2 Urúeigu9
Lanuadirúniwa Heú lun larúeihan Ísüraeli
1Aba lagúarun Eliséu lun aban hádangiñe profetagu, aba lariñagun lun:—Aransebá lun báfuridun. Barübei agülei le, beiba Ramotu le lani Galaadü;2danme bachülürün ñein, bídinme áluahei Heú, le liráü Hosafátü, le libari Nimüsí. Bebelurame le ñeinhin lumuti, ábame banügüni hádangiñe líbirigu tidoun amu rumu;3ábameti banügüni garaba, ábame béseruni lábulugun, bariñagame: “Lariñahare Bungiu: Anúadira numutibu keisi lurúeite Ísüraeli”. Lárigiñeme, ábame badaaruni bena furese, ábame béibaagun, merederaguabátia.4Aba lidin profeta ligía Ramotun le lani Galaadü,5dan lebelurunbei, ñéinñanu hábutigu súdaragu. Aba lariñagun:
—Ábuti, anihein aban dimurei lun nariñaguni bun.
Lariñaga Heú lun:
—Ka un wádangiñe sun wagía?
Lariñaga lun:
—Bun nábuti.6Aba lásaarun, aba lebelurun múnadoun, aba léseruni profeta agülei lábulugun, aba lariñagun:
—Lariñahare Bungiu le Lubungiute Ísüraeli: “Anúadira numutibu harúeiteme Ísüraelina, ha numutuniña.7Bagumuchuba hau ladügawagun Aabü le babureme, ítara luba bafayeiragüdüni luagu hata nánigu profeta, luma hata nubúeingu le táwiyuragüdübei Hesawéli.8Hagünrinchawaguba sun liduheñu Aabü; nagumuchuba hau sun wügüriña ha tílana luban Aabü Ísüraeli, meredebei ni aban wínwanñu.9Nadügüba houn ladügawagun Aabü kei nadüga houn ladügawagun Heroboamü, le liráü Nabatü, luma houn ladügawagun Baasá, le liráü Aíasi.10Ánhounti Hesawéli, héigiboun ounli áraabu Hesüreeli, úabei kaba lan ábunoun”.
Lásurun lariñaguni, profeta sun katei le, aba ladaaruni bena, aba léibaagun.11Danti lídinbei Heú hamoun lani labureme úfisigu, aba hariñagun lun:
—Ka suserebei? Ka uagu liabin lülü tau le arihabu?
Lariñaga Heú houn:
—Subudi humuti ani subudi humuti giñe ligaburi ladimurehan.12Hariñaga lun:
—Meyeedabáwa, abahüdaguabéi woun!
Ábati lariñagun Heú houn:
—Anihán lariñagun nun: “Lariñahare Bungiu: Anúadira numutibu lurúeiteme Ísüraeli”.13Lidan oura ligía, aba látulerunu kada aban hádangiñe tidáü ladaüragun lubá lugudi Heú luagu aban lálana arúeihani. Aba hínwinruni liganchun gábara, aba hagúaragun:
—Heú urúeibei!
Láfaruni Heú Horamü
14Aba leledegun Heú lubá Horamü. Horamü, le buga hámabei Ísüraelina, ageindagua hámagiñe luagu lufulesein Ramotu le lani Galaadü, luma Asaeli le lurúeite Siria,15giribuhali buga uburugun Hesüreeli lun lagaranihóun lun lárigi habuleseiruni Síriana lidan hawuribuhan luma Asaeli. Ábati lariñagun Heú houn lánigu anhein lan busén habéi le tímatimaati lun urúeibei lan, lun lan mígirun hamá lun háfuridun ni aban uburugugiñe lun líchuguni uganu Hesüreeli.16Aba ládinun tidoun likarün, to lánina wuribu, aba lidin uburugu Hesüreeli le ñein lubéi Horamü gabanarugu. Aningira giñe buga Okosíasi le lurúeite Hudá arihei Horamü.17Dan larihinbei óunigiruti le luágubei wáyelesi Hesüreeli anite lan Heú hau lánigu, aba lagúaragun ariñaga:—Añate gürigia!
Ábati lariñagun Horamü:
—Óunaha humá aban wügüri gabayuagu habaroun álügüdaña anhein lau lubéi darangilaü hayabin.18Aba lidin gabayuaguti lubaroun Heú, aba lariñagun lun:
—Lóunahañadina urúei álügüdaha anhein lau lubéi darangilaü hiabin.
Lariñaga Heú lun:
—Kámegia buma? Sügüba nanagangiñoun!
