Tasinɛ21
Kolapa Sɔɔ a Kotipi Sɔɔ
1Kɛɗɔn n zɛ kolapa sɔɔ a kotipi sɔɔ, kolapa gaanɛ a kotipi gaanɛ i nirɛ, wapo wɔ tɔɓa.2N zɛ koomo wɔsɔ-wɔsɔrɛ, Urushalima sɔɔ, kɛ nɔnɛ a kolapa a Ɗalapa ɗɔbii, shɔ masiu bitɛ naa su sɔɔ au kpaakɛ ɓɛvɔ yɛ.3N nta yeenya pɛ̃niba kɛ shanɛ a lakpati nɛː<<Dɔdɔrim Ɗalapa ɗɔgbete ɔ̃yɛ pɛ a shɔzɛ ɗɔbii! Yɛ ɔ̃ a ikɔ ni, i yɛ ɔ̃kɛ u shɔbiiyi, Ɗalapa au yuu yɛ ɔ̃ ayini, ukɔ yɛ ɔ̃rɛ i Ɗalapa.4Yɛ sɔ̃riyi murutɔ ai nɔɔyini kpai. Ruu vɔnɛ yɛ ɔ̃ toti ɓa, ko sisɨn hɨmnɛ ko sɨnɛ ko kɔnɛ yɛ ɔ̃ toti ɓa. vi gbaaliyi i tɛɛtɛ gboti.5Kɛɗɔn shɔ gbeteu ɔ̃ a lakpti shanɛ,<<Dɔdɔrim n pɛli vitɛ sɔɔ kpai! A gelin sɔ̃nnɛ,<<Bee vimnɛ,<<Ruum pɛ nizɛ kɔ, nɔgbete shɔ ã sisɨn aɗɔn.>>6A shanɛ, nankɔ! Nkɔ ɔ̃rɛ gɨn-gɨn a sɔ̃sinɛ, gaanɛ a yisinɛ, shɔu nta sutu miiyɛ, n yɛn ãu naatɔ u ɓoo mii a shãrã mii suru au ã miiyɛ sho viwɔ ɓa.7Shɔu Ɗa kɛ sharuunɛ yɛ kpaa vivɔ shaanɛtɔ ang naani: n yɛn ɔ̃yi Ɗalapa, i yɛ ɔ̃kɛ majaayi.8Ama shɔ pnzɛyi, shɔyi sã rumanɛ ɓa, shɔ vizara pɛlinɛ, shɔ yuuvɔ nyonɛyi, shɔ gbeteyi roo a shɔ su ko a shɔ vɔshɔni, shɔ vi gãnki pɛlinɛyi, shɔ gbeteyi bassi jaɗayi, a shɔ nyayeenɛni kpai, i yɛ kpaa ɗɔ ɔ̃nɛ a yaa kanɛ a kolo yaa, ukɔ ɔ̃rɛ vɔnɛ ɓa ziti.>>Urushalima Sɔɔ
9Gbete atette Ɗajashonɛlapayi manzii ai piiyi shɔ yisi a yukɔnɛ au wasinaa manzii i ang ɗɔbii i shanɛ,<<Anɛ n yɛn tasɔɔ su sɔɔtɔ, Jamɛrɛ̃ ɓeso.10Kɛɗɔn Ɗa suru nɔ ang yuu, a ɗajashonɛlapa tunrɛ yɛnɛ kɔpɔ pɛ̃niba gbeteu yuu shinɛ ɗɔn fɛ̃ɛm. A tasing Urushalima, koomo wɔsɔ-wɔsɔ kɛ nɔnɛ a kolapa shɛ a Ɗalapa ɗɔbii,11u ɗɔ kɔlinɛ a Ɗalapa bassinɛni, Koomou koli naa tari gbeteu saa yuuniyɛ, naa yasipa, wasak naa takolo.12U kãsiri ɗɔn raki, nyaba ɗɔn kopi atu ziti kopishɔpiya Ɗajashonɛlapayi aɗɔ ganɛ. A nyaba koomoyiwi shɔ bee laduru Israila kopi atu ziti i nii aɗɔn.13Kopikapiya nyaba si taati ɗɔn: taati a gɨnri, taati aka nagang, taati aka nakɨn, taati aka paa.14Shɔ maa gɨn-gɨn koomou a tariyi kopi atu ziti, ai bikɔ jashonɛ jamɛrɛ̃yi kopi atu ziti shɔ bee nii