Matthew21

1Tuôôy oot jeq truh theng Jê-ru-sa-lem, ji hooy truh Bê-pha-jê, wih xuq Đoot Ô-liu, tuôôy nưq Lôôk Jê-xu patăk vaarq khơl xatyauq,2dăt oot: “Dayh hooy muut palơy pla kangưưr oh ay, yôôch oh ay hnoq hloq hloay muuyq ôô lưưa pi biq vek, kung muuyq ôô lưưa koot măn dii ni. Atêq tuôôy luh talơy vek, dayh duuy truh ka thơy.3Ji atoh muuyq dro leq nưq đnooy kajoq dii oh ay, yôôych oh ay hnoq đnooy đaneq: ‘Lôôk e kơn duh truh oot,’ yôôch dro nưq hnoq ăm hloay xôq oot hooy.”4Mot kadrơy, varơuq neq xalih vlôh xôq ka apok heq jah xanoh gamưh hnhư hlit hnoq ik jah jêêk, đaneq:5“Dayh dăt koot kadrê ku Si-ôn:'Yo hơq, Vuua xăk truh kung xăk,be huq ji acho lưưa— nưq laa tol muuyq lưưa koot, koot ku lưưa pi.”
6Tuôôy nưq, khơl xatyauq, atêq tuôôy hooy ji dưk dơơp dang đaji Lôôk Jê-xu heq pato oot,7heq duuy lưưa pi kung lưưa koot xuq, ji hlơơk aau koot keek ku oot tol lưưa, yôôch Kadraq 'ngôôy tol nưq.8Tuôôy nưq, phon 'ngưng manih karôp hlơơk aau ku oot tol trôôk, măn muuyq sôôq kadrơy yôôych koh kaluh đook hla ji hlơơk vlôh tol trôôk.9Anưq yôôch, bing manih karôp hooy adroyq Kadraq ji tyauq atêq heq tarok tok, đaneq:“Hô-sa-na Koot vuua Đa-vik!Xưngq vanê ayuôôt Kơy truh đom yal Lôôk!Hô-sa-na tol aduq yơơt lơyq!”
10Atêq tuôôy Kadraq muut đom theng Jê-ru-sa-lem, dêq ka theng biq diik miik, đnooy: “Nưq laa kơyq?”11Anưq yôôych manih karôp tơơl: “Nưq laa Kơy hlit Jê-xu, xing Na-xa-ret, dêh Ga-li-lê.”
12Lôôk Jê-xu hooy muut đom hnhư hơu, yôôch Kadraq đuôôy dêq hloay khơl dro tabôôt tek đom hnhư hơu, ji tơơk kahlôôp para ku khơl tađôôy jêêt kung ragê ku khơl tabôôt xêêp katrơu.13Kadraq đnooy dii oot: “Apok heq jah valơk: ‘Hnhư Gô hnoq jah taayh laa hnhư apôôy,’ bơh êêp kơy heq dơơp ni jêêk aduq varoh atôk.”14Yôôch khơl dro apul ji dro qwe truh jeq Kadraq đom hnhư hơu, ji Kadraq payơh ka oot.15Bơh khơl thơy tơơk tưp kôt ji khơl thơy pato ganuun, atêq tuôôy hloq kaluh varơuq akêh đơu Kadraq heq dơơp, ji hloq bing on oh vanê ayuôôt đom hnhư hơu, đaneq: “Hô-sa-na Koot vuua Đa-vik,” yôôych oot tôq jaraq.16Oot đnooy kung Kadraq: “Thơy e tameng oot đnooy kajoq be?” Bơh Lôôk Jê-xu tơơl oot: “E! Êêp kơy koq hmưq đok đaneq: ‘Lôôk heq ralauq 'miêh varơuq ayuôôt laat xing huuy ku khơl on oh ji khơl oh de măn uq,’ long aleq?”17Atêq tuôôy chuh klơlh oot, Kadraq hooy vlôh klơlh theng truh Bê-tha-ni ji padơy hlê klôôy kađnư.
