Acts9

1Bơh Sau-lơ, đom tuôôy hloay kưq đnooy apok naap joa ji varơuq păk kaxêêt tachơơl dii khơl jah rơơlh ku Lôôk, atêq tuôôy truh dii thơy tơơk tưp kôt,2yôôych xiin xing aduq kơy kaluh hla thư deng ka khơl hnhư anguk aduq Đa-mach, xôq atoh kơy axek jah paq kê kơyq tyauq Đaauq, kaah khơl kanau hloay khơl kadrê, yôôych Kơy xagook oot đom tuôôy biq vek jarooy xuq Jê-ru-sa-lem.3Tuôôy nưq, đom tuôôy hooy trôôk, varơuq xalih vlôh tuôôy kơy jeq truh theng Đa-mach, tưng hưng xaraar tađnah xing plêêk jaraak tađnah tol kơy,4yôôch, atêq tuôôy gưlh pôôt vari, kơy tameng muuyq xarooy xanoh dii kơy: “Sau-lơ, Sau-lơ, aleq koot rôp toop gô?”5Tuôôy nưq, kơy đnooy: “Kuh Lôôk, Kadraq laa kơyq?” Lôôk xanoh: “Gô laa Jê-xu đơu koot đong rôp toop;6lunư, dayh dưk tok ji hooy muut đom theng, yôôch dong varơuq hnoq jah đnooy dii koot truh varơuq kajoq duh dik ka koot xôq dưk dơơp.”7Bơh khơl adro hooy trôôk kung kơy yôôych dưk đnư leh đnooy ik apok, tuôôy tek xarooy đơu leh hloq kơyq.8Tuôôy nưq, Sau-lơ dưk tok klơlh vari, bơh tuôôy mot ku kơy jah luh vlôh, yôôych kơy be hloq kajoq dêq. Anưq yôôch, atêq tuôôy rôp ti jarooy kơy hooy, oot xagook kơy muut theng Đa-mach.9Tuôôt pe hngơy, kơy leh 'yo hloq kajoq, ji kơy be xa kung be hôôch.
10Tuôôy nưq, aduq theng Đa-mach e muuyq dro jah rơơlh nưq anơng A-na-nia. Lôôk xanoh dii kơy đom muuyq ăm xet adroyq: “A-na-nia lơơy!” Yôôch kơy đnooy: “Kuh Lôôk, xiin 'yo nee, koot neq!”11Tuôôy nưq, Lôôk xanoh dii ay: “Atêq tuôôy dưk tok, dayh hooy truh trôôk taayh laa Hyioh Jăk, ji dayh axek đom hnhư ku Ju-đa muuyq dro anơng Sau-lơ, manih Tat-sơ, dayh văch 'yo, vii manih neq đong xadrook apôôy,12ji đom muuyq varơuq ăm hloq adroyq, kơy nưq heq hloq muuyq dro anơng A-na-nia hooy muut ji xôq ti tol kơy xôq kơy nưq hnoq ik tađnah mot hlê.”13Bơh A-na-nia tơơl: “Kuh Lôôk, koot heq tameng xing 'ngưng manih truh adro neq, truh xet taleq varơuq ra ơơh kơy nưq heq dơơp vlôh ka khơl jah rơơlh ku Kadraq aduq Jê-ru-sa-lem.14Ji ka đnen, kơy nưq e varơuq ăm qwuyen xing khơl thơy tơơk tưp kôt xôq rôp vek tôôy adro taayh apôôy yal Kadraq.”15Nưq bơh, Lôôk xanoh dii kơy: “Kưq hooy yuh, vii kơy neq laa kông varơuq ku varơuq rơơlh đôôyq dii Gô, xôq xagook yal Gô vlôh kangưưr kaluh tamooy kadrơy, jauq hloay khơl vuua, kung dii koot xau I-sơ-ra-ên;16vii Gô hnoq kahnoq ka kơy nưq xet kơy duh pheq chiuq pơơl 'ngưng đaleq vii yal Gô.”17Anưq yôôch, A-na-nia dưk hooy ji hooy muut đom hnhư nưq. Atêq tuôôy xôq ti tol kơy, kơy đnooy đaneq: “Nee ay Sau-lơ, Lôôk heq patăk gô — nưq laa Lôôk Jê-xu, Kơy heq rama vlôh kung ay tol trôôk đơu ay hooy truh đnen — xôq ay hnoq ik 'yo hloq hlê ji jah viik galaay Lôôk Phool Hiel.”18Hloay jơnưq, muuyq thưq kajoq nưq dang đaji kaxaap, kaluh nưq klêh klơlh mot ku kơy, vơơ hloay, kơy 'yo hloq hlê, ji atêq tuôôy dưk tok, kơy chiuq pheep bap-tem;19tuôôy heq nhonq tuôông xa, kơy jah e hlê kalh paraat.
Tuôôy nưq, kơy măn dii khơl jah rơơlh aduq Đa-mach taleq hngơy.
20Hloay jơnưq, Kơy padoh taboon Lôôk Jê-xu đom kaluh hnhư hơu, đaneq Kadraq laa Koot Kơy Plêêk.21Tôôy dro tameng raay tưng hưng, đnooy: “Be aalq neq laa dro heq păk kaxêêt khơl manih apôôy taayh yal neq aduq Jê-ru-sa-lem ih? Ji be aalq kơy nưq heq truh đnen vii kakơq nưq, xôq atêq tuôôy rôp vek yôôych jarooy oot xuq ăm khơl thơy tơơk tưp kôt be aalq?”22Bơh Sau-lơ kưq kalh paraat athêêp, ji dơơp xôôl dôôl ka khơl manih Jo Thaiq riirh aduq Đa-mach bơơn kach dưk xanưk đaneq Jê-xu laa Lôôk Wơơt Dêh.
