni welti hedhemmari Isira'eelika arda duuchcha Gibetooni'ni alale fulleexxi Tirsta'a buqe.18Zimmir qachchi abidemeexxa uude wodda mootummatike mini giddo hedheeke kinjiinke miniba e'yeexxi mootummatike mine giira woreexxi ookkoone reye.19Tinni iitta kadde'ek Duuchchi Woddike Gootti edo gibendeexxa elobaaxxa huje hujatinna Iyyorbi'aammishsha kadeexxi; ittanni ifi'a hujeexxe cubboxxeenna Isira'eel hujjaashsha asseexxe cubboxxe buuto'aten.20Zimmir baro isike'n huje'exxi wele hujenna asseexxi fuggoxxi yaane Isira'eelke moyanjuwwike jirtetike maxaafa'ni borreessende'en.Isira'eelk Moyanjo Omiiri
21Ookkoneechchi uduma Isira'eelik ardi lameba qoodeme, gamisi Ginaatika belto Taminii'i moosisateete kada wodda, weli gate'ek kinn Omiirii'i kiphatitemman.22Kaddollenna Omiiri'i hordofaammakiir Ginaatike belto Taminii'i hordofamake erra jabaante; tennexxe Tamininna reye; Omiirinna moye.23Yihuda miyanji Aasa moyeexxe sase tommenna mitte wogga'ni Omiiri Isira'eel'i moye; tommenna lame wogganna moye; konneer giddii'n jaane wogga moyeek Tirtsa hedheeten.24Isinna Semaariyaka tulluchchuwwa lame jaane kuma birretike sibiljinni Samiirii'n hireexxi qachcha ijaare; isika summanna edike eettene koobake anna Samiirike summinni Semaariya hiyye fulche.25Kaddo malee'e Omiirinna Duuchchi Woddike Gootti edo fuggoxxa huje huje; isi edo hedhemmakeeri irra hara saxxeexxa cubbo huje.26Isinna Isira'eel la'o affebaaxxe fakkuwwan Isira'eelika Duuchchi Woddik Gootti Mageni hifataashsha assatte'e Naabaaxik belti Iyyorbi'aami assemmaxxa duuchchanna isi cubbo huje Isira'eelik ardi hujaashsha asse'exxe cubboxxa duuka me'e.27Omiiri isike baro'ni huje'exxinna asseexxi wele yaane duuchcha Isira'eelke moyanjuwwinke jirtetike maxaafa'ni borreessende'en.28Omiiri reye; Semaariya moogeme; belti isiki Aki'aab isixxe bakka'ni moye.Aki'abi Isira'eelke Moyanjo Kade
29Yihudak moyanji Aasa moyeexxe sase tommenna saddeetixxe wogga'n Omiirik belti Aki'aab Isira'el'i moye; Semaariya hedhe Isira'eel'i lame tommenna lame wogga moye.30Omiirik belti Aki'aab isonaa'ni ediseexxi hedhemmaki duuchchi erra Duuchchi Woddike Gootti edo fuggoxxa yaane asse.31Aki'aabi, moyanji Iyyorbi'aami hujeexxa cubbo shollaxxe yaane asse uudati isi iif'aani eettenee cubbo huje; ookkoneechchi uduma duuchchiinxa sa'isse Sidoonaka moyanjo Etiba'aalixxa belto Arimaatichcho Elzabeeli'i aadhe; isinna mari Ba'aal hinammaka mageno magenoonfate; isonna sagade.32Semaariya ijaaremake Ba'aalika fakkuwwati mine Ba'aali'a tolchimalcho giisse.33Higgeen Aki'aab Asheerixxe fakkexxa sooddo uurrise isi edi darre hedhemmake Isira'eelixxe moyanjuwwi erra Isira'eelka Duuchchi Woddika Gootta Mageno mufachchiissaaxxa huje huje.34Beeti'eeliki manji Hi'eel; Aki'abike baro'ni Iyyaarikoo hiisse ijaare. Duuchchi Woddik Gootti Neeweke belto Iyyaasu darre'ni haaso'eeki hiyyichchi muuxemaashsha ijaarsa safee wodda angafi belti welti Abiraani reye; dalla'iinxa huluwwa giissa wodda isik maa'nichchi belti Segubi reye.The Word for the World International