18Truh xaroq, đong tuôôy wiit muut theng, yôôych Kadraq pangoot.19Atêq tuôôy 'yo hloq muuyq ưk pok puut gah trôôk, Kadraq hooy truh ưk nưq ji 'yo hloq be e kajoq tol nưq đêh vlôh hla ni heq. Kadraq xanoh dii ni: “Play be măn e aduq may đnoyq dong truh đơơy đơơy,” ji vơ hloay, ưk pok puut nưq yauq kateh.20Hloq đanưq yôôch, khơl xatyauq akêh, đnooy: “Dơơp đaleq đơu ưk pok puut heq vơ hloay yauq kateh?”21Yôôch tuôôy tơơl apok, Lôôk Jê-xu đnooy dii oot: “Dong dik, thơy đnooy dii oh ay, atoh oh ay e xuum tuôq ji leh biit ravơq, yôôych oh ay hnoq dơơp ik leh vơ varơuq neq ka ưk pok puut, đơu pheq đnooy atoh oh ay đnooy dii đoot neq: ‘Dayh ik katơơk tok ji biq taweek pôôt tahli,’ yôôych varơuq nưq hnoq xalih vlôh.22Tôôy varơuq, paq kê kaluh varơuq leq oh ay apôôy vôôch đom apok apôôy, yôôych oh ay hnoq nhonq jah tuôôy tuôq gamưh.”
23Ji tuôôy Kadraq muut đom hnhư hơu yôôch, khơl thơy tơơk tưp kôt kung khơl draq đom manih karôp heq truh tavơh Kadraq đong tuôôy Kadraq pato dayq, đnooy: “Gamưh taay yaak leq thơy dơơp kaluh varơuq neq, ji kơyq heq ăm ka thơy taay yaak nưq?”24Bơh xôq tơơl apok, Lôôk Jê-xu đnooy dii oot: “Gô kung hnoq vôôch êêp kơy muuyq apok, đơu atoh êêp kơy hnoq ik tơơl apok gô, yôôych gô kung hnoq đnooy ka êêp kơy xet gô đong dơơp kaluh varơuq neq gamưh taay yaak leq.25Pheep bap-tem ku Jăng — pheep nưq laa xing leq? Xing plêêk long xing koot manih?” Anưq yôôch, oot đnooy athêêk dii mamuuyq, đaneq: “Atoh haay đnooy: ‘Xing plêêk,’ yôôych ni hnoq đnooy dii haay: ‘Anưq vii kakơq kajoq đơu êêp kơy leh tuôq jăng?’26Măn atoh haay đnooy: ‘Xing koot manih,’ yôôych haay laay kamưưl manih karôp, bơyh dêq hloay oot 'yo Jăng laa muuyq hnhư hlit.”27Atoh tuôôy tơơl apok Lôôk Jê-xu, oot đnooy: “'Wot leh xet.” Kadraq kung đnooy ka oot: “Gô kung leh ăm êêp kơy xet gô dơơp kaluh varơuq neq bơyh taay yaak leq.28Anưq bơh, êêp kơy biit aleq? Muuyq dro e vaarq koot kanau, ji atêq tuôôy truh dii dro adroyq dik, kơy đnooy: ‘Koot kanau, hngơy neng koot dayh hooy dơơp varơuq đom hluôôt nho.’29Đơu tuôôy tơơl hlê, ni đnooy: ‘Koot leh trôôch,’ bơh atêq nưq, tuôôy heq tađôôy iq, yôôych ni hooy.30Măn atêq tuôôy truh tavơh dro thưq vaarq, dro vaq đnooy dang anưq. Yôôch, tuôôy tơơl apok, ni đnooy: ‘E koot, vaq lơơy,’ đơu dro nưq be hooy.31Kơyq đom vaarq koot kanau nưq heq dưk dơơp iq trôôch ku vaq baarq?” Oot tơơl: “Dro droyq dik.” Lôôk Jê-xu đnooy dii oot: “Dong dik, gô đnooy ka êêp kơy đaneq khơl dro xok xơu ji khơl drê xakwoah hooy muut đom daak dêh ku Kơy Plêêk adroyq êêp kơy.32Vii Jăng heq truh dii êêp kơy đom trôôk hooy hyioh jăk, đơu êêp kơy leh tuôq jăng. Măn khơl dro xok xơu ji khơl drê xakwoah yôôych tuôq jăng. Bơh êêp kơy, long 'yo hloq yôôch, heq be wiit xuum atêq nưq xôq tuôq kơy.