23Lunư, tuôôy 'ngưng hngơy heq dalơh hlê, manih Jo Thaiq kung mamuuyq xôq vih păk kaxêêt kơy.24Nưq bơh, xôq vih ku oot heq jah tauq ka Sau-lơ xet. Anưq yôôch, khơl drơy pheq đnooy kôô 'yo kaluh 'mok theng hloay hngơy ji kamơng xôq păk kaxêêt kơy.25Tuôôy nưq, atêq tuôôy jarooy hooy đom klôôy, khơl xatyauq ku kơy xôq kơy pôôt pi gôk apưt theng, bơơn kach raduk kơy pôôt đom muuyq poop vuk.
26Bơh tuôôy heq truh aduq Jê-ru-sa-lem, kơy raanq paraat axek trôôk xôq jah tagu dii khơl xatyauq, đơu dêq hloay oot raay yôq kơy, leh tuôq đaneq kơy laa khơl xatyauq.27Tuôôy nưq, atêq tuôôy jarooy kơy hooy, Ba-na-ba xagook kơy truh tavơh khơl jah rơơlh, yôôch taboon ka oot dơơp aleq đơu kơy heq 'yo xet Lôôk tol trôôk, kung đaji Kadraq heq xanoh dii kơy, ji đaleq aduq Đa-mach, kơy heq kôk kalh padoh taboon taayh yal Lôôk Jê-xu.28Anưq laa, kơy măn kung dii oot tuôôy muut vlôh aduq Jê-ru-sa-lem, kôk kalh padoh taboon taayh yal Lôôk.29Kơy vơơ athêêk, vơơ tagêh apok dii khơl manih Jo Thaiq đnooy apok Hi Lap, bơh oot axek trôôk păk kaxêêt kơy.30Bơh tuôôy heq xet đanưq, khơl oh ay jarooy kơy pôôt truh Sê-sa-rê, ji jarooy kơy hlê Tat-sơ.
31Anưq, tayuup vah loch hloay dêh Ju-đê, Ga-li-lê, ji Sa-ma-ri e varơuq hrok hrol; vii jah panưk tok kung tawaak hooy đom varơuq kuh yôq Lôôk ji đom varơuq hlơq hlôôp ku Lôôk Phool Hiel, tayuup vah jah karôp athêêp 'ngưng.32Tuôôy nưq, varơuq xalih vlôh nưq laa tuôôy Phi-e-rơ đong hooy loch dêq dêh, yôôych kung hooy aloh truh aduq khơl vah riirh aduq Li-đa.33Yôôch aduq nưq, kơy tavơh muuyq dro hơq, anơng Ê-nê, đong vik lêêt tol chanưng tuôôt thơơm xanưm, nưq laa dro biq taqwauq talêêt.34Phi-e-rơ đnooy dii ay nưq: “Ê-nê lơơy, Lôôk Wơơt Dêh Jê-xu payơh ka ay. Dayh dưk tok ji deep chanưng kơy yơu,” ji hloay jơnưq, ay dưk tok.35Dêq hloay khơl leq riirh aduq Li-đa ji Sa-rôn heq hloq ay, oot raay wiit hlê kung Lôôk.
36Tuôôy nưq, aduq Jôp-bê e muuyq khơl jah rơơlh nưq anơng Ta-bi-tha, anơng nưq, tuôôy jah jich vlôh, yôôych taayh laa “Đô-ka”. Mư 'miêh viik kaluh varơuq tamaq kung dii 'ngưng varơuq ăm hloh đơu mư heq dơơp.37Varơuq xalih vlôh đom kaluh hngơy nưq, nưq laa atêq tuôôy gưlh jiq, mư kaxêêt. Xatyauq nưq, tuôôy heq hôôp 'nhaau ka mư yôôch, khơl drơy xôq mư đom rawaak tol paak ataalh.38Vii Li-đa măn jeq Jôp-bê, lunưq khơl xatyauq tuôôy tameng đaneq Phi-e-rơ đong măn aduq nưq, oot patăk vaarq dro truh kung kơy, hluk hluul: “Xiin dayh dayh truh dii 'wot.”39Nưq laa, atêq tuôôy dưk tok, Phi-e-rơ hooy raa dii oot, laa khơl dro đơu, tuôôy heq truh aduq, oot jarooy kơy tok rawaak tol paak, yôôch dêq hloay mo valơu truh pi gah kơy nhim, ji pato ka kơy 'yo kaluh aau kahliik kung 'ngưng qwuân aau đaleq đơu Đô-ka heq axit tuôôy đong măn kung oot.40Bơh tuôôy heq dăt dêq hloay vlôh pi gôk ji kul takuul pôôt, Phi-e-rơ xadrook apôôy, yôôch atêq tuôôy wih hlê xaak kaxêêt, kơy đnooy: “Ta-bi-tha, dayh kah yuh.” Nưq laa, mư liêk mot mư vlôh, ji tuôôy 'yo hloq Phi-e-rơ, mư 'ngôôy kah.41Atêq tuôôy palo ti vlôh ka mư, kơy rôôk mư dưk tok, yôôch tuôôy heq taayh khơl vah ji khơl mo valơu muut, kơy ăm hloq mư đong riirh.42Tuôôy nưq, kaluh varơuq neq vlôh jêêk hêêl padoh vlôh loch dêq Jôp-bê ji 'ngưng dro tuôq muut Lôôk.43Varơuq xalih vlôh atêq nưq laa kơy heq măn hlê 'ngưng hngơy aduq Jôp-bê dii muuyq dro nưq anơng Si-môn, laa thơq thuôk kađuh.

FAR EAST BROADCASTING COMPANY

https://app.library.bible/content/37a1dc7a54269bd3