Ábati lariñagun óunigiruti:
—Chülüti óunagülei hamoun gama lumoun magiribudúnti.19Ábaya lóunahan urúei Ábanya wügüri gabayuagu, dan lachülürün hamoun aba lariñagun:
—Lóunahañadina urúei álügüdaha anhein lau lubéi darangilaü hiabin.
Lariñaga Heú lun:
—Kámegia buma? Sügüba nanagangiñoun!20Ábaya lariñagun óunigiruti:
—Chülüti giñe le aban hamoun, gama lumoun magiribudúnti. Ani genegeti luagu Heú lan le libari Nimüsí le abugahabei, lugundun ítara liña labugahan kei aban lülü tau, kei ligaburi.21Ábati lariñagun Horamü:
—Aranse humóun nikarün lánina wuribu!
Aba haranserunu likarün, aba láfuridun Horamü, lurúeite Ísüraeli luma Okosíasi lurúeite Hudá kada aban tidan likarün lánina wuribu lun houdin lubaroun Heú. Aba hadariruni lufulasunrugu Nawotu le Hesüreelina.22Dan larihini Horamü Heú, aba lariñagun lun:
—Lau san darangilaü biabin Heú?
Lariñaga Heú lun:
—Siñati ñein lan darangilaü lau tahoruhan búguchu luma tabiñarahan.23Aba lagararaagun Horamü, aba léibaagun agúaraheina lun Okosíasi:
—Agarabaaguni, Okosíasi!24Gama lumoun aba lǘnhürüni Heú tau ligimaran aba tebelurun lanagawagun chülǘ tumoun lanigi, aba lábürühan tidan likarün.25Ábati lariñagun Heú lun Bidikárü le lubúein:
—Sagabei ñéingiñe, fuibei lidoun lichari Nawotu le Hesüreelina, lugundun haritagua numuti, au, buma, dan meha wabugahanu likarün Aabü le lúguchi, ariñaga lumuti buga Bungiu siadi le luagu Horamü:26“Ítara kei narihini lita Nawotu luma hata lirahüñü gúñaarü, ítara luba nafayeiragüdünibu luagu lidan fulasuméme le. Au le Aburemei ariñagubalin”. Barübei lubeiti, fuibei licharirugun Nawotu, kei buga lariñaguni Aburemei.
Láfaruni Heú Okosíasi
27Dan larihinbalin Okosíasi le lurúeite Hudá katei le asuseredubei, aba lanurahan uburugun Betü-agán. Gama lumoun aba léibaagun Heú lárigi, aba lariñagun:—Áfara huméi giñe!
Aba hímiruni tidan likarün luagu lamudeirun Guru, yarafa lun Ibüleámü, gama lumoun éibaaguati chülǘ Megidu. Ñein lounwe.28Lárigiñe aba hanügüni lumusuniña Herusaléun tidan likarün, aba hábununi lidan hamúaha liduheñu luburuguterugu Dawidi.29Luagu bugaha liunsun lirumudiri larúeihan Horamü le liráü Aabü, ligía lagumeserun Okosíasi arúeiha Hudá.
Tounwen Hesawéli
30Ábati lidin Heú uburugun Hesüreeli. Dan tasubudirunbalin Hesawéli, aba tefeindihan geyegua lau tagu, aba tewendedagüdüni tídiburi; lárigiñe aba taganaridun lídangiñe aban funedera.31Danti lachülürünbei Heú lubenari uburugu, aba tariñagun lun:—Ida liñagia Simürí le áfarubalin babureme?32Aba larihin Heú luagun funedera, aba lariñagun:
—Ka númagiñebei?
Aba haganaridun biama o ǘrüwa úfisigu arihei,33aba lariñagun Heú houn:
—Chü humóun ǘnabun!
Aba hágurunu ǘnabun, aba labahichagun líbiri tita luagun touba muna luma hawagun gabayu, aba hadügüragunu gabayu.34Lárigiñe aba lidin Heú eiga luma ata. Lárigiñe aba lariñagun Heú:
—Barǘ humóun tagübüri würi tuguya, buná humóun, lugundun liráü meha urúei.35Gama lumoun dan hóudinbei lun hábununu, tichügürügaali hadarira, tugudi luma lurageirugu túhabu.36Ábati hagiribudun ariñagei lun Heú, aba lariñagun Heú:
—Ariñaga laali buga Bungiu lídangiñe lubúein Elíasi le Tísübena, luagu héigibei lan ounli túgubu,37ábame lan terederun múarugu kei hádiga animaalugu áraabu Hesüreeli, darime lun ua lan ni aban asubudirutu.
Bible Society of Honduras