KATAGARDA ISHIPA102
Ma̱shi ma̱ kushika̱ unushi ma vuza na wi atakaci.
Kavasa ka vuza va a atakaci a makyan ma na u nambai utsura a̱ ma̱shi e kelime ka Vuzavaguɗu.
1Vuzavaguɗu pana avasa a̱ va̱,yaꞋan ma̱shi ma̱ kula̱nsa̱ uɓa̱nki ma̱ va̱,ma̱ ta̱wa̱ wa̱ a̱ nu.2Ka̱ta̱ vu sokongu ku mu a̱shi a̱ nua makyan ma na mi atakaci ba.Zuwaka mu atsuvu,a makyan ma na baci n yaꞋin meɗevile,ushuku mu gogoꞋo.3Adama a na ayin a̱ va̱ i ta̱ a̱ kupuwa̱nka̱tsu ka̱nga̱,etele a̱ va̱ a kutakuma n usuɗukpitsa a akina.4Ka̱ɗu ka̱ va̱ ka̱ ka̱na̱ ta̱ mɓa̱la̱,ɗa ko okpoi an mita̱ mu uɗekpu,ko mali mi ilikulya n tsu pana ba.5Adama a inka ya a̱bunda̱i i va̱,n yambai ali etele a̱ va̱ uta̱i e keteshe.6Ɗa mo okpoi an ma̱kpa̱tuwa̱n ma kakamba,an ma̱kpa̱tuwa̱n a kagali.7M asai a̱shi wuma,mo okpoi an kojuronjuron endeꞋin a gaɗi vu kukpa̱Ꞌa̱.8Irala i va̱ i ka̱na̱i kushika mu ali kanna ka̱ɓula̱,a kuyaꞋanka mu ma̱ka̱n,o bonokoi kula ku va̱ ili yi uyaꞋanki wu una̱.9Adama a na n lyaꞋa ta̱ kokomo an tsuwa,ka̱ta̱ n satara ili i kusoꞋo i va̱ n kujilya10ɗa vu ɗa̱ngusa̱i mu gaɗi vu ɓasangi mu a iɗika,adama a wupa nu n asuvu a usuɗukpi u ka̱ɗu u nu.11Ayin a̱ va̱ i ta̱ an kulu ku kulivi,n ɗekpei an mita̱.12Ama avu, Vuzavaguɗu,vi ta̱ a kakuba ko tsugono ko wannai,i ta̱ a kuciɓa n kula ku nua tsukaya a kubana tsukaya.13Vi ta̱ a̱ kuɗa̱nga̱ka̱ta̱ vu sa̱Ꞌa̱ a Sihiyona,adama a na makyan maꞋa, ma na va kuɓa̱nka̱ yi,makyan ma na o foɓoi ma yawa ta̱.14Agbashi a̱ nu i ta̱ a kuciga yi,ko a na wo okpoi una yi ta̱.I ta̱ a̱ kusa̱Ꞌa̱ yiko a na wo okpoi agali.15Uduniyan wi ta̱ a kupana wovon u kula ku Vuzavaguɗu,ngono ma aduniyan ra̱ka̱,mi ta̱ a kupana wovon u tsugbayin tsu nu.16Adama a na Vuzavaguɗu,wi ta̱ a kumaꞋasaka Sihiyona,ka̱ta̱ wu uta̱ a̱ ka̱tsuma̱ ka tsugbayin ci ni.17Wi ta̱ a kupana avasa aza a na i n utsura ba,kpamu u tsu goyo avasa e le ba.18Ka̱sukpa̱ a ɗana ili i nampa adama a tsukaya tsu na tsa kuta̱wa̱,adama uduniyan u na ka̱ta̱ a matsai ba u cikpa Vuzavaguɗu,19a dana, Vuzavaguɗu u tsu inda ta̱ aduniyan ɗe gaɗi a̱ ubuta̱ u ciɗa u ni,ɗe gaɗi ɗa Vuzavaguɗu u tsu inda aduniyan,20adama a na u pana yura̱ ya aza a na i a tsugbashi,ka̱ta̱ kpamu u shikpa aza a na a kiɗikai afada a̱ ukpa̱.21I ta̱ a kudansa ukuna u kula ku Vuzavaguɗu a Sihiyonaka̱ta̱ a cikpa yi a Urushelima,22ana uma nu ngono o ɓolongi a̱ ubuta̱ u te,adama a cikpa Vuzavaguɗu.23U jebe mu ta̱ utsura kafu tsukutsa tsu va̱,ɗa u gbatyai ka̱bunda̱i ka ayin a wuma u va̱.24Ɗa n danai, <<Ka̱shile ka̱ va̱,ka̱ta̱ vu ɗika mu e mere ma ayin a wuma a̱ va̱ ba,avu na a̱ya̱ nutsukaya n tsukaya ɗa.25A ayin ɗe, an vu yaꞋin aduniyan,ɗa gaɗi kpamu wo okpoi ulinga wa ekiye a̱ nu.26I ta̱ a kukuwa̱, ama vi ta̱ a kulyaꞋa kelime,ra̱ka̱ vu le i ta̱ o ku oꞋoi an motogu,ka̱ta̱ a sabaꞋasa le tsa a kashi,ka̱ta̱ a̱ puwa̱nka̱.27Ama avu vi ta̱ lo tsu na vi,kpamu a̱ya̱ nu i nu uteku ba.28Muku ma agbashi a̱ nu mi ta̱ o kuyongo m ma̱ta̱na̱,kumaci ku le ki ta̱ a kutsurukpa.>>