33Dayh tameng muuyq apok atoh kadrơy. E muuyq dro kôôch vari, laa dro heq pêêt muuyq hluôôt nho, panưk paga rawiit hluôôt nưq, xiel troop raniaq lok đom nưq, panưk kadroak 'yo ji ăm khơl pêêt nho xapo ni, yôôch kơy hooy dêh xangưưy.34Tuôôy nưq, muut tuôôy xiêk weelh play jeq truh, kơy patăk taleq dro xapok kơy truh dii khơl pêêt nho xôq xok phon ưng lơơy ku kơy.35Đơu tuôôy rôp jư bing xapok ku kôôch yôôch, bing pêêt nho tiel dro neq, păk kaxêêt dro hơq, tiip phơu dro kadrơy.36Kơy laay patăk khơl xapok kadrơy truh, karôp iaq bing adroyq, đơu khơl pêêt nho xa dơơp oot dang đanưq.37Yôôch atêq lôôch, kơy patăk kadih koot kanau kơy truh kung oot, đaneq: ‘Oot hnoq 'yo yôq koot kanau kơy.’38Bơh bing pêêt nho, atêq tuôôy hloq dro koot nưq, heq athêêk dii mamuuyq: ‘Neq laa adro dưk katôôl hlê. Nee, haay duh păk kaxêêt ni yôôch xok dêq vari hluôôt ku ni.’39Tuôôy rôp jư dro koot yôôch, oot qweek vlôh khơl hluôôt nho ji păk kaxêêt.40Anưq, tuôôy dro kôôch hluôôt nho truh, kơy nưq hnoq dơơp kajoq dii bing pêêt nho nưq?”41Oot tơơl dii Kadraq: “Kơy nưq hnoq dook kaxêêt bing xơk tauq hơq dong ra ơơh, yôôch hnoq ăm khơl dro pêêt nho kadrơy xapo hluôôt, laa khơl dro hnoq noop hlê ka kơy phon lơơy muut tuôôy xiêk weelh ku oot.”42Lôôk Jê-xu đnooy dii oot: “Jơq be êêp kơy koq hmưq đok đom Rahlăp Vah:‘Kuk phơu đơu khơl thơq xơy ka'lăk vlôh,ni heq jah vlôh jêêk phơu duh dik ku gok hnhư.Varơuq neq xalih truh xing Lôôk,ji ni dik laa akêh đom mot haay?’
43Vii kakơq neq, gô đnooy dii êêp kơy đaneq daak dêh ku Kơy Plêêk hnoq biq xok hooy klơlh êêp kơy ji hnoq jah kahniq ka muuyq tamooy vlôh raak play ku daak dêh nưq.44Kơyq gưlh muut kuk phơu neq hnoq biq naat tapuk, măn kuk phơu rôh tol dro leq, ni hnoq kaxup naat dro nưq.”45Atêq tuôôy tameng kaluh apok atoh ku Kadraq, khơl thơy tơơk tưp kôt ji khơl manih Pha-ri-si 'yo xet đaneq Kadraq đong đnooy truh oot.46Tuôôy axek trôôk rôp Kadraq, oot laay 'yo yôq manih karôp, vii manih karôp 'yo Kadraq laa muuyq kơy hlit.

FAR EAST BROADCASTING COMPANY

https://app.library.bible/content/37a1dc7a54269bd3