ɗɔn.15Ɗajashonɛlapa au nwanya a nkɔni u labaa vitesinɛ e tarimɛɛ ɗɔn au teesi koomou, u nyaba, au kãsiri awuni.16Koomou kopikapiya zali, u raki au ɓuzɨn ni sɔ̃nji zali. Ɗajashonɛlapa teesi koomourɛ au labaa teesinɛuni: sipɛ meli laa maani ɓa kopi atu maani u raki, u ɓusɨng au yuu shinɛni zali kpai.17Ɗajashonɛlapa teesi kãsiriu sɔ̃njirɛ, u shinɛ si dɔɔ 216, pɛlivishonɛ ji a vi teesinɛ nɔgbete shɔ teesi vi a wuniyɛ.18Shɔ maa kãsiriu a tariu shɔ ɓaanɛ jasipa, koomou shɔ maa a tarimɛɛ au nɔɔ, wasak naa zɛlivini.19Gɨn-gɨn kãsiri koomou shɔ bariki a zɔng tarimɛɛyi toti, gɨn-gɨn kãsiri koomou shɔ gaa pɛ a tari jasipa, gbete shɔ pɛsiyɛ shɔ ɓaanɛ sappaya, u shɔ taati u zɔng totto u niinɛ aget, shɔ nɛ̃ɛ̃ti tari saa u niinɛ zumurudu,20e maani tariu saa yuuni shɔ ɓaanɛ onis, e maangbete karnɛliyan, e maanzii tarimɛɛ miiroo shɔ ɓaanɛ kpat, e maantaati lariki shɔ ɓaanɛ beril, e maannɛ̃ɛ̃ti tari miiroo shɔ ɓaanɛ topas, e kopi tari saa shɔ ɓaanɛ kalsidoni, e kopi atu gbete tari lariki shɔ ɓaanɛ tokpis, e kopi atu ziti tari miizari shɔ ɓaanɛ ametes.21Nyaba kopi atu zitiwi shɔ pɛli a tari puru kopi atu ziti; ko-pi nyaba shɔpiya shɔ pɛli a tari puru gbete. Nyaba koomo pɛ̃nibau shɔ pɛli a tarimɛɛ au nɔɔ kpai, tuu shɔ nɔkɨn naa zɛlivini.22N ji zɛ Wɛrɛ Ɗa ɓa a koomouni ɓa, aruviya Uɓeyelapa Ɗalapa shɔ gbete vi tɛu kaka ɓayɛ a jamɛ̃rɛ̃ ukɔ ɔ̃rɛ koomou wɛrɛ Ɗa.23Koomou ji kã ɗaa ɓa ko shɛlɛ u koli au ɓuzɨn niɓa aru Ɗalapa bassinɛ ukɔ kolirɛ aɗɔn, jamɛ̃rɛ̃ pɛ ukɔ u pitila.24Shɔ kotipi i yɛ rajo a koomou ɗɔsẽsẽkɔ. Kpati kotipiyi i yɛ n-tiyi vinaa kiriri jo koomoukɔ.25Nyaba koomou shɔ yɛ yaa ɓelinɛ niti niti; shɔ yɛ kukki ɓa dangdang; aruviya zɨmba yɛ ɔ̃ tɔɓa a ɗɔuni ɓa.26Shɔ kotipiyi i yɛ n ti vi pɛ̃niba ai vinaa ni ji a koomoukɔ.27Ama vigbeteu ɓa wɔsɔ wɔsɔ ɓa yɛ to koomou ɓa, ko shɔgbeteu pɛli viyusẽẽ ko shɔ nyayeenɛ yɛ to koomou ɓa, see jo shɔ gbete shɔ beeyi nii a labeenɛ jamɛ̃rɛ̃ suru kɔ sheeli i yɛ to koomourɛ.The Word